၁၊ ၂။ ဒီလောက​စနစ်​မှာ ဘာကြောင့် ဆင်းရဲသား​တွေ အမြဲ​ရှိနေ​မလဲ။

ဒီနေ့ စီးပွားရေး​လောက​ဟာ ကြမ်းတမ်း​တယ်၊ မတရား​ဘူး။ လူငယ်တွေ အလုပ်ရှာ​ရ​ခက်တယ်။ လူများစွာ​ဟာ ချမ်းသာ​တဲ့ နိုင်ငံ​တွေကို စွန့်စွန့်စားစား ပြောင်းရွှေ့​ကြ​တယ်။ ချမ်းသာကြွယ်ဝ​တဲ့ နိုင်ငံ​တွေမှာ​တောင် ဆင်းရဲမွဲတေ​မှု ရှိနေ​တယ်။ ဆင်းရဲ​ချမ်းသာ ပို​ကွာဟ​လာတယ်။ မကြာသေး​ခင် ခန့်မှန်းချက်​အရ ကမ္ဘာ့​အ​ချမ်းသာ​ဆုံး​ပုဂ္ဂိုလ် တစ်​ရာခိုင်နှုန်း​ရဲ့ ပိုင်ဆိုင်မှု​က ကျန်​တဲ့ ၉၉ ရာခိုင်နှုန်း​ရဲ့ စုစုပေါင်း ပိုင်ဆိုင်မှု​ထက် ပိုများ​နေတယ်။ အဲဒီ​ကိန်းဂဏန်း​က အတည်ပြု​ဖို့​တော့ ခက်တယ်။ တချို့သူ​တွေမှာ ဆယ်​သက်​မက စား​မ​ကုန်​တဲ့ စည်းစိမ်​တွေ ပိုင်ဆိုင်​ထား​ပေ​မဲ့ လူ​သန်း​ထောင်နဲ့​ချီ​က​တော့ ကုန်း​ကောက်​စရာ​မရှိအောင် ဆင်းရဲမွဲတေ​နေကြတယ်။ ဒီ​အခြေအနေ​နဲ့ပတ်သက်ပြီး “ဆင်းရဲသား​တွေ​က ခင်ဗျား​တို့​နဲ့အတူ အမြဲ​ရှိနေ​မှာပဲ” လို့ ယေရှု ပြောခဲ့တယ်။ (မာ. ၁၄:၇) ဘာကြောင့် ဒီလို​မမျှ​မတ ဖြစ်​ရသလဲ။

^၂ ဘုရားနိုင်ငံတော် မလာ​မချင်း လက်ရှိ​စီးပွားရေး​စနစ် ပြောင်းလဲ​မှာ မဟုတ်မှန်း ယေရှု သိထား​တယ်။ နိုင်ငံရေး၊ ဘာသာရေး အုပ်စု​တွေနဲ့​အတူ ဗျာဒိတ် ၁၈:၃ မှာ “ကုန်သည်​တွေ” လို့​ဖော်ပြထားတဲ့ အမြတ်​ကြီး​စား စီးပွားရေး​စနစ်​ဟာ စာတန့်​လောကရဲ့ အစိတ်အပိုင်း​တွေ ဖြစ်တယ်။ ဘုရား​လူမျိုးဟာ နိုင်ငံရေး၊ မှားယွင်းတဲ့ ဘာသာရေး​နဲ့ ပြတ်ပြတ်သားသား သီးခြားနေ​လို့ ရပေမဲ့ စာတန့်​လောကရဲ့ အစိတ်အပိုင်း စီးပွားရေး​စနစ်​နဲ့​တော့ မကင်း​နိုင်ကြဘူး။

၃။ ဘယ်မေးခွန်းတွေကို ဆွေးနွေးသုံးသပ်​ကြ​မလဲ။

 ^၃ ကျွန်တော်တို့ ခရစ်ယာန်တွေ​ဟာ လက်ရှိ​စီးပွားရေး​စနစ်​အပေါ် ကိုယ့်​အမြင်​ကို ဆန်းစစ်​ဖို့ ဒီလို​မေးခွန်းတွေ မေးသင့်တယ်– ‘ဘုရား​အပေါ် သစ္စာရှိ​ကြောင်း​ပြဖို့ ငါ့ရဲ့​ဥစ္စာပစ္စည်း​တွေကို ဘယ်လို အသုံးပြု​နေ​သလဲ။ စီးပွားရေး​လောကမှာ ပါဝင်မှု​ကို ဘယ်လို လျှော့ချ​နိုင်မလဲ။ ခက်ခဲတဲ့​အခြေအနေ​မှာ ဘုရား​လူမျိုးဟာ ဘုရားကို အပြည့်အဝ ယုံကြည်ကိုးစား​ကြောင်း ဘယ်​အတွေ့အကြုံ​တွေ​က ဖော်ပြသလဲ။’

