စာရှုသူများထံမှမေးခွန်းလွှာ
စာရှုသူများထံမှမေးခွန်းလွှာ
• လူစီဖာဟူသည် စာတန်အတွက် သမ္မာကျမ်းစာအသုံးပြုသောအမည်လော။
လူစီဖာဟူသောအမည်သည် ကျမ်းစာစောင်များ၌ တစ်ကြိမ်ပါရှိပြီး အချို့ဘာသာပြန်ကျမ်း၌သာဖြစ်သည်။ ဥပမာ၊ ဂျိမ်းစ်ဘုရင်ဘာသာပြန်ကျမ်းက ဟေရှာယ ၁၄:၁၂ ကိုဤသို့ ပြန်ဆို၏– “အိုလူစီဖာ၊ နံနက်သား၊ သင်သည်ကောင်းကင်က ကျလေပြီတကား!”
“ထွန်းလင်းသူ” ဟုဘာသာပြန်ဆိုထားသော ဟေဗြဲစကားလုံးသည် “မိုးသောက်ကြယ်” ကိုဆိုလို၏။ စက်ပ်တွားဂျင့်ဘာသာပြန်ကျမ်းက “မိုးသောက်ချိန်ကိုယူဆောင်လာသူ” ဟုဆိုလိုသော ဂရိစကားလုံးကိုအသုံးပြုသည်။ ထို့ကြောင့် ဘာသာပြန်ကျမ်းအချို့က မူရင်းဟေဗြဲစကားလုံး “နံနက်ကြယ်” သို့မဟုတ် “ကြယ်နီ” ဟုပြန်ဆိုကြသည်။ သို့သော် ဂျရုမ်း၏ လက်တင်ဗားလ်ဂိတ်ကျမ်းက “လူစီဖာ” (အလင်းဆောင်သူ) ကိုအသုံးပြုထားရာ ဘာသာပြန်ကျမ်းအသီးသီး၌ ၎င်းအသုံးအနှုန်းကိုတွေ့ရခြင်းဖြစ်သည်။
၎င်းလူစီဖာကား မည်သူနည်း။ “ထွန်းလင်းသူ” သို့မဟုတ် “လူစီဖာ” ဟူသောအသုံးအနှုန်းကို “ဗာဗုလုန်ရှင်ဘုရင်ကိုရည်ဆောင်၍ ပုံစကား” အဖြစ် ဣသရေလလူမျိုးတို့ မြွက်ဆိုရန် ဟေရှာယ၏ ပရောဖက်ပြုမိန့်မှာချက်တွင် တွေ့ရသည်။ သို့ဖြစ်၍ ယင်းသည် နေဗုခဒ်နေဇာဖြင့်အစပြုသော ဗာဗုလုန်မင်းဆက်ကို အဓိကရည်စူးသည့် ပြောဆိုချက်တစ်ပိုင်းဖြစ်သည်။ “မိုးသောက်ကြယ် (“ထွန်းလင်းသူ၊” ကဘ)” ဟူသောဖော်ပြချက်သည် ဝိညာဉ်သတ္တဝါတစ်ပါးကိုမဟုတ်ဘဲ လူသားတစ်ဦးကိုပြောခြင်းဖြစ်ကြောင်း ဤဖော်ပြချက်၌ ထပ်မံတွေ့ရသည်– “သင်သည် မရဏာနိုင်ငံ သင်္ချိုင်းတွင်း (ရှီးအိုးလ်) ထဲသို့ နှိမ့်ချခြင်းကိုခံရလေပြီ။” ရှီးအိုးလ်သည် စာတန်နေထိုင်ရာအရပ်မဟုတ်ဘဲ လူသားတို့၏ သာမန်သင်္ချိုင်းပင်ဖြစ်သည်။ ထို့အပြင် လူစီဖာအားတွေ့ မြင်သူတို့က ဤသို့မေးကြသည်– “မြေကြီးကိုတုန်လှုပ်စေ၍ တိုင်းနိုင်ငံများကို လှုပ်ချောက်သောသူကား ဤသူလော။” “လူစီဖာ” သည် ဝိညာဉ်သတ္တဝါတစ်ပါးကိုမဟုတ်ဘဲ လူသားတစ်ဦးကိုရည်ညွှန်းသည်မှာ ရှင်းပါသည်။—ဟေရှာယ ၁၄:၄၊ ၁၅၊ ၁၆။
