အီစတာပွဲကို “ခရစ်ယာန်ချာ့ခ်ျရဲ့ အရေးပါတဲ့ပွဲ၊ ယေရှုခရစ် အသက်ပြန်ရှင်လာတဲ့ အထိမ်းအမှတ်အနေနဲ့ ကျင်းပတဲ့ပွဲ” လို့ ဗြိတိန်နီကာစွယ်စုံကျမ်းမှာ ဖော်ပြထားပါတယ်။ ဒါပေမဲ့ ဒီပွဲက ခရစ်ယာန်တွေ ကျင်းပသင့်တဲ့ပွဲလား။

ရှေးဟောင်းပစ္စည်း ဟုတ်မဟုတ်သိနိုင်ဖို့ ပစ္စည်းတစ်ခုကို အသေးစိတ်ဆန်းစစ်ကြည့်ဖို့ လိုတယ်။ အဲဒီလိုပဲ အီစတာပွဲဟာ ခရစ်ယာန်တွေကျင်းပသင့်တဲ့ပွဲ ဟုတ်မဟုတ်ဆိုတာသိဖို့ အီစတာပွဲနဲ့ ဆက်နွှယ်နေတဲ့အရာတွေကို အသေးစိတ်ဆန်းစစ်ဖို့ လိုပါတယ်။

ပထမတစ်ချက်အနေနဲ့ ယေရှုက မိမိရဲ့အသက်ပြန်ရှင်လာခြင်းကိုမဟုတ်ဘဲ သေခြင်းကိုအောက်မေ့ဖို့ အထိမ်းအမှတ်ပွဲကျင်းပပါလို့ တပည့်တွေကို မိန့်မှာခဲ့တယ်။ အဲဒီပွဲကို “သခင့်ညစာစားပွဲ” လို့ တမန်တော်ပေါလု နာမည်ပေးခဲ့တယ်။—၁ ကောရိန္သု ၁၁:၂၀; လုကာ ၂၂:၁၉၊ ၂၀။

ဒါ့အပြင် အီစတာပွဲ ဓလေ့ထုံးစံတွေက ယေရှုအသက်ပြန်ရှင်လာခြင်းနဲ့ “ဘာမှမဆိုင်ဘဲ မိရိုးဖလာဓလေ့တွေကနေ ဆင်းသက်လာတာ” လို့ ဗြိတိန်နီကာစွယ်စုံကျမ်းမှာ ဖော်ပြထားတယ်။ ဥပမာ၊ အီစတာပွဲရဲ့ လူကြိုက်များတဲ့ ကြက်ဥနဲ့ ယုန် အမှတ်သင်္ကေတအကြောင်း စွယ်စုံကျမ်းတစ်ကျမ်း [The Encyclopedia of Religion] မှာဒီလိုဆိုထားတယ်– “အီစတာကြက်ဥက ဘဝသစ်မွေးဖွားလာတာရဲ့ အမှတ်သင်္ကေတဖြစ်ပြီး အီစတာယုန်ကတော့ နွေဦးရာသီရောက်တော့မယ်ဆိုတဲ့ အမှတ်သင်္ကေတဖြစ်တယ်။ ယုန်ကို မျိုးပွားနှုန်းကောင်းတဲ့ တိရစ္ဆာန်လို့ လူသိများတယ်။”

အီစတာပွဲမှာ ဒီဓလေ့တွေ ဘယ်လိုပါဝင်ပတ်သက်လာသလဲဆိုတာကို အလယ်ခေတ်စာပေပညာရှင် ဖိလစ်ဝေါလ်တာက ရှင်းပြပေးထားတယ်။ သူ ဒီလိုဖော်ပြခဲ့တယ်– “အယူမှားဓလေ့ထုံးစံတွေကို ခရစ်ယာန်ဘာသာထဲ သွတ်သွင်းနေချိန်” အတွင်း “ဆောင်းအကုန် နွေအကူးမှာ ကျင်းပတဲ့” အယူမှားပွဲကို ယေရှုအသက်ပြန်ရှင်လာခြင်းနဲ့ ရောနှောပစ်လိုက်ဖို့ လွယ်ကူသွားတယ်။ အယူမှားဘာသာရဲ့ပြက္ခဒိန်ထဲ “ခရစ်ယာန်တွေရဲ့ အထိမ်းအမှတ်ပွဲတွေ” ထည့်သွင်းလိုက်တာက ခရစ်ယာန်ဘာသာထဲ အယူမှားဘာသာဝင်တွေ အုပ်စုလိုက်ပြောင်းဝင်လာဖို့ ပိုလွယ်ကူစေတယ်လို့ ဝေါလ်တာ ထပ်ပြောခဲ့တယ်။

