Tlajtolpanextijketl Moisés kiijtok toTeotsij techteochiuas tlaj tijchiuasej tlen ya technauatia (Deuteronomio 10:13; 11:27). Tikikneliaj toTeotsij pampa kinextia kuajkuali tlamantli, uan amo pampa amo tijnekij ma techtlatsakuilti. Tikikneliaj toTeotsij, yeka tijchiuaj tlen technauatia uan amo tijnekij tijchiuasej se tlamantli tlen uelis kiyolkokos. “Uajka para tikikneliaj toTeko kineki kiijtos tikintokiliaj itlanauatiljuaj, uan itlanauatiljuaj axouij” (1 Juan 5:3).

Uan, ¿tlake tlateochiualistli tijselisej tlaj tijchiuasej tlen toTeotsij kipaktia? Ma tikitakaj ome tlateochiualistli.

“Na niDios niinmoTeko [Jehová] tlen niinmechmachtia para inkimatisej tlen kuali para inkichiuasej. Uan niinmechyakanas ipan nopa ojtli tlen kinamiki inkitokilisej” (ISAÍAS 48:17).

ToTeotsij Jehová, katli techchijchijki, kuali techixmati uan techpaleuia kuali ma tiitstokaj. Tlaj tijnekij ma techpaleui kuali tijtlapejpenisej tlen tijchiuasej, moneki tikitasej tlake techtlajtolmaka ipan Biblia uan ma tijchiuakaj tlen nopaya kiijtoua.

‘Kipantiaj pakilistli nopa maseualmej tlen kikakij itlajtol toTeko uan kineltokiliajʼ (LUCAS 11:28).

Ipan ni tonali tlauel miakej maseualmej yolpakij pampa kichiuaj tlen toTeotsij iTlajtol kiijtoua. Ma tikitakaj tlen kipanok se tlakatl tlen eua España, ya nimantsi kualaniyaya, amo kintlepanitayaya sekinok yon amo kitlepanitayaya isiua. Se tonali kipojki tlen kiijkuilok tlajtolpanextijketl Moisés kampa kiijtouayaya tlen kipanok José, ikone Jacob. José kinamakakej uan kitsajkej maske amo tleno kichijtoya. Maske kipanok nopa, ya amo kema kualanki, kipixki iyolo uan tetlasojtlak (Génesis, capítulos 37-45). Nopa tlakatl kiijtok: “Kema nimoiljuik tlen kipanok José, nechpaleuik kuali ma nitenojnotsa, ma niteikneli uan ayokmo nima ma nikualani. Nopa nechpaleuijtok ma niyolpaki ininuaya nochampoyouaj”.

ToTeotsij iTlajtol uelis techpaleuis ma tijmatikaj kenijkatsa timouikasej ininuaya sekinok. Ipan seyok tlamachtili tikitasej kenijkatsa uelis tijchiuasej nopa.