ပင်လယ်လိပ်ကြီးတချို့ရဲ့ သက်တမ်းက နှစ်ပေါင်း ၁၅၀ ရှိတယ်။ သစ်ပင်တချို့ရဲ့ သက်တမ်းကျတော့ နှစ်ပေါင်း ၃,၀၀၀ ရှိတယ်။ လူ့သက်တမ်းကျတော့ အရမ်းကို တိုတောင်းပါတယ်။ ဒါပေမဲ့ ကျွန်ုပ်တို့ဟာ ပင်လယ်လိပ်ကြီး ဒါမှမဟုတ် သစ်ပင်ထက် ပိုပြီးအဓိပ္ပာယ်ရှိရှိ အသက်ရှင်နိုင်ကြတယ်။ ယေဟောဝါဘုရားသခင်ဟာ လူတွေကို တေးဂီတ၊ အားကစား၊ အစာစားတာ၊ သင်ယူတာ၊ ခရီးသွားတာ၊ လူတွေနဲ့ ပေါင်းသင်းတာတွေကို မွေ့လျော်ပြီး ထာ၀စဉ် အသက်ရှင်လိုတဲ့ဆန္ဒနဲ့ ဖန်ဆင်းခဲ့တယ်။—ဒေသနာ ၃:၁၁ ကိုဖတ်ပါ။

ယေဟောဝါဟာ ထာဝစဉ်အသက်ရှင်တဲ့ ဘုရားသခင်ဖြစ်တယ်။ ကိုယ်တော်ဟာ ဘယ်တော့မှ မသေနိုင်ဘူး။ အသက်ပေးပိုင်ရှင် ဖြစ်တဲ့အတွက် တခြားသူတွေကို ထာဝစဉ်အသက်ရှင်အောင် လုပ်ပေးနိုင်တယ်။ (ဆာလံ ၃၆:၉; ဟဗက္ကုတ် ၁:၁၂) ဒါ့အပြင် ကိုယ်တော့်စကား နားထောင်တဲ့သူတွေကို ထာဝစဉ်အသက်ရှင်ခွင့် ပေးမယ်လို့လည်း ကတိပြုထားတယ်။ သူတို့ကို ပြန်လည် နုပျိုစေပါလိမ့်မယ်။—ယောဘ ၃၃:၂၄၊ ၂၅; ဟေရှာယ ၂၅:၈; ၃၃:၂၄ တို့ကိုဖတ်ပါ။

ကျန်းကျန်းမာမာနဲ့ ထာဝစဉ် အသက်ရှင်စေမယ်ဆိုတဲ့ ဘုရားသခင်ရဲ့ကတိကို ကျွန်ုပ်တို့ ယုံကြည်ကိုးစားနိုင်အောင် အံ့ဖွယ်အမှုတွေ ယေရှုပြသခဲ့တယ်။ ယေရှုဟာ ရောဂါအမျိုးမျိုးကို ကုသပေးခဲ့ပြီး သေလွန်သူတွေကိုတောင် အသက်ပြန်ရှင်စေခဲ့တယ်။—လုကာ ၇:၁၁-၁၅၊ ၁၈၊ ၁၉၊ ၂၂ ကိုဖတ်ပါ။

ဘုရားသခင်က ကျွန်ုပ်တို့ကို ဖိနှိပ်မှုနဲ့ အကြမ်းဖက်မှုတွေ ပြည့်နှက်နေတဲ့ ဒီလောကမှာမဟုတ်ဘဲ သာယာလှပပြီး လုံခြုံမှုရှိတဲ့ မြေကြီးပရဒိသုမှာ ထာဝစဉ်အသက်ရှင်စေချင်တယ်။ (ဆာလံ ၃၇:၉၊ ၂၉; ဟေရှာယ ၆၅:၂၁၊ ၂၂) ဒီကမ္ဘာကြီးဟာ သာယာလှပတဲ့ အခြေအနေကို ပြန်ရောက်သွားတဲ့အခါ သန်းနဲ့ချီတဲ့ သေလွန်သူတွေ အသက်ပြန်ရှင်လာကြမယ်။ အသက်ပြန်ရှင်လာတဲ့သူတွေဟာ ဘုရားသခင်ကိုဝတ်ပြုပြီး ကိုယ်တော့်စကားနားထောင်ဖို့ ရွေးချယ်မယ်ဆိုရင် ထာဝစဉ်အသက်ရှင်ခွင့် ရရှိပါလိမ့်မယ်။—လုကာ ၂၃:၄၂၊ ၄၃; ယောဟန် ၅:၂၈၊ ၂၉ တို့ကို ဖတ်ပါ။

ထာဝရအသက်ကို ဘုရားသခင်ဆီကပဲ ရရှိနိုင်ပါတယ်။ ဒါကြောင့် ဘုရားသခင်အကြောင်း လေ့လာခြင်းအားဖြင့် ကိုယ်တော်နဲ့ ရင်းနှီးလာအောင် ပြုလုပ်သင့်တယ်။ သမ္မာကျမ်းစာမှာ ဘုရားသခင်နဲ့ပတ်သက်တဲ့ အသိပညာ ဆည်းပူးခြင်းကို အစာစားခြင်းနဲ့ ဆက်စပ်ဖော်ပြထားတယ်။ (မဿဲ ၄:၄) အစာစားတာကို ခုံမင်ကြပေမယ့် အစာကိုရယူပြီး ပြင်ဆင်ဖို့ ကြိုးစားအားထုတ်ဖို့တော့ လိုအပ်ပါတယ်။ အလားတူ ပုံဆောင်အစာဖြစ်တဲ့ ဘုရားသခင်နဲ့ဆိုင်တဲ့ အသိပညာကို ဆည်းပူးဖို့လည်း ကြိုးစားအားထုတ်ဖို့ လိုအပ်တယ်။ ဘုရားသခင်နဲ့ရင်းနှီးလာပြီး ထာဝရအသက်ရရှိခြင်းက အရမ်းကို တန်ဖိုးရှိပါတယ်။—လုကာ ၁၃:၂၃၊ ၂၄; ယောဟန် ၆:၂၇; ၁၇:၃ တို့ကိုဖတ်ပါ။