ToTeotsij kiniljuia maseualmej tlen kampa ueli euaj ma momaijtokaj uan kej nopa uelis kinechkauisej. Yeka timomaijtosej nelia se ueyi tlateochiualistli (Salmo 65:2). Inoj amo kiijtosneki toTeotsij kintlakakilia nochi katli momaijtouaj. Ipan Biblia kiijtoua tlaj se tlakatl kitlaijiyouiltia isiua, toTeotsij “axkikakis” kema momaijtos (1 Pedro 3:7). Kema israeleuanij nochipa kichiuayayaj tlen amo kuali, toTeotsij amo kintlakakiliyaya. Nama tlaj se akajya kichiua se ueyi tlajtlakoli uan moyolkuepa toTeotsij kena kitlakakilia. (Xijpoua Isaías 1:15 uan 55:7).

Xikita nopa video ¿Kitlakakilia toTeotsij nochi tlamaijtoli?

Kema timomaijtouaj nojkia tijueyichiuaj Jehová, yeka san ya moneki tijnojnotsasej (Mateo 4:10; 6:9). Uan pampa titlajtlakolejkej, moneki ma timomaijtokaj ika Jesús itoka pampa ya kiixpolok totlajtlakoljuaj kema mijki (Juan 16:23, 24). Jehová amo kineki ma tikiljuikaj san tlen tijtsontekontlalijtokej o san tlen ijkuilijtok ipan se amatl, ya kineki ma tijnojnotsakaj ika nochi toyolo. (Xijpoua Mateo 6:7; Filipenses 4:6 uan 7).

ToTeotsij nojkia techtlakakilia kema timomaijtouaj ichtakatsi o san ipan toyolo (1 Samuel 1:12, 13). Uan ya techiljuia nochipa ma timomaijtokaj, kema peua se tonali uan kema tlami, kema titlakuasej o kema tijpiaj kuesoli. (Xijpoua Salmo 55:22 uan Mateo 15:36).

Nama ouij tijnechkauisej toTeotsij, pampa itstokej miakej katli amo kineltokaj toTeotsij uan kipinajtiaj kema  kiijtoua kichiuas ma onka tlayolseuilistli ipan Tlaltipaktli (2 Timoteo 3:1, 4; 2 Pedro 3:3, 13). Yeka moneki ma timonechikokaj ininuaya sekinok Cristo itokilijkauaj uan kiampa sansejko timoyolchikauasej. (Xijpoua Hebreos 10:24 uan 25).

Tlaj timonechikosej ininuaya katli kiikneliaj toTeotsij, tijyolmatisej tiitstokej toTeotsij inechka. Uan kampa monechikouaj Jehová itlajtoltemakauaj nojkia uelis timoyolchikauasej pampa tikinitasej kenijkatsa sekinok tlauel kuali tlaneltokatokej. (Xijpoua Romanos 1:11 uan 12).

Uelis tijnechkauisej tlaj timoiljuisej kenijkatsa uelis techpaleuis tlen timomachtijtokej ipan iTlajtol. Ma tikilnamikikaj tlen kichijtok, tlen tetlajtolmaka uan tlen mosentlalijtok kichiuas. Tlaj timoyoliljuisej ipan nochi ni tlamantli uan timomaijtosej, techpaleuis tijkuamachilisej kenijkatsa toTeotsij tlauel techiknelia uan kenijkatsa tlauel miak ixtlamati. (Xijpoua Josué 1:8 uan Salmo 1:1-3).

Tlaj tijneltokasej nelia itstok toTeotsij uan timotemachisej ipan ya uelis tiitstosej inechka. Totlaneltokilis kejuak se kuauitl tlen moneki nochipa tikatekijtosej uan kej nopa moskaltijtias. Uajka nojkia, tlaj tijnekij nojua kuali titlaneltokasej, moneki timoiljuisej kenke tijneltokatokej tlen kiijtoua Biblia. (Xijpoua Mateo 4:4; Hebreos 11:1 uan 6).

Jehová kitekipachoua tlen kinpano katli kiikneliaj. Yeka amo kikauas ma pano se tlamantli tlen ueliskia kichiuas ma ayokmo titlaneltokakaj uan nojkia amo kikauas ma ayokmo timotemachikaj ipan nopa nemilistli tlen amo kema tlamis (Salmo 91:1, 2, 7-10). Nojkia techiljuia amo matijchiuakaj tlen ueliskia techkokolismakas uan kichiuaskia ma ayokmo tiyolpakikaj, uan techmachtia kenijkatsa tlauel kuali ma timonejnemiltikaj. (Xijpoua Salmo 73:27, 28; Santiago 4:4 uan 8).