ယေဟောဝါသက်သေတွေ​က jw.org ဝက်ဘ်ဆိုက် ဝေစာ​ကို ၂၀၁၄၊ ဩဂုတ်​လ​အတွင်း ကမ္ဘာတစ်ဝန်းမှာ ဝေငှ​ခဲ့​ကြတယ်။ ရလဒ်အနေနဲ့ အဲဒီ​လ​အတွင်း ဝက်ဘ်ဆိုက် ဝင်ကြည့်​သူ ၂၀ ရာခိုင်နှုန်း​ကျော် တိုးများ​လာပြီး ၆၅ သန်း​နီးပါး ကြည့်ရှု​ကြတယ်။ ကမ္ဘာ​တစ်ဝန်းလုံးမှာ ဝက်ဘ်ဆိုက်​က​တစ်ဆင့် အခမဲ့ ကျမ်းစာ​လေ့လာမှု တောင်းဆိုသူ ၁၀,၀၀၀ ရှိခဲ့တယ်။ လွန်ခဲ့တဲ့​လ​ထက် ၆၇ ရာခိုင်နှုန်း ပို​များတယ်။ ကင်ပိန်း​က နေရာတိုင်းက လူတွေ​အတွက် အကူအညီ ဖြစ်ခဲ့တယ်။

ကနေဒါ​နိုင်ငံက ယေဟောဝါ​သက်သေ ညီအစ်မ​တစ်ယောက် ဓာတ်​လှေကား​မှာ မက်​ဒ​လင်း​နဲ့ ဆုံပြီး ဘဝနဲ့​ပတ်သက်တဲ့ မေးခွန်းတွေရဲ့​အဖြေကို ဘယ်မှာ ရှာတွေ့​နိုင်မလဲ ကင်ပိန်း​ဝေစာ​ကို ပြတယ်။ ဘဝနဲ့​ပတ်သက်တဲ့ မေးခွန်းတွေရဲ့ အဖြေ တွေ့​အောင် ဘုရား ကူညီ​ပေးဖို့ မ​နေ့​ည​တုန်း​က ထက်သန်​စွာ ဆုတောင်း​ခဲ့​ကြောင်း မက်​ဒ​လင်း ပြောပြတယ်။ အရင်တုန်းက​လည်း ကျမ်းစာ သင်ပေးဖို့ ဘုရားကျောင်း အတော်များများ​ဆီ တောင်းဆို​ခဲ့​ပေမဲ့ အကြောင်း​မပြန်​ခဲ့​ကြဘူး။ မကြာမီ​မှာ​ပဲ ယေဟောဝါသက်သေတွေ​နဲ့ ကျမ်းစာ စလေ့လာ​ခဲ့တယ်။

ဖိလစ်ပိုင်​နိုင်ငံက ရိုဝီ​နာ​ဟာ အမြန်​ရ​စားသောက်​ဆိုင်​ရှေ့မှာ ရပ်နေတဲ့ တရုတ်​အမျိုးသား​တစ်ယောက်နဲ့ စကားပြော​ဖြစ်တယ်။ သူ့ကို ဝေစာ ပေးပြီး ယေဟောဝါသက်သေတွေ​အနေနဲ့ လူတွေ ကျမ်းစာ​လေ့လာပြီး အကျိုး​ခံစား​စေ​ချင်​ကြ​ကြောင်း ရိုဝီ​နာ ရှင်းပြတယ်။

အမျိုးသား​က ကျမ်းစာကို မမြင်ဖူး​ကြောင်း ပြောတယ်။ စကား​ဆက်ပြော​ကြ​ရင်း အမျိုးသား​က ယေဟောဝါသက်သေတွေရဲ့ စည်းဝေးပွဲ​ကို တက်ရောက်​ဖို့ စိတ်ဝင်စား​သွားတယ်။ ကျမ်းစာ​အကြောင်း ပို​သိချင်တဲ့​အတွက် ဝက်ဘ်ဆိုက်​ကနေ ကျမ်းစာ ကူးယူ​မယ်​လို့ ပြောခဲ့တယ်။

စပိန်​နိုင်ငံက နားမကြား ယေဟောဝါ​သက်သေ ဂီ​လာ​မို​ဟာ ကျောင်းနေဖက် နားမကြား ဟို​ဟေ​နဲ့ ဆုံတယ်။ မကြာသေးခင်က ဟို​ဟေ​အမေ ဆုံးသွားလို့ သိချင်တဲ့ မေးခွန်းတွေ အတော်များများ ရှိကြောင်း ပြောတယ်။ ဂီ​လာ​မို​က ကင်ပိန်း​ဝေစာ ပေးပြီး သိချင်တဲ့ မေးခွန်းတွေရဲ့ အဖြေတွေကို jw.org ဝက်​ဆိုက်​မှာ လက်သင်္ကေတပြ​စကားနဲ့ ရှာ​နိုင်ပုံကို ရှင်းပြခဲ့တယ်။ ဝတ်ပြုရာ​ခန်းမ​မှာ အစည်းအဝေး တက်ဖို့​လည်း ဟို​ဟေ​ကို ဖိတ်ခေါ်​တော့ လာ​တက်ခဲ့တယ်။ ခန်းမ​နဲ့ ဟို​ဟေ​အိမ်က ၃၇ မိုင် (၆၀ ကီလိုမီတာ) ဝေးတယ်။ ဒါပေမဲ့ အဲဒီ​နောက်ပိုင်း ဟို​ဟေ တစ်ခါ​မှ အစည်းအဝေး မပျက်​ခဲ့​ဘူး။

