Kema se chikauak ajakatl o seyok tlamantli tlauel tlasojsoloua, tojuantij nimantsi tikinpaleuiaj toikniuaj. Nochi tlen mochiua kinextia nelnelia timoikneliaj (Juan 13:34, 35; 1 Juan 3:17, 18). ¿Ika tlake tikinpaleuiaj?

Ika tomij. Nopa Cristo itokilijkauaj katli itstoyaj Antioquía kintitlanilijkej tomij toikniuaj ne Judea kema onkak se ueyi mayantli (Hechos 11:27-30). Ipan ni tonali, kema tijmatij toikniuaj kinpanotok se ueyi tlaouijkayotl katli itstokej ipan se uejka altepetl, kintitlaniliaj tomij tlen titemakaj ipan tlanechikoli uan kej nopa tikinpaleuiaj (2 Corintios 8:13-15).

Ika tekitl tlen moneki. Ueuejtlakamej katli itstokej nechka kampa panok tlen amo kuali, kintemouaj nochi toikniuaj uan kej nopa kimatij tlaj nochi kuali itstokej. Toikniuaj katli kintlalijtokej ma tlapaleuikaj uelis kiitasej kenijki temajmakasej tlakualistli, atl, yoyomitl, pajtli uan kanke mokauasej. Miakej Jehová itlajtoltemakauaj katli kimatij se tekitl, yauij ika inintomij uan kinpaleuiaj toikniuaj ma kikualchijchiuakaj ininchajchaj o kampa mosentiliaj. Uan pampa nochipa sansejko titekititokej techpaleuia nimantsi ma titlapaleuikaj kema moneki. Uan amo san tikinpaleuiaj “toikniuaj ipan Cristo”, nojkia kema tiuelij tikinpaleuiaj tlen itstokej ipan sekinok religiones (Gálatas 6:10).

Ika Biblia uan tikinyolchikauaj. Kema pano se tlauel amo kuali tlamantli, tlauel moneki ma titeyolchikauakaj. Uan Jehová tlen “techyoltlalia” uelis kinmakas tetikayotl kema moneki (2 Corintios 1:3, 4). Yeka nochi katli tlaijiyouijtokej tikinpouiliaj tlen toTeotsij kiijtoua kichiuas. Uan tikiniljuiaj toTeotsij iTlanauatijkayo temachtli kitlamiltis nochi amo kuali tlamantli tlen techtlaijiyouiltia (Apocalipsis 21:4).

• ¿Kenke Jehová itlajtoltemakauaj uelij nima tepaleuiaj kema pano tlen tlauel amo kuali?

• ¿Kenijkatsa tikinyolchikauaj ika Biblia katli tlaijiyouiaj kema pano tlen tlauel amo kuali?