၄၊ ၅။ (က) ယေရှုရဲ့ ပုံဥပမာ​ထဲက ဘဏ္ဍာစိုး ဘယ်​အခြေအနေ ကြုံ​ခဲ့ရ​သလဲ။ (ခ) နောက်လိုက်​တွေကို ယေရှု ဘယ်လို သတိပေး​ခဲ့​သလဲ။

^၄ လုကာ ၁၆:၁-၉ ကိုဖတ်ပါ။ မရိုးသား​တဲ့ ဘဏ္ဍာစိုး​အကြောင်း ယေရှုရဲ့ ပုံဥပမာ​ဟာ စဉ်းစားစရာ​ပါပဲ။ ဖြုန်းတီး​တယ်​ဆိုတဲ့ စွပ်စွဲချက်​နဲ့ အလုပ်​ထုတ်​ခံ​လိုက်ရ​တော့ ကူညီပေးမယ့်​သူတွေကို “မိတ်ဖွဲ့​ထား” ဖို့ “အမြော်အမြင်​ရှိရှိ လုပ်ဆောင်” ခဲ့တယ်။ * ဒီ​လောကမှာ ဆက်​ရှင်သန်​နိုင်အောင် မ​ရိုး​မသား​ပြုမူဖို့ တပည့်​တွေကို ယေရှု အားပေးနေ​တာ မဟုတ်ဘူး။ ဒီနည်း​က “ဒီလောက​စနစ်​မှာရှိတဲ့ လူတွေ” ရဲ့ အပြုအမူ​လို့ ယေရှု ပြောခဲ့တယ်။ ဒါပေမဲ့ ဒီ​ပုံဥပမာ​ကို သုံးပြီး အရေးကြီးတဲ့ သင်ခန်းစာ သင်ပေး​ခဲ့တယ်။

^၅ အကျပ်အတည်း​နဲ့ ရင်ဆိုင်​ခဲ့ရတဲ့ ဘဏ္ဍာစိုး​လိုပဲ ယေရှုရဲ့ နောက်လိုက်​အများစု​လည်း မတရား​တဲ့ စီးပွားရေး​လောကမှာ စားဝတ်နေရေး​အတွက် ခက်ခဲပင်ပန်း​စွာ ရုန်းကန်​ရ​မယ်​ဆိုတာ ယေရှု သိတယ်။ ဒါကြောင့် ဒီလို​တိုက်တွန်း​ခဲ့တယ်– “ခင်ဗျား​တို့လည်း မဖြောင့်မတ်​တဲ့ စည်းစိမ်​ကိုသုံးပြီး မိတ်ဖွဲ့​ထားပါ။ စည်းစိမ်​ကုန်​သွား​တဲ့အခါ သူတို့ [ယေဟောဝါနဲ့ ယေရှု] က ခင်ဗျား​တို့ကို ထာဝရ​စံအိမ်​မှာ လက်ခံ​ထား​လိမ့်မယ်။” ယေရှုရဲ့ သွန်သင်ချက်​က​နေ ဘာသင်ယူနိုင်သလဲ။

၆။ ဒီနေ့ စီးပွားရေး​စနစ်​ဟာ ဘုရား​ရည်ရွယ်ချက်​မှာ မပါဝင်​ကြောင်း ဘယ်လို သိရ​သလဲ။

^၆ စည်းစိမ်ဥစ္စာ​ကို “မဖြောင့်မတ်” တဲ့​အရာ​လို့ ယေရှု ဘာကြောင့် ခေါ်​မှန်း မရှင်းပြ​ခဲ့ဘူး။ စီးပွားရေး​စနစ်​ဟာ ဘုရား​ရည်ရွယ်ချက်​မှာ မပါဝင်​ဘူးဆို​တာ​ကိုတော့ ကျမ်းစာမှာ ရှင်းရှင်းလင်းလင်း ဖော်ပြထားတယ်။ အာဒံနဲ့ ဧဝ​အတွက် လိုအပ်ရာတွေကို ဧဒင်​ဥယျာဉ်​မှာ ယေဟောဝါ အလျှံပယ် ပြင်ဆင်ပေး​ထားတယ်။ (က. ၂:၁၅၊ ၁၆) နောက်ပိုင်း ပထမရာစု ဘိသိက်ခံ​တွေရဲ့ အသင်းတော်​မှာ သန့်ရှင်းသော စွမ်းအားတော် လှုပ်ရှား​လာတဲ့အခါ “ဘယ်သူမှ သူ့​ပစ္စည်း ငါ့​ပစ္စည်း မခွဲခြား​တော့​ဘဲ ရှိတာ​တွေကို ဝေမျှ​သုံးစွဲ​ကြ​တယ်။” (တ. ၄:၃၂) လူသား​အားလုံး ကမ္ဘာ့​သယံဇာတ​တွေကနေ အကျိုး​အပြည့်အဝ ခံစားရမယ့်​အချိန်​အကြောင်း ဟေရှာယ ကြိုဟော​ခဲ့တယ်။ (ဟေရှာ. ၂၅:၆-၉။ ၆၅:၂၁၊ ၂၂) အခု​ချိန်မှာ​တော့ ယေရှုရဲ့ နောက်လိုက်​တွေဟာ ဘုရား​နှစ်သက်မှု​ရဖို့ ကြိုးစား​ရင်း လောကရဲ့ “မဖြောင့်မတ်​တဲ့ စည်းစိမ်” ကို သုံးပြီး အသက်မွေး​ရာမှာ “အမြော်အမြင်” ရှိ​ဖို့ လိုတယ်။

