Annasa ge ǀgaiǃkhō khoeb ge ǁîsa ge aoǁhui. “Dītsâ ta ge ge ǁkhā ta ân hoana îb tita xu bē,” dis ge Annasa ra mî. “Dītsâ ta ge ge ǃausa, xaweb ge ǂoab ǀguiba ti soga xu gere ǂoaxa. ǂHā, ǂnā, ǂnau tsî ta ge ge xora bi. Xawe ta ge ǁnā ǁaeb ai ta gôas ǀkha ǃkhāhe hâsa ge hōǃâ. Ti soros hoas ǃnâ ta ge ge ǂhabu.”

ǁNāti ī mâsib ǃnâts ga hâhâ o, tare-ets ga satsa dī hâ?

ǀNîsits ge ǃgâise aiǂhomisen hâ tsî a ǂkhaikhari ǃuiats ga ra ǃgûmâ o, xawe ǁgai xūn ge a ī ǁkhā. “ǃKhoes ǃnâ dans ǃhae khoeb di tama” dis ge Elobmîsa ra mî, “tsî ǃkhūsib ǁnâuǃāxan di tama . . .  xawen ge hoatsama ǁaeb tsî hâsib [“mâsib,” NW] tsîkha ī khami ra hōhe.”—Aoǁnâ-aob 9:11.

ǀNî ǂkhamkhoen Annas khami īn ge ǀūn a khoe-i xa ge a ǀgaiǃkhōhe. ǀNîn ge kaisen ǀgūse ǂan khoe-i tamas ka io ǀaokhoe-i xa ge ǀgaiǃkhōhe. Natashas ge disi kurixas a hîna ǁîn oms ǀgūse ra hâ axab xa ge ǀgaiǃkhōhe. “Kaise ta ge ge ǃao tsî tao, ǁnās ǀkha ta ge khoe-e ge mîba tama hâ i,” dis ge Natashasa ra mî.

Annas ge noxoba ra ǀhapitsâsen ǁnā ǃui ge ī xū-i xa. “ǁNā ǃuis xas ge kaise ra ǂâi,” dis ge Annasa ra mî. “ǁNā khoeba ta ge ǀgaisase ga ǃkhamǃoa hâ. Xawe gôas ǀkhab ge ǃkhā te toas khaoǃgâ ta ge ǃaob xa ge ǂhabu kaihe. Xū-e ta ge ge dīǁoa i, xawe ta ge dī ta ga hâ ti ra tsâ.”

Natashas tsîn ge ra ǀhapitsâsen. “Tā ta ge ga ǂgomǃgâ bi hâ,” dis ge Natashasa ra mî. “Ti îra ge tita tsî ti ǃgâs tsîna ge mîba ǃaugam ga ra ǀhuru o, om ge ǀguiba nî ǀhuru xawe ta ge tita ge ǃgâ tama hâ i. Tita ge ra tsâ ti ǁanǁare-aoba ta ge ǃēsa māsa tita tsûtsûsa. Nē xū-i ge ti omarisa kaise ge a tsâǀkhā tsî tita ge ra tsâ tita ge nē ǃgomsiba a ǃaroma ti. Nē ǃkhais ge tita kaise ra tsûtsû.”

Sats nî Annas tamas ka io Natashas khami nî tsâs ga ra io, ǂâis ǃnâ ūhâ re ǀgaiǃkhōhe ra khoe-i ge māsen tama hâ. ǀNî khoen ge ǀgaiǃkhōsa ǁkhōǁkhōsase mû tama hâ tsî ra mî aore axagu ge hoaǃnâ-aixase di ra dī. Tamas ka ion ge ra mî ǀgaiǃkhōhe go khoe-i go ǂgansa ǀgaiǃkhōhesa. Xawe khoe-i ge ǀgaiǃkhōhesa ǂgan tama hâ. Sas ga nēti ī ǃaoǃaosa ǀgaub ai tsūdīhe o, os ge sasa ǀhapixa tama hâ!

“Sas ge ǀhapixa tama hâ,” di hâ mîde khomais ge a supu; xawe nē mîde ǂgoms ge a ǃgom ǁkhā. ǀNî khoedi ge ǁîdi tsâsiga ra sâu, ī ge xū-i xa ǃhoasa tsî ǃgoma ra tsâ tsî ra ǀhapitsâsens ǃgâi tama tsâsigu xa. Xawe ham-e a ǃgâibahe ǃnōs ga ra o—sasa tamas ka io ǀgaiǃkhō-aoba? Sas ge ǀnî hâ ǀgaub xa a ǂâi ǁkhā.

Elobmîs ge ra mîba ta khoexaǃnâ ǂâiǂhansens ge ge ǃaroma îb ǂhanu-ai Joba mî: “Tita ge ausib ti ǀoms dib ǃnâ nî ǃhoa.” (Job 10:1) Sas tsîn ge ǂkhîba a hōǁkhā dis ga dī o. ǂGomǃgâs ra khoe-i ǀkha ǃhoas ge nî huisi tsî ǁnās ge ǃgâi tama tsâsiba xu nî ǃnora kaisi.

