TLAMACHTILI 4
¿Ajkia Jesucristo?
1. ¿Ajkia kichijki Jesús?
¿Tlake kuali tlamantli tlen kinextik Jesús kinextia kipaktiyaya ma kinechkauikaj? (MATEO 11:29; MARCOS 10:13-16).
Kema Jesús ayamo tlakatiyaya ipan Tlaltipaktli itstoya ne iluikak kej se iluikaejketl. Yeka amo eliyaya kej maseualmej (Juan 8:23). Jehová achtoui kichijki Jesús. Kema ya itstoya ne iluikak kipaleuik toTeotsij kichiuas nochi tlamantli tlen onka. Biblia kitokaxtia “iyojtsi” toTeotsij iKone, pampa kema toTeotsij kichijki amo aka kipaleuik (Juan 1:14). Nojkia kiixmatij kej “Tlajtoli”, pampa teiljuiyaya tlen iTata kinauatiyaya (Apocalipsis [Revelación] 19:13). (Xijpoua Colosenses 1:15 uan 16).
2. ¿Kenke tlakatiko Jesús ipan Tlaltipaktli?
ToTeotsij kititlanki Jesús ma tlakatiki ipan Tlaltipaktli. Ya kipanoltik inemilis ipan María itlakayo katli eliyaya se ichpokatl judeaejketl tlen amo monamiktijtoya. Yeka Jesús itata amo se maseuali (Lucas 1:30-35). Jesús ualajki ipan Tlaltipaktli pampa: 1) techmachtiko katli melauak tlen toTeotsij, 2) technextiliko ika inemilis kenijkatsa uelis tijchiuasej tlen toTeotsij kineki maske tijpiaskiaj tlaouijkayotl uan 3) temaktiliko inemilis tlen amo tlajtlakole kej se “tlaxtlauili”. (Xijpoua Mateo 20:28).
3. ¿Kenke monekiyaya ma techmakixtikaj?
Se tlamakixtili kiijtosneki kema se akajya tlaxtlaua uan kej nopa kimanauia se maseuali (Éxodo 21:29, 30). ToTeotsij amo kinekiyaya maseualmej ma mikikaj yon ma ueuejtiakaj. ¿Kenke tijmatij ni? Pampa Jehová kiiljuik Adán tlaj kiixpanoskia o ayokmo kineltokaskia, mikiskia. Uajka tlaj Adán amo kema tlajtlakolchijtoskia, amo kema miktoskia (Génesis 2:16, 17; 5:5). Biblia kiijtoua ipan Tlaltipaktli “pejki” onka mikilistli pampa Adán tlajtlakolchijki. Ni kiijtosneki Adán kinpanoltilik tlajtlakoli ininkoneuaj, yeka nochi timikij. Yeka monekiyaya se akajya ma techmakixti. (Xijpoua Romanos 5:12 uan 6:23).
Uajka, ¿ajkia ueliskia tlaxtlauaskia nopa tlamakixtili uan techmanauiskia tlen nopa mikilistli? Kema timikij, kejuak tikixtlauaj totlajtlakoljuaj. Yeka, pampa titlajtlakolejkej, yon se maseuali amo ueli kiixtlaua sekinok inintlajtlakoljuaj. (Xijpoua Salmo 49:7-9).
4. ¿Kenke mijki Jesús?
Jesús amo eliyaya kej tojuantij pampa ya amo tlajtlakole eliyaya uan amo kema tlajtlakolchijki. Uajka ya amo mijki pampa monekiyaya kiixtlauas itlajtlakoljuaj, ya mijki pampa kiixtlajki sekinok inintlajtlakoljuaj. Kema toTeotsij kititlanki iKone ma motemaktiliki, toTeotsij kinextik kenijkatsa tlauel kiniknelia maseualmej. Uan Jesús nojkia kinextik kenijkatsa techiknelia kema kineltokak iTata uan motemaktilik uan kiampa techmakixtik tlen totlajtlakoljuaj uan mikilistli. (Xijpoua Juan 3:16; Romanos 5:18 uan 19).
Xikita nopa video ¿Kenke mijki Jesús?
5. ¿Uan nama tlake kichiua Jesús?
Kema Jesús itstoya ipan Tlaltipaktli, kinchikajki katli kipixtoyaj kokolistli, kinyolkuik mijkatsitsij uan kinpaleuik katli tlaijiyouiyayaj. Kej nopa kinextik tlen kinchiuilis teipa katli kitekipanouaj toTeotsij (Mateo 15:30, 31; Juan 5:28). Kema mijki Jesús, toTeotsij kiyolkuik uan sampa kichijki ma itsto ne iluikak kej se iluikaejketl (1 Pedro 3:18). Uan nepa kichixki iTata ma kimaka tlanauatili tlen ika ueliskia tlanauatis ipan Tlaltipaktli (Hebreos 10:12, 13). Nama Jesús tekichijtok ne iluikak, uan itokilijkauaj teiljuijtinemij ni kuali tlamantli ipan nochi Tlaltipaktli. (Xijpoua Daniel 7:13, 14 uan Mateo 24:14).
Ni Tlanauatijketl nechka kintsontlamiltis tlen amo kualmej uan tlaijiyouilistli. Nochi katli tlaneltokaj ipan Jesús uan kichiuaj tlen tlanauatia itstosej ika pakilistli ipan Tlaltipaktli kema mochiuas se xochimili. (Xijpoua Salmo 37:9-11).
