Nopa carta tlen kintitlanilijkej Cristo itokilijkauaj tlen Filipos 1:1-30
1 Na Pablo uan nojkia Timoteo, tiitlatekipanojkauaj Cristo Jesús, tiinmechtlajkuiljuiliaj nochi katli Dios* kiniyokatlalijtok* katli itstokej sansejko iuaya Cristo Jesús ipan Filipos, ininuaya tlayakananij* uan tlapaleuianij:*
2 ToTata Dios uan toTeko Jesucristo ma kipiakaj ueyi ininyolo ika inmojuantij* uan ma inmechpaleuikaj kuali ximouikakaj ininuaya.
3 Nochipa nijtlaskamatilia noDios kema niinmechilnamiki,
4 kiampa nijchiua kema ipan sejse tlamaijtoli* chikauak nitlajtlani por inmojuantij. Uan nijchiua ika pakilistli,
5 pampa desde kema inkikajkej uan hasta nama, intlapaleuijtokej ma momoyaua nopa kuali tlamachtili.
6 Pampa nimotemachia Dios inmechpaleuis xijtlamiltikaj ni kuali tekitl tlen kipeualtik ika inmojuantij hasta ipan nopa tonali kema ualas Cristo Jesús.
7 Nelia kinamiki kiampa ma nimoiljui ika nochi inmojuantij, pampa niinmechpixtok ipan noyolo. Inmojuantij innechpaleuijkej kema nitsaktoya uan niilpitoya ika cadenas uan nojkia inkimanauijkej uan intlapaleuijkej para ma techkauakaj tijmoyauasej nopa kuali tlamachtili. Kiampa inmojuantij uan na, tikitakej kenijkatsa techpaleuik kema Dios kinextik ueyi iyolo ika tojuantij.*
8 Dios eli notestigo para tlauel niinmechtemoua uan tlauel niinmechiknelia sanse kej Cristo Jesús inmechiknelia.
9 Uan ya ni tlen nitlajtlani kema nimomaijtoua: nojua más xijmatikaj tlen Dios kineki, nojua kuali xitlalnamikikaj uan kiampa nojua más inteiknelisej.
10 Uan xikitakaj tlake tlamantli eli más ipati, kiampa amo inkipiasej yon se tlamantli tlen amo kuali ipan inmojuantij uan amo inkichiuasej sekinok ma tlajtlakolchiuakaj hasta nopa tonali kema ualas Cristo
11 uan Jesucristo ma inmechpaleui xijchijtokaj nojua más miak tlamantli tlen kuali,* kiampa maseualmej kimatisej Dios eli tlauel ueyi uan kiuejkapantlalisej.
12 Noikniuaj, nijneki xijmatikaj tlen nechpanotok tlauel tlapaleuijtok para ma momoyaua nopa kuali tlamachtili,
13 pampa nochi soldados katli kimokuitlauiaj tlanauatijketl tlen Roma uan nochi nopa sekinok, kimatij nechilpitokej ika ni cadena pampa niitokilijka Cristo.
14 Uan yeka nama miakej toikniuaj katli nojkia tlaneltokaj ipan toTeko, kinpaleuijtok amo ma majmauikaj pampa nechtsaktokej uan kinextiaj amo majmauij kamanaltisej itlajtol Dios.
15 Sekij tematiltiaj tlen Cristo pampa tekokoliaj* uan kinpaktia motekitlachilisej,* pero sekij kichiuaj ika nochi ininyolo.
16 Katli kichiuaj ika nochi ininyolo tematiltiaj tlen Cristo pampa nelia teikneliaj, pampa kimatij nechtekimakakej para nijmanauis nopa kuali tlamachtili;
17 pero nopa sekinok kichiuaj san para ma onka kualantli, amo kichiuaj pampa kipiaj kuali ininyolo, pampa kinekij nechkuesolmakasej kampa nitsaktok uan niilpitok ika cadenas.
18 ¿Kenijkatsa tlapaleuia nopa? Sekij tepouiliaj tlen Cristo maske amo kichiuaj ika nochi ininyolo uan sekinok kena, nopa kichiua ma niyolpaki. Uan nojua kichijtos ma niyolpakto,
19 pampa nijmati nopa nechpaleuis ma nimomakixti* pampa inmojuantij chikauak inmomaijtouaj, uan pampa nechpaleuia ichikaualis Dios* tlen Jesucristo temaka.
20 Ni tlamantli mouika ika tlen tlauel nijneki uan nimotemachia para amo nimopinaualtis ika yon se tlamantli. Uan nimotemachia nojua uelis nitematiltijtos uan kiampa uelis nijuejkapantlalis Cristo ika notlakayo, kej nochipa nijchijtok, maske niyoltos o nimiktos.
21 Pampa tlaj niyoltos, nijtekiuis nonemilis para Cristo, uan tlaj nimikis, nelia tlauel nitlatlani.
22 Uan tlaj nojua moneki niitstos ipan Tlaltipaktli,* nojua más uelis nijtekipanos Cristo. Pero amo nikijtos tlen nijtlapejpenis nijchiuas.
23 Nimoxelojtok ika ni ome tlamantli, nijneki ma nechmakixtikaj uan nojkia nijneki niitstos iuaya Cristo, uan ya nopa más kuali.
24 Pero más kuali para inmojuantij ma niitsto ipan Tlaltipaktli.*
25 Yeka, pampa nimotemachia ipan ni tlamantli, nijmati nojua niyoltos uan niitstos inmouaya, para nojua kuali xitlatekipanojtokaj uan xiyolpakikaj pampa intlaneltokaj,
26 uan tlauel inyolpakisej ipan Cristo Jesús kema na sampa niitstos inmouaya.
27 Uan ximonejnemiltikaj kej kinamiki kichiuasej katli tematiltiaj nopa kuali tlamachtili tlen Cristo, kiampa kema nias niinmechitati o kema amo niitstos, nijkakis uan nijmatis para inmojuantij inkipiaj sanse inmotlalnamikilis, sanse inmoyolo,* inmopaleuiaj se ika seyok para kuali intlaneltokatosej ipan nopa kuali tlamachtili
28 uan amo inkinmakasij katli inmechkualankaitaj. Uan nopa kinextia inijuantij kintsontlamiltisej uan inmojuantij inmechmakixtisej, uan ni uala tlen Dios.
29 Pampa amo san inmechmakakej nopa tlateochiualistli para intlaneltokasej ipan Cristo, nojkia para intlaijiyouisej por ya.
30 Yeka, nojkia inkiixnamikij nopa tlaouijkayotl tlen inkiitakej nikixnamijki, uan kej inkimatij nojua nikixnamiktok.
Tlen ijkuilijtok tlatsintla
^ Kanajya kiijtouaj “toTeotsij”.
^ O “tlatsejtseloltikej”.
^ O “katli tlamokuitlauiaj uan temanauiaj”.
^ Nojkia kinixmatij kej “siervos ministeriales”.
^ O “ma inmechmakakaj tlateochiualistli tlen amo kinamiki tijselisej”.
^ Kanajya kiijtouaj “tlatlajtili”.
^ O “techmakak tlateochiualistli tlen amo kinamiki tijselisej”.
^ Ika griego “inmotlajka tlen xitlauak”.
^ O “kiixtokaj tlen sekinok ininaxka”.
^ O “motekitlanisej”.
^ O “ma nimomanaui”.
^ O “espíritu santo”.
^ Ika griego “ipan notlakayo”.
^ Ika griego “ipan notlakayo”.