Annas ge ge mûǂan nē ǀapemās a amasa. ǁÎs ge ra mî: “Tita ge ti ǀgūǀhōsasa ge mîba tsî ǁîs ge tita ge a ǂkhâǃnâ î da sida ǀhaohâb ǃûi-aogu ǀkha ǃhoa. Kaise ta ge ra ǃgâiaǂgao ǁîgu ǀkha ta ge ǃhoa toas khaoǃgâ. ǁÎgu ge tita ǀkha ǂomxa ǁaeba ǂnû tsî ge a mîba te—ī ge xū-i, ti ǀhapi tamasa.”

Natashas ge ǁîs ǁgûra ǀkha ge ǃhoa ǀgaiǃkhōhes ge xū-i xa. “ǁÎra ge tita ge mâxōǀkhā,” dis ge ǁîsa ra mî. “ǁÎra ge ge ǂkhâǃnâ te î ta ǃhoaǂui, ǁnās khaoǃgâ ta ge kaise ǃgâise gere tsâ tsî ge ǁaixa-ūsen tama hâ i.”

Natashas ge ǀgores xas tsîna ge hui-e. ǁÎs ge ge mî “Elob ǀkha ǃhoas ge kaise ge hui te” “ǀnî hâ khoe-i ǀkha ta ge ǃhoa ǂgao tama hâ i amaga. ǀGore ta ga ra o, o ta ge ǂhâba ta hâse mâ xū-i hoa-i xa a ǃhoa ǁkhā. ǀGores ge ǃnomsasib tsî ǂkhîb tsîna ti ǀoms ǃnâ ra hau.”

Hoa xūn ge ǁîn ǁaeba ūhâ “ǁaeb ǂuruǂurus dib” tsîn ge hâ. (Aoǁnâ-aob 3:3) Sats ge sa soros tsî khoesi tsâsigu tsîna nî kōǃgâ. Sats ge sa sorosa nî sâ ū. Tsîts ge hoan ǂamai Jehova Elob ai nî ǂgomaiǂnûi. —2 Korinteǁîn 1:3, 4.

Sas ga tare io tsî ǀnîsi khoe-i xa ga ra ǁgarihe o îs ǃgâi tama xūna dī, os ge nî mî, “tā dī ǂgao tama ta ge hâ!” tamas ka io “sa ǃomkha ūbē tita xuǃ”. Tā ǃao ti mîsa, nēsits ga sa ǀhōsa-e ǂoaǃnâ xawe. ǁÎ-i ga satsa ǀgora xu xawes tsîna i ge ǁî-e anu tama hâ sas ǀkha hâsaǃ Sas ge ama-ai khoeb hîna sa soros tsî sas ta mî xūna ra ǃgôaǃgâba ǂhâ hâ.

“Skoli tawa gu ge axaga tita gere tsâǀkhā tsî ǃgâi tama xūna gere mî. ǀNîgu ge gere ǁgoe-ū te ǂgao.”—Xoretas.

Nē axaga tare-e gere dī?

1. ǁÎsa gu gere ai-ôa?

2. ǁÎs ǀkha gu gere ǁâǁâsen?

3. Tamas ka io gu gere ǁgoe-ūsi ǂgao?

“Skola xu ta ǃgôaxa hînab ge ǀnî axaba ǀurixa xūna mî tsî gere ǃkhōǀkhā te. Tsî ta ge ǁîb ǃomsa ge ǂnaubē tsî ge bē kai bi. Ob ge ǁîba ǃgâi tama ǀgaub ai gere kō te tsî ǃkhau ta hâ ti ge gere mî.”—Tesas.

Nē axaba tare-e Tesasa gere dī?

1. ǁÎsab gere ai-ôa?

2. ǁÎs ǀkhab gere ǁâǁâsen?

3. Tamas ka iob gere ǁgoe-ūsi ǂgao?

“ǂOa goro kurib ge axaba ge mîba te tita xab a ǃgâibahe ti xawe ta ge tita ǁîba gere mîba ǂgao tsi tama ta ge hâ ti. ǀNî ǁaeb aib ge ti ǁôaba gere ǀnōbo. Tsî tita ge ǁîba gere mîba ǂgao tama ta ge hâ ti xaweb ge ge ǀū ǂgao tama hâ i. ǀNî tsē ta ti ǁharode ra ǃgae hînab ge ti khaos ai ge tsâǀkhā te.”—Benitas.

Sats ta ǂâi o, nē axaba tare-e gere dī:

1. ǁÎsab gere ai-ôa?

2. ǁÎs ǀkhab gere ǁâǁâsen?

3. Tamas ka iob gere ǁgoe-ūsi ǂgao?

ǂHanu ǃereams ge a C nē dîdi ai.

Sausausa ǃkhai-i ai tsâǀkhāhesa mati ra ǃkharagagu khoe-e ai-ôas tamas ka io khoe-i ǀkha ǁâǁâsens xa?

Sausausa ǃkhai-i ai khoe-e ra tsâǀkhā khoe-i ge a ǃgâibahe xawe tsâǀkhāhe ra khoe-i ose. Nē i ge khoe-i ga ra ǂkhā xawes tsîna ra aiǃgû xū-e.

Khoe-e sausausa ǃkhaib ai tsâǀkhās ge a ǁkhōǁkhōsa. Nēs ge ǀgaiǃkhōsa a ǃaroma ǁkhā.