Nitlakatki ipan Paddington, se altepetl kampa tlauel miakej itstokej ipan Londres (Inglaterra). Niitstoya iuaya nonana uan eyij noachtouikniuaj siuamej. Notata san kemantika itstoya touaya pampa tlauel tlaiyaya.

Kema nieliyaya nisiuapil, nonana nechmachtik nimomaijtos ika tlayoua. Na nijpixtoya se Biblia pilsiltsi tlen san kipiayaya salmos uan nimoiljuiyaya ipan uikatl uan kiampa ueliyaya niuika nopa salmos. Se tonali nijpojki ipan se amochtli kampa kiijtouayaya: “Se tonali ayokmo tiitstosej”. Tlen nijpojki kichiuayaya amo ma niueli nikochi uan nochipa nimoiljuiyaya ipan tlen panoskia teipa. Nimoiljuiyaya: “Amo san kinamiki tiitstosej uan timikisej. ¿Kenke nikaj niitstok?” ¡Na amo nijnekiyaya nimikis!

Nijnekiyaya nijmatis tlen kichiuaj tetlajchiuianij. Yeka nijnekiyaya nimokamanaljuis ika mijkatsitsij uan niauiyaya ininuaya sekinok telpokamej katli ininuaya nimomachtiyaya kampa kintlalpachojtoyaj. Nojkia, timosentiliyayaj uan tijtlachiliyayaj películas kampa nesi tlen temajmatiaj. Maske tlauel techmajmatiyaya, nojkia tlauel techpaktiyaya.

Kema nijpixtoya matlaktli xiuitl, pejki amo kuali nimonejnemiltia. Pejki nitlachichina uan amo ueliyaya nijkaua. Teipa pejki nijchichina marihuana. Pejki nitlai kema nijpixtoya 11 xiuitl uan maske amo nechpaktiyaya, kuali nijmatiyaya kema niiuintitoya. Nechpaktiyaya uikatl, nimijtotis uan nochipa kema niueliyaya niauiyaya kampa iljuichiuayayaj uan nojkia kampa san mijtotiyayaj. Nikisayaya nochaj ika tlayoua uan kema tlanesiyaya nimokuepayaya ichtakatsi uan axaka nechitayaya. Kema kiampa nijchiuayaya tlauel nisiauiyaya, yeka amo niauiyaya escuela. Uan kema kena niauiyaya, nojkia niontlaiyaya.

Ipan nopa xiuitl kema tlamiskia nimomachtis, tlamachtianij kiijtojkej tlauel amo kuali nimomachtiyaya. Kema nonana kimatki kenijkatsa nimonejnemiltiyaya, tlauel kualanki nouaya. Timokualanijkej uan niajki niitstoto iuaya Tony, katli iuaya ninemiyaya, ya eliyaya rastafari. Ya tlachtekiyaya, kinamakayaya drogas uan tlauel mosisiniyaya. Teipa pejki nitlanemiltia uan kema nijpixtoya 16 xiuitl tlakatki noachtouikone.

Nikinixmatki Jehová itlajtoltemakauaj kema niitstoya kampa kinpaleuiaj siuamej katli ininselti kiniskaltiaj ininkoneuaj. Nopaya tiitstoyaj pampa tekichiuanij techmakatoyaj kampa tiitstosej. Omej tosiuaikniuaj nochipa kinpaxalouayayaj sekinok siuamej katli nojkia nopaya itstoyaj. Se tonali niajki kampa itstoyaj nopa tosiuaikniuaj pampa nijnekiyaya nijnextis amo nelia tlen tlamachtiyayaj. Kema kiampa nijchijki, inijuantij nechnankilijkej ika Biblia, amo kualankej uan amo ouij kej nechixtomilijkej. Tlauel kuali nijyolmatki pampa kinextijkej nechikneliyayaj uan nechnojnotskej ika kuali. Yeka pejki nimomachtia ininuaya.

Nijyekok se tlamantli tlen tlauel nechpaleuik ipan nonemilis. Kema nieliyaya nisiuapil tlauel nijmakasiyaya nimikis, uan nopa tosiuaikniuaj nechmachtijkej Jesús kiijtok moyolkuisej katli miktokej (Juan 5:​28, 29). Nojkia nikitak toTeotsij kitekipachoua tlen nechpano (1 Pedro 5:⁠7). Tlen kiijtoua Jeremías 29:11 asik ipan noyolo. Nopaya kiijtoua: “Pampa na nijmati kuali nopa tlamantli tlen nijsenkajtok para inmojuantij”, kiijtoua toTeko. “Nijsenkajtok tlen kuali uan axtlen fiero, para nochi kisas kuali para inmojuantij teipa uan para inkiselisej tlen inkichiaj”. Pejki nimotemachia uelis niitstos nochipa ipan Tlaltipaktli kema mochiuas se xochimili (Salmo 37:29).

