၂၀၁၁ ခုနှစ်တုန်းက အီတလီမှာ စက်ဘီးရောင်းချရမှုဟာ ကားရောင်းချရမှုထက် ပိုခဲ့တယ်။ စီးပွားရေးကျပ်တည်းမှု၊ လောင်စာဆီကုန်ကျစရိတ်နဲ့ ကားတွေအတွက် ပြုပြင်ထိန်းသိမ်းမှု ကုန်ကျစရိတ်တွေကြောင့် ဖြစ်နိုင်တယ်။ စက်ဘီးကတော့ ပြုပြင်ထိန်းသိမ်းမှုစရိတ် သက်သာတယ်၊ အသုံးပြုရတာလည်းလွယ်ပြီး အဆင်လည်းပြေတယ်။

ယေဟောဝါသက်သေလူငယ် ၁၇ ယောက်ဟာ စစ်ဘက်ဆိုင်ရာအာဏာပိုင်တွေရဲ့ ကြီးကြပ်မှုအောက်မှာရှိတဲ့ အရပ်ဘက်လုပ်ငန်းမှာ လုပ်ဆောင်ဖို့ငြင်းပယ်တာကြောင့် အာမေးနီးယားအစိုးရက ဖမ်းဆီးထားခြင်းဟာ သူတို့ရဲ့အခွင့်အရေးကို ချိုးဖောက်ရာရောက်တယ်လို့ လူ့အခွင့်အရေးဆိုင်ရာ ဥရောပတရားရုံးက စီရင်ချက်ချလိုက်တယ်။ အာမေးနီးယားအစိုးရက လူငယ် ၁၇ ယောက်အတွက် နစ်နာကြေးနဲ့ တရားရုံးစရိတ်ကို ပေးဆောင်ရမှာဖြစ်တယ်။

လူမှုဆက်သွယ်ရေးကွန်ရက်ဝက်ဘ်ဆိုက်တွေကြောင့် ဒုက္ခရောက်ခဲ့ရတဲ့ ကလေးတွေထဲက ၆၃ ရာခိုင်နှုန်းဟာ ဖြစ်လာနိုင်တဲ့အန္တရာယ်နဲ့ပတ်သက်ပြီး မိဘတွေရဲ့ သတိပေးမှုကို မခံခဲ့ရဘူး။ အမှု ၅၉၉ ခုကို သုံးသပ်ကြည့်တဲ့အခါ လိင်မုဆိုးတွေဖြစ်တဲ့ တရားခံ ၇၄ ရာခိုင်နှုန်းက ကလေးတွေကိုပစ်မှတ်ထားပြီး အဲဒီဝက်ဘ်ဆိုက်တွေကို တမင်တကာအသုံးပြုတာပါလို့ ဝန်ခံကြတယ်။

ယာဉ်ကြောပိတ်ဆို့မှုကို လျှော့ချဖို့အတွက် အဓိကမြို့ကြီးတွေမှာ မော်တော်ယာဉ်မှတ်ပုံတင်ခြင်းကို ကန့်သတ်လိုက်တယ်။ ဥပမာ၊ ပေကျင်းမြို့မှာ တစ်နှစ်ကို မှတ်ပုံ တင်မှု ၂၄၀၀၀၀ ထက်ပိုတင်ခွင့်ရရှိမှာမဟုတ်ဘူး။ ၂၀၁၂ ခုနှစ် ဩဂုတ်လမှာ တရားဝင်မှတ်ပုံတင်ခွင့်ရနိုင်ဖို့ လူပေါင်း ၁၀၅၀၀၀၀ က မဲနှိုက်ခဲ့တဲ့ထဲက ၁၉၉၂၆ ခုပဲ မှတ်ပုံတင်ခွင့် ရရှိတယ်။ လျှောက်လွှာတင်သူ ၅၃ ယောက်မှာ ၁ ယောက်ပဲ မှတ်ပုံတင်ခွင့်ရတယ်ဆိုတဲ့ အဓိပ္ပာယ်ဖြစ်တယ်။