ဗာဗုလုန်မင်းဆက်သည် အဘယ်ကြောင့် ဤမျှထင်ရှားကျော်ကြားစွာ ဖော်ပြခံရသနည်း။ ဗာဗုလုန်ရှင်ဘုရင် ကျဆုံးပြီးနောက် သူ့ကို ထွန်းလင်းသူဟု ကဲ့ရဲ့လှောင်ပြောင်သည့်နည်းဖြင့် ခေါ်ဆိုကြမည်ကို ကျွန်ုပ်တို့သဘောပေါက်ရမည်။ (ဟေရှာယ ၁၄:၃) အတ္တမာနက ဗာဗုလုန်မင်းများကို ပတ်ဝန်းကျင်ရှိသူများအထက်တွင် မိမိကိုယ်ကိုမြှင့်တင်စေခဲ့သည်။ ဗာဗုလုန်မင်းဆက်တို့သည် အလွန်မာနထောင်လွှားရကား ဤသို့ဝါကြွားသည်ကို ပုံဖော်ပြခဲ့၏– “ကောင်းကင်သို့ ငါတက်မည်။ ဘုရားသခင်၏ကြယ်များထက် ငါ့ပလ္လင်ကိုငါချီးမြှင့်မည်။ မြောက်မျက်နှာဘက် အဝေးဆုံးသောအရပ်၊ ဘုရားတို့စုဝေးရာတောင်ပေါ်မှာ ငါနန်းထိုင်မည်။ . . . အမြင့်ဆုံးသောဘုရားနှင့် ဂုဏ်တူမည်။”—ဟေရှာယ ၁၄:၁၃၊ ၁၄၊ သမ္မာ။
“ဘုရားသခင်၏ကြယ်များ” မှာ ဒါဝိဒ်မင်းမျိုးမှဆင်းသက်လာသော ဘုရင်များဖြစ်သည်။ (တောလည်ရာ ၂၄:၁၇) ဒါဝိဒ်လက်ထက်မှစ၍ ဤ “ကြယ်များ” သည် ဇိအုန်တောင်မှ အုပ်ချုပ်ခဲ့ကြသည်။ ရှောလမုန်သည် ယေရုရှလင်မြို့တွင် ဝတ်ပြုရာအိမ်တော် တည်ဆောက်ပြီးနောက် ဇိအုန်ဟူသည့်အမည်သည် မြို့တစ်မြို့လုံးနှင့်သက်ဆိုင်လာသည်။ ပညတ်ပဋိညာဉ်အရ ဣသရေလအမျိုးသားအားလုံးသည် တစ်နှစ်လျှင်သုံးကြိမ် ဇိအုန်သို့သွားရောက်ရကြသည်။ ထို့ကြောင့် ၎င်းသည် “စုဝေးရာတောင်” ဖြစ်လာခဲ့သည်။ နေဗုခဒ်နေဇာသည် ယုဒဘုရင်မင်းတို့ကို တိုက်ခိုက်အနိုင်ယူပြီး ထိုတောင်မှ သူတို့ကိုရွှေ့လိုက်မည်ဟု စိတ်ဆုံးဖြတ်ထားခြင်းအားဖြင့် ထို “ကြယ်များ” အပေါ်တွင် မိမိကိုယ်ကိုချီးမြှောက်ရန် ရည်ရွယ်ကြောင်း ကြေညာသည်။ သူတို့ကို အောင်နိုင်ခဲ့ခြင်းသည် ယေဟောဝါကြောင့်ဖြစ်ကြောင်း ကိုယ်တော့်အားဂုဏ်တင်မည့်အစား သူသည် မာန်မာနထောင်လွှားစွာဖြင့် ယေဟောဝါ၏နေရာကို ဝင်ယူလေသည်။ ထို့ကြောင့် ဗာဗုလုန်မင်းဆက်သည် ကျဆုံးပြီးနောက် ကဲ့ရဲ့လှောင်ပြောင်ခံရသည့်အနေနှင့် “ထွန်းလင်းသူ” ဟုခေါ်ခံခဲ့ရသည်။
ဗာဗုလုန်ရှင်ဘုရင်များ၏ မာန်မာနသည် “ဤလောကကိုအစိုးရသောဘုရား” စာတန်၏စိတ်သဘောကို အမှန်ရောင်ပြန်ဟပ်ပေသည်။ (၂ ကောရိန္သု ၄:၄) သူသည်လည်း အာဏာမက်မောပြီး ယေဟောဝါဘုရားသခင်၏အထက် နေလိုစိတ်ရှိသည်။ သို့တိုင် သမ္မာကျမ်းစာအရ စာတန်ကို လူစီဖာဟူသောအမည်မပေးပါ။
• ၁ ရာဇဝင်ချုပ် ၂:၁၃-၁၅ (သမ္မာ) ကဒါဝိဒ်ကို ယေရှဲ၏ သတ္တမသားအဖြစ်ဖော်ပြလျက်ကယ် ၁ဓမ္မရာဇဝင် ၁၆:၁၀၊၁၁ က အဋ္ဌမသားဟု အဘယ်ကြောင့်ဖော်ပြသနည်း။