၇။ လုကာ ၁၆:၁၀-၁၃ မှာ ဘယ်​အကြံပြုချက် တွေ့ရ​သလဲ။

^၇ လုကာ ၁၆:၁၀-၁၃ ကိုဖတ်ပါ။ ယေရှုရဲ့ ပုံဥပမာ​ထဲက ဘဏ္ဍာစိုး​ဟာ ကိုယ်ကျိုး​အတွက် မိတ်ဖွဲ့​ခဲ့တာ ဖြစ်တယ်။ ဒါပေမဲ့ ယေရှုက​တော့ မိမိ​နောက်လိုက်​တွေကို ကိုယ်ကျိုး​မပါတဲ့ ရည်ရွယ်ချက်​အတွက် ကောင်းကင်မှာ မိတ်ဖွဲ့​ဖို့ တိုက်တွန်း​ခဲ့တယ်။ ပုံဥပမာ ပြောပြီး​တဲ့​နောက် ယေရှုက “မဖြောင့်မတ်​တဲ့ စည်းစိမ်” အသုံးပြုခြင်း​နဲ့ ဘုရား​အပေါ် သစ္စာရှိခြင်း​ကို ဆက်စပ်​ထားတယ်။ ကိုယ်ပိုင်​ဆိုင်​ထားတဲ့ စည်းစိမ်​ကို အသုံးပြုပြီး ဘုရား​အပေါ် ‘သစ္စာရှိ’ ကြောင်း ပြ​နိုင်မှန်း ယေရှု ဆိုလိုတယ်။ ဘယ်လိုနည်းနဲ့​လဲ။

၈၊ ၉။ မဖြောင့်မတ်​တဲ့ စည်းစိမ် အသုံးပြု​ရာမှာ သစ္စာရှိ​ကြောင်း တချို့သူ​တွေ ဘယ်လို ဖော်ပြ​ကြ​သလဲ။

^၈ ပစ္စည်းဥစ္စာ သုံးပြီး သစ္စာရှိ​ကြောင်း ပြ​နိုင်တဲ့ နည်းလမ်း​ တစ်ခုက ယေရှု ကြိုဟော​ထားတဲ့ ကမ္ဘာချီ ဟောပြောခြင်းလုပ်ငန်း​အတွက် အလှူငွေ ထည့်ဝင်​ခြင်း​ပါပဲ။ (မ. ၂၄:၁၄) အိန္ဒိယနိုင်ငံ​က မိန်းကလေး​တစ်ယောက် စုဘူး​တစ်​ဘူး လုပ်ပြီး အ​ကြွေ​စေ့​တွေ စု​တယ်။ အရုပ်​တွေတောင် မဝယ်​တော့ဘူး။ စုဘူး ပြည့်​သွား​တဲ့အခါ ဟောပြောခြင်းလုပ်ငန်း​မှာ သုံး​ဖို့ ပေးလိုက်​တယ်။ အိန္ဒိယနိုင်ငံ​က အု​န်း​ခြံ​ပိုင်​တဲ့ ညီအစ်ကို​တစ်ယောက် မာလာယလမ် ဘာသာပြန်​ရုံးခွဲ​ကို အုန်းသီး​တွေ အများကြီး​လှူ​တယ်။ ရုံး​မှာ အုန်းသီး​တွေ လို​မှာပဲ လို့​တွေး​ပြီး ငွေပေး​မယ့်အစား အုန်းသီး​ပဲ တိုက်ရိုက်​ပေးလိုက်​တယ်။ ဒါဟာ အမြော်အမြင်​ရှိတာ​ပဲ။ အဲဒီလိုပဲ ဂရိ​နိုင်ငံ​က ညီအစ်ကိုတွေ​လည်း ဗေသလမိသားစု​အတွက် သံလွင်ဆီ၊ ဒိ​န်​ခဲ​နဲ့ တခြား​စားစရာ​တွေ ပုံမှန် လှူ​ကြ​တယ်။

