၁။ ကျွန်တော်တို့​အားလုံးမှာ ဘယ်လို​ဆန္ဒ​မျိုး ရှိ​ကြသလဲ။

သင် လေးစား​ရတဲ့ အသိမိတ်ဆွေ​တစ်ယောက်က သင့်​နာမည်ကို မေ့သွား​ရင်၊ သင့်ကို​တောင် မမှတ်မိ​တော့​ရင် ဘယ်လို​ခံစားရ​မလဲ။ တော်​တော်​စိတ်ပျက်​သွားမှာပဲ။ ကျွန်တော်တို့​အားလုံး အသိအမှတ်ပြု​ခံ​ချင်​ကြ​တာ သဘာဝ​ပဲ။ ကိုယ့်ကို မှတ်မိ​ရုံ​လောက်​သာ​မဟုတ်ဘဲ ဘယ်လို​လူစားမျိုး​လဲ၊ ဘာတွေ​လုပ်ခဲ့သလဲ ဆိုတာကို အမှတ်ရ​စေချင်တယ်။—တော. ၁၁:၁၆။ ယောဘ ၃၁:၆။

၂၊ ၃။ အသိအမှတ်ပြု​ခံ​ချင်စိတ်​ဟာ ဘယ်လို တစ်ဖက်​စွန်း​ရောက်​သွား​နိုင်သလဲ။ (ဆောင်းပါး​အစမှာ​ပါတဲ့ ပုံကို ကြည့်ပါ။)

^၂ ကျွန်တော်တို့ရဲ့ မစုံလင်မှု​က အသိအမှတ်ပြု​ခံ​ချင်စိတ်​ကို တစ်ဖက်​စွန်း​ရောက်​သွား​စေနိုင်တယ်။ စာတန့်​လောက​က​လ​ည်း ကျော်ကြား​ချင်စိတ်၊ အသိအမှတ်ပြု​ခံ​ချင်စိတ် ဝင်​လာ​အောင် သွေးထိုး​ပေးတယ်။ ဒီလိုနဲ့ ကောင်းကင်ဖခင် ယေဟောဝါ​ဘုရား​သာ ရထိုက်တဲ့ ကိုးကွယ်မှုနဲ့ အသိအမှတ်ပြုမှု​ကို ပေးဖို့ ပျက်ကွက်​သွားနိုင်တယ်။—ဗျာ. ၄:၁၁။

 ^၃ ယေရှု​ခေတ်​က ဘာသာရေးခေါင်းဆောင်​တချို့မှာ အသိအမှတ်ပြုမှု​နဲ့ပတ်သက်ပြီး လွဲမှား​တဲ့​အမြင် ရှိကြတယ်။ နောက်လိုက်တွေ​ကို ယေရှု ဒီလို သတိ​ပေးခဲ့တယ်– “ကျမ်းတတ်တွေ​ကို သတိထား​ကြ။ သူတို့က ဝတ်လုံ​ရှည်​တွေ ဝတ်​ပြီး သွားလာ​ချင်တယ်။ စျေး​မှာ ရိုရို​သေသေ နှုတ်ဆက်​တာ​ကို ခံ​ချင်တယ်။ တရားဇရပ်​ဆိုရင် ရှေ့ဆုံး​ခုံ​မှာ၊ စားသောက်ပွဲ​ဆိုရင်​လ​ည်း အထင်ပေါ်ဆုံး​နေရာမှာပဲ ထိုင်​ချင်တယ်။ . . . ပိုကြီး​လေး​တဲ့ ပြစ်ဒဏ်​ကို သူတို့​ခံရလိမ့်မယ်။” (လု. ၂၀:၄၆၊ ၄၇) ဒါပေမဲ့ ဒင်္ဂါးနှစ်ပြား လှူ​ခဲ့​တဲ့ ဆင်းရဲတဲ့ မုဆိုးမ​ကို​တော့ တခြား​သူတွေ သတိ​မပြုမိ​ပေ​မဲ့ ယေရှု ချီးမွမ်းခဲ့တယ်။ (လု. ၂၁:၁-၄) အသိအမှတ်ပြု​ခြင်းနဲ့​ပတ်သက်တဲ့ ယေရှုရဲ့​အမြင်​ဟာ တခြား​သူတွေနဲ့ အလွန်​ကွာခြား​တ​ယ်။ ယေဟောဝါ​ဘုရား လက်ခံ​တဲ့ အမြင်မှန်​ရှိအောင် ဒီဆောင်းပါး​က ကူညီ​ပေးပါလိမ့်မယ်။

