Hechos (Tlen apóstoles kichijkej) 17:1-34
17 Uajka panokej Anfípolis uan Apolonia uan asitoj Tesalónica, uan nopaya eltoya kampa tlaueyichiuaj judíos.
2 Uan kej Pablo momajtoya kichiua, kalajki kampa itstoyaj inijuantij uan ipan eyi sábado kinmachtik uan kinpaleuik ma kikuamachilikaj iTlajkuilol Dios.
3 Kinixtomiliyaya uan kinextiyaya ika iTlajkuilol Dios para Cristo monekiyaya tlaijiyouis uan moyolkuis. Kiniljuiyaya: “Ni Jesús, tlen namantsi niinmechpouilijtok, ya eli nopa Cristo”.
4 Yeka se keskij katli nopaya itstoyaj pejkej tlaneltokaj uan mosentilijkej ininuaya Pablo uan Silas. Nojkia kiampa kichijkej miakej griegos katli kiueyichiuayayaj Dios* uan siuamej katli tlauel pankisayayaj.
5 Pero nopa judíos, katli tlauel kinkualankaitayayaj, kinsentilijkej se keskij tlakamej katli amo kualmej katli nochipa nemiyayaj ipan tiankis* uan kinajkomankej* katli itstoyaj ipan nopa altepetl. Uajka kalajkej ichaj Jasón pampa kintemouayayaj Pablo uan Silas para kintemaktilisej ininmako nopa miakej maseualmej.
6 Uan pampa amo kinpantijkej, kinuauatatstiajkej Jasón uan se keskij toikniuaj hasta kampa itstoyaj tekichiuanij tlen nopa altepetl, uan chikauak kiijtouayayaj: “Nopa tlakamej katli kinajkomantokej nochi katli itstokej ipan Tlaltipaktli, nojkia itstokej nikaj
7 uan Jasón kinkauilijtok ma mokauakaj ichaj. Nochi ni tlakamej kiixpanoj itlanauatiljuaj Tlanauatijketl tlen Roma* pampa kiijtouaj itstok seyok tlanauatijketl: Jesús”.
8 Kema kikajkej nopa, maseualmej uan tekichiuanij tlen nopa altepetl momajmatijkej,
9 uajka kintlajtlanijkej tomij Jasón uan nopa sekinok, uan kinkajkej ma yakaj.
10 Ipan nopa youali, toikniuaj kintitlankej Pablo uan Silas ma yakaj Berea. Kema asitoj, yajkej kampa tlaueyichiuaj judíos.
11 Pero ni judíos más kinekiyayaj momachtisej que katli itstoyaj Tesalónica, pampa kiselijkej itlajtol Dios ika nochi ininyolo, uan mojmostla kuali momachtiyayaj iTlajkuilol Dios pampa kinekiyayaj kiitasej tlaj nelia tlen kiniljuiyayaj.
12 Yeka miakej katli nopaya itstoyaj, pejkej tlaneltokaj. Nojkia kiampa kichijkej miakej siuamej katli eliyayaj griegos uan tlauel kintlepanitayayaj, uan nojkia se keskij tlakamej.
13 Pero kema judíos tlen Tesalónica kimatkej Pablo nojkia kimoyauayaya itlajtol Dios ipan Berea, yajkej kinkualankamakatoj uan kinajkomanatoj maseualmej katli nopaya itstoyaj.
14 Toikniuaj nimantsi kipaleuijkej Pablo ma yaui hasta kampa mar, pero Silas uan Timoteo mokajkej nopaya.
15 Pero katli yauiyayaj iuaya Pablo kiuikakej hasta Atenas. Teipa kema tlakuepilijkej, Pablo kiniljuik ma kiniljuitij Silas uan Timoteo nimantsi ma yakaj kampa ya itstoya.
16 Kema Pablo kinchixtoya Atenas, tlauel mokuesok pampa kiitak ipan nopa altepetl kinpixtoyaj miakej dioses.*
17 Uajka pejki kinkamanaljuia judíos kampa tlaueyichiuayayaj uan nojkia sekinok maseualmej katli kiueyichiuayayaj Dios para kinpaleuis ma kikuamachilikaj iTlajkuilol Dios. Uan mojmostla nojkia kiampa kichiuayaya ipan tiankis, kinkamanaljuiyaya katli nopaya itstoyaj.
