Ipan ni tonali nojkia monechkauijtiuala kejuak se “chikauak ajakatl” tlen tlauel tlasosolos. Jesús kitokaxtik “ueyi tlaijiyouilistli” (Mateo 24:21). Maske amo uelis timochololtisej, kena uelis tikitasej kenijkatsa timomanauisej. ¿Tlake uelis tijchiuas?

Ipan Sermón del Monte, Jesucristo kiijtok: “Achtoui xijtemokaj [...] itlanauatilis toTeko uan para inkipiasej se yolistli tlen xitlauak iixtla” (Mateo 6:33). ¿Tlake kiijtosneki ni?

“Achtoui xijtemokaj [...] itlanauatilis toTeko”. Kiijtosneki ipan tonemilis, moneki san toTeotsij iTlanauatijkayo tijpatiitasej uan amo sekinok tlamantli (Mateo 6:25, 32, 33). ¿Kenke kiampa moneki tijchiuasej? Pampa yon se maseuali uelis kisenkauas nochi kuesoli ipan Tlaltipaktli. San toTeotsij uelis kisenkauas.

Xijtemokaj “se yolistli tlen xitlauak”. Ni kinextia moneki tijchiuasej kampeka tijneltokasej toTeotsij itlanauatiljuaj uan tlen tetlajtolmaka. Tlaj san tojuantij tikijtoskiaj tlake tlamantli kuali uan tlake amo, uajka tijpiasej kuesoli (Proverbios 16:25). Uan tlaj tijchiuaj tlen Jehová kineki, uelis tijyolpakiltisej uan nojkia kuali tiitstosej (Isaías 48:17, 18).

¿Kenke kiijtok Jesús: “Achtoui xijtemokaj [...] itlanauatilis toTeko uan para inkipiasej se yolistli tlen xitlauak iixtla”? Kiampa kiijtok pampa sekij uelis kinekiskiaj kipiasej miak tomij uan moiljuiskiaj nopa kinpaleuis kuali ma itstokaj. Uan sekinok tlauel tekitiskiaj chikauak kema kitemoskiaj tlen ika mopanoltisej uan ayokmo kitekipanoskiaj toTeotsij  pampa amo kipiaskiaj tonali (Mateo 6:19-21, 25-32).

Jesús kiijtok katli kipaleuisej toTeotsij iTlanauatijkayo, kipiasej nochi tlen moneki, uan teipa nojua kiselisej miak tlateochiualistli (Mateo 6:33).

Maske Cristo itokilijkauaj kiachtouitlalijkej toTeotsij iTlanauatijkayo uan kichijkej tlen xitlauak, inijuantij nojua kiitayayaj onka miak tlaijiyouilistli. Maske kiampa panok, inijuantij kena kimatkej kenijkatsa ueliskiaj momanauisej. ¿Tlake kichijkej?

Kineltokakej toTeotsij itlanauatiljuaj uan yeka amo kipixkej kuesoli kej sekinok katli amo kineltokayayaj Jehová. Motemachijkej toTeotsij iTlanauatijkayo asiskia se tonali, uan nopa kinpaleuik ma kiijiyouikaj uejueyi tlaouijkayotl. Nojkia, toTeotsij amo kintlauelkajki uan kinmakak “ueyi chikaualistli” tlen kinpaleuiskia ma kiijiyouikaj (2 Corintios 4:7-9).

Cristo itokilijkauaj tlen achtoui siglo kineltokakej tlen Jesús kiniljuik uan kiachtouitlalijkej toTeotsij iTlanauatijkayo. Kimoyajkej nopa kuali tlamachtili tlen toTeotsij iTlanauatijkayo kampa itstoyaj (Colosenses 1:23). ¿Nojkia itstokej ipan ni tonali katli kichiuaj nopa tekitl?

¡Kena! Jehová itlajtoltemakauaj kimatij ayokmo poliui miak tonali kema toTeotsij iTlanauatijkayo kitlamiltis nochi tlen amo kuali. Yeka, kichiuaj kampeka kineltokasej tlen Jesús kiijtok: “Ni kuali tlamachtili tlen kejatsa eltos kema toTeko tlanauatia [...] kiuikasej hasta kampa ueli techaj ipan nochi tlaltinij ipan ni Tlaltipaktli para nochi tlakamej ma kimatikaj. Uan teipa ualas itlamia nochi tlen onka” (Mateo 24:14).

¿Tlake tijchiuas kema tijkakis nopa kuali tlamachtili? Uelis tijchiuas kej katli itstoyaj ipan Berea tlen altepetl Macedonia. Kema apóstol Pablo kinixtomilik nopa kuali tlamachtili tlen toTeotsij iTlanauatijkayo, “kitlakakilijkej iTlajtol toTeko ika pakilistli” uan “kitemouayayaj ipan iTlajtol toTeko” pampa kinekiyayaj kimatisej tlaj melauak tlen kikaktoyaj, uan kichijkej tlen kiyekojkej (Hechos 17:11, 12).

Ta nojkia uelis kiampa tijchiuas. Tlaj tikachtouitlalis toTeotsij iTlanauatijkayo uan tijchiuas tlen xitlauak, uajka tijmatis kenijkatsa timomanauis nama, uan teipa uelis tiitstos nochipa ika pakilistli.