Nopa carta tlen kintitlanilijkej Cristo itokilijkauaj tlen Colosas 3:1-25
3 Pero tlaj inmojuantij inmoyolkuikej* iuaya Cristo, uajka nojua xijtemojtokaj tlamantli tlen onka uejkapa, kampa Cristo moseuijtok ika imanejmak Dios.*
2 Ximosentlalikaj inmoiljuisej ipan tlen onka uejkapa uan amo ipan tlamantli tlen onka ipan Tlaltipaktli.
3 Pampa inmojuantij inmijkej, uan inmonemilis motlatijtok* ipan Cristo pampa Dios kej nopa kineki.
4 Kema monextis Cristo, katli techmaka nemilistli, uajka inmojuantij nojkia inmonextisej iuaya uan inmechuejkapantlalisej kej ya.
5 Uajka, xijmiktikaj tlen kiyoltilana sejse parte tlen inmotlakayo para amo inauilnemisej,* amo inkichiuasej tlen sokiyo, amo san inkinektosej inmotekasej iuaya se akajya, amo inkinekisej inkichiuasej tlen amo kuali uan amo inkiixtokasej tlen sekinok ininaxka, tlen eli sanse kej kema kinueyichiuaj dioses uan tlaixkopinkayomej.
6 Dios kinextis ikualankayo ika maseualmej katli kichiuaj nopa tlamantli.
7 Achtouia inmojuantij nojkia kiampa inmonejnemiltiyayaj.
8 Pero nama ayokmo xikualankamikikaj,* ayokmo ximosisinikaj, ayokmo xijchiuakaj tlen amo kuali, ayokmo xikijtokaj tlajtoli tlen teyolkokoua uan ayokmo ma kisa ipan inmokamak tlajtoli tlen sokiyo.
9 Amo ximokajkayauakaj se ika seyok. Xijtlauelkauakaj inmonemilis tlen achtouia inkipiayayaj uan tlen inkichiuayayaj,
10 uan sanse kej inmotlaliliskiaj se yankuik yoyomitl, xijpiakaj se inmonemilis tlen yankuik, tlen moyankuilijtia kema más kuali inkiixmajtiauij Dios, uan kiampa inkichiuasej sanse kej ya.
11 Kema tijpiaj tonemilis tlen yankuik nochi tielij sanse, amo itstok griego yon judío, yon katli mochiuilijtok circuncisión* yon katli amo mochiuilijtok,* yon katli sejkanok* euanij yon katli itstokej kuatitla,* yon katli eli tlatekipanojketl yon katli amo. Kema tijpiaj tonemilis tlen yankuik, Cristo eli nochi uan itstok ipan nochi.
12 Yeka, pampa Dios inmechtlapejpenijtok, inmechiyokatlalijtok* uan inmechiknelia, tlauel xitetlasojtlakaj,* xijpiakaj kuali inmoyolo, ximoechkapanokaj,* xielikaj inyolyamanikej* uan xijpiakaj inmoyolo.
13 Nojua ximoijiyouijtokaj se ika seyok uan ximotlapojpoljuijtokaj ika nochi inmoyolo maske se akajya kichiua se tlenijki tlen inmechyolkokoua. Jehová* inmechtlapojpoljuik ika nochi iyolo, uajka inmojuantij nojkia kiampa xijchiuakaj.
14 Pero amo san nopa, nojkia tlauel xiteiknelikaj,* pampa tlaiknelili kinsansejkotilia maseualmej uan kichiua kuali ma mouikakaj se ika seyok.
15 Uan nopa tlaseuilistli tlen Cristo temaka ma kiyakana inmoyolo, pampa inmojuantij inmechnotskej para initstosej ika nopa tlaseuilistli uan inelisej kejuak san setsi itlakayo. Nojkia xijnextikaj intetlaskamatij.
16 Itlajtol Cristo senkistok ma elto ipan inmojuantij uan kiampa inkipiasej tlalnamikilistli. Nojua ximomachtijtokaj uan ximoyolchikajtokaj se ika seyok ika salmos, uikatl tlen ika titlaueyichiuaj uan teouikatl* tlen ika tijtlaskamatiliaj Dios. Xijuikatikaj Jehová* ipan inmoyolo.
17 Tlen ueli tlamantli tlen inkiijtosej o inkichiuasej, xijchiuakaj ipan itoka toTeko Jesús, uan ika ya xijtlaskamatilikaj toTata Dios.
18 Siuamej katli inmonamiktijtokej, xijkauakaj ma inmechyakana inmoueue, kej kinamiki kichiuasej itokilijkauaj toTeko.
19 Tlakamej katli inmosiuajtijtokej, nojua xikiknelijtokaj inmosiua uan amo xikualankamikikaj* ika ya.
20 Konemej, xikinneltokakaj inmotatauaj ipan nochi tlen inmechiljuiaj, pampa nopa kipaktia toTeko.
21 Tetajmej,* amo xikinkualankamakakaj inmokoneuaj, kiampa inijuantij amo moyolkuesosej.
22 Intlatekipanouanij, xikinneltokakaj inmotekouaj ipan nochi tlen inmechiljuiaj. Amo san xikinneltokakaj kema inmechtlachilijtokej pampa san inkinekij inkinyolpakiltisej maseualmej, xikinneltokakaj ika nochi inmoyolo pampa inkimakasij Jehová.*
23 Tlen ueli tlamantli tlen inkichiuaj, xijchiuakaj ika nochi inmonemilis* kejuak eliskia para Jehová* uan amo para maseualmej,
24 pampa inkimatij eli Jehová* katli inmechteochiuas kema inmechaxkatis tlen kitenkajtok. Xielikaj itlatekipanojkauaj toTeko Cristo.
25 Tlaj se akajya kichiua tlen amo kuali, temachtli kiixtlauas tlen kichijtok, pampa Dios nochi kintlajtolsenkauas uan amo aka kichikoiknelis.
Tlen ijkuilijtok tlatsintla
^ Ika griego “inmotlanankej”.
^ Kanajya kiijtouaj “toTeotsij”.
^ Kanajya kiijtouaj “miyantok”.
^ Ika griego pornéia. Xikita auilnemilistli.
^ Kanajya kiijtouaj “ayokmo xiyolkuitlamikikaj”.
^ Xikita circuncisión.
^ O “incircunciso”.
^ Kanajya kiijtouaj “oksejko”, “sejkoyok”.
^ Ika griego “escita”. Uejkajkia kiampa kiniljuiyayaj maseualmej katli kinchikoitayayaj pampa amo momajtoyaj kichiuaj kej sekinok yon monejnemiltiyayaj kej inijuantij.
^ O “amo ximoueyimatikaj”.
^ O “amo ximosisinikaj”.
^ O “kejuak ximokentikaj nopa tetlasojtlalistli”.
^ O “inelij intlatsejtseloltikej”.
^ O “kejuak ximokentikaj nopa tlaiknelijkayotl”.
^ O “uikatl tlen Dios”.
^ O “amo xielikaj inyoltetikej”.
^ Nikaj kiijtosneki tlakamej.
