နှစ်စဉ်ကျင်းပတဲ့ စာအုပ်ပြပွဲကို ၂၀၂၄ ခုနှစ်၊ ဖေဖော်ဝါရီ ၂၈ ကနေ မတ် ၁၀ ရက်အထိ ပါရာဂွေးနိုင်ငံ၊ အာဆွန်စီယွန်မြို့မှာ ကျင်းပခဲ့တယ်။ အသက်အရွယ်ပေါင်းစုံက စာပေဝါသနာရှင် ၁၀,၀၀၀ လောက် နှစ်စဉ် တက်ရောက်ကြတယ်လို့ ခန့်မှန်းရရှိတယ်။ အဲဒီပွဲမှာ ကျမ်းစာနဲ့ jw.org မှာတင်ထားတဲ့ ကျမ်းစာလေ့လာမှု အထောက်အကူပြု စာပေတွေကို အီလက်ထရောနစ်ပုံစံနဲ့ရော ပုံနှိပ်စာပေအနေနဲ့ပါ ဂွါရာနီစကား၊ ပါရာဂွေး လက်သင်္ကေတပြစကား၊ စပိန်စကားနဲ့ ပြသခဲ့တယ်။ ညီအစ်ကို/မ ၁၆၀ ကျော် အလှည့်ကျ ပါဝင်ခဲ့ကြတယ်။

အခမဲ့ကျမ်းစာလေ့လာနိုင်တယ်ဆိုတဲ့ ကြော်ငြာစာတန်းကိုမြင်ပြီး အမျိုးသားတစ်ယောက် ပြခန်းကို ရောက်လာတယ်။ ညီအစ်ကိုတွေက ကျမ်းစာလေ့လာပုံကို ရှင်းပြပြီး ပျော်စရာဘဝ ထာဝရ စံစားကြ စာစောင်ကို ပြတယ်။ စာစောင်ရဲ့မာတိကာကို ကြည့်ပြီး “ဒီမေးခွန်းအားလုံးကို ကျမ်းစာ ဖြေပေးနိုင်တယ်ဆိုတာ ကျွန်တော် လုံးဝမသိခဲ့ဘူး” ဆိုပြီး ပြောတယ်။ ဘုရားသခင့်နာမည် ယေဟောဝါဖြစ်ကြောင်း သိသွားတဲ့အခါ သိပ်ဝမ်းသာသွားတယ်။ သူနဲ့ ကျမ်းစာသင်အံမှုစဖို့ ညီအစ်ကိုတွေ စီစဉ်ခဲ့တယ်။

နောက်အမျိုးသားတစ်ယောက်ကလည်း ပြခန်းက ညီအစ်မတစ်ယောက်နဲ့ စကားပြောတယ်။ ကျွန်တော်တို့ရဲ့ ဝက်ဘ်ဆိုက်မှာ ဂွါရာနီ၊ ဂွါရာနီ (အမ်ဘီရာ)၊ နီဗာကလေး စကားတွေနဲ့ အကြောင်းအရာမျိုးစုံ တင်ထားပေးတာကို သိပ်သဘောကျတယ်လို့ ပြောပြတယ်။ ကျမ်းစာစာပေတွေကို ဒေသခံဘာသာစကားအမျိုးမျိုးနဲ့ ဘာသာပြန်ဆိုပေးနေတဲ့ ယေဟောဝါသက်သေတွေကို ချီးကျူးစကား ဆိုခဲ့တယ်။

“ကျမ်းစာအကြောင်း စိတ်ဝင်စားသူတွေနဲ့ စကားကောင်းကောင်းပြောခဲ့ရလို့ ဝမ်းသာတယ်” ဆိုပြီး စေတနာ့ဝန်ထမ်းကြီးကြပ်သူ ညီအစ်ကို ဒဲန်ယက်လေး ဆာကိုနီ ပြောတယ်။ စာအုပ်ပြပွဲအတွင်း ကျမ်းစာသင်အံမှု တောင်းခံသူပေါင်း အနည်းဆုံး ၁၃ ယောက်ရှိတယ်။

ပါရာဂွေးနိုင်ငံမှာ လူများစွာ အမှန်တရား ကြားသိနေကြောင်း သိရလို့ ကျွန်တော်တို့ ဝမ်းသာပါတယ်။—ဆာလံ ၁၁၉:၁၆၀။