Tlen kiijkuilok Juan 1:1-51
1 Kema pejki nochi tlen onka, nopa Tlajtoli ipa itstoya, nopa Tlajtoli itstoya iuaya Dios* uan nopa Tlajtoli eliyaya kej Dios.*
2 Kema pejki nochi, yaya itstoya iuaya Dios.
3 Dios kitekiuik para kichijchiuas nochi tlen onka, uan tlaj ya amo itstoskia, yon se tlamantli mochijtoskia.
4 Dios kitekiuik para ma onka nemilistli, uan nopa nemilistli eliyaya inintlauil maseualmej.
5 Nopa tlauili tlauia kampa tsintlayouilotl, pero nopa tsintlayouilotl amo ueltok kiseuia nopa tlauili.
6 Ualajki se tlakatl katli Dios kititlantoya. Motokaxtiyaya Juan.
7 Ni tlakatl ualajki kej se testigo para tematiltis tlen nopa tlauili, kiampa ika tlen kichiuaskia, nochi maseualmej tlaneltokaskiaj.
8 Juan amo eliyaya nopa tlauili, ya ualajki tematiltiko tlen nopa tlauili.
9 Nopa tlauili tlen melauak, tlen kintlauilia nochi maseualmej, nechka ualaskia ipan Tlaltipaktli.
10 Yaya* itstoya ipan Tlaltipaktli, uan Dios kitekiuik para kinchijchiuas katli itstokej ipan Tlaltipaktli, pero maseualmej amo kiixmatkej.
11 Ualajki ichaj, pero maseualmej katli nopaya itstoyaj amo kiselijkej.
12 Pero nochi katli kena kiselijkej, kinkauilik ma elikaj ikoneuaj Dios, pampa kinextijkej tlaneltokaj ipan itoka.
13 Uan inijuantij amo tlakatkej tlen inintatauaj yon pampa maseualmej kiampa kinejkej yon pampa se tlakatl kinejki, tlakatkej pampa Dios kinejki.
14 Nopa Tlajtoli mochijki tlakatl uan itstoya kampa tojuantij, uan tikitakej iueyitilis, kej kema se tetaj kimaka ikone iyojtsi iueyitilis. Uan Dios nochipa tlauel kiteochiuayaya uan ya nochipa kiijtok tlen melauak.
15 (Juan tematiltik tlen ya. Chikauak kiijtok: “¡Yaya eli katli niinmechiljuiyaya kema nikijtok ‘Katli uala noika, nama tlayakantok, pampa kema ayamo niitstoya ya ipa itstoya’!”).
16 Pampa maske ipa techmaka tlateochiualistli, nochi tojuantij senkistok tijseliaj nojua tlauel miak tlateochiualistli pampa ueyi iyolo ika tojuantij.
17 Pampa Dios techmakak nopa Tlanauatili ika Moisés, pero ika Jesucristo kinextik ueyi iyolo touaya uan techmakak tlen melauak.
18 Yon se maseuali amo kema kiitstok Dios. Nopa dios katli iyojtsi uan itstok inechka toTata, techixtomilijtok kenijkatsa eli ya.
19 Ya ni tlen Juan tematiltik kema judíos kintitlankej sacerdotes uan levitas desde Jerusalén para kitlatsintokitij: “¿Ajkia tieli?”.
20 Ya tlanankilik uan kiijtok: “Na amo nieli Cristo”.
21 Uan kitlatsintokijkej: “Uajka, ¿ajkia tieli? ¿TiElías?”. Uan ya tlanankilik: “Amo, na amo niElías”. Sampa kitlatsintokijkej: “¿Tieli nopa Teokamanalojketl* katli ualaskia?”. Uan tlanankilik: “¡Amo!”.
22 Uajka kiiljuijkej: “Xitechiljui ajkia tieli, kiampa tijmatisej tlake uelis tikiniljuisej katli techtitlankej. ¿Ta ajkia tikijtoua tieli?”.
23 Ya tlanankilik: “Na nieli katli chikauak kiijtoua* ipan uaktok tlali ‘¡Xijchiuakaj iojui Jehová* kuali ma elto!’, kej kiijtok teokamanalojketl Isaías”.
24 Nopa tlakamej kintitlantoyaj fariseos.*
25 Uan kitlatsintokijkej: “Tlaj amo tieli nopa Cristo yon Elías yon nopa Teokamanalojketl tlen ualaskia, ¿uajka kenke titeatsonpoliuiltia?”.
26 Juan kinnankilik: “Na niteatsonpoliuiltia ika atl. Kampa inmojuantij itstok se akajya katli amo inkiixmatij.
27 Ya eli katli uala noika uan amo kinamiki yon ma nijtojtomili ihuaraches”.
28 Ni tlamantli panok ipan Betania, ipan seyok nali ueyatl Jordán, kampa Juan teatsonpoliuiltiyaya.
29 Ika ualmostla,* Juan kiitak Jesús ualayaya kampa ya uan kiijtok: “¡Xikitakaj, iBorregojtsi Dios katli kikixtia tlajtlakoli ipan Tlaltipaktli!
