Nopa achtoui carta tlen kintitlanilijkej Cristo itokilijkauaj tlen Corinto 6:1-20
6 Tlaj se tlen inmojuantij kipia se kuesoli ika seyok, ¿kenke inkinekij inmoteljuitij kampa tekichiuanij katli amo kichiuaj tlen xitlauak? ¿Kenke amo inyauij kampa toikniuaj katli Dios kiniyokatlalijtok?*
2 ¿Amo inkimatij katli Dios kiniyokatlalijtok kintlajtolsenkauasej katli itstokej ipan Tlaltipaktli? Uan tlaj inmojuantij inkintlajtolsenkauasej katli itstokej ipan Tlaltipaktli, ¿kenke amo ueli inkisenkauaj se kuesoli tlen amo tlauel ueyi?
3 ¿Amo inkimatij para tikintlajtolsenkauasej ángeles? Uajka, ¿kenke amo ueli inkisenkauaj se kuesoli tlen pano ipan ni tonali?
4 Yeka, tlaj moneki inkisenkauasej se kuesoli tlen nama onka, ¿kenke inkiniljuiaj ma inmechtlajtolsenkauakaj tlakamej katli toikniuaj tlen tlanechikoli amo kinseliaj?*
5 Niinmechiljuia ni tlamantli para xipinauakaj. ¿Nelia amo itstok kampa inmojuantij yon se tlakatl katli tlalnamiki katli uelis kisenkauas nopa kuesoli tlen kipiaj toikniuaj?
6 Pero se toikni kiuika seyok toikni kampa tekichiuanij katli amo tlaneltokaj.
7 Nelia se ueyi pinaualistli para inmojuantij kema inmoteljuiaj kampa tekichiuanij. ¿Kenke amo inkiijiyouiaj kema inmoikniuaj inmechchiuiliaj tlen amo kuali? ¿Amo kinamikiskia inkikauasej ma inmechkuilikaj tlen inmoaxka?
8 Pero inmojuantij inkichiuaj tlen amo xitlauak uan inkinkuiliaj tlen sekinok ininaxka, ¡uan ni tlamantli inkinchiuiliaj inmoikniuaj!
9 ¿O amo inkimatij katli kichiuaj tlen amo xitlauak amo kiselisej iTlanauatijkayo Dios? Amo ximokajkayauakaj.* Maseualmej katli auilnemij,* katli kinueyichiuaj sekinok dioses, katli momekatiaj,* tlakamej katli mosiuanekij, tlakamej katli motekaj ininuaya tlakamej,
10 katli tlachtekij, katli kiixtokaj tlen sekinok ininaxka, katli moiuintiaj, katli tetlaijiljuiaj ika fiero tlajtoli* uan katli tlakajkayauaj para tlachtekisej, amo kiselisej iTlanauatijkayo Dios.
11 Uan se keskij tlen inmojuantij ya nopa inkichiuayayaj. Pero nama inmechchijtokej intlapajpaktikej, inmechiyokatlalijtokej para Dios,* inmechitaj inxitlauakej ipan itoka toTeko Jesucristo uan ika ichikaualis* toDios.
12 Nochi ueli nijchiua, pero amo nochi nechpaleuia. Nochi ueli nijchiua, pero amo nijkauas yon se tlamantli ma nechnauati.
13 Tlakualistli mochijki para toijti, uan toijti mochijki para tlakualistli, pero Dios* kitlamiltis nochi nopa ome tlamantli. Uan totlakayo amo mochijki para tiauilnemisej,* mochijki para tijtekipanosej toTeko, uan toTeko kimokuitlauia totlakayo.
14 Pero Dios kiyolkuik* toTeko uan nojkia techyolkuis tojuantij ika itetikayo.
15 ¿Amo inkimatij inmotlakayo tlatskitok ika itlakayo Cristo uan mochiua san setsi itlakayo? Uajka, ¿inmoiljuiaj kinamiki nijkixtilis tlen kipia itlakayo Cristo uan nijtlatskiltis ipan se siuatl katli monamaka?* ¡Amo kema ma pano nopa!
16 ¿Amo inkimatij para se tlakatl katli mosansejkotilia iuaya se siuatl katli monamaka, mochiuaj san setsi inintlakayo? Pampa Dios kiijtoua: “Nopa omej elisej san setsi inintlakayo”.
17 Pero katli mosansejkotilia iuaya toTeko, kipia sanse tlalnamikilistli kej ya.*
18 ¡Amo xiauilnemikaj!* Katli kichiua sekinok tlajtlakoli amo kisokiuia itlakayo, pero katli auilnemi kisokiuia itlakayo.
19 ¿Amo inkimatij para inmotlakayo eli kej se templo kampa eltok ichikaualis Dios,* tlen mokaua ipan inmojuantij uan tlen Dios inmechmaka? Nojkia, inmotlakayo amo inmoaxka,
20 pampa Dios tlaxtlajki para inmechkouas. Uajka, xijtekiuikaj inmotlakayo para inkiueyichiuasej Dios.
Tlen ijkuilijtok tlatsintla
^ O “tlatsejtseloltikej”.
^ O “amo kuali kinitaj”.
^ O “Amo xijkauakaj ma inmechkajkayauakaj”.
^ Xikita auilnemilistli.
^ O “kikajkayauaj ininnamik”.
^ Kanajya kiijtouaj “kamanali”.
^ O “inmechchijtokej intlatsejtseloltikej”.
^ O “iespíritu”.
^ Kanajya kiijtouaj “toTeotsij”.
^ Ika griego pornéia. Xikita auilnemilistli.
^ Ika griego “kitlananki”.
^ O “auilnenkasiuatl”.
^ O “mosejkotilia iuaya ika espíritu”.
^ Ika griego “¡Xicholokaj tlen auilnemilistli!”. Ika griego pornéia. Xikita auilnemilistli.
^ O “espíritu santo”.