၄။ ဘယ်​အသိအမှတ်ပြုမှု​က အကောင်းဆုံး​လဲ။ ဘာကြောင့်လဲ။

^၄ အကောင်းဆုံး အသိအမှတ်ပြုမှု​ကို ဘယ်လို​ရနိုင်မလဲ။ ပညာရေး၊ အလုပ်နဲ့ ဖျော်ဖြေရေး​လောကမှာ လူတွေ​ရှာ​နေတဲ့ အသိအမှတ်ပြုမှု​မျိုး​တော့ မဟုတ်ဘူး။ ပေါလု ဒီလို​ပြောတယ်– “အခုတော့ ခင်ဗျားတို့ ဘုရား​သခင်ကို သိလာ​ကြ​ပြီ။ ဘုရားသခင်ကလည်း ခင်ဗျားတို့ကို သိ​ထားပြီ။ ဒါနဲ့​တောင် အကျိုး​မရှိ၊ အသုံးမဝင်​တဲ့ အခြေခံ​တရား​တွေ​ဆီ ပြန်လှည့်ပြီး ဘာလို့ ကျွန်ခံ​ချင်​ရတာလဲ။” (ဂ​လ. ၄:၉) ကျွန်တော်တို့ကို စကြဝဠာ အချုပ်အခြာအာဏာပိုင်ရှင် ‘ဘုရားသခင် သိထား’ တ​ယ်။ ဘုရားသခင်​ဟာ ကျွန်တော်တို့ကို ချစ်မြတ်နိုးပြီး ရင်းနှီး​ချင်တယ်။ ယေဟောဝါနဲ့ မိတ်ဆွေ​ဖြစ်နိုင်ဖို့ ဖန်ဆင်း​ထားတယ်။ အခွင့်ထူး​ကြီး​ပါ​ပဲ။—ဒေ. ၁၂:၁၃၊ ၁၄။

၅။ ဘုရားသခင် သိတဲ့​သူ ဘယ်လို ဖြစ်နိုင်မလဲ။

^၅ အဲဒီလို ကောင်းချီး​ကို မောရှေ ရခဲ့တယ်။ ဘုရား​လမ်းစဉ်​တွေ​အကြောင်း ပို​သိလာ​ဖို့ ဆုတောင်းတဲ့အခါ “ဒီ​တစ်ခါ​လ​ည်း မင်း​တောင်းဆိုတဲ့​အတိုင်း လုပ်ပေးမယ်။ မင်းဟာ ငါ့​စိတ်နဲ့​တွေ့​တဲ့​သူ​ပဲ။ မင်းကို ငါ​ကောင်းကောင်း​သိတယ်” လို့ ယေဟောဝါ​ပြောတယ်။ (ထွ. ၃၃:၁၂-၁၇) ကျွန်တော်တို့ကိုလည်း ယေဟောဝါ ကောင်းကောင်းသိ​တဲ့အခါ ကောင်းချီးတွေ ရရှိ​နိုင်တယ်။ ဒါပေမဲ့ ယေဟောဝါ သိတဲ့​သူ ဘယ်လို​ဖြစ်နိုင်မလဲ။ ဘုရားကို ချစ်​ပြီး ဘုရားဆီ ဆ​က်​ကပ်​အပ်နှံ​ဖို့ လိုတယ်။—၁ ကောရိန္သု ၈:၃ ကိုဖတ်ပါ။