^၉ နိုင်ငံ​ခြား ရောက်နေ​တဲ့ သီရိလင်္ကာ​နိုင်ငံ​က ညီအစ်ကို​တစ်ယောက်​ဟာ အစည်းအဝေး​တွေ၊ အစည်းအဝေး​ပွဲ​တွေ ကျင်းပ​ဖို့၊ အချိန်ပြည့် အမှုဆောင်သူ​တွေ နေထိုင်​ဖို့ သူ့အိမ်ကို ပေးထားတယ်။ ညီအစ်ကို​အတွက် ငွေကြေး နစ်နာဆုံးၡုံး​ပေ​မဲ့ ဆင်းရဲ​တဲ့ ဒေသခံ ကြေညာသူ​တွေအတွက်​တော့ တကယ့်​အကူအညီ​ပါပဲ။ အမှုဆောင်လုပ်ငန်း ပိတ်ပင်​ထားတဲ့ နိုင်ငံ​တစ်ခုမှာ ညီအစ်ကိုတွေ​က သူတို့ရဲ့​အိမ်​ကို နိုင်ငံတော်ခန်းမ​အဖြစ် အသုံးပြုခွင့် ပေးကြတယ်။ ဒါကြောင့် ငွေကြေး မတတ်နိုင်​တဲ့ ရှေ့ဆောင်​တွေနဲ့ တခြားသူတွေ ငွေ​မ​ကုန်​ဘဲ စည်းဝေး​ဖို့ နေရာ ရစေတယ်။

၁၀။ ရက်ရော​တဲ့အခါ ဘယ်​ကောင်းချီးတွေ ခံစားရ​သလဲ။

^၁၀ ဖော်ပြခဲ့တဲ့ နမူနာ​တွေမှာ ဘုရား​လူမျိုးဟာ စစ်မှန်တဲ့ စည်းစိမ်​လောက် တန်ဖိုးမရှိ​တဲ့ ပစ္စည်းဥစ္စာ​တွေကို အသုံးပြုခြင်း​အားဖြင့် “အသေးအမွှား​ကိစ္စတွေ​မှာ သစ္စာ” ရှိကြောင်း ပြ​နေကြတယ်။ (လု. ၁၆:၁၀) ဒီလို​ကိုယ်ကျိုးစွန့်​လို့ ယေဟောဝါရဲ့ မိတ်ဆွေတွေ ဘယ်လို ခံစားရ​သလဲ။ ရက်ရော​ခြင်းက “စစ်မှန်တဲ့​စည်းစိမ်” ရရှိ​စေတဲ့ နည်းလမ်း​ဆိုတာ သူတို့ နားလည်​ကြ​တယ်။ (လု. ၁၆:၁၁) နိုင်ငံတော်​လုပ်ငန်း​အတွက် ပုံမှန်​အလှူငွေ ထည့်ဝင်တဲ့ ညီအစ်မ​တစ်ယောက်က ရရှိတဲ့ ကောင်းချီး​အကြောင်း ဒီလိုပြောတယ်– “ရုပ်ပစ္စည်း​ပိုင်းမှာ ရက်ရော​လို့ နှစ်တွေ​တစ်လျှောက် ထူးထူးခြားခြား ပြောင်းလဲ​လာတယ်။ ရုပ်ပစ္စည်း​မှာ ပို​ရက်ရော​လေ ပေးချင်​ကမ်း​ချင်စိတ် ပိုများ​လာ​လေ​ပဲ။ ပို​ခွင့်လွှတ်​တတ်လာ​တယ်။ ပို​စိတ်ရှည်​လာတယ်။ စိတ်ပျက်​စရာ​တွေ၊ အကြံပြုချက်​တွေကို လက်ခံ​ရ ပိုလွယ်​လာတယ်။” ရက်ရော​ခြင်းက ဘုရားရေးရာ​ဘက်မှာ​လည်း ပိုကြွယ်ဝ​စေ​ကြောင်း လူများစွာ သိလာ​ကြပြီ။—ဆာ. ၁၁၂:၅။ ပညာ. ၂၂:၉။

၁၁။ (က) စေတနာအလျောက် ပေးကမ်းခြင်း​က “အမြော်အမြင်​ရှိ” ကြောင်း ဘယ်လို ဖော်ပြသလဲ။ (ခ) ဘုရား​လူမျိုးအလယ်​မှာ ငွေကြေး​အရ ဘယ်လို သာ​တူညီ​မျှ ဖြစ်နေ​သလဲ။ (ဆောင်းပါးအစမှာပါတဲ့ ရုပ်ပုံကို ကြည့်ပါ။)

