Veru li n-Nies fiż-Żminijiet Bibliċi Kienu Jgħixu Ħajja Daqshekk Twila?
JEANNE LOUISE CALMENT mietet fl-4 t’Awwissu, 1997, f’raħal twelidha fix-Xlokk taʼ Franza. Hi mietet taʼ 122 sena!
Illum, l-avanzi fix-xjenza, fil-kura tas-saħħa, u f’oqsma oħrajn qed jgħinu lin-nies jgħixu iktar. Xorta waħda, ftit huma n-nies li jgħixu sa 100 sena jew iktar. Huwa forsi għalhekk li meta xi nies jgħixu daqshekk fit-tul jissemmew fl-aħbarijiet, kif ġara fil-każ taʼ Madame Calment.
Il-Bibbja tgħid li fiż-żminijiet tal-qedem in-nies kienu jgħixu ħajja ħafna iktar twila; xi wħud għexu kważi elf sena. Huwa dan veru jew kredibbli? Veru li n-nies fiż-żminijiet Bibliċi kienu jgħixu ħajja daqshekk twila? Huwa dan taʼ interess għalina llum?
Nies li Għexu Snin Twal
Il-ktieb Bibliku tal-Ġenesi jitkellem dwar sebat irġiel li għexu iktar minn 900 sena u li kollha kemm huma twieldu qabel id-Dilluvju taʼ żmien Noè. Dawn kienu Adam, Set, Enos, Kenan, Ġared, Metuselaħ, u Noè. (Ġenesi 5:5-27; 9:29) Il-maġġuranza tan-nies forsi mhumiex familjari maʼ ħafna minn dawn l-irġiel, imma lkoll kemm huma kienu fost l-ewwel għaxar ġenerazzjonijiet fl-istorja tal-bniedem. Metuselaħ huwa magħruf sew għax kien l-iktar bniedem li għex—rekord taʼ 969 sena!
Il-Bibbja ssemmi minn tal-inqas 25 persuna oħra li wkoll għexu iktar milli jgħixu n-nies illum. Xi wħud minnhom għexu 300, 400, u saħansitra 700 sena jew iktar. (Ġenesi 5:28-31; 11:10-25) Madankollu, għal ħafna nies, rakkonti Bibliċi taʼ nies li għexu ħajja daqshekk twila, mhuma xejn ħlief ħrejjef. Huwa dan minnu?
Ħrafa Jew Rakkont taʼ Min Joqgħod Fuqu?
Skont dokument maħruġ mill-Istitut Max Planck għar-Riċerka Demografika fil-Ġermanja, xi riċerkaturi kkonfermaw
l-età taʼ Madame Calment, li ssemmiet qabel. Dan għamluh billi ġabru ftit mill-“istqarrijiet sempliċi u li ġew provati li huma veri” li qalet hi stess. Dawn l-istqarrijiet kellhom konnessjoni magħha jew mal-qraba tagħha fiż-żmien li seħħew ċerti ġrajjiet. Dak li qalet hi ġie mqabbel maʼ dak li kien hemm imniżżel fir-rekords taċ-ċivil, tan-nutar, u tal-knisja, kif ukoll mal-artikli tal-gazzetti u maċ-ċensimenti tal-popolazzjoni. Huwa taʼ interess li, għalkemm kien impossibbli li jiġi konfermat kull dettall, l-evidenza kemm diretta u kemm indiretta għamlitha possibbli li jiġi konfermat kemm għexet.Xi ngħidu dwar ir-rakkonti tal-Bibbja? Taw prova li huma taʼ min joqgħod fuqhom? Iva assolutament! Għalkemm is-sorsi sekulari disponibbli ma kkonfermawx id-dettalji kollha, għal darba wara l-oħra l-evidenza wriet li dak li hemm miktub fil-Bibbja hu taʼ min joqgħod fuqu mill-ħarsa kemm storika, kemm xjentifika, u kif ukoll kronoloġika. a Dan m’għandux jissorprendina għax il-Bibbja stess tgħid li “Alla hu veru, għalkemm kull bniedem jintwera li hu giddieb.” (Rumani 3:4) Peress li l-Bibbja hi ktieb “imnebbaħ minn Alla,” ma fihiex affarijiet fittizji.—2 Timotju 3:16.
