Rosi kiijtoua: “Nimotekipachouayaya pampa amo nikilkauayaya se keski kuesoli uan nochipa nimoiljuiyaya panoskia tlen amo kuali”. ¿Tlake textos kipaleuijkej? Se elki Mateo 6:34: “Amo ximokuesokaj tlen uelis panos mostla. Pampa mojmostla tijpantijtiyouij kuesoli”. Rosi kiijtoua nopa tlajtoli tlen Jesús kiijtok kipaleuik amo ma kitekipacho tlen ueliskia panos teipa. Ya nojua kiijtoua: “Nijpixtoya tlauel miak kuesoli, yeka amo kinamikiyaya nimotekipachos ipan sekinok tlamantli tlen ayamo panotoya uan tlen amo kema panoskia”.

Yasmín nojkia tlauel ouij kimatiyaya amo motekipachos. Ya kiijtoua: “Ipan sejse semana nochipa nichokayaya se keski tonali, uan kemantika amo niueliyaya nikochi. Tlauel amo kuali nijyolmatiyaya pampa nimoiljuiyaya ipan tlen amo kinamiki”. ¿Tlake texto kipaleuik? Ya kiijtok kipaleuijtoya 1 Pedro 5:7: “Xikiljuikaj toTeko nochi inmokuesol uan xijkauakaj imako, pampa yajaya inmechmokuitlauia”. Yasmín nojua kiijtoua: “Nochipa nimomaijtouayaya, uan teipa nikitak kenijkatsa Jehová nechnankilik. Nijyolmatki kejuak nechkixtilijkej se ueyi tlamamali. Maske nojua nimoiljuia ipan tlamantli tlen amo kinamiki, nama nijmati tlake nechpaleuis”.

Se siuatl tlen itoka Isabella kiijtoua: “Nimoiljuia amo nijchijtiuetsi se tekitl pampa notata nojkia kiampa kichiua uan kikajtia iteki. Kemantika amo nijchiua se tlamantli tlen tlauel ipati san pampa amo tleno nijneki nijchiuas uan pampa nijmauisoua televisión o nimosiajketsa. Teipa, nopa kichiua ma nimotekipacho uan ayokmo kuali nijchiua noteki”. Ya tlauel kipaleuik 2 Timoteo 2:15: “Xitekiti chikauak para kema asis nopa tonal kema timonextis iixpa toTeko, yajaya uelis kiijtos para tijchijki tlen kipaktia. Xiitsto se ikualtlatekipanojka tlen axmoneki mopinauas”. Isabella kiijtoua: “Amo nijnekiyaya Jehová ma pinaua ika se tekitl tlen nijchijki san pampa nijkajtiajki uan nijchijki kema san poliuiyaya kentsi tonali”. Nama ayokmo kiampa kichiua.

Kelly nojkia kiijtoua: “Kema monekiyaya nijtlamiltis se tekitl, nijkauayaya uan nijchiuayaya kema san kentsi tonali poliuiyaya. Yeka teipa nichokayaya, amo nikochiyaya uan nimotekipachouayaya. Nopa amo nechpaleuiyaya”. Kelly kikajki toTeotsij ma kipaleui uan kichijki tlen kiijtoua Proverbios 13:16: “[Maseualmej] tlen tlalnamikij moyoliljuiaj achtoui intla kuali para kichiuasej se tlamantli o axtle. Pero tlen uiuitikej axmoyoliljuiaj achtoui”. Ya kiijtoua tlake kiyekok kema moyoliljuik ipan nopa texto: “Kinamiki timoiljuisej tlake panos teipa uan tikitasej kenijkatsa tijchiuasej se tlenijki. Nama nikijkuiloua nochi tlen nijchiuas. Kiampa nikilnamiki tlake moneki nijchiuas achtoui uan amo nijchiuas kema san kentsi tonali poliui”.

Cristina kiijtoua: “Noueue nechkajki uan noselti nimokajki ininuaya nauij nopilkoneuaj”. ¿Tlake texto kipaleuik? Proverbios 17:17 kiijtoua: “Se tlen tokualuampo temachtli techiknelia nochipa. Kema onka tlaouijkayotl techpaleuia keja eliskia se toikni”. Ya kintemok sekinok toTeotsij itekipanojkauaj katli kipaleuiskiaj. ¿Tlake panok? Ya kiijtoua: “Nouampoyouaj nimantsi kiitakej kenijkatsa nechpaleuisej. Sekij techuikilijkej tlakualistli uan sekinok xochitl. Expa tlauel miakej toikniuaj nechpaleuitoj na uan nokoneuaj ma tijsajsakakaj tlen tijpixtoyaj pampa timochantitoj ipan seyok kali. Se tlen inijuantij nechtemolik se tekitl. Nouampoyouaj nochipa itstoyaj nouaya”.

Diana, katli ipa tikijtojtoyaj, nojkia kiijtoua kenijkatsa kiyolmatki kema iueue kikajki uan iichpoka mijki: “San nikitayaya kenijkatsa sekinok moyolpakiltiyayaj, uan na amo ueliyaya nijchiua nopa. Tlauel noselti nijyolmatiyaya”. Tlauel kipaleuik Salmo 68:6: “ToTeko Dios kinmaka ininchampoyouaj tlen itstokej ininseltsitsij”. Ya kiijtoua: “Nijmatiyaya nopa texto amo san kamanaltiyaya tlen se kali. Nijkuamachilik kiijtosnekiyaya kenijkatsa kuali tiitstokej ipan itlanechikol, kampa nochi techmokuitlauiaj, techikneliaj uan kuali tijyolmatij pampa sansejko tiitstokej ininuaya katli kiikneliaj Jehová. Na nijmajtoya amo ueliskia kiampa nijyolmatis tlaj amo nimonechkauiskia ika Jehová. Salmo 37:4 tlauel nechpaleuik: ‘Ximouampojchiua iuaya toTeko, uan yajaya mitsmakas tlen moyolo kineki’”.

Ya nojua kiijtoua: “Nikitak tlauel monekiyaya nojua kuali nimouikas iuaya Jehová. Amo aka seyok kej ya. Nijnekiyaya nimouampojchiuas ininuaya toikniuaj katli nojkia kiikneliaj Jehová, yeka nikijkuilok se keski tlamantli tlen ueliskia nijchiuas ininuaya. Maske nojkia mokuapolouaj, na san nikita tlen kuali katli kichiuaj”.

Katli kitekipanouaj toTeotsij nojkia tlajtlakolejkej. Maske Jehová itlajtoltemakauaj nojkia kiixnamikij kuesoli kej sekinok maseualmej, tlen Biblia tlamachtia kinyololinia ma kichiuakaj kampeka kinpaleuisej sekinok. Nelia tlauel kuali kema touampoyouaj kej nopa kichiuaj. Uan tlaj tijpiaj se keski kuesoli tlen amo uelis tijsenkauasej, kej se kokolistli o kema miki se akajya, ¿uelis techpaleuis Biblia ma tikixnamikikaj nopa kuesoli?