၆၊ ၇။ ယေဟောဝါနဲ့ ဆက်ဆံရေးကို ဘာက ပျက်စီးစေနိုင်​သလဲ။

^၆ ကောင်းကင်ဖခင်​နဲ့ အဖိုးတန် ဆက်ဆံရေးကို ထိန်းသိမ်း​ထားရမယ်။ ပေါလု စာရေးခဲ့တဲ့ ဂလာတိ​မြို့​က ခရစ်ယာန်တွေ​လို​ပဲ ကျွန်တော်တို့လည်း ဒီ​လောကရဲ့ အသိအမှတ်ပြုမှု အပါအဝင် “အကျိုး​မရှိ၊ အသုံးမဝင်​တဲ့ အခြေခံ​တရား​တွေ” ရဲ့​ကျွန် မဖြစ်အောင် ရှောင်ရမယ်။ (ဂ​လ. ၄:၉) ပထမရာစု ခရစ်ယာန်တွေဟာ ဘုရား​သိတဲ့​သူ​ဖြစ်ဖို့ ကြိုးစား​ခဲ့ကြတယ်။ ဒါပေမဲ့ အကျိုး​မရှိတဲ့​အရာတွေ​ဘက် “ပြန်လှည့်” သွားတယ်လို့ ပေါလု​ပြောတယ်။ “ဒီလောက်​ကြိုးစားပြီး​မှ အကျိုး​မရှိ၊ အသုံးမဝင်​တဲ့ အရာတွေ​ဆီ ဘာကြောင့် ပြန်လှည့်​သွားတာ​လဲ” လို့ ပေါလု​ပြော​နေတာ။

^၇ ကျွန်တော်တို့လည်း အဲဒီလို ဖြစ်သွား​နိုင်သလား။ ဖြစ်သွား​နိုင်တယ်။ ယေဟောဝါ​အကြောင်း သိ​ခါ​စ​တုန်း​က ပေါလု​လို​ပဲ စာတန့်​လောကရဲ့ အသိအမှတ်ပြုမှု​ကို စွန့်လွှတ်​ခဲ့ကြတယ်။ (ဖိလိပ္ပိ ၃:၇၊ ၈ ကိုဖတ်ပါ။) အဆင့်မြင့်​ပညာ သင်ယူဖို့၊ ရာထူး​တိုး​ဖို့၊ စီးပွားရေး​လောကမှာ ငွေပို​ရဖို့ အခွင့်အရေး​တွေ ဖြစ်နိုင်တယ်။ ဂီတ​ပါရမီ၊ အားကစား​စွမ်းရည်တွေ​ကြောင့် နာမည်ကျော်​ပြီး ချမ်းသာ​နိုင်ပေမဲ့ အားလုံးကို စွန့်လွှတ်​ခဲ့​တယ်။ (ဟီ. ၁၁:၂၄-၂၇) အဲဒီလို စွန့်လွှတ်ဖို့ ဆုံးဖြတ်​ခဲ့တာကို အခုကျမှ ‘အခွင့်အရေး ဆုံးရှုံး’ တ​ယ်လို့ ရှုမြင်​ တာ သိပ်​မိုက်မဲ​တ​ယ်။ အဲဒီလို သဘောထား​က “အကျိုး​မရှိ၊ အသုံးမဝင်” လို့ ကိုယ်​သတ်မှတ်​ထားတဲ့​အရာတွေ​နောက် ပြန်​လိုက်​မိ​သွား​စေနိုင်တယ်။

၈။ ယေဟောဝါရဲ့ အသိအမှတ်ပြုမှု ရယူဖို့​ဆိုတဲ့ စိတ်ပိုင်းဖြတ်ချက်ကို ဘယ်လို ခိုင်မာ​စေနိုင်သလဲ။

