Tlen kiijkuilok Santiago 3:1-18
3 Noikniuaj, amo miakej tlen inmojuantij monekiskia inelisej tlamachtianij, pampa inkimatij más chikauak techtlajtolsenkauasej.
2 Pampa nochi miakpa timokuapolouaj. Katli amo kema mokuapoloua ika tlen kiijtoua, amo kipia tlajtlakoli uan ueli kinauatia nochi itlakayo.
3 Kema kauayojmej tikintlaliliaj freno ipan ininkamak para ma techneltokakaj, uajka ueli tikinyakanaj kampa tojuantij tijnekij.
4 Nojkia xikintlachilikaj barcos: maske tlauel uejueyij uan kintopeua se chikauak ajakatl, san kiyakanaj ika se kuauitl pilsiltsi* tlen kiiljuiaj timón tlen eltok ika iika, uan katli kiyakana nopa barco kiuika kampa kineki yas.
5 Nojkia kiampa pano ika tonenepil: maske eli se tlamantli pilsiltsi tlen totlakayo, kiijtoua tlajtoli tlen ika tlauel moueyimati. ¡Uan xikitakaj kenijkatsa se piltlilelemektsi kilemenaltia se ueyi kuatitlamitl!
6 Tonenepil nojkia eli kej tlitl. Eli se tlamantli tlen kipia totlakayo tlen kichiua tlen amo xitlauak uan kisokiuia nochi totlakayo. Uelis kichiuas ma nempoliui* inemilis se akajya, uan eli kej nopa Gehena* pampa kichiua ma kitsontlamiltikaj.
7 Pampa tlen ueli tlapialmej tlen itstokej kuatitla, totomej, tlapialmej tlen mouauatatsaj uan tlen itstokej atitla, uelis kinmaxojtilisej uan maseualmej ya kinmaxojtilijtokej.
8 Pero amo aka ueli kejuak kimaxojtilia inenepil. Amo uelis kinauatisej uan teyolkokoua; kejuak temitok ika veneno tlen temiktia.
9 Ika tonenepil tijueyichiuaj toTata Jehová,* pero nojkia ika tonenepil tikintelchiuaj maseualmej katli kinchijchijtokej “kej itlachialis Dios”.*
10 Ika tokamak tikinteochiuaj sekinok uan tikintelchiuaj.
Noikniuaj, amo kinamiki kiampa ma tijchiuakaj.
11 Ipan se ameli amo meya* atl tlen kuali uan nojkia atl tlen chichik, ¿axke?
12 Noikniuaj, se higokuauitl amo ueli temaka aceitunas yon nopa uvatsontli amo ueli temaka higos, ¿axke? Nojkia ipan se ameli kampa meya atl tlen poyek amo uelis meyas atl tlen kuali.
13 ¿Itstok kampa inmojuantij se akajya katli tlalnamiki uan nochi kikuamachilia? Tlaj kena, kuali ma monejnemilti para kinextis ika nochi tlen kichiua eli yolyamanik pampa kipia tlalnamikilistli.
14 Pero tlaj tlauel intekokoliaj* uan ipan inmoyolo san inkinekij inkichiuasej kualantli,* uajka amo xikijtojtinemikaj tlajtoli tlen ika inmoueyimatij yon xikijtojtinemikaj istlakatili tlen kiijixnamiki tlen melauak.
15 Ni tlalnamikilistli amo uala tlen Dios; uala tlen ni Tlaltipaktli, katli moyakanaj ika tlen kiyoltilana inintlakayo uan tlen nopa amo kuali ajakamej.*
16 Pampa kampa itstokej katli tekokoliaj uan katli kichiuaj ma onka kualantli,* nojkia itstosej san kej ueli uan panos nochi tlen amo kuali.
17 Pero katli kipia nopa tlalnamikilistli tlen uala tlen Dios, achtoui kichiua tlen tlapajpaktik, teipa kichiua ma onka tlaseuilistli uan amo kitemolia nochipa ma mochiua san tlen ya kineki, nimantsi tlaneltoka uan tlauel tetlasojtla uan kichiua kuajkuali tlamantli, amo techikoita uan amo kipia ome ixayak.
18 Katli kuali mouikaj ininuaya sekinok, kichiuaj ma onka tlaseuilistli, uan yeka inijuantij kichiuaj tlen xitlauak.
Tlen ijkuilijtok tlatsintla
^ Kanajya kiijtouaj “tsikitetsi”.
^ Kanajya kiijtouaj “ma ijtlakaui”.
^ Kanajya kiijtouaj “toTeotsij”.
^ O “yoli”, “pankisa”.
^ O “intekualankaitaj”.
^ O uelis “tlauel inkinekij inmoaxkatisej miak tlamantli”.
^ O “demonios”.
^ O uelis “tlauel kinekij moaxkatisej miak tlamantli”.