30 Yaya eli katli niinmechiljuiyaya kema nikijtok ‘Katli uala noika, nama tlayakantok, pampa kema ayamo niitstoya ya ipa itstoya’.
31 Yon na nikixmatiyaya, pero niualajki para niteatsonpoliuiltis ika atl para ma kimatikaj ipan Israel ajkia eli ya”.
32 Juan nojkia tematiltik ni: “Nikitak ichikaualis Dios* temoyaya tlen iluikak kej se paloma uan mokajki ipan ya.
33 Yon na nikixmatiyaya, pero katli nechualtitlanki ma niteatsonpoliuilti ika atl nechiljuik: ‘Tijmatis ajkia eli katli teatsonpoliuiltia ika ichikaualis Dios kema tikitas nopa chikaualistli temo uan mokaua ipan ya’.
34 Uan na nikitak nopa, uan nitematiltijtok yaya eli iKone Dios”.
35 Ika ualmostla, Juan sampa itstoya nopaya ininuaya omej itokilijkauaj,
36 uan kema kiitak Jesús nejnentiauiyaya, kiijtok: “¡Xikitakaj, iBorregojtsi Dios!”.
37 Kema nopa omej itokilijkauaj kikajkej nopa, kitokilijkej Jesús.
38 Uajka Jesús mokuepki uan kema kiitak kitokiliyayaj, kintlatsintokik: “¿Tlake inkitemouaj?”. Inijuantij kinankilijkej: “Rabí (tlen kiijtosneki ‘tlamachtijketl’), ¿kanke timokaua?”.
39 Ya kiniljuik: “Xiualakaj uan inkiitasej”. Uajka yajkej, kiitakej kanke mokauayaya uan mokajkej iuaya nopa tonali; eliyaya nechka las cuatro ika tiotlak.*
40 Andrés, iikni Simón Pedro, elki se tlen nopa omej katli kikajkej tlen Juan kiijtok uan kitokilijkej Jesús.
41 Achtoui kipantik iikni, Simón, uan kiiljuik: “Tijpantijtokej nopa Mesías” (tlen kiijtosneki Cristo),
42 uan kiuikak kampa Jesús itstoya. Kema Jesús kiitak, kiiljuik: “Ta tieli Simón ikone Juan. Ta timotokaxtis Cefas” (tlen kiijtosneki Pedro).
43 Ika ualmostla, Jesús kinekiyaya yas Galilea. Uajka kipantik Felipe uan kiiljuik: “Xieli notokilijka”.
44 Felipe euayaya altepetl Betsaida, kampa nojkia euayayaj Andrés uan Pedro.
45 Uan Felipe kipantik Natanael uan kiiljuik: “Tijpantijtokej Jesús ikone José, katli eua Nazaret, nopa tlakatl katli Moisés kiijkuilok ipan iTlanauatil, uan nojkia katli kiijkuilojkej Teokamanalouanij”.
46 Uan Natanael kitlatsintokik: “¿Uelis kisas se tlamantli tlen kuali ipan Nazaret?”. Felipe kiiljuik: “Xiuala uan tikitas”.
47 Kema Jesús kiitak Natanael yauiyaya kampa ya, kiijtok: “Xikitakaj, se israelejketl katli nelia amo tlakajkayaua”.
48 Natanael kitlatsintokik: “¿Kenijkatsa tinechixmati?”. Jesús kinankilik: “Nimitsitak kema tiitstoya itsintla nopa higokuauitl, kema Felipe ayamo mitsnotsayaya”.
49 Natanael kinankilik: “Tlamachtijketl,* ta tieli iKone Dios, ta tieli nopa Tlanauatijketl tlen altepetl Israel”.
50 Jesús kiiljuik: “¿Tinechneltoka pampa nimitsiljuik nimitsitak itsintla nopa higokuauitl? Tikitas sekinok tlamantli tlen más uejueyi que ni”.
51 Uan nojkia kiijtok: “Temachtli niinmechiljuia, inmojuantij inkiitasej iluikaktli tlapojtok uan iángeles Dios tlejkoj uan temoj kampa itstok katli eli iKone se Maseuali”.*
Tlen ijkuilijtok tlatsintla
^ Kanajya kiijtouaj “toTeotsij”.
^ Ika griego “eliyaya se dios”.
^ Kineki kiijtos nopa “Tlajtoli”.
^ O “Profeta”.
^ Ika griego “kuatsajtsi”.
^ Kanajya kiijtouaj “Mostlaijki”, “Kema tonilik”.
^ O “espíritu santo”.
^ Ika griego “majtlakpa hora”.
^ Ika griego “Rabí”.
^ Xikita katli eli iKone se Maseuali.