^၈ လောကရဲ့ အသိအမှတ်ပြုမှု မဟုတ်ဘဲ ယေဟောဝါရဲ့ အသိအမှတ်ပြုမှု ရယူဖို့​ဆိုတဲ့ စိတ်ပိုင်းဖြတ်ချက်ကို ဘယ်လို ခိုင်မာ​စေနိုင်သလဲ။ အရေးကြီးတဲ့​အချက် နှစ်ချက်​ကို အမှတ်ရနေ​ဖို့ လိုတယ်။ ပထမ၊ သစ္စာရှိသူတွေကို ယေဟောဝါ အမြဲ အသိအမှတ်ပြုတယ်။ (ဟီဘရူး ၆:၁၀။ ၁၁:၆ ကိုဖတ်ပါ။) ကျေးကျွန်​တစ်ယောက်စီကို ယေဟောဝါ အလွန်​တန်ဖိုး​ထားတယ်။ သစ္စာ​ရှိသူတွေ​အပေါ် အရေး​မစိုက်​တာ​ကို ‘မဖြောင့်မတ်တဲ့’ လုပ်ရပ်​အဖြစ် ရှုမြင်တယ်။ “မိမိရဲ့​လူ ဘယ်သူ​လဲ​ဆိုတာ” ဘုရား အမြဲ “သိတယ်။” (၂ တိ. ၂:၁၉) ‘ဖြောင့်မတ်​သူတွေရဲ့ လမ်းစဉ်​ကို သိ’ သလို ဒုက္ခတွေ​ကြား​ကနေ ဘယ်လို ကယ်တင်​ရမလဲ​ဆိုတာလည်း သိတယ်။—ဆာ. ၁:၆။ ၂ ပေ. ၂:၉။

၉။ မိမိ​လူမျိုးကို ယေဟောဝါ အသိအမှတ်ပြုကြောင်း ဥပမာ ပေးပါ။

^၉ တစ်ခါတလေ ယေဟောဝါ​က မိမိ​လူမျိုးကို ထူးခြားတဲ့​နည်းတွေနဲ့ အသိအမှတ်​ပြုတယ်။ (၂ ရာ. ၂၀:၂၀၊ ၂၉) ဥပမာ၊ ဖာရော​ရဲ့ စစ်တပ်​ကြီး လိုက်​လာ​တုန်း​က ပင်လယ်နီ​မှာ မိမိ​လူမျိုးကို ယေဟောဝါ ဘယ်လို ကယ်တင်​ခဲ့​ကြောင်း သုံးသပ်​ကြည့်ပါ။ (ထွ. ၁၄:၂၁-၃၀။ ဆာ. ၁၀၆:၉-၁၁) အဲဒီ​ဖြစ်ရပ်​က ထူးခြား​လွန်း​လို့ နှစ်ပေါင်း ၄၀ ကြာပြီးနောက်​မှာ​တောင် လူတွေ​ပြောလို့ မဆုံး​သေး​ဘူး။ (ယောရှု ၂:၉-၁၁) ကြို​ဟောထားတဲ့ မာဂေါဂ​ပြည်​က ဂေါဂ​မင်းရဲ့ တိုက်ခိုက်မှု​ကို ကျွန်တော်တို့ ကြုံရချိန်​မှာ ယေဟောဝါရဲ့ အဲဒီလို အသိအမှတ်ပြုမှု​နဲ့ တန်ခိုးတော်​အကြောင်း ပြန်အမှတ်​ရတာက အားရှိစရာပဲ။ (ယေဇ. ၃၈:၈-၁၂) အဲဒီအချိန်မှာ လောကရဲ့​အသိအမှတ်ပြုမှု​ကို မဟုတ်ဘဲ ဘုရားသခင်ရဲ့ အသိအမှတ်ပြုမှု​ကို ရှာ​ခဲ့လို့ အလွန်​ကျေးဇူးတင်​ကြပါလိမ့်မယ်။

