ယင်ကောင်ကို ဘယ်လောက် ဖမ်းရခက်မှန်း ဖမ်းဖူးသူတိုင်း သိပါလိမ့်မယ်။ ဖမ်းလိုက်တိုင်း လှစ်ခနဲ၊ လှစ်ခနဲ ရှောင်တိမ်းတတ်တယ်။

 သီးလုံးဖောက် ယင်ကောင်တစ်မျိုးဟာ တိုက်လေယာဉ်တွေလို တစ်စက္ကန့်လေးအတွင်းမှာ ကျွမ်းထိုးမှောက်ခုံ ကွေ့ဝိုက်ပျံသန်းနိုင်စွမ်းရှိကြောင်း သိပ္ပံပညာရှင်တွေ တွေ့ရှိခဲ့ကြတယ်။ အကောင်ပေါက်တာနဲ့ “ကျွမ်းပြန်အောင် ပျံနိုင်ကြတယ်။ လေယာဉ် ဘယ်လိုမောင်းရမှန်း သိနေတဲ့ မွေးကင်းစ ကလေးကို တိုက်လေယာဉ် မောင်းသူနေရာမှာ ထိုင်ခိုင်းလိုက်သလိုပဲ” လို့ ပါမောက္ခ မိုက်ကယ် ဒစ်ကင်စန် ပြောပြတယ်။

 ယင်ကောင် ကျွမ်းထိုးပျံသန်းပုံကို ရုပ်ရှင်ရိုက်ကြည့်တဲ့အခါ တစ်စက္ကန့်လေးအတွင်း အကြိမ် ၂၀၀ တောင်ပံခတ်တာကို သုတေသီတွေ တွေ့ရှိရတယ်။ တောင်ပံတစ်ချက် ခတ်ရုံနဲ့ ကိုယ်ကို လှိမ့်ပြီး အန္တရာယ်ကို ရှောင်တိမ်းနိုင်ကြတယ်။

 တုံ့ပြန်မှုအချိန်ကျတော့ကော။ လူတစ်ယောက် မျက်တောင်ခတ်တာထက် အဆ ၅၀ မြန်အောင် တုံ့ပြန်နိုင်စွမ်း ရှိတယ်ဆိုပြီး သုတေသီတွေ တွေ့ရှိကြတယ်။ “ဘယ်နားမှာ အန္တရာယ် ရှိမှန်း၊ လွတ်အောင် ဘယ်လို ပျံသန်းရမှန်း အချိန်တိုအတွင်း တွက်ချက်တတ်တယ်” လို့ ဒစ်ကင်စန် ရှင်းပြတယ်။

 သီးလုံးဖောက် ယင်ကောင်ရဲ့ ဦးနှောက်သေးသေးလေးရဲ့ အံ့ဖွယ်စွမ်းရည်ကို သုတေသီတွေ လေ့လာနေကြတယ်။

 သင် ဘယ်လို ထင်ပါသလဲ။ သီးလုံးဖောက် ယင်ကောင်ရဲ့ ပျံသန်းနိုင်စွမ်းဟာ သူ့အလိုလို ဖြစ်လာတာလား။ ဒါမှမဟုတ် တစ်စုံတစ်ဦးက ပုံစံပြုဖန်ဆင်းထားတာလား။