Nimoskaltik ipan Costa Rica, ipan altepetl Puerto Limón uan ipan pilaltepetsitsij tlen nopaya eltoya. Notatauaj kinpixkej chikueyij ininkoneuaj uan na nielki nopa chikompa ininkone. Notata mijki kema na nijpixtoya chikueyi xiuitl, yeka nonana iselti monejki techiskaltis.

Na tlauel nechpaktiyaya béisbol pampa kema nieliyaya niokichpil ipa nechpaktiyaya nimauiltis. Kema nimotelpokachijki, pejki nimauiltia béisbol ininuaya sekinok telpokamej. Uan kema nopaya niitstoya uan nijpixtoya se 20 xiuitl, se tlakatl nechiljuik ma nimauilti ininuaya katli tlauel kinixmatiyayaj ipan Nicaragua. Maske kiampa nechiljuik, ipan nopa tonali nonana tlauel mokokouayaya, uan pampa na nijmokuitlauiyaya, amo nijnekiyaya nias Nicaragua. Yeka nikiljuik amo niueliskia. Teipa, seyok tlakatl nechiljuik ma nimauilti béisbol ipan Costa Rica. Katli nopaya mauiltiyayaj amo tlauel kinixmatiyayaj uan nama nikijtok kena niaskia. Pejki nimauiltia nopaya ipan xiuitl 1949 uan tlanki ipan 1952 ipan altepemej Cuba, México uan Nicaragua. Na nieliyaya defensor de base uan tlauel kuali nimauiltiyaya. Timauiltijkej 17 imiakpa uan amo kema nimokuapolok. Tlauel nechpaktiyaya kema maseualmej chikauak kiijtouayayaj notoka.

Teipa pejki amo kuali nimonejnemiltia. Maske ninemiyaya iuaya se ichpokatl, nojkia nechpaktiyaya ninemis ininuaya sekinok siuamej. Nojkia tlauel nitlaiyaya. Se tonali, tlauel nitlaik uan kema niisak, amo nikilnamikiyaya kenijkatsa niasito nochaj. Nojkia nimauiltiyaya dominó ika apuestas uan nijkouayaya billetes de lotería.

Ipan nopa tonali nonana mochijki se tlen Jehová itlajtoltemakauaj. Maske achtouia ya nojkia kinekiyaya ma nimomachti, na amo kiampa nijchijki pampa tlauel nimauiltiyaya. Kema nimomachtiyaya kenijkatsa nimauiltiskia, na amo nimayanayaya. San nijnekiyaya nimauiltijtos. Tlauel nechpaktiyaya nimauiltis béisbol.

Kema nikaxitik 29 xiuitl, nechpanok tlen amo kuali kema nijnekiyaya nikitskis pelota. Maske nimochikajki, ayokmo uelki nimauiltia ininuaya katli tlauel kinixmatij. Na nojua nimauiltiyaya béisbol uan nikinmachtiyaya mauiltisej telpokamej nechka nochaj.

Ipan xiuitl 1957, niajki ipan se ueyi tlanechikolistli tlen Jehová itlajtoltemakauaj ipan se estadio kampa na nimauiltijtoya béisbol. Kema nimoseuijtoya nopaya, tlauel nimosentlachilik pampa inijuantij tlauel tlatlepanitayayaj, uan kema sekinok maseualmej yauiyayaj, amo kiampa kichiuayayaj uan tlauel kuatsajtsiyayaj. Tlen nopaya nikitak kichijki ma nijneki nimomachti Biblia ininuaya Jehová itlajtoltemakauaj uan ma nia tlanechikoli.

Nochi tlen nimomachtiyaya ipan Biblia kichijki ma nimosentlachili. Se neskayotl, Jesús kiijtok ipan itlamia tonali itokilijkauaj kimoyauaskiaj nopa kuali tlamachtili tlen toTeotsij iTlanauatijkayo ipan nochi Tlaltipaktli (Mateo 24:14). Nojkia nikitak katli nelnelia elij Cristo itokilijkauaj, tlajtolmoyauaj kampa ueli uan amo tlainamaj kema kiampa kichiuaj. Jesús kiijtok: “Niinmechmaka ni chikaualistli, uajka axkema xitlainamakaj kema intepaleuisej” (Mateo 10:⁠8).

