Betel moijkuilojtok ika tlajtoli hebreo uan kiijtosneki “iChaj toTeko” (Génesis 28:17, 19). Ni tokajyotl kuali kinamiki nopa uejueyi kali katli kipiaj Jehová itlajtoltemakauaj ipan nochi Tlaltipaktli. Nopaya kiyakanaj tlajtolmoyaualistli. Katli kinyakanaj Jehová itlajtoltemakauaj itstokej ipan nopa tlauel ueyi kali Betel ne Nueva York (Estados Unidos) kampa kiyakanaj sekinok kali Betel katli eltok ipan miak altepemej. Toikniuaj katli tekitij Betel itstokej kej ininuaya ininchampoyouaj pampa sansejko itstokej, tlakuaj, tekitij uan sansejko momachtiaj Biblia (Salmo 133:1).

Se yejyektsi kali kampa tekitij ika nochi ininyolo. Ipan sejse kali Betel itstokej tlakamej uan siuamej katli kuali mouikaj iuaya toTeotsij uan mosentlalijtokej nochipa kichiuasej tlen toTeotsij kineki uan san ya kitekipanosej (Mateo 6:33, TNM). Maske amo kintlaxtlauiaj, kena kinmakaj kampa mokauasej, tlen kikuasej uan tlen ika uelis kikouasej tlen kinpoloua. Nochi kipiaj se tekitl. Sekij tekitij kampa tlajkuilouaj ipan computadoras, kampa tlakualchiuaj o kampa tlakuaj, sekij kichiuaj amatlajkuiloli, tlachpanaj, tlachikueniaj, kikualchijchiuaj tlen sojsoliui o sekinok tekitl.

Kampa tlauel tekitij uan kej nopa tlapaleuiaj ma tlajtolmoyauakaj. Ipan sejse kali Betel mosentlalijtokej kichiuasej ma kimatikaj miakej toTeotsij iTlajtol, yeka kichijkej ni pilamochtsi. Achtoui, kema kiijkuilojkej, Katli tlayakanaj kitlachilijtiajkej kenijkatsa moijkuiloskia, teipa kintitlanilijkej ipan Internet miakej tlajtolkuepanij ipan nochi Tlaltipaktli, uan ipan uejueyi altepemej kichijkej ika tepostli tlen kichijtiuetsi miak pilamochtsitsij uan teipa kititlankej ipan kipano ciento diez mil tlanechikoli. Ika nochi ni tekitl, katli tekitij Betel tlapaleuiaj ma momoyaua toTeotsij iTlajtol. Ni tekitl moneki nima mochiuas (Marcos 13:10).

• ¿Ajkia inijuantij tekitij Betel uan tlake tlamantli kinmakaj?

• Ika tlen mochiua ipan sejse kali Betel, ¿tlake tekitl ueli mochiua?