၁၀။ ယေဟောဝါရဲ့ အသိအမှတ်ပြုမှု​နဲ့ပတ်သက်ပြီး ဘယ်အချက်ကို စိတ်စွဲမှတ်​ထားရမလဲ။

^၁၀ အရေးကြီးတဲ့ ဒုတိယ​အချက်​ကိုလည်း သတိရ​ဖို့​လိုတယ်။ မမျှော်လင့်​ထားတဲ့ နည်းတွေနဲ့ ယေဟောဝါ အသိအမှတ်ပြု​နိုင်တယ်။ လူ​မြင်​ကောင်း​ရုံ​လောက်​သာ ကောင်းမှုပြု​သူတွေဟာ ယေဟောဝါ​ဆီက ဘာ​ကောင်းချီး​မှ ရမှာ မဟုတ်ဘူး။ ဘာကြောင့်လဲ။ တခြား​သူတွေရဲ့ ချီးမွမ်းမှုကို ခံရချိန်မှာ လိုချင်တဲ့​အကျိုးကို ရပြီး​သား​ဖြစ်လို့ပဲ။ (မဿဲ ၆:၁-၅ ကိုဖတ်ပါ။) ဒါပေမဲ့ တခြား​သူတွေကို လုပ်ပေးတဲ့ ကောင်းမှု​အတွက် အသိအမှတ်ပြု မခံရ​သူတွေနဲ့​ပတ်သက်​ရင်​တော့ ဘုရားသခင်က “ဆိတ်ကွယ်​ရာ​ကို မြင်” တ​ယ်။ တစ်ယောက်စီ​ရဲ့ လုပ်ရပ်တွေကို သတိပြုမိ​ပြီး ကောင်းချီး​ပေးတယ်။ တစ်ခါတလေ မမျှော်လင့်​ထားတဲ့​နည်းတွေနဲ့ ကောင်းချီး​ပေးတယ်။ ဥပမာ​တချို့ကို သုံးသပ်ကြည့်​ကြစို့။

၁၁။ မာရိ​ကို ယေဟောဝါ ဘယ်လို အသိအမှတ်ပြု​ခဲ့သလဲ။

^၁၁ သားတော် ယေရှုရဲ့ မိခင်​ဖြစ်ဖို့ နိမ့်ကျတဲ့ အပျိုစင် မာရိ​ကို ယေဟောဝါ ရွေးချယ်ခဲ့တယ်။ မာရိ​ဟာ ဂျေရုဆလင်​မြို့၊ ခမ်းနား​လှတဲ့ ဗိမာန်တော်​နဲ့ ဝေးရာ မထင်ပေါ်​တဲ့ နာဇရက်​မြို့မှာ နေထိုင်တယ်။ (လုကာ ၁:၂၆-၃၃ ကိုဖတ်ပါ။) ဒီ​အခွင့်ထူး​အတွက် မာရိ​ကို ဘာကြောင့် ရွေးချယ်​ခဲ့​တာလဲ။ မာရိ​ကို “ဘုရား မျက်နှာသာ​ရတဲ့​သူ” လို့ ကောင်းကင်တမန် ဂါဗြေလ ပြောခဲ့တယ်။ နောက်ပိုင်း၊ ဆွေမျိုး​ဖြစ်တဲ့ ဧလိရှဗက်​နဲ့ ပြောတဲ့​စကားမှာ မာရိရဲ့ ဘုရားရေးရာ​စိတ်ဓာတ်​ကို တွေ့နိုင်တယ်။  (လု. ၁:၄၆-၅၅) ယေဟောဝါ​က မာရိ​ကို စောင့်ကြည့်​နေပြီး သူ့ရဲ့ သစ္စာရှိ​မှု​ကြောင့် မမျှော်လင့်​ထားတဲ့ အခွင့်ထူး​ပေးခဲ့တယ်။

၁၂၊ ၁၃။ ယေရှု မွေးဖွားချိန်မှာ၊ ရက် ၄၀ ကြာပြီးနောက် ဗိမာန်တော်မှာ ဘယ်လို​အသိအမှတ်ပြုမှု ရခဲ့​သလဲ။

