“Meta kont immur l-​iskola, jekk xi ħadd kien jgħid li għamel is-​sess, kulħadd ikun irid jagħmel bħalu. Ħadd ma jixtieq ikun differenti.”—Elaine, 21.

 Ġieli ħassejt pressjoni biex tagħmel is-​sess minħabba li kulħadd qisu qed jagħmel hekk?

 Ġieli kellek pressjoni minn xi ħadd li tħobb biex tagħmel is-​sess?

 Jekk iva, dan l-​artiklu jistaʼ jgħinek biex ma ċċedix għall-​pressjoni t’oħrajn jew għax-​xewqat tiegħek, u tieħu deċiżjonijiet tajbin.

•  Ideat żbaljati u fatti

•  Kif tistaʼ ma ċċedix biex tagħmel is-​sess?

•  Dak li jgħidu żgħażagħ oħra

 IDEA ŻBALJATA: Kulħadd qed jagħmel is-​sess minbarra jien.

 FATT: Skont studju li sar dwar żgħażagħ li għandhom 18-​il sena, tnejn minn kull tlieta jgħidu li diġà għamlu s-​sess. Dan juri li numru kbir, iktar minn 30 fil-​mija, għadhom m’għamlux. Mela mhux “kulħadd” qed jagħmel is-​sess.

 IDEA ŻBALJATA: Is-​sess isaħħaħ ir-​relazzjoni.

 FATT: Xi ġuvintur jgħidu hekk biex iġiegħlu lit-​tfajliet ikollhom x’jaqsmu magħhom, imma dan mhux vera. Spiss, il-​ġuvni jitlaq lit-​tfajla wara li jkollu x’jaqsam magħha. Dan iġegħelha tħossha użata għax hi tkun ħasbet li kien iħobbha jew għall-​inqas kellu grazzja magħha. a

 IDEA ŻBALJATA: Il-​Bibbja tgħid li s-​sess hu ħażin.

 FATT: Il-​Bibbja ma tgħidx li s-​sess hu ħażin, imma li għandu jkun biss bejn raġel u mara miżżewġin.—Ġenesi 1:28; 1 Korintin 7:3.

 IDEA ŻBALJATA: Jekk tagħmel dak li tgħid il-​Bibbja mhux se tgawdi l-​ħajja.

 FATT: Jekk tistenna sa ma tiżżewweġ biex tagħmel is-​sess, se tkun iktar ferħan għax tevita l-​inkwiet u d-​diżappunti.

 L-​iktar ħaġa importanti: Dawk li stennew biex jagħmlu s-​sess wara li żżewġu ma ddispjaċihomx. Imma ħafna minn dawk li għamlu s-​sess qabel iż-​żwieġ iddispjaċiehom.

•   Kun konvint minn dak li temmen dwar x’inhu tajjeb u x’inhu ħażin. Il-​Bibbja tgħid li n-​nies maturi “għandhom is-​sensi tagħhom imħarrġin biex jagħrfu jagħżlu kemm it-​tajjeb u kemm il-​ħażin.” (Ebrej 5:14) Minħabba li huma konvinti li dak li tgħid il-​Bibbja hu tajjeb, oħrajn mhux ħa jwaqqgħuhom malajr biex jagħmlu xi ħaġa ħażina.

   “Jien noqgħod attenta ħafna biex ma nagħmilx xi ħaġa li tħassar ir-​reputazzjoni tiegħi.”—Alicia, 16.

   Aħseb dwar dan: X’tip taʼ reputazzjoni trid li jkollok? Hu worth it li biex togħġob lil xi ħadd tħassar ir-​reputazzjoni tiegħek?

•   Aħseb dwar il-​konsegwenzi. Il-​Bibbja tgħid: “Dak li bniedem jiżraʼ, dak ukoll jaħsad.” (Galatin 6:7) Aħseb kif il-​futur tiegħek u tal-​persuna l-​oħra jistaʼ jinbidel jekk iċċedi biex tagħmel is-​sess. b

   “Nies li jagħmlu s-​sess qabel jiżżewġu spiss jiddispjaċihom, ma jħossuhomx maħbubin, jistaʼ jkollhom tarbija li ma jkunux qed jistennew jew mard li jiġi trasmess mis-​sess.”—Sienna, 16.

   Aħseb dwar dan: Il-​ktieb Sex Smart jistaqsi: “Jekk il-​ħbieb qed iġegħluk tagħmel xi ħaġa li tistaʼ tagħmillek il-​ħsara, huma ħbieb li għandek tagħmilha magħhom jew tismaʼ minn dak li jgħidulek?”

•   Ara li jkollok ħarsa bbilanċjata. Is-​sess mhux xi ħaġa ħażina. Infatti l-​Bibbja turina li koppja miżżewġa għandhom igawdu s-​sess bejniethom.—Proverbji 5:18, 19.

   “Is-​sess hu xi ħaġa sabiħa li ħalaq Alla. Imma hu jridna ngawduh bil-​mod kif irid hu, jiġifieri meta nkunu miżżewġin.” Jeremy, 17.

   Aħseb dwar dan: Jekk tiżżewweġ se tkun tistaʼ tgawdi s-​sess kif jixtieq Alla, u se tevita l-​konsegwenzi li semmejna qabel.