Mosè, li kien gwidat minn Alla Ġeħova biex jikteb il-Pentatewku, jiġifieri l-ewwel ħames kotba tal-Bibbja, għandu jiġi klassifikat bħala wieħed mill-iktar irġiel influwenti u rispettat fl-istorja tal-bniedem. Il-Lhud iqisuh bħala l-aqwa fost l-għalliema tagħhom. Il-Musulmani jikkunsidrawh bħala wieħed mill-akbar profeti tagħhom. Għall-Kristjani, Mosè huwa l-wieħed li witta t-triq għal Ġesù Kristu. Taħseb li jkun raġunevoli li wieħed jikkonkludi li l-kitbiet taʼ persuna daqstant importanti fl-istorja m’għandhomx jiġu emmnuti?
Kien iż-Żmien Jitkejjel b’Mod Differenti?
Xi wħud allegaw li ż-żmien kien jitkejjel b’mod differenti f’dawk iż-żminijiet u li dik li kienet tissejjaħ sena kienet fil-fatt xahar. Madankollu, analisi tar-rakkont tal-Ġenesi ma jħalli l-ebda dubju li lura f’dawk iż-żminijiet in-nies kienu jkejlu ż-żmien bl-istess mod li nkejluh illum. Ejja nikkunsidraw żewġ eżempji. Fir-rakkont tad-Dilluvju naqraw li d-Dilluvju beda meta Noè kellu 600 sena, “fit-tieni xahar, fis-sbatax tax-xahar.” Imbagħad ikompli jgħid li l-ilmijiet għarrqu l-art għal 150 jum u li “fis-sebaʼ xahar, fis-sbatax tax-xahar l-arka straħet fuq il-muntanji t’Ararat.” (Ġenesi 7:11, 24; 8:4) Għalhekk, perijodu taʼ ħames xhur—mis-17–il jum tat-tieni xahar sas-17-il jum tas-sebaʼ xahar taʼ dik is-sena—jintqal li jammonta għal 150 jum. Mela jidher ċar li l-allegazzjoni li sena kienet fil-fatt xahar m’għandha bażi taʼ xejn.
Issa ejja nikkunsidraw it-tieni eżempju. Skont Ġenesi 5:15-18, Maħalalel kellu iben fl-età taʼ 65 sena, għex 830 sena oħra, u miet fl-età taʼ 895 sena. In-neputi tiegħu, Enok, ukoll kellu iben meta kellu 65 sena. (Ġenesi 5:21) Li kieku sena kienet verament xahar, kieku dawn iż-żewġt irġiel saru missirijiet meta kellhom biss ħames snin! Dan kollu jagħmel sens?
Anki l-arkeoloġija tagħti evidenza taʼ dan għax taqbel maʼ stqarrijiet Bibliċi dwar nies li għexu ħajja twila. Dwar il-patrijarka Abraham, il-Bibbja tgħid li hu kien mill-belt taʼ Ur, li iktar tard mar jgħix fil-belt taʼ Ħaran, imbagħad fir-reġjun taʼ Kangħan, u li ġġieled u rebaħ lil Kedorlagħomer, sultan taʼ Elam. (Ġenesi 11:31; 12:5; 14:13-17) Xi skoperti kkonfermaw li dawn il-postijiet u n-nies tassew eżistew. Ukoll, l-arkeoloġija għenitna nifhmu aħjar il-ġeografija tal-artijiet u d-drawwiet tan-nies li ssemmew b’konnessjoni maʼ Abraham. Ladarba dawn l-istqarrijiet Bibliċi dwar Abraham huma eżatti, għala għandhom iqumu dubji dwar l-età tiegħu taʼ 175 sena?—Ġenesi 25:7.
Għalhekk, m’hemm l-ebda raġuni għala għandna niddubitaw l-istqarrijiet li tagħmel il-Bibbja dwar xi nies tal-qedem li għexu ħajja twila ħafna. Imma għandek mnejn tistaqsi lilek innifsek, ‘Għala għandu jkun taʼ interess għalija jekk dawn in-nies għexux ħajja daqshekk twila jew le?’
Int Tistaʼ Tgħix Iktar Milli Qed Taħseb!