^၁၂ ယေရှုကို မွေးဖွားချိန်မှာ ဂျေရုဆလင်​နဲ့ ဘက်သလီဟင်​မြို့​က အထင်ကရ အရာရှိ​တွေ​နဲ့ အုပ်စိုးရှင်တွေ​ကို ယေဟောဝါ အသိ​မပေးဘူး။ အဲဒီအစား ဘက်သလီဟင်​မြို့ပြင်မှာ သိုးထိန်း​နေတဲ့ နိမ့်ကျတဲ့ သိုးထိန်းတွေ​ရှေ့ ကောင်းကင်တမန်တွေ ပေါ်လာပြီး အသိ​ပေးတယ်။ (လု. ၂:၈-၁၄) သိုးထိန်းတွေ​လ​ည်း မွေးကင်းစ​ကလေးကို သွား​ကြည့်​ကြတယ်။ (လု. ၂:၁၅-၁၇) ယေရှု အဲဒီလို ဂုဏ်တင်​ခံရတဲ့​အတွက် မာရိ​နဲ့ ယောသပ် အံ့ဩ​ကြည်နူး​မိ​မှာ​ပဲ။ ယေဟောဝါရဲ့ လုပ်ဆောင်ပုံ​နဲ့ မာရ်နတ်​ရဲ့ လုပ်ဆောင်ပုံ အလွန်​ကွာခြား​ကြောင်း သုံးသပ်​ကြည့်ပါ။ ယေရှုနဲ့ မိဘတွေ​ဆီ နက္ခတ်ဗေဒင်​ဆရာတွေကို စာတန် စေလွှတ်​ချိန်မှာ ယေရှု မွေး​ပြီဆို​တဲ့ သတင်း​ကြောင့် ဂျေရုဆလင် တစ်မြို့​လုံး ရုတ်ရုတ်သဲသဲ ဖြစ်သွားတယ်။ (မ. ၂:၃) အဲဒီလို လူသိရှင်ကြား​ဖြစ်သွား​လို့ အပြစ်မဲ့တဲ့ ကလေး​များစွာ အသတ်ခံ​ခဲ့​ရတယ်။—မ. ၂:၁၆။

^၁၃ ယေရှု မွေး​ပြီး ရက်​လေးဆယ်​ကြာတဲ့အခါ မာရိ​ဟာ ဘက်သလီဟင်​မြို့​နဲ့ ခြောက်မိုင်​ဝေး​တဲ့ ဂျေရုဆလင် ဗိမာန်တော်မှာ ယေဟောဝါ​ဆီ ပူဇော်သက္ကာ ဆက်သ​ရမယ်။ (လု. ၂:၂၂-၂၄) ယောသပ်၊ ယေရှုနဲ့အတူ မာရိ ခရီးသွား​ရင်း ဒီ​ကလေးကို တာဝန်ကျ ပုရောဟိတ်​ကများ အထူး​နည်းနဲ့ အသိအမှတ်ပြု​မလားလို့ တွေး​နေ​မိ​မှာ​ပဲ။ ယေရှုဟာ မာရိ မမျှော်လင့်​ထားတဲ့​နည်းနဲ့ အသိအမှတ်ပြု ခံခဲ့ရ​တ​ယ်။ “ဖြောင့်မတ်သူ၊ ဘုရားတရား​ကြည်ညို​သူ” ရှိမောင်​နဲ့ အသက် ၈၄ နှစ်အရွယ် မုဆိုးမ ပရောဖက်​မ အန္န​ကို ယေဟောဝါ သုံးပြီး ယေရှုဟာ ကတိထားရာ မေရှိယ၊ ခရစ်တော်​ဖြစ်​လာမယ်လို့ အသိအမှတ်ပြု​ခဲ့​တ​ယ်။—လု. ၂:၂၅-၃၈။