^၁၁ အမှုဆောင်လုပ်ငန်းမှာ တခြားသူတွေကို ကူညီဖို့ ကျွန်တော်တို့ရဲ့ ရုပ်ပစ္စည်း​တွေကို အသုံးပြုခြင်း​က “အမြော်အမြင်​ရှိ” ကြောင်း ဖော်ပြ​တဲ့ နောက်ထပ်​နည်းလမ်း​တစ်ခု ဖြစ်တယ်။ လောက​စည်းစိမ် ပိုင်ဆိုင်​ထားပြီး အချိန်ပြည့်လုပ်ငန်း​မှာ မပါဝင်​နိုင်​သူတွေ၊ တိုင်းတစ်ပါး​ကို မပြောင်းရွှေ့​နိုင်​သူတွေဟာ မိမိတို့​အလှူငွေ​တွေ​က တခြားသူတွေရဲ့ အမှုဆောင်လုပ်ငန်း​ကို ထောက်ပံ့​ပေး​ကြောင်း သိရ​လို့ ကျေနပ်မှု ခံစား​နိုင်ပါတယ်။ (ပညာ. ၁၉:၁၇) ဆင်းရဲ​ပေ​မဲ့ ဘုရားရေးရာ​မှာ တိုးတက်​နေတဲ့ ဒေသ​တွေမှာ စာပေ​တွေ ရဖို့၊ ဟောပြော​ဖို့ အလှူငွေ​တွေ​က အထောက်အကူ ပြုပါ​တယ်။ နှစ်တွေ​တစ်လျှောက် ကွန်ဂို၊ မာဒါဂတ်စကာ၊ ရဝမ်ဒါ​နိုင်ငံ​က ညီအစ်ကိုတွေ​ဟာ မိသားစု​အတွက်  စားစရာ ဝယ်​မလား၊ ကျမ်းစာ ဝယ်​မလား ရွေးချယ်​ခဲ့ရတယ်။ ကျမ်းစာ​တစ်အုပ်​က တစ်ပတ်စာ၊ တစ်လ​စာ လုပ်ခ​နဲ့ ညီ​တယ်။ အခုတော့ လူများစွာ​ရဲ့ အလှူငွေ​တွေကြောင့် “သာ​တူညီ​မျှ ဖြစ်” လာ​လို့ ယေဟောဝါရဲ့ အဖွဲ့အစည်း​က ကျမ်းစာ ဘာသာပြန်ခြင်း၊ ဖြန့်ဝေခြင်း​ကို လုပ်ဆောင်​ပေးပြီး မိသားစုဝင်​တိုင်း၊ ကျမ်းစာသင်သား​တိုင်း ကျမ်းစာ ရနိုင်​ပြီ။ (၂ ကောရိန္သု ၈:၁၃-၁၅ ကိုဖတ်ပါ။) ဒါကြောင့် ယေဟောဝါနဲ့ မိတ်ဖွဲ့ခြင်း​က​နေ ပေးကမ်းသူ​ရော ရယူ​သူ​ပါ အကျိုးခံစား​ရတယ်။

၁၂။ ဘုရားကို ယုံကြည်ကိုးစား​ကြောင်း အာဗြဟံ ဘယ်လို တင်ပြ​ခဲ့​သလဲ။

^၁၂ ယေဟောဝါနဲ့ မိတ်ဖွဲ့​နိုင်တဲ့ နောက်​နည်းလမ်း​တစ်ခုက​တော့ စီးပွားရေး​လောကမှာ ပါဝင်မှု​ကို လျှော့ချခြင်း၊ “စစ်မှန်တဲ့” စည်းစိမ် ရှာဖွေ​ဖို့ ကိုယ့်အခြေ​အ​နေ​တွေကို အသုံးပြုခြင်း​ပါပဲ။ ရှေးခေတ်​က သစ္စာရှိ​အမျိုးသား အာဗြဟံ​ဟာ ချမ်းသာကြွယ်ဝ​တဲ့ ဥရမြို့​က​နေ နာခံမှု​ရှိရှိ ထွက်လာ​ပြီး ယေဟောဝါနဲ့ မိတ်ဖွဲ့​ဖို့ တဲ​နဲ့ နေထိုင်ခဲ့​တယ်။ (ဟီ. ၁၁:၈-၁၀) စစ်မှန်တဲ့ စည်းစိမ်​အတွက် ယေဟောဝါကို အမြဲ ယုံကြည်ကိုးစား​ခဲ့​ပြီး ယုံကြည်ခြင်း ကင်းမဲ့​ကြောင်း ဖော်ပြ​တဲ့ ရုပ်ပစ္စည်း ရှာဖွေ​တာမျိုး ဘယ်တော့မှ မလုပ်​ခဲ့ဘူး။ (က. ၁၄:၂၂၊ ၂၃) ချမ်းသာ​တဲ့​လူငယ်​ကို အဲဒီလို​ယုံကြည်ခြင်း​မျိုး ရှိ​ဖို့ ယေရှု​ပြောခဲ့တယ်- “ပြည့်ဝစုံလင်​သူ ဖြစ်ချင်​ရင် ခင်ဗျား​ရဲ့ ပစ္စည်း​တွေကို ရောင်း​ပြီး ဆင်းရဲသား​တွေကို ပေးကမ်း​ပါ။ ကောင်းကင်​ဘဏ္ဍာ​ကို ရ​လိမ့်မယ်။ ပြီးမှ ကျွန်တော့်​နောက်လိုက် လုပ်ပါ။” (မ. ၁၉:၂၁) ဒီ​လူငယ်​မှာ အာဗြဟံ​လို ယုံကြည်ခြင်း​မျိုး မရှိ​ခဲ့​ပေ​မဲ့ တခြားသူတွေက​တော့ ဘုရားသခင်ကို အကြွင်းမဲ့ ယုံကြည်ကိုးစား​ကြောင်း တင်ပြ​ခဲ့ကြတယ်။