Kema nimomachtiyaya Biblia, nikitstiauiyaya tlaj Jehová itlajtoltemakauaj nelia kichiuayayaj tlen nopaya kiijtoua. Tlauel nimosentlachiliyaya pampa inijuantij kichiuaj kampeka kimoyauasej nopa kuali tlamachtili ipan nochi Tlaltipaktli. Nikitak inijuantij temakayayaj tlen kipixtoyaj, kej Jesús kinnauatijtoya itokilijkauaj. Yeka, kema nijpojki tlen ijkuilijtok ipan Marcos 10:21 kampa Jesús kiijtok: “Xiuala, xinechtokili”, nijnejki nimochiuas se tlen Jehová itlajtoltemakauaj.

Maske kiampa, tlauel ouij nijmatki kema monejki nijtlapejpenis nijchiuas se keski tlamantli. Se neskayotl, miak xiuitl, sejse semana nijtekiuik ipan lotería nopa “número tlen ika nitlatlaniyaya”. Maske kiampa nijchiuayaya, teipa nikitak toTeotsij amo kuali kinita nopa maseualmej katli tlauel kinekij miak tomij yon katli kiueyichiuaj nopa teotsij katli kinpaleuia ma tlatlanikaj (Isaías 65:11; Colosenses 3:⁠5). Yeka, nimosentlalik ayokmo nimauiltis ika nopa tlamantli. Nopa domingo kema ayokmo nimauiltik ika lotería, ¡nopa “número tlen ika nitlatlaniyaya” tlatlanki! Maseualmej tlauel nechpinajtijkej pampa amo nimauiltijtoya nopa semana. Uan nechtetsopkej pampa kinekiyayaj sampa ma nimauilti. Maske kiampa kichijkej, ayokmo kema sampa nimauiltik yon nijchijki apuestas.

Nonemilis “tlen yankuik” sampa kiixnamijki se tlaouijkayotl ipan nopa tonali kema nimoatsonpoliuiltik ipan se ueyi tlanechikolistli tlen Jehová itlajtoltemakauaj (Efesios 4:24). Ika tlayoua, kema nitlakuepilik ipan nopa hotel kampa nimokauayaya, puertajteno nechchixtoya nopa ichpokatl katli achtouia iuaya ninemiyaya. Ya nechiljuik: “Sammy, ma timoyolpakiltikaj se kentsi”. Na nima nijnankilik: “¡Amo!”. Nikiljuik nama nimoyakanayaya ika tlen Biblia tlamachtia (1 Corintios 6:18). Ya kiijtok: “¡¿Tlake?!”. Uajka pejki nechiljuia amo kenijki tlaj tikixpanosej tlen Biblia kiijtoua kema se akajya moteka iuaya seyok, uan kinekiyaya sampa ma ninemi iuaya. Maske kiampa kichijki, na nima nikalajki ipan cuarto uan kuali nijtsajki puerta. Ipan ni tonali, tlauel niyolpaki pampa amo kema nikixpanotok tlen nimosentlalik nijchiuas kema nimoatsonpoliuiltik ipan 1958.

Nijmati ueliskia nikijkuilos se amochtli ika nochi nopa tlateochiualistli tlen nijselijtok pampa nimoyakantok ika tlen Biblia tlamachtia. Nama nikinpia kuali nouampoyouaj, nijmati amo san tlapik niitstok uan tlauel niyolpaki.

Maske nojua nechpaktia nimauiltis béisbol, amo ya nopa nikachtouitlalia ipan nonemilis. Kema nimauiltiyaya, sekinok tlauel nechixmatiyayaj uan nijpiayaya miak tomij, uan nama nijmati nopa amo uejkauas. Kuali nimouampojchiuas ininuaya Jehová uan noikniuaj kena uejkauas nochipa. Biblia kiijtoua: “Panoti ni Tlaltipaktli uan nochi tlen itstokej ipani, uan nochi nopa tlamantli tlen yajuantij kinekij. Pero ajkeya kichiua tlen toTeko kineki, itstos para nochipa” (1 Juan 2:17). Nama tlauel nechpaktia nijchiuas seyok tlamantli: nijtekipanos Jehová uan niitstos ipan itlanechikol. Ya nopa tlen tlauel nijpatiita ipan nonemilis.