ရှေးခေတ်ဣသရေလဘုရင်ရှောလုသည် စစ်မှန်သောဝတ်ပြုရေးမှ သွေဖည်သွားပြီးနောက် ယေဟောဝါဘုရားသခင်သည် ယေရှဲ၏သားတစ်ဦးကို ဘုရင်အဖြစ်ဘိသိက်ပေးရန် ပရောဖက်ရှမွေလကို စေလွှတ်ခဲ့သည်။ ဘီ.စီ.အီး. ၁၁ ရာစုတွင် ရှမွေလကိုယ်တိုင်ရေးသားခဲ့သော မှုတ်သွင်းခံ ဤသမိုင်းဝင်ဖြစ်ရပ်၌ ဒါဝိဒ်ကို ယေရှဲ၏အဋ္ဌမသားအဖြစ် ဖော်ပြသည်။ (၁ ဓမ္မရာဇဝင် ၁၆:၁၀-၁၃) သို့သော် အနှစ် ၆၀၀ ခန့်လွန်ပြီးနောက် ယဇ်ပုရောဟိတ်ဧဇရ ရေးသားခဲ့သောမှတ်တမ်းက ဤသို့ဆို၏– “ယေရှဲသားဦးကား ဧလျာဘ၊ ဒုတိယသား အဘိနဒပ်၊ တတိယသား ရှိမာ၊ စတုတ္ထသား နာသနေလ၊ ပဉ္စမသား ရဒ္ဒဲ၊ ဆဋ္ဌမသား ဩဇင်၊ သတ္တမသား ဒါဝိဒ်တည်း။” (၁ ရာဇဝင်ချုပ် ၂:၁၃-၁၅၊ သမ္မာ) ဒါဝိဒ်၏ညီအစ်ကိုတစ်ဦး အဘယ်သို့ ဖြစ်သွားသနည်း၊ သူ၏အမည်ကို ဧဇရအဘယ်ကြောင့် ချန်လှပ်ထားရသနည်း။
သမ္မာကျမ်းစာက ယေရှဲ၌ “သားရှစ်ယောက်ရှိ၏” ဟုဖော်ပြသည်။ (၁ ဓမ္မရာဇဝင် ၁၇:၁၂) သူ၏သားတစ်ဦးသည် အိမ်ထောင်ပြုပြီး သားသမီးရသည့်အထိ အသက်ရှင်ခဲ့ပုံမရှိပေ။ ထိုသူသည် သားစဉ်မြေးဆက်မရှိသဖြင့် မျိုးနွယ်အမွေ ခံမည်မဟုတ်၊ ယေရှဲ၏ဆွေစဉ်မျိုးဆက်စာရင်းတွင်လည်း ပါတော့မည်မဟုတ်ချေ။
ယခု ဧဇရခေတ်ကို ပြန်စဉ်းစားကြည့်ကြစို့။ ရာဇဝင်ချုပ်ကျမ်းကို သူရေးသားပြုစုခဲ့ခြင်း၏ နောက်ခံအခြေအနေကို သုံးသပ်ကြည့်ပါ။ ဗာဗုလုန်သို့ ပြည်နှင်ခံခဲ့ရသည့်အချိန်မှာ လွန်ခဲ့သော အနှစ် ၇၇ နှစ်ခန့်ကပြီးဆုံးခဲ့၍ ယခု ဂျူးတို့သည် မိမိတို့ ပြည်၌ ပြန်ရောက်ရှိနေကြပြီ။ ပါးရှားဘုရင်သည် ဘုရားသခင့်ပညတ်တော်ကို သွန်သင်ပေးပြီး ယေဟောဝါ၏အိမ်တော်ကို လှပတင့်တယ်စေမည့် မင်းများ၊ တရားသူကြီးများကို ခန့်အပ်ရန် ဧဇရအား အခွင့်အာဏာပေးထားသည်။ အမျိုးအနွယ်အမွေခံယူရန်နှင့် ယဇ်ပုရောဟိတ်အဖွဲ့တွင် အခွင့်ရှိသူများသာ အမှုဆောင်စေရန် တိကျသောမျိုးရိုးစဉ်ဆက်စာရင်း လိုအပ်ခဲ့သည်။ ထို့ကြောင့် ဧဇရသည် ယုဒနှင့်ဒါဝိဒ်တို့၏ ရှင်းလင်းပြတ်သားပြီး စိတ်ချရသော ဆွေစဉ်မျိုးဆက်စာရင်းအပါအဝင် နိုင်ငံ၏သမိုင်းအပြည့်အစုံကို ရေးသားခဲ့ရခြင်းဖြစ်သည်။ သားသမီးမရှိဘဲ သေဆုံးခဲ့သူ ယေရှဲ၏သားအမည်သည် မလိုသောကြောင့် သူ၏အမည်ကို ဧဇရချန်လှပ်ခဲ့ခြင်းဖြစ်မည်။