တမန်တော်တွေ အသက်ရှင်နေတုန်းမှာ “ခရစ်ယာန်ဘာသာထဲ” အယူမှားဓလေ့တွေ သွတ်သွင်းတာမျိုး မရှိခဲ့ကြဘူး။ အကြောင်းကတော့ သူတို့ဟာ အယူမှားဓလေ့တွေ ဝင်မလာရအောင် “တားဆီး” ခဲ့ကြလို့ပါ။ (၂ သက်သာလောနိတ် ၂:၇) တမန်တော်ပေါလုက သူ “မရှိတဲ့နောက် . . . မိမိတို့နောက် ဆွဲဆောင်ရန် မှားယွင်းသော သွန်သင်ချက်များကို ဟောပြောသူများလည်း သင်တို့အထဲမှာ ပေါ်လာ” မယ်လို့ သတိပေးခဲ့ပါတယ်။ (တမန်တော် ၂၀:၂၉၊ ၃၀) ပထမရာစုနှောင်းပိုင်းမှာ ခရစ်ယာန်တွေကို လှည့်စားနေသူတချို့ရှိနေပြီလို့ တမန်တော်ယောဟန် ရေးခဲ့တယ်။ (၁ ယောဟန် ၂:၁၈၊ ၂၆) ဒါကြောင့် နောက်ဆုံးမှာ အယူမှားဓလေ့တွေကို လက်ခံမွေးစားဖို့ လမ်းစပွင့်သွားတယ်။

ဒါပေမဲ့ အီစတာပွဲရဲ့ဓလေ့ထုံးစံတချို့ကို လက်ခံပေးတာဟာ ယေရှုအသက်ပြန်ရှင်လာတဲ့အကြောင်းကို “အယူမှားကိုးကွယ်သူတွေ” ပိုနားလည်နိုင်မှာဖြစ်လို့ မမှားဘူးဆိုပြီး လူတချို့ယူဆကြတယ်။ တမန်တော်ပေါလုကတော့ တစ်ခါမှ ဒီလို မယူဆခဲ့ပါဘူး။ ရောမအင်ပါယာတစ်လျှောက် သူ ခရီးလှည့်လည်နေတုန်းက အယူမှားဓလေ့တွေကို မြင်တွေ့ခဲ့ရပေမဲ့ ယေရှုအကြောင်း လူတွေ ပိုနားလည်လာအောင် ကူညီပေးတဲ့အခါ ဘယ်အယူမှားဓလေ့တစ်ခုကိုမှ မွေးစားပြီးအသုံးပြုခဲ့တာမျိုး မရှိဘူး။ အဲဒီအစား ခရစ်ယာန်တွေကို သူဒီလို သတိပေးခဲ့ပါတယ်– “မယုံကြည်သောသူတို့နှင့်တွဲ၍ ဘက်မညီသည့် ထမ်းပိုးကို မထမ်းကြနှင့်။ အကြောင်းမူကား ဖြောင့်မတ်မှုနှင့် မတရားမှုသည် မည်သို့ပေါင်းဖက်နိုင်မည်နည်း။ အလင်းနှင့် အမှောင်သည် မည်သို့တွဲဖက်နိုင်မည်နည်း။ ‘ထို့ကြောင့် ထိုသူတို့အထဲမှ ထွက်၍ တသီးတခြားနေကြလော့။ မသန့်ရှင်းသောအရာကို မတို့မထိကြနှင့်’ . . . ဟူ၍ ယေဟောဝါဘုရား မိန့်တော်မူ၏။”—၂ ကောရိန္သု ၆:၁၄၊ ၁၇။

အီစတာပွဲအကြောင်း အနည်းငယ်လေ့လာဆန်းစစ်ခြင်းကနေ ဘာသိရှိရသလဲ။ အီစတာပွဲက ခရစ်ယာန်တွေ ကျင်းပသင့်တဲ့ပွဲ မဟုတ်မှန်း ရှင်းရှင်းလင်းလင်း သိရပါတယ်။