ဂရင်းလန်​က မောင်နှံ​တစ်စုံဟာ လူပေါင်း ၂၈၀ နေထိုင်တဲ့ ရွာ​တစ်ရွာ​ကို ရောက်​ဖို့ အတော်အတန် ငွေ​ကုန်ကျ​ခံ​ပြီး ခြောက်​နာရီ​ကြာ စက်လှေ စီး​သွားတယ်။ သူတို့ ဟောပြော​သက်သေခံ​တယ်။ ဝေစာတွေ ဝေငှတယ်။ ဂရင်းလန် ဘာသာစကားနဲ့ jw.org ဗီဒီယိုကို ပြပေး​ကြတယ်။ မောင်နှံ​တစ်စုံ​နဲ့​လည်း ကျမ်းစာ​သင်အံမှု စခဲ့တယ်။ အခု​ဆိုရင် တစ်ပတ်ကို နှစ်ကြိမ် ဖုန်း​နဲ့ ကျမ်းစာ​သင်အံမှု လုပ်​နေပါတယ်။

မြောက်​ဖျား​ပိုင်း ဒေသ​အတွက်ပဲ လုပ်ဆောင်ခဲ့​ကြ​တာ မဟုတ်ဘူး။ နီ​ကာ​ရာ​ဂွါ​က ယေဟောဝါ​သက်သေတွေဟာ ကာရစ်ဘီယံ​တော​မှာ နေတဲ့ မာ​ယန်​နာ စကား​ပြောတဲ့ လူတွေ​ဆီ သွားပြီး ဝေစာ ဝေငှ​ဖို့ စီစဉ်ခဲ့​ကြတယ်။ လမ်း​ကြမ်း​ပေါ်မှာ ဟောင်းနွမ်း​နေတဲ့ ဘတ်စကား​နဲ့ နာရီ ၂၀ ကြာ မရပ်မနား ခရီးနှင်​ပြီးနောက် ရွာ​တွေ​ဆီ ရောက်​ဖို့ ရွှံ့​ပေါတဲ့ လမ်းမှာ ၁၁ နာရီ​ကြာ လမ်းလျှောက်​ခဲ့​ရတယ်။ ဝေစာတွေ ဝေငှ​ပြီး မာ​ယန်​နာ စကားနဲ့ ဗီဒီယိုတွေ ပြ​တဲ့အခါ အများစုက အံ့ဩ၊ နှစ်သက်​ကြတယ်။

ဘရာဇီး​နိုင်ငံ အမေ​ဇုန် မိုးသစ်တော​ထဲ​က မြို့ငယ်​လေး​ကို ဖြတ်​သွားတဲ့ အမျိုးသား​တစ်ယောက်ကို အက်​စ​တယ်​လာ​က ဝေစာ​တစ်စောင် ဝေငှတယ်။ စိတ်​မ​ပါ့​တ​ပါ​နဲ့ ဝေစာ​ကို လက်ခံ​ယူပြီး အိပ်​ကပ်​ထဲ ထည့်​လိုက်တယ်။ အိမ်အပြန်​လမ်းမှာ စက်လှေ ပျက်​ပြီး သောင်တင်​နေတယ်။ စောင့်နေ​တုန်း ဝေစာ​ကို စ​ဖတ်တယ်။ ဖုန်း​နဲ့ jw.org မှာ ဆောင်းပါး​အတော်များများ ဖတ်တယ်။ ဗီဒီယို​တချို့ ကူးယူ​တယ်။ ရက်​အနည်းငယ်​ကြာပြီးနောက် အက်​စ​တယ်​လာ​ရဲ့ အမျိုးသားနဲ့ ဆုံပြီး ဝေစာ ပေးတဲ့​အတွက် ကျေးဇူးတင်ကြောင်း ပြော​ပေးဖို့ ပြောတယ်။ “ကျွန်တော် ဖတ်​တဲ့ ဆောင်းပါး​တွေ​က စက်လှေ သောင်တင်​နေချိန်မှာ ကျွန်တော့်ကို စိတ်​တည်တည်ငြိမ်ငြိမ် ရှိစေခဲ့တယ်။ ကျွန်တော့်​ကလေးတွေလည်း အောင်အောင် ဗီဒီယိုတွေကို ကြိုက်​ကြတယ်။ jw.org ဝက်​ဆိုက်​မှာ ဝင်ကြည့်​ဦး​မယ်” လို့ ပြောတယ်။