၁၃။ (က) တိမောသေကို ပေါလု ဘယ်လို သတိပေး​ခဲ့​သလဲ။ (ခ) ပေါလု​ရဲ့ သတိပေးချက်​ကို ဒီနေ့ ဘယ်လို ကျင့်သုံး​နိုင်သလဲ။

^၁၃ တိမောသေ​ဟာ ယုံကြည်ခြင်းရှိ​သူ ဖြစ်တယ်။ တိမောသေကို “ခရစ်တော်ရဲ့ စစ်သားကောင်း​တစ်ဦး” လို့ခေါ်​ပြီးနောက်​မှာ “စစ်မှုထမ်း​နေတဲ့​သူက စီးပွားရေး​လုပ်ငန်း​တွေမှာ ပါဝင်​မှာ မဟုတ်ဘူး။ စစ်သည်​အဖြစ် စာရင်းသွင်း​ပေးတဲ့​သူ​ကို စိတ်ကျေနပ်​စေချင်​တာ​ကိုး” လို့ ပေါလု ပြောခဲ့တယ်။ (၂ တိ. ၂:၃၊ ၄) အချိန်ပြည့် အမှုဆောင်သူ တစ်သန်း​ကျော် အပါအဝင် ယနေ့ ယေရှုရဲ့ နောက်လိုက်​တွေဟာ အခြေအနေ ခွင့်ပြု​သ​ရွေ့ ပေါလု​ရဲ့ အကြံပြုချက်​ကို လိုက်နာကြတယ်။ ကြော်ငြာတွေ၊ ပတ်ဝန်းကျင် ဖိအား​တွေကို တွန်းလှန်​ရင်း “ချေးငှား​ယူ​သူဟာ ချေးငှား​ပေး​သူရဲ့ ကျွန်​ပဲ” ဆိုတဲ့ မူကို သတိရ​ကြ​တယ်။ (ပညာ. ၂၂:၇) ကျွန်တော်တို့ရဲ့ အချိန်၊ ခွန်အား ရှိသမျှ သုံးပြီး စီးပွားရေး​လောကရဲ့ ကျွန်​ဖြစ်ဖို့ စာတန် အလိုရှိ​တယ်။ ဆုံးဖြတ်ချက်​တချို့​ကြောင့် နှစ်​ရှည်​လ​များ အကြွေး​ဆပ်​နေရတာ ဖြစ်နိုင်တယ်။ အိမ်ဝ​ယ်​ဖို့၊ ပညာ​သင်​ဖို့၊ ကား​ဝယ်​ဖို့၊ ခမ်းခမ်းနားနား မင်္ဂလာဆောင်​ဖို့ ငွေချေး​တာ​က ငွေကြေး​အခက်အခဲ ဖြစ်စေ​နိုင်တယ်။ ဘဝကို ရိုးရှင်း​စေပြီး အကြွေး​တွေ၊ အသုံးစရိတ်​တွေ လျှော့ချခြင်း​အားဖြင့် အမြော်အမြင်​ရှိကြောင်း ပြ​ကြ​တယ်။ ဒီလို​နည်းနဲ့ ဒီနေ့ စီးပွားရေး​စနစ်​ရဲ့ ကျွန်​ဖြစ်​မယ့်အစား ဘုရားကို လွတ်လွတ်လပ်လပ် အမှုဆောင်​ကြ​တယ်။—၁ တိ. ၆:၁၀။

