သင်သိပါသလော
သင်သိပါသလော
ပဋိညာဉ်သေတ္တာသည် အမှန်အားဖြင့် မည်သို့ဖြစ်သွား သနည်း။
အစ္စရေးလူမျိုးအတွက် ပဋိညာဉ်သေတ္တာသည် ဘုရားသခင်ရောက်ရှိနေခြင်း၏အထိမ်းအမှတ်ဖြစ်သည်။ (ထွက်မြောက်ရာ ၂၅:၂၂) ယင်းသည် ရွှေဖြင့်မွမ်းမံထားသည့် မြင့်မြတ်သောသစ်သားသေတ္တာဖြစ်ပြီး ထိုအထဲတွင် မောရှေထည့်ထားသည့် ပညတ်တော်ကျောက်ပြားနှစ်ချပ်ရှိသည်။ အစ္စရေးလူမျိုးသည် တောကန္တာရတွင်နေထိုင်စဉ် သေတ္တာတော်ကို စုဝေးရာတဲတော်၏အသန့်ရှင်းဆုံးအခန်းတွင် ထားရှိသည်။ (ထွက်မြောက်ရာ ၂၆:၃၃) နောက်ဆုံး၊ သေတ္တာတော်ကို ရှောလမုန်ဆောက်လုပ်သောဝတ်ပြုရာအိမ်တော်၏ အသန့်ရှင်းဆုံးအခန်းတွင် ထားရှိသည်။—၃ ဓမ္မရာဇဝင် ၆:၁၉။
ဘီစီ ၆၄၂ တွင် ဘုရင်ယောရှိသည် သေတ္တာတော်ကို ဝတ်ပြုရာအိမ်တော်၌ပြန်ထားရှိသည်ဟုဖော်ပြသော ၂ ရာဇဝင်ချုပ် ၃၅:၃ သည် ပဋိညာဉ်သေတ္တာမည်သို့ဖြစ်သွားသည်နှင့်ပတ်သက်သော နောက်ဆုံးဖော်ပြချက်ဖြစ်၏။ ယောရှိ၏အဘိုးဖြစ်သူ၊ ဝတ်ပြုရာအိမ်တော်တွင်ရုပ်ပုံကိုထားရှိခဲ့သော အယူဖောက်ပြန်သူ မနာရှေသည် ပဋိညာဉ်သေတ္တာကို ဖယ်ရှားခဲ့ခြင်းဖြစ်နိုင်သည်။ သို့မဟုတ် ယောရှိလက်ထက် ဝတ်ပြုရာအိမ်တော်ပြုပြင်မွမ်းမံချိန်အတွင်း သေတ္တာတော်ကို လုံခြုံစိတ်ချရသည့်နေရာသို့ ပြောင်းရွှေ့လိုက်ခြင်းလည်း ဖြစ်နိုင်သည်။ (၂ ရာဇဝင်ချုပ် ၃၃:၁၊ ၂၊ ၇; ၃၄:၁၊ ၈-၁၁) ထိုအချိန်နောက်ပိုင်း သေတ္တာတော်မည်သို့ဖြစ်သွားသည်ကို မသိရပေ။ အကြောင်းမှာ ဘီစီ ၆၀၇ တွင် ဂျေရုဆလင်မြို့ကို ဗာဗုလုန်တို့သိမ်းပိုက်ချိန်၌ ဝတ်ပြုရာအိမ်တော်မှယူဆောင်သွားသည့် ပစ္စည်းစာရင်းတွင် သေတ္တာတော်မပါဝင်သောကြောင့်ဖြစ်၏။—၄ ဓမ္မရာဇဝင် ၂၅:၁၃-၁၇။
ဇေရုဗဗေလပြန်တည်ဆောက်သော ဝတ်ပြုရာအိမ်တော်ရှိ အသန့်ရှင်းဆုံးအခန်းတွင် ပဋိညာဉ်သေတ္တာကို ပြန်လည်ထားရှိသည်ဟူ၍ ကျမ်းစာမဖော်ပြချေ။ ပဋိညာဉ်သေတ္တာနောက်တစ်လုံးကို အစားထိုးခဲ့ပုံလည်းမရပေ။—ဧဇရ ၁:၇-၁၁။
ခရစ်ယာန်ဂရိကျမ်းစောင်များမှ ယာကုပ် (James) ဟုခေါ်သော အမျိုးသားများကား မည်သူများနည်း။