၁၄။ ယေဟောဝါ​ဆီက ဘယ်​ကောင်းချီးတွေကို မာရိ ရခဲ့​သလဲ။

^၁၄ သားတော်ကို သစ္စာရှိ​ရှိ ပြုစု​ပျိုးထောင်​ခဲ့​တဲ့​အတွက် မာရိ​ကို​ရော ယေဟောဝါ ဆ​က်​အသိအမှတ်ပြု​ခဲ့​သလား။ ပြု​ခဲ့​ပါတယ်။ မာရိရဲ့ လုပ်ရပ်​နဲ့ စကားတွေကို ကျမ်းစာမှာ မှတ်တမ်းတင်​စေခဲ့တယ်။ အမှုဆောင်လုပ်ငန်း သုံးနှစ်ခွဲ​အတွင်း ယေရှုနဲ့အတူ မာရိ မလိုက်​နိုင်​ခဲ့​ဘူး။ မုဆိုးမ​ဖြစ်လို့ နာဇရက်​မြို့မှာ နေခဲ့​ပုံ​ရတယ်။ အခွင့်ထူး​များစွာ ဆုံးရှုံး​ခဲ့​ပေ​မဲ့ ယေရှု သေဆုံးချိန်​မှာ​တော့ အနား​မှာ ရှိနေတယ်။ (ယော. ၁၉:၂၆) နောက်ပိုင်း သန့်ရှင်းသော​စွမ်းအားတော် သွန်းလောင်း​တဲ့ ပင်တေကုတ္တေပွဲ​အတွင်း တပည့်တွေ​နဲ့အတူ ဂျေရုဆလင်​မြို့မှာ မာရိ ရှိနေခဲ့တယ်။ (တ. ၁:၁၃၊ ၁၄) အဲဒီမှာ တခြား​သူတွေ​နဲ့အတူ ဘိသိက်ပေး​ခံခဲ့ရ​နိုင်တယ်။ အဲဒီလိုသာ​ဆိုရင် ယေရှုနဲ့အတူ ကောင်းကင်မှာ ထာဝရ​နေခွင့် ရ​လိုက်တာပဲ။ သူ့ရဲ့ သစ္စာရှိ​ရှိ​လုပ်ဆောင်မှု​အတွက် အကောင်းဆုံး ဆုလာဘ်​ပါ​ပဲ။

၁၅။ ယေရှု မြေကြီးပေါ်ရှိနေတုန်း ယေဟောဝါ ဘယ်လို အသိအမှတ်ပြု​ခဲ့သလဲ။

^၁၅ ဘာသာရေး ခေါင်းဆောင်​တွေ၊ နိုင်ငံရေး ခေါင်းဆောင်​တွေရဲ့ အသိအမှတ်ပြုမှု​ကို ယေရှု မလိုချင်ဘူး။ ဒါပေမဲ့ ကောင်းကင်က​နေ ယေဟောဝါ သုံးကြိမ် တိုက်ရိုက်​စကား​ပြောပြီး အသိအမှတ်ပြု​ခဲ့လို့ ယေရှု အားရှိ​ခဲ့​မှာ​ပဲ။ ဂျော်ဒန်​မြစ်​ထဲ ယေရှု နှစ်ခြင်း​ခံပြီးတာနဲ့ “သူဟာ ငါ​မြတ်နိုးတဲ့ ငါ့ရဲ့​ချစ်သားပဲ” လို့ ယေဟောဝါ ပြောတယ်။ (မ. ၃:၁၇) ဒါကို နှစ်ခြင်း​ဆရာ ယောဟန် တစ်ယောက်ပဲ ကြားခဲ့​ပုံ​ရတယ်။ ယေရှု မသေဆုံးခင် တစ်နှစ်လောက်​မှာလည်း “သူဟာ ငါ​မြတ်နိုးတဲ့ ငါ့ရဲ့​ချစ်သားပဲ။ သူ့​စကားကို နားထောင်ကြ” လို့ ယေဟောဝါ ပြောတာကို တမန်တော် သုံးယောက် ကြားခဲ့တယ်။ (မ. ၁၇:၅) နောက်ဆုံး၊ ယေရှု မသေဆုံးခင် ရက်​အနည်းငယ်​ မှာ ကောင်းကင်က​နေ ယေဟောဝါ ထပ်​စကား​ပြောခဲ့တယ်။—ယော. ၁၂:၂၈။

၁၆၊ ၁၇။ မမျှော်လင့်​ထားတဲ့​နည်းနဲ့ ယေရှုကို ယေဟောဝါ ဘယ်လို အသိအမှတ်ပြု​ခဲ့သလဲ။

^၁၆ ဘုရားကို စော်ကားသူ​အဖြစ် စွပ်စွဲ​ခံရပြီး အရှက်တကွဲ သေဆုံး​ရမယ်ဆိုတာ သိ​ပေ​မဲ့​လ​ည်း မိမိ​ဆန္ဒ​အတိုင်း မဟုတ်ဘဲ ဖခင်ရဲ့ ဆန္ဒ​အတိုင်း ဖြစ်ဖို့ ယေရှု ဆုတောင်းခဲ့တယ်။ (မ. ၂၆:၃၉၊ ၄၂) လောက​အသိအမှတ်ပြုမှု မဟုတ်ဘဲ ဖခင်ရဲ့ အသိအမှတ်ပြုမှု ရ​ချင်တဲ့​အတွက် “အရှက်ခွဲ​ခံ​ရတာကို အရေး​မစိုက်​ဘဲ ဒုက္ခ​သစ်တိုင်​ပေါ်မှာ အသေ​ခံခဲ့တယ်။” (ဟီ. ၁၂:၂) ယေဟောဝါ ဘယ်လို အသိအမှတ်ပြု​ခဲ့သလဲ။