18 Pero se keskij ixtlamatinij tlen kiniljuiaj epicúreos uan estoicos* pejkej kinajnankiliaj Pablo. Sekij tlatsintokayayaj: “¿Tlake kineki kiijtos ne katli san popolokatok?”. Uan sekinok kiijtouayayaj: “Nesi tepouilia tlen dioses tlen sejkanok* euaj”. Kiampa kiijtouayayaj pampa tematiltiyaya nopa kuali tlamachtili tlen Jesús uan tlamachtiyaya moyolkuisej katli miktokej.
19 Uajka kiitskijkej uan kiuikakej Areópago. Kiijtouayayaj: “¿Uelis tijmatisej tlake nopa yankuik tlamachtili tlen titlamachtijtinemi?
20 Pampa tikijtoua tlamantli tlen amo kema tijkaktoyaj uan tijnekij tijmatisej tlake kiijtosneki”.
21 Uan nochi katli euayayaj Atenas uan nojkia katli sejkanok euayayaj uan itstoyaj* nopona, san kinpaktiyaya tepouilisej o kikakisej yajyankuik tlamantli kema amo tleno kichiuayayaj.
22 Uajka Pablo moketski tlatlajko tlen nopa Areópago uan kiijtok:
“Tlakamej katli ineuaj Atenas, nikita inmojuantij más inkinueyichiuaj inmodioses* que sekinok.
23 Kema ninejnentiauiyaya uan kuali nijtlachilijtiauiyaya tlen inkinchijchijtokej para inkinueyichiuasej, nikitak se tlaixpamitl kampa ijkuilijtoya: ‘Para se Dios katli amo Tikixmatij’. Na niinmechkamanaljuia tlen nopa Dios katli inkiueyichiuaj maske amo inkiixmatij.
24 Nopa Dios katli kichijchijki Tlaltipaktli uan nochi tlen nopaya onka, iaxka iluikaktli uan Tlaltipaktli, yeka amo itstok ipan templos tlen maseualmej kichijchijtokej.
25 Nojkia amo moneki se akajya ma kipaleui pampa ya amo tleno kipoloua, pampa ya kinmaka nochi maseualmej nemilistli, kichiua ma tlaijiyotilanakaj uan kinmaka nochi tlen moneki.
26 San ika se tlakatl kinchijchijki nochi maseualmej para ma kitemitikaj nochi Tlaltipaktli, uan kiixtlalik tonali para ma pano se keski tlamantli; nojkia kiixtlalik hasta kanke ueliskia itstosej maseualmej.
27 Kiampa kichijki para ma kitemokaj Dios. Tlaj inkichiuasej kampeka, uelis inkipantisej pampa nelia ya amo uejka itstok.
28 Pampa ya techmaka nemilistli, kichiua ma timoojolinikaj uan ma tiitstokaj. Kej kiijtojtokej se keskij tlajkuilouanij katli nikaj euaj: ‘Pampa tojuantij nojkia tielij ikoneuaj’.
29 ”Uajka, pampa tielij ikoneuaj Dios, amo kinamiki timoiljuisej Dios eli kej dioses tlen kinchijchijtokej ika oro, plata o tetl, o tlen maseualmej moiljuiaj uan kinchijchiuaj.
30 Kena, Dios inmechkajki kiampa xijchiuakaj pampa amo inkiixmatiyayaj, pero nama kiniljuia nochi maseualmej katli kampa ueli euaj ma moyolkuepakaj.
31 Pampa kiixtlalijtok se tonali kema kintlajtolsenkauas kej kinamiki nochi maseualmej katli itstokej ipan Tlaltipaktli ika se tlakatl katli ya kitlapejpenijtok. Uan nelia uelis timotemachisej kiampa kichiuas, pampa kiyolkuik”.
32 Kema kikajkej kiniljuik moyolkuisej katli miktokej, se keskij pejkej kipinajtiaj uan sekinok kiijtojkej: “Seyok tonali tijtlakakilisej motlamachtil”.
33 Uajka Pablo yajki,
34 pero se keskij tlakamej yajkej iuaya uan pejkej tlaneltokaj. Se katli tlaneltokak motokaxtiyaya Dionisio, ya eliyaya juez tlen nopa Areópago, uan se siuatl katli motokaxtiyaya Dámaris, uan nojkia sekinok.
Tlen ijkuilijtok tlatsintla
^ Kanajya kiijtouaj “toTeotsij”.
^ Kanajya kiijtouaj “plaza”.
^ O “kichijkej ma kualanikaj”.
^ Ika griego “César”.
^ O “teteyomej”.
^ Katli kitokiliyayaj Epicuro uan Zenón.
^ Kanajya kiijtouaj “oksejko”, “sejkoyok”.
^ O “yajtoyaj paxalouaj”.
^ O “más inkinmakasij inmodioses”.