Il-ħajja twila taʼ dawn in-nies li għexu qabel id-Dilluvju hi evidenza li l-ġisem uman għandu l-potenzjal rimarkevoli li jgħix ħajja twila. It-teknoloġija moderna ppermettiet lix-xjenzati jagħtu ħarsa iktar mill-qrib lejn il-ġisem uman u l-mod meraviljuż kif inhu msawwar, inkluż il-kapaċità tal-għaġeb li għandu biex jerġaʼ jiġġenera u jfejjaq lilu nnifsu. X’kienet il-konklużjoni tagħhom? Li l-ġisem kapaċi jgħix għal dejjem. Il-Professur tal-Mediċina Tom Kirkwood jgħid: “[Ix-xjuħija] tibqaʼ waħda mill-akbar misteri tax-xjenza medika.”
Iżda għal Alla Ġeħova x-xjuħija la hi misteru u lanqas hi problema mingħajr soluzzjoni. Hu ħalaq lill-ewwel raġel, Adam, perfett u kellu l-iskop li l-bnedmin jgħixu għal dejjem. B’sogħba, Adam iddeċieda li jirribella kontra Alla. B’riżultat taʼ dan, hu waqaʼ fid-dnub u sar imperfett. Din hi l-ispjegazzjoni li x-xjenzati tant ilhom ifittxu: “Permezz taʼ bniedem wieħed id-dnub daħal fid-dinja, u permezz tad-dnub il-mewt, u b’hekk il-mewt infirxet fuq il-bnedmin kollha għax kollha dinbu.” (Rumani 5:12) Huwa minħabba d-dnub u l-imperfezzjoni li aħna nimirdu, nixjieħu, u mmutu.
Madankollu, l-iskop tal-Ħallieq tagħna kollu mħabba qatt ma tbiddel. Biex jagħti prova sinifikanti taʼ dan hu pprovda lil Ibnu, Ġesù Kristu, bħala s-sagrifiċċju tal-fidwa. Dan is-sagrifiċċju għamilha possibbli li jkollna l-perfezzjoni u l-ħajja taʼ dejjem. Il-Bibbja tgħid: “Bħalma kulħadd qed imut f’Adam, hekk ukoll kulħadd għad jingħata l-ħajja fil-Kristu.” (1 Korintin 15:22) In-nies qabel id-Dilluvju kienu iktar qrib il-perfezzjoni minna, u huwa proprju għalhekk li kienu jgħixu iktar—ħafna iktar—milli ngħixu llum. Imma llum aħna eqreb lejn iż-żmien li titwettaq il-wegħda t’Alla. Dalwaqt se tgħib kull traċċa taʼ dnub u imperfezzjoni u n-nies mhux se jixjieħu u jmutu.—Isaija 33:24; Titu 1:2.
Kif tistaʼ tirċievi barkiet bħal dawn? Tassumix li dak li wiegħed Alla hu sempliċement ħolma. Ġesù qal: “Min jismaʼ kelmti u jemmen lil dak li bagħatni għandu l-ħajja taʼ dejjem.” (Ġwanni 5:24) Għalhekk, ħu l-għarfien mill-Bibbja u applikah. Jekk tagħmel dan, tkun qed issegwi l-eżempju taʼ dawk li l-appostlu Pawlu tkellem dwarhom bħala li “jqiegħdu fis-sigurtà għalihom infushom pedament tajjeb għall-futur sabiex jaqbdu qabda soda mal-ħajja vera.” (1 Timotju 6:19) Tistaʼ tibqaʼ ċert li l-Alla li għamilha possibbli li n-nies imsemmijin fil-Bibbja jibqgħu jgħixu ħajja daqshekk twila, jistaʼ jagħmilha possibbli għalik li tgħix għal dejjem!
[Nota taʼ taħt]
a Għal iktar dettalji, ara l-ktieb The Bible—God’s Word or Man’s? pubblikat mix-Xhieda taʼ Ġeħova.
[Graff f’paġna 20]
(Għall-formazzjoni sħiħa tat-test, ara pubblikazzjoni)
1000*
969 METUSELAĦ*
950 NOÈ*
930 ADAM*
900*
800*
700*
600*
500*
400*
300*
200*
100* BNIEDEM TAL-LUM
*ETAJIET