Ipan tlamachtili tlen namantsi tikitakej, moixtonki tlen Jesús kiijtok panoskia. Nochi tlen panotok kinextia Jesús tekichiua kej Tlanauatijketl ipan toTeotsij iTlanauatijkayo ne iluikak.

Biblia kiijtoua kema Jesús pejki tekichiua, kinkixtik Satanás uan iajakauaj. Inijuantij itstokej ipan Tlaltipaktli uan kichiuaj tlen kinekij, yeka ipan 1914 pejki momiakilia tlen amo kuali (Apocalipsis 12:7, 9).

Maske ipan Tlaltipaktli nojua momiakilijtia tlen amo kuali, Jesús, nopa Tlanauatijketl tlen toTeotsij iTlanauatijkayo, kichijtok miak tlamantli tlen kinpaleuijtok maseualmej. Jesús kiyakana tlajtolmoyaualistli ipan nochi Tlaltipaktli uan yeka miakej kiyekouaj tlen Biblia tetlajtolmaka uan kichiuaj ipan ininnemilis tlen momachtiaj (Isaías 2:2-4). Tlen kiyekojtokej kinpaleuijtok ma kiitakaj tekitl kej kinamiki, kuali ma itstokaj ika ininchampoyouaj uan ma yolpakikaj san ika tlen kipiaj. Biblia kinpaleuia ma monejnemiltikaj kej toTeotsij kineki uan kiampa uelis itstosej kema toTeotsij iTlanauatijkayo tekichiuas ipan Tlaltipaktli.

Maske Jesús tekichijtok iluikak uan maseualmej nojua tekichijtokej ipan Tlaltipaktli, toTeotsij kiiljuijtok Jesús: “Tikinnauatis mokualankaitakauaj tlen kampa ueli itstokej” (Salmo 110:2). Jesús nechka kintsontlamiltis ikualankaitakauaj uan kiampa kitlamiltis nochi tlen kinkuesoua maseualmej katli kinekij kichiuasej tlen toTeotsij tlanauatia.

Ipan nopa tonali, toTeotsij iTlanauatijkayo kichiuas ni:

• Kintsontlamiltis religiones tlen amo melauakej. Biblia kiijtoua nochi religiones tlen amo melauak elij kej se momekatijkasiuatl katli nechka kitsontlamiltisej. Uajka, ayokmo onkas yon se religión katli amo tlamachtiaj tlen melauak tlen toTeotsij uan katli san kintlaijiyouiltijtokej maseualmej. Miakej san motetsauisej kema kintsontlamiltisej religiones (Apocalipsis 17:15, 16).

• Kintsontlamiltis tlanauatianij. ToTeotsij iTlanauatijkayo kintsontlamiltis nochi tlanauatianij (Apocalipsis 19:15, 17, 18).

• Kintsontlamiltis katli amo kualmej. ¿Tlake kinpanos katli kinpaktia kichiuasej tlen amo kuali uan amo kinekij kineltokasej tlen toTeotsij tlanauatia? “ToTeko kintsontlamiltis” (Proverbios 2:22).

• Ayokmo kinkauas Satanás uan iajakauaj ma kichiuakaj tlen amo kuali. Satanás uan iajakauaj ayokmo uelisej kinkajkayauasej maseualmej (Apocalipsis 20:3, 10).

¿Uan tlake kinpanos maseualmej katli kinekij ma kinnauati toTeotsij iTlanauatijkayo?

Maske tekichijtos iluikak, Jesús kena kichiuas tlen tlanauatianij amo kema uelkej. Uan amo san ya tekichiuas, nojkia kipaleuisej 144,000 katli kintlapejpenijtokej tlen ni Tlaltipaktli (Apocalipsis 5:9, 10; 14:1, 3). Jesús kichiuas ma moaxiti ipan Tlaltipaktli tlen toTeotsij kineki. ¿Kenijkatsa toTeotsij iTlanauatijkayo kinpaleuis maseualmej?

• Kitlamiltis kokolistli uan mikilistli. “Ayok kiijtosej para mokokouaj” uan “ayok kema aki mikis” (Isaías 33:24; Apocalipsis 21:4).

• Kichiuas ma tiitstokaj ika tlaseuilistli uan amo tleno techmajmatis. “Nochi inmokoneuaj kipiasej miak tlaseuilistli” uan “sejse tlakatl mosiajkauas ika pakili itsala se ikuatlatok uan sejse ixokomekamil [...]. Ayok aka kintemajmatis” (Isaías 54:13; Miqueas 4:4).

• Techmakas tekitl tlen techpaktis. “Kipiasej nopa pakilistli para kitekiuisej nochi tlen kipiaj ipampa ininteki. Axtekitisej para tlakuasej ininkualankaitakauaj” (Isaías 65:22, 23).

• Kikualtlalis nochi Tlaltipaktli. “Ipan nopa tonali elis keja pakis nopa uaktok tlali uan kampa tlatsitsika pampa xochiouasej keja se yejyektsi xochitl” (Isaías 35:1).

• Kinmachtis maseualmej tlake moneki kichiuasej tlaj kinekij itstosej nochipa. “Inijuantij kipiaj yolistli yankuik para nochipa intla mitsixmatij ta tlen melauak tiDios uan axaka seyok, uan nojkia nechixmatij na niJesucristo tlen tinechtitlantok” (Juan 17:3).

ToTeotsij kineki xijseli nochi ni tlateochiualistli uan xiyolpaki (Isaías 48:18). Ipan nopa seyok tlamachtili tikitas tlake moneki tijchiuas uan kiampa uelis tiitstos kema mochiuas nochi nopa kuajkuali tlamantli ipan Tlaltipaktli.