Xikita ni pilokichpiltsi ipan tlaixkopinkayotl, nesi itstok iselti uan majmaui. ¿Nojkia kej nopa mitspanotok?... Nochi techpanotok. Biblia kiijtoua sekij toTeotsij itekipanojkauaj nojkia majmajkej uan moiljuiyayaj itstoyaj ininselti. Ipan ni tlapoualistli tikitasej kenijkatsa Elías kej nopa kiyolmatki.

Elías itstoya uejkajkia ipan altepetl Israel kema Jesús ayamo tlakatiyaya. Acab, katli tekichiuayaya ne Israel, amo kiueyichiuayaya Jehová. Ya uan isiua Jezabel kiueyichiuayayaj Baal, ininteotsij tlen amo melauak. Yeka miakej israeleuanij nojkia pejkej kiueyichiuaj Baal. Jezabel kichiuayaya miak tlamantli tlen amo kuali uan kinekiyaya kinmiktis nochi Jehová itekipanojkauaj. Yeka nojkia kinekiyaya kimiktis Elías. ¿Tijmati tlake kichijki Elías?...

Elías mochololtik uan yajki kampa uaktok tlali uan motlatito kampa tlakoyontoya  ipan se tepetl. ¿Tijmati kenke motlatito nopaya?... Pampa tlauel majmauiyaya. Elías amo kinamikiyaya majmauis, pampa Jehová ueliskia kipaleuis. Jehová ipa kipaleuijtoya. Se tonali kema Elías momaijtok, Jehová kipaleuik uan kichijki ma uetsi tlitl tlen iluikak. Yeka, ¡Jehová sampa ueliskia kipaleuis!

Kema Elías motlatijtoya, Jehová kiiljuik: “¿Kenke tiitstok nikaj?”. Elías kinankilik: “Pampa san na nimokaua uan noselti niitstok. Uan nimajmaui pampa nojkia kinekij nechmiktisej”. Elías moiljuiyaya kinmiktijtoyaj nochi toTeotsij itekipanojkauaj. Yeka Jehová kiiljuik: “Amo, amo san ta tiitstok, nojua itstokej 7,000 notekipanojkauaj. Amo ximajmaui, pampa nijneki nojua xijchiua se tlamantli”. ¿Kenijkatsa timoiljuia kiyolmatki Elías kema Jehová kej nopa kiiljuik?... ¡Nelia tlauel yolpajki!

¿Tlake mitsmachtia tlen kipanok Elías?... Maske kemantika uelis timajmauis o timoiljuis moselti tiitstok, xikilnamikto tikinpia mouampoyouaj katli kiikneliaj Jehová uan katli nojkia mitsikneliaj. Nochipa xikilnamikto: Jehová kipia miak tetikayotl uan ya nochipa mitspaleuis. ¿Tiyolpaki pampa tijmati amo kema tiitstos moselti?...