UEJKAJKIA, se tlakatl katli kinekiyaya mosenkauas, monekiyaya kinmakas inintatauaj nopa ichpokatl se keski tlamantli. Ueliskia temakas tlamantli tlen patiyo, kej tlapialmej o tomij. Uan kemantika kichiuayaya se keski tekitl, kej Jacob kichijki kema kinekiyaya mosenkauas iuaya Raquel. Ya kiiljuik katli eliskia imontaj tekitiskia iuaya chikome xiuitl uan kiampa mokuiliskia iichpoka (Gén. 29:17, 18, 20). ¿Kenke monekiyaya temakasej se tlenijki?

Carol Meyers, se siuatl katli kiita tlen kiijtoua Biblia, kiijtoua: “Kema se tlakatl kinmakayaya se tlenijki inintatauaj nopa ichpokatl, kinextiyaya nopa ichpokatl ayokmo kichiuaskia se keski tekitl ichaj. Uan ni tlauel kipatiitayayaj ichampoyouaj se ichpokatl, katli san mopanoltiyayaj ika tlen kitokayayaj”. Tlen temakayayaj, nojkia kinpaleuiyaya kuali ma mouikakaj itatauaj nopa ichpokatl ika itatauaj nopa telpokatl. Uan kiampa kema kiixnamikiskiaj se tlaouijkayotl, ueliskiaj mopaleuisej. Nojkia, kema se tlakatl temakayaya se tlenijki kinextiyaya nopa ichpokatl nechka monamiktiskia uan nama ya kimokuitlauiskia, uan ayokmo itatauaj.

Kema se tlakatl temakayaya se tlenijki kema tlaijtlaniyaya, amo kiijtosneki ueliskia kikouas se ichpokatl o kinamakasej kej se tlamantli. Nopa amochtli Instituciones del Antiguo Testamento kiijtoua: “Maske nesiyaya kejuak kikouayaya nopa ichpokatl kema kinmakayaya ichampoyouaj tomij o sekinok tlamantli, amo kiampa eliyaya pampa nopa telpokatl san kintlaskamatiliyayaj itatauaj ika tlen kichijkej”. *

Ipan se keskij altepemej nojua temakaj se keski tlamantli kema kiijtlanij se ichpokatl. Tlaj tetajmej kitekipanouaj Jehová uan amo tlajtlanij miak tlamantli kema kiijtlanij ininichpoka, maseualmej kiitasej inijuantij amo kinchiualtiaj sekinok ma kichiuakaj tlen amo yajatij (Filip. 4:5; 1 Cor. 10:32, 33). Tlaj kiampa kichiuaj, kinextisej amo tlauel kinekij tlapijpiasej (2 Tim. 3:2). Nojkia, tlaj amo tlajtlanij miak tlamantli, kipaleuis nopa telpokatl ma mosenkaua ipan tonali kema kiixtlalijtok. Uan tlaj tlatekipanoua kej precursor, kipaleuis nojua kiampa ma tlatekipanojto uan amo san mosentlalis kitlanis tomij.

Ipan se keskij altepemej kitlalijtokej tlanauatili kampa kiijtoua keski moneki temakas se telpokatl kema kiijtlani se ichpokatl. Ipan nopa altepemej, toikniuaj kichiuaj tlen nopa tlanauatili kiijtoua. Kiampa kichiuaj pampa kimatij Jehová kineki itekipanojkauaj ma kintlepanitakaj tekichiuanij, uan uelis kichiuasej tlaj amo kiixpanoj toTeotsij itlanauatiljuaj (Rom. 13:1; Hech. 5:29).