Jehová itlajtoltemakauaj kinextijkej tlauel nechikneliaj. Kema achtoui niajki ipan se tlanechikoli, nikitak nochi kuali mouikayayaj uan kuali nechselijkej. Nochi tlauel teikneliyayaj (Juan 13:​34, 35). ¡Ipan iglesia amo kiampa kichiuayayaj! Jehová itlajtoltemakauaj nechtlepanitakej maske amo kuali nimonejnemiltijtoya. Inijuantij kichijkej kampeka itstosej nouaya, nechiknelijkej, nechtlakakilijkej uan nechpaleuijkej. Nijmatiyaya eliyayaj nochampoyouaj.

Kema pejki nimomachtia Biblia nikitak monekiyaya nijpatlas nonemilis tlaj nijnekiyaya nijyolpakiltis Jehová. Tlauel ouij nijmatki ayokmo nitlachichinas. Nojkia nikitak se keski uikatl tlen nijtlakakiliyaya kichiuayaya ma nijneki nijchichinas marihuana, yeka pejki nijtlakakilia sekinok uikatl. Ayokmo niajki kampa iljuichiuayayaj yon kampa mijtotiyayaj pampa nijmatiyaya nopaya ueliskia kichiuas sampa ma nijneki nitlais. Uan nojkia nikintemok sekinok nouampoyouaj katli nechpaleuiskiaj kuali ma nimonejnemilti (Proverbios 13:20).

Ipan nopa tonali, Tony nojkia pejtoya momachtia ika Jehová itlajtoltemakauaj. Kema kinankiliyayaj ika Biblia tlen kinekiyaya kimatis, kiitak tlen kimachtiyayaj eliyaya melauak. Uan yeka kipatlak miak tlamantli ipan inemilis, ayokmo mouikak ininuaya katli tlauel mosisiniyayaj, ayokmo tlachtejki uan ayokmo kichichinki marihuana. Nojkia tikitakej tlaj tijnekiyayaj tijtekipanosej Jehová kej ya kipaktia, monekiyaya timosenkauasej uan kiampa tijpaleuiskia tokone kuali ma itsto. Yeka ipan 1982 timosenkajkej.

Ipan pilamochtsi Tlen Tematiltia uan ¡Xitlachixtokaj! * nijpouayaya tlen kinpanotoya toikniuaj, katli nojkia amo kuali monejnemiltiyayaj uan katli kipatlakej ininnemilis. Tlauel nechyolchikauayaya tlen kinpanotoya uan nechpaleuiyaya nojua ma nijchiua kampeka nijpatlas tlen monekiyaya. Nochipa nikiljuiyaya Jehová amo ma nechtlauelkaua. Tony uan na timoatsonpoliuiltijkej ipan 1982.

Nimouampojchiuas iuaya Jehová nechpaleuik amo ma nechpano tlen amo kuali. Tony uan na tikitstokej kenijkatsa Jehová techpaleuia kema tikixnamikij se tlamantli tlen tlauel ouij. Nojkia techpaleuijtok ma timotemachikaj ipan ya kema tijpiaj tlaouijkayotl uan tikitstokej kenijkatsa kinmokuitlauijtok tochampoyouaj (Salmo 55:22).

Tlauel tiyolpakij pampa uelkej tijpaleuiaj tokone uan tosiuapil kuali ma mouampojchiuakaj iuaya Jehová. Uan nojkia tlauel niyolpaki pampa nikita noixuiuaj nojkia kuali kiixmajtiauij Jehová.

Nama kuali nikochi pampa ayokmo nimoiljuia ipan mikilistli o ipan tlen panos teipa. Tony uan na tlauel timotekiuijtokej pampa tikinpaxalouaj tlanechikoli sejse chikueyi uan kiampa ueli tikinyolchikauaj toikniuaj. Uan sansejko tikinmachtiaj maseualmej uan tikiniljuiaj tlaj tlaneltokaj ipan Jesús, nojkia uelis itstosej nochipa.