María, Raúl, Arne uan sekinok tlauel kipatiitaj tlamaijtoli. Kema momaijtouaj kimatij mokamanaljuiaj iuaya toTeotsij, kitlaskamatiliaj uan kitlajtlaniaj ma kinpaleui. Inijuantij kimatij melauak tlen kiijtoua Biblia: “Uan tijmatij temachtli intla tijtlajtlaniaj toTeko tlen kinamiki ika tlen yajaya kineki, yajaya techtlakakilia” (1 Juan 5:14).

Miakej maseualmej amo kineltokaj tlen Biblia kiijtoua tlen tlamaijtoli. Steve kiijtoua tlen moiljuia: “Kema nijpixtoya 17 xiuitl, eyij nouampoyouaj mijkej: se mijki kema yauiyaya ipan se carro pampa panok se tlamantli tlen amo kuali uan nopa omej misauijkej”. ¿Tlake kichijki Steve? “Nimomaijtok uan nijtlajtlanik toTeotsij kenke kiampa  panotoya, uan ya amo nechnankilik. Yeka nimotlajtlanik: ‘¿Techpaleuia kema timomaijtouaj?’”. Miakej nojkia kiampa moiljuiaj uan motlajtlaniaj tlaj techpaleuia kema timomaijtouaj.

Uan onka sekinok tlamantli tlen kichiua maseualmej ma moiljuikaj amo kinpaleuia kema momaijtouaj. Sekij kiijtouaj toTeotsij kimati tlake kuesoli tijpiaj uan tlake techpoloua, yeka ayokmo kinamiki ma timomaijtokaj. Uajka, ¿kinamiki tikiljuisej tlen techpano?

Uan sekij moiljuiaj toTeotsij amo kintlakakilis kema momaijtosej pampa kichijkej tlen amo kuali. Jenny kiijtoua: “Tlauel amo kuali tlen nijyolmati pampa nimoiljuia amo tleno nopati. Nijchijki tlamantli tlen amo kuali, yeka nimoiljuia toTeotsij amo kinamiki ma nechtlakakili kema nimomaijtoua”.

Uan ta, ¿tlake timoiljuia? ¿Nojkia timoiljuia kej ni maseualmej? Tlaj kiampa timoiljuijtok, tiyolpakis tijmatis tlen Biblia tlamachtia. Uan timotemachis nelnelia tlen kiijtoua Biblia tlen tlamaijtoli. * Uan mitspaleuis xijnankili ni tlajtlanili:

• ¿Nelnelia kikaki toTeotsij kema timomaijtouaj?

• ¿Kenke amo kikaki se keski tlamaijtoli?

• ¿Kenijkatsa moneki timomaijtosej tlaj tijnekij ma techtlakakili?

• ¿Kenijkatsa mitspaleuis tlamaijtoli?