၁၄။ ဘယ်​ဆုံးဖြတ်ချက်​မျိုး ချဖို့ လို​သလဲ။ ဥပမာ ပေးပါ။

^၁၄ ဘဝကို ရိုးရှင်းစေခြင်း​မှာ ဦးစားထားရာ မှန်ကန်​ခြင်း​လည်း ပါတယ်။ မောင်နှံတစ်စုံ​ဟာ အမြတ်​များတဲ့ စီးပွားရေး​လုပ်ငန်း​တစ်ခု ပိုင်ဆိုင်​ထားတယ်။ ဒါပေမဲ့ အချိန်ပြည့် အမှုဆောင်လုပ်ငန်းမှာ ပြန်​ပါဝင်ချင်​လို့ လုပ်ငန်း၊ ရွက်လှေ၊ တခြား​ပစ္စည်း​တွေကို ရောင်းချ​လိုက်တယ်။ ပြီးတဲ့နောက် နယူးယောက်၊ ဝေါဝစ် ကမ္ဘာ့ဌာနချုပ် ဆောက်လုပ်ရေး စီမံကိန်း​မှာ လုပ်အားပေး​ကြ​တယ်။ အထူး​ကောင်းချီး​အနေနဲ့ သမီး၊ သမက်​တို့​နဲ့အတူ ဗေသလ​မှာ အပတ်​အနည်းငယ် အမှုဆောင်ခွင့် ရတယ်။ ဝေါဝစ်​စီမံကိန်း​မှာ ယောက်ျား​ဘက်က မိဘတွေ​နဲ့အတူ လုပ်ဆောင်ခွင့် ရတယ်။ အမေရိကန်၊ ကော်လိုရာဒို​က ရှေ့ဆောင် ညီအစ်မ​တစ်ယောက်​ဟာ ဘဏ်​တစ်ခုမှာ အချိန်ပိုင်း​အလုပ် လုပ်တယ်။ အလုပ်ရှင်​က လုပ်ရည်ကိုင်ရည်​ကို သဘောကျ​လို့ အချိန်ပြည့်​လုပ်​ရင် လစာ သုံး​ဆ​တိုး​ပေးမယ်လို့ ပြောတယ်။ ဒါပေမဲ့ အဲဒီ​ အလုပ်​က အမှုဆောင်လုပ်ငန်းမှာ ပါဝင်ချိန်​နည်း​သွား​စေ​လို့ ငြင်း​လိုက်တယ်။ ဒါက ယေဟောဝါရဲ့ ကိုယ်ကျိုးစွန့်​သူ ကျေးကျွန်​များစွာ​ထဲက နမူနာ အနည်းငယ်​သာ ဖြစ်တယ်။ နိုင်ငံတော်ကို ဦးစားထား​တဲ့ ဒီ​ဆုံးဖြတ်ချက်​တွေ​က ဒီနေ့ စီးပွားရေး​လောက ကမ်းလှမ်း​တာ​တွေ​ထက် ဘုရားနဲ့ မိတ်ဖွဲ့​ခွင့်နဲ့ စစ်မှန်တဲ့ စည်းစိမ်​ကို ပိုတန်ဖိုး​ထားကြောင်း ဖော်ပြတယ်။

၁၅။ ဘယ်​စည်းစိမ်​က အကြီးမားဆုံး ကျေနပ်မှု ခံစားရ​စေ​သလဲ။

^၁၅ စည်းစိမ်ဥစ္စာ​ဟာ ဘုရား​ကောင်းချီးခံစား​ရတယ်​ဆိုတဲ့ အထောက်အထား မဟုတ်ပါဘူး။ “မွန်မြတ်​တဲ့လုပ်ရပ်​တွေ အများကြီး လုပ်ဆောင်” သူတွေကို ယေဟောဝါ ကောင်းချီးပေး​တယ်။ (၁ တိမောသေ ၆:၁၇-၁၉ ကိုဖတ်ပါ။) ဥပမာ၊ အယ်လ်ဘေးနီးယား​နိုင်ငံမှာ အမှုဆောင်သူ​တွေ လိုအပ်​နေမှန်း ညီအစ်မ လူ​စီ​ယာ * သိတော့ ၁၉​၉၃ ခုနှစ်မှာ အထောက်အပံ့ မရှိဘဲ ယေဟောဝါကို အပြည့်အဝ ယုံကြည်ကိုးစား​ပြီး အီတလီ​က​နေ ပြောင်းရွှေ့​သွားတယ်။ အယ်လ်ဘေးနီးယား​စကား တတ်ကျွမ်း​လာပြီး လူ ၆​၀ ကို နှစ်ခြင်းခံ​နိုင်အောင် ကူညီပေး​ခဲ့​ပြီ။ ဘုရား​လူမျိုး​အများစုက အဲဒီလို​သီးပွင့်ဖြစ်ထွန်း​တဲ့ နယ်မြေ​တွေမှာ မဟောပြော​ကြပေမဲ့ အသက်​လမ်း ရှာတွေ့​ဖို့၊ အသက်​လမ်းမှာ ဆက်လျှောက်​နိုင်​ဖို့ အထောက်အကူ​ပြု​မယ့် ဘာကို​မဆို လုပ်ဆောင်ကြ​တယ်။ အဲဒါကို ကျွန်တော်တို့​ရော သူတို့​ပါ ထာဝစဉ် တန်ဖိုးထား​ကြပါ​မယ်။—မ. ၆:၂၀။

၁၆။ (က) ဒီနေ့ စီးပွားရေး​စနစ် ဘာဖြစ်​သွား​မလဲ။ (ခ) အနာဂတ်​အကြောင်း သိထားခြင်း​က စည်းစိမ်ဥစ္စာ​ကို ဘယ်လို ရှုမြင်​စေ​သင့်သလဲ။