ဂရိကျမ်းစောင်များတွင် ယာကုပ်(James)ဟုခေါ်သော အမျိုးသားလေးဦးရှိသောကြောင့် ရှုပ်ထွေးစရာဖြစ်နိုင်သည်။ * တစ်ဦးမှာ တမန်တော်ယုဒ(ရှကာရုတ်မဟုတ်)၏ဖခင်ဖြစ်ပြီး သူ့အကြောင်း ဘာမျှမသိရှိရပေ။—လုကာ ၆:၁၆; တမန်တော် ၁:၁၃။
နောက်တစ်ဦးမှာ ဇေဗေဒဲ၏သား ယာကုပ်ဖြစ်သည်။ ထိုယာကုပ်သည် ယောဟန်၏အစ်ကိုဖြစ်ပြီး သူတို့နှစ်ဦးစလုံးသည် ယေရှု၏တမန်တော်များဖြစ်ကြသည်။ (မဿဲ ၁၀:၂) သူ၏မိခင်မှာ ယေရှုမိခင်၏ညီမ ရှာလုံဖြစ်ပုံရသည်။ (မဿဲ ၂၇:၅၅၊ ၅၆ ကို မာကု ၁၅:၄၀၊ ၄၁; ယောဟန် ၁၉:၂၅ တို့နှင့်နှိုင်းယှဉ်ပါ။) သို့ဖြစ်ပါက ယာကုပ်သည် ယေရှု၏ညီတစ်ဝမ်းကွဲဖြစ်သည်။ ယာကုပ်သည် တံငါသည်ဖြစ်ပြီး သူနှင့်သူ့ညီသည် ပေတရု၊ အန္ဒြေတို့နှင့်အတူ အလုပ်လုပ်ခဲ့ကြသည်။—မာကု ၁:၁၆-၁၉; လုကာ ၅:၇-၁၀။
နောက်တစ်ဦးမှာ အာလဖဲ၏သား ယာကုပ်ဖြစ်ပြီး သူသည်လည်း ယေရှု၏တမန်တော်တစ်ပါးဖြစ်သည်။ (မာကု ၃:၁၆-၁၈) မာကု ၁၅:၄၀ တွင် သူ့ကို “ယာကုပ်ငယ်” အဖြစ် ဖော်ပြထား၏။ သူသည် ဇေဗေဒဲ၏သား ယာကုပ်ထက် ကိုယ်ခန္ဓာသေးသောကြောင့် သို့မဟုတ် အသက်ငယ်သောကြောင့် “ယာကုပ်ငယ်” ဟူ၍အခေါ်ခံရခြင်းဖြစ်နိုင်သည်။
နောက်ဆုံးတစ်ဦးမှာ ယောသပ်နှင့်မာရိ၏သားဖြစ်ပြီး ယုဒ၏အစ်ကို၊ ယေရှု၏မိတူဖကွဲညီဖြစ်သည်။ (မာကု ၆:၃; ဂလာတိ ၁:၁၉) ယေရှု ဓမ္မအမှုဆောင်ချိန်အတွင်း ယာကုပ်သည် ကိုယ်တော့်တပည့်တစ်ဦးမဖြစ်သေးပါ။ (မဿဲ ၁၂:၄၆-၅၀; ယောဟန် ၇:၅) သို့သော် အေဒီ ၃၃၊ ပင်တေကုတ္တေပွဲနေ့မတိုင်မီတွင် ယာကုပ်သည် မိခင်၊ ညီများ၊ တမန်တော်များနှင့်အတူ ဂျေရုဆလင်မြို့ရှိအထက်ခန်းတစ်ခုတွင် ဆုတောင်းခဲ့သည်။ (တမန်တော် ၁:၁၃၊ ၁၄) နောက်ပိုင်း၊ ယာကုပ်သည် ဂျေရုဆလင်အသင်းတော်တွင် အထင်ကရအသင်းသားတစ်ဦးဖြစ်လာပြီး သူ့အမည်တပ်ထားသည့်ကျမ်းစောင်ကို ရေးသားခဲ့သည်။—တမန်တော် ၁၂:၁၇; ယာကုပ် ၁:၁။
[အောက်ခြေမှတ်ချက်]
^ အပိုဒ်၊ 7 မူရင်းကျမ်းမှ ဂျေးကော့ပ်(Jacob) နှင့် ဂျိမ်းစ် (James) ဟူသောအမည်တို့ကို မြန်မာဘာသာစကားတွင် ယာကုပ်ဟူ၍တစ်မျိုးတည်းပြန်ဆိုထား၏။ ကျမ်းစာတွင် ပုဂ္ဂိုလ်အချို့၏အမည်များမှာ တူကြသည်။ ဥပမာ၊ “အာဗြဟံ၊ ဣဇာက်၊ ယာကုပ် (Jacob)” ဟူသောစကားစု အကြိမ်များစွာပါရှိပြီး မဿဲ ၁:၁၆ တွင် “မာရိ၏ခင်ပွန်းယောသပ်” ၏ဖခင်အမည်မှာလည်း ယာကုပ် (Jacob) ဖြစ်သည်ဟုဖော်ပြ၏။