^၁၇ ကောင်းကင်မှာ ဖခင်​နဲ့အတူ ခံစားခဲ့​ရတဲ့ ဘုန်းအသရေ​မျိုး ပြန်​ခံစား​လို​ကြောင်း ယေရှု မြေကြီးပေါ်​ရှိတုန်း ဆုတောင်းခဲ့တယ်။ (ယော. ၁၇:၅) အဲဒီထက်​ပိုပြီး မျှော်လင့်​တ​ယ်လို့ ကျမ်းစာမှာ မဖော်ပြထားဘူး။ ဒါပေမဲ့ ယေဟောဝါ ဘာ​လုပ်ပေး​ခဲ့သလဲ။ ရှင်ပြန်ထမြောက်​ပေး​ပြီး “သာလွန်​မြင့်မြတ်တဲ့ အနေအထား” နဲ့ မသေနိုင်တဲ့ နာမ်ဝိညာဉ်​အသက်ကို ပေးခဲ့တယ်။ * ဒီနည်းအားဖြင့် မမျှော်လင့်​ထားတဲ့​နည်းနဲ့ ဂုဏ်တင်​ခဲ့​တ​ယ်။ (ဖိ. ၂:၉။ ၁ တိ. ၆:၁၆) ယေရှုရဲ့ သစ္စာရှိ​လမ်းစဉ်​အတွက် ထူးခြားတဲ့ အသိအမှတ်ပြုမှု​ပါ​ပဲ။

၁၈။ လောကရဲ့ အသိအမှတ်ပြုမှု မ​ရှာ​ဖို့ ဘာက ကူညီပေး​မလဲ။

^၁၈ လောကရဲ့ အသိအမှတ်ပြုမှု မ​ရှာ​ဖို့ ဘာက ကူညီပေး​မလဲ။ သစ္စာရှိ​ကျေးကျွန်တွေ​ကို ယေဟောဝါ အမြဲ အသိအမှတ်ပြုကြောင်း၊ ကောင်းချီး​ပေး​ကြောင်း၊ တစ်ခါတလေ မမျှော်လင့်​ထားတဲ့ နည်းတွေနဲ့ ကောင်းချီး​ပေး​ကြောင်းကို သတိရ​ပါ။ အနာဂတ်မှာ မမျှော်လင့်​ထားတဲ့ ကောင်းချီးတွေ စောင့်ကြို​နေ​နိုင်တယ်။ လောလောဆယ် ဒီ​ဆိုးညစ်​တဲ့​လောကမှာ အခက်အခဲတွေ၊ စမ်းသပ်မှုတွေ ခံရပ်​ရင်း ဒီ​လောက​နဲ့ လောကရဲ့ အသိအမှတ်ပြုမှု အားလုံး ရွေ့​သွား​ကွယ်ပျောက်​နေ​ကြောင်း အမြဲ​သတိရ​နေ​ကြစို့။ (၁ ယော. ၂:၁၇) မေတ္တာရှင် ဖခင် ‘ယေဟောဝါဟာ ဖြောင့်မတ်တဲ့​ဘုရား​ဖြစ်လို့ ကျွန်တော်တို့ရဲ့ လုပ်ရပ်​ကို၊ နာမတော်​အတွက်​ပြ​တဲ့ မေတ္တာကို ဘယ်တော့မှ မမေ့​ပါဘူး။’ (ဟီ. ၆:၁၀) ကျွန်တော်တို့ကို မျက်နှာသာ​ပေး​ပြီး မမျှော်လင့်​ထားတဲ့​နည်းတွေနဲ့​တောင် ကောင်းချီး​ပေးပါလိမ့်မယ်။