^၁၆ ‘[မဖြောင့်မတ်​တဲ့] စည်းစိမ် ကုန်​သွား​ရင်’ လို့​မပြော​ဘဲ ‘ကုန်​သွား​တဲ့အခါ’ လို့ ယေရှု ပြောတယ်။ (လု. ၁၆:၉) ဒီ​နောက်ဆုံးကာလ​မှာ ဘဏ်​နဲ့ စီးပွားရေး​လုပ်ငန်း​တွေ ပြိုလဲ​နေတယ်။ အနာဂတ်မှာ ဒီ့​ထက် ပိုဆိုး​လာနိုင်တယ်။ စာတန့်​စနစ်​တစ်ခုလုံး နိုင်ငံရေး၊ ဘာသာရေး၊ စီးပွားရေး​တို့ ပျက်စီး​ရတော့​မယ်။ စီးပွားရေး​လောကရဲ့ အရေးကြီး​ရာ ရွှေငွေ​တွေ တန်ဖိုး​မဲ့​သွားမယ်​လို့ ပရောဖက် ယေဇကျေလ၊ ဇေဖနိ​တို့ ကြိုဟော​ခဲ့တယ်။ (ယေဇ. ၇:၁၉။ ဇေ. ၁:၁၈) အသက် ဆုံး​ခါနီး​ကျ​မှ တစ်ဘဝလုံး စစ်မှန်တဲ့ စည်းစိမ်​ကို မဟုတ်ဘဲ ဒီလောက​ရဲ့ “မဖြောင့်မတ်​တဲ့ စည်းစိမ်” ကို သဲ​သဲ​မဲ​မဲ ရှာဖွေခဲ့​ပြီး အဲဒီ​စည်းစိမ်​တွေ တန်ဖိုး မရှိတော့​ပါ​လား​လို့ သိလိုက်​ရ​တဲ့အခါ ဘယ်လို ခံစားရ​မလဲ။ တစ်ဘဝလုံး စုဆောင်း​ခဲ့တဲ့ ငွေ​တွေ အတု​ဖြစ်နေ​မှန်း သိလိုက်​ရတဲ့​သူ​လို ခံစားရ​နိုင်တယ်။ (ပညာ. ၁၈:၁၁) အဲဒီ​စည်းစိမ်ဥစ္စာ​တွေ လုံးလုံး ပျက်စီး​သွားမယ်။ ဒါကြောင့် ကောင်းကင်မှာ ‘မိတ်ဖွဲ့’ ဖို့ အခွင့်အရေး​ကို လက်လွတ်​မခံ​ပါနဲ့။ ယေဟောဝါရဲ့ နိုင်ငံတော် လုပ်ငန်း တိုးတက်​ဖို့ လုပ်ဆောင်​သမျှ​ဟာ ကျွန်တော်​တို့ကို စစ်မှန်တဲ့ စည်းစိမ် ရရှိ​စေတယ်။

၁၇၊ ၁၈။ ဘုရားရဲ့ မိတ်ဆွေတွေ​ကို ဘာ​စောင့်ကြို​နေ​သလဲ။

^၁၇ ဘုရားနိုင်ငံတော် ရောက်လာ​တဲ့အခါ ချေးငှား​တာ​တွေ မရှိတော့​ဘူး။ စားစရာ​တွေ အခမဲ့၊ အလျှံပယ် ရမယ်။ ကျန်းမာရေး​စရိတ်​တွေ မလို​တော့ဘူး။ ယေဟောဝါရဲ့ မြေကြီး​ဆိုင်ရာ မိသားစု​ဟာ မြေကြီး​က​ပေးတဲ့ အကောင်းဆုံး​အရာတွေ​ကို မွေ့လျော်ခံစား​ရမယ်။ ရွှေငွေ​ကျောက်​သံ​ပတ္တမြား​တွေ​က ရင်းနှီးမြှုပ်နှံ၊ စုဆောင်း​ဖို့ မဟုတ်ဘဲ အလှဆင်​ဖို့ ဖြစ်သွား​မယ်။ လှပတဲ့​အိမ်​တွေ ဆောက်​ဖို့ အရည်အသွေး​မြင့် သစ်၊ ကျောက်၊ သတ္တု​တွေ အခမဲ့ ရမယ်။ မိတ်ဆွေတွေ​က ငွေ​အတွက် မဟုတ်ဘဲ စေတနာ​နဲ့ ကူညီပေး​ကြ​မယ်။ မြေကြီး​သယံဇာတ​တွေကို အတူ​မျှဝေ သုံးစွဲ​ကြ​ရမယ်။

^၁၈ ဒါက ကောင်းကင်မှာ မိတ်ဖွဲ့​သူတွေ ရရှိ​မယ့်၊ တန်ဖိုးမဖြတ်နိုင်​မယ့် အမွေ​ထဲက တချို့​သာ​ဖြစ်တယ်။ ယေဟောဝါရဲ့ မြေကြီး​ဆိုင်ရာ ကိုးကွယ်သူ​တွေဟာ “အဖဘုရား​ဆီက ကောင်းချီး​ကို ခံစားရ​သူတို့၊ လူ့လောက​အစပြုချိန် ကတည်းက မင်း​တို့အတွက် ပြင်ဆင်​ထားတဲ့​နိုင်ငံ​ကို လာပြီး အမွေခံ​ကြ” ဆိုတဲ့ ယေရှုရဲ့​စကားကို ကြား​တဲ့အခါ အကန့်အသတ်​မဲ့ ပျော်ရွှင်​ဝမ်းမြောက်​ကြပါ​မယ်။—မ. ၂၅:၃၄။