Nopa carta tlen kintitlanilijkej Cristo itokilijkauaj tlen Roma 2:1-29
2 Yeka, amo kenijki ajkia tieli,* tlaj tikinijilnamiki sekinok, amo kuali tlen tijchiua. Pampa kema tikijilnamiki se akajya, ta moselti timotlatsakuiltia, pampa ta nojkia tijchiua nopa tlamantli.
2 Tijmatij Dios* tetlajtolsenkaua ika tlen melauak uan kintlatsakuiltia katli kichiuaj nopa tlamantli.
3 Pero ta, katli tikinijilnamiki katli kichiuaj nopa tlamantli tlen ta nojkia tijchiua, ¿timoiljuia timomanauis kema Dios tetlajtolsenkauas?
4 ¿O amo tijpatiita pampa Dios kinextia kuali iyolo ika ta, mitsijiyouia uan kipia iyolo? ¿Amo tikita Dios kipia kuali iyolo uan yeka kitemolia kenijkatsa mitspaleuis ximoyolkuepa?
5 Pero titochontik uan amo tijneki timoyolpatlas, yeka ta moselti tijmiakilia nopa kualantli para Dios mitstlatsakuiltis ipan nopa tonali kema kinextis ikualankayo uan xitlauak tetlajtolsenkauas.
6 Uan Dios kimakas sejse maseuali tlen kinamiki kiselis ika tlen kichiua:
7 kinmakas nemilistli tlen amo kema tlamis* katli nochipa kichijtinemij tlen kuali pampa kitemouaj yaya ma kinuejkapantlali, ma kintlepanita uan amo ma nempoliui inintlakayo;
8 pero kintlatsakuiltis uan kinnextilis ikualankayo katli kinpaktia kichiuasej kualantli uan amo kineltokaj tlen melauak, san kichiuaj tlen amo xitlauak.
9 Kipiasej tlaouijkayotl uan tlaijiyouilistli katli kichiuaj tlen amo kuali, achtoui judíos uan nojkia griegos.
10 Pero kinuejkapantlalisej, kintlepanitasej uan kipiasej tlaseuilistli nochi katli kichiuaj tlen kuali, achtoui judíos uan nojkia griegos.
11 Pampa Dios amo techikoita.
12 Kiampa, nochi katli tlajtlakolchijtokej uan amo kiixmatij iTlanauatil Moisés, nojkia mikisej maske amo kiixmatkej nopa Tlanauatili, pero nochi katli tlajtlakolchiuaj maske kiixmatij iTlanauatil Moisés, kintlatsakuiltisej kej kiijtoua nopa Tlanauatili.
13 Pampa Dios amo kinita xitlauakej katli san kitlakakiliaj nopa Tlanauatili, ya kinitas xitlauakej katli kineltokaj nopa Tlanauatili.
14 Pampa katli amo elij judíos, amo kipiaj iTlanauatil Moisés. Pero kema inijuantij kichiuaj tlen kiijtoua nopa tlanauatili maske amo kiixmatij, kinextiaj kipiaj nopa tlanauatili ipan ininyolo.
15 Tlen kichiuaj kinextia tlen kiijtoua nopa tlanauatili ijkuilijtok ipan ininyolo, uan inintlalnamikilis nojkia kiampa kinextia; kema kichiuaj tlen amo kuali inintlalnamikilis kinyolkokoua, uan kema kichiuaj tlen kuali amo kinyolkokoua.
16 Ni panos ipan nopa tonali kema Dios kitlajtolsenkauas ika Cristo Jesús nopa tlamantli tlen maseualmej kichijtokej ichtakatsi, kej kiijtoua nopa kuali tlamachtili tlen nitematiltia.
17 Pero tlaj ta tikijtoua tieli judío uan timotemachia ipan iTlanauatil Moisés uan timoueyimati pampa kuali timouika iuaya Dios,
18 tlaj tijmati tlake kineki Dios uan mitspaktia tlamantli tlen kuali pampa mitsmachtijtokej nopa Tlanauatili,
19 tlaj timotemachia uelis tikinyakanas katli amo tlachiaj, tikintlauilis katli itstokej ipan tsintlayouilotl,
20 tikintlalnamiktis katli uiuitikej uan tikinmachtis konemej, uan tlaj tijkuamachilia nochi nopa tlamachtili uan tlen melauak tlen eltok ipan nopa Tlanauatili...,
21 uajka, ta katli tijmachtia seyok, ¿kenke nojkia amo timomachtia? Ta katli titeiljuijtinemi “Amo xitlachteki”, ¿titlachteki?
22 Ta katli tikijtoua “Amo ximomekati”, ¿timomekatia? Ta katli tikinkualankaita tlaixkopinkayomej,* ¿titlachteki teopa?
23 Ta katli timoueyimati pampa tikixmati tlanauatili, ¿tikixpano Dios pampa amo tijchiua tlen kiijtoua nopa Tlanauatili?
24 Pampa sanse kej ijkuilijtok, “ika tlen inkichiuaj, maseualmej ipan nochi altepemej kiixpanotokej itoka Dios”.
25 Se tlamantli tlen melauak, kema mitschiuiliaj circuncisión* san mitspaleuia tlaj tijchiua tlen kiijtoua iTlanauatil Moisés. Pero tlaj tikixpano nopa Tlanauatili, eliskia kejuak amo kema mitschiuilijtoskiaj circuncisión.
26 Yeka, tlaj se tlakatl katli amo kichiuilijtokej circuncisión* kineltoka nochi tlen kiijtoua nopa Tlanauatili, ¿amo kiitas Dios kejuak kena kichiuilijtokej circuncisión?
27 Uan se tlakatl katli amo kichiuilijtokej circuncisión, kema kineltoka nopa Tlanauatili, kinextis tikixpano Tlanauatili pampa amo tijneltoka maske tijmati tlake ijkuilijtok uan maske mitschiuilijtokej circuncisión.
28 Pampa se katli nelnelia eli judío amo san ixnesi, uan kema se akajya kichiuiliaj circuncisión, amo san kitekiliaj ipan itlakayo.
29 Más kuali, se akajya nelnelia eli judío ika tlen kipixtok ipan iyolo uan kejuak mochiuilia circuncisión ipan iyolo pampa ichikaualis Dios* kiampa kichiua uan amo pampa kimati tlen ijkuilijtok ipan Tlanauatili. Dios kiuejkapantlalia nopa tlakatl uan amo sekinok maseualmej.
Tlen ijkuilijtok tlatsintla
^ O “tieli katli tieli”.
^ Kanajya kiijtouaj “toTeotsij”.
^ O “kichiuas nochipa ma itstokaj”.
^ O “dioses”, “teteyomej”.
^ Xikita circuncisión.
^ O “incircunciso”.
^ O “espíritu santo”.
