1, 2. 1) Xikixtoma tlake kichijki nopa tlakatl katli kipixtoya se xokomekamili. 2) ¿Kenijkatsa nopa tlapoualistli kinextia tlake kiijtosneki kema se akajya kipia ueyi iyolo?

SE TLAKATL katli kipixtoya se xokomekamili, yajki kintemoua se keskij tlakamej katli kipaleuiskiaj. Kiniljuik keski kintlaxtlauiskia uan inijuantij kinejkej kipaleuisej. Teipa kiitak nojua monekiyaya sekinok ma kipaleuikaj, yeka sampa yajki kiniljuia sekinok tlakamej. Kiniljuik nochi kuali kintlaxtlauiskia. Kema tlankej tekitij, nochi kinsentilik pampa monekiyaya kintlaxtlauis. Maske sekij se tonal tekititoyaj uan sekinok san se hora, nochi sanse kintlaxtlauik pampa nopa tlakatl kipiayaya kuali iyolo. Kema nopa tlakamej katli se tonal tekitikej pejkej kualanij, nopa tlakatl kiniljuik: “Niinmechiljuik niinmechtlaxtlauiskia tlen ipati se tonal tekitl uan keja nopa niinmechtlaxtlauik. [...] ¿Axnijpia tlanauatili nijchiuas tlen nijnejki ika notomij? Uelis san inmoxikouaj ika yajuantij pampa nelia kuali nikintlaxtlauik” (Mat. 20:1-15).

² Ika ni tlapoualistli Jesús kinextik kenijkatsa Jehová kipia “ueyi iyolo” uan kenke tlauel ipati (xijpoua 2 Corintios 6:1) ^[1] (xikita nopa nota kampa tlami ni tlamachtili). Uelis sekij moiljuiaj nopa tlakamej katli amo se tonal tekitikej amo kinamikiyaya kuali kintlaxtlauisej. Nopa tlakatl katli kintekimakak kinextik ueyi iyolo pampa kena kuali kintlaxtlauik. Se tlakatl kiixtoma tlake kiijtosneki nopa tlajtoli “ueyi iyolo” ipan Biblia: “Nopa tlajtoli kiijtosneki kema se akajya techmaka  se tlenijki maske amo timotlanilijtokej, se tlenijki tlen amo kinamiki tijselisej o techmakasej”.

3, 4. ¿Kenke Jehová kinextijtok ueyi iyolo ika nochi maseualmej, uan kenijkatsa kinextik?

³ Biblia kiijtoua kema toTeotsij kinextia “ueyi iyolo” techmaka kejuak “se regalo” (Efes. 3:7). Tojuantij amo nochipa tiuelij tijneltokaj tlen toTeotsij technauatia, yeka amo kinamiki ma technextili “ueyi iyolo”. Tojuantij kinamiki timikisej. Nopa tlanauatijketl Salomón kiijtok: “Ipan nochi ni Tlaltipaktli axonka niyon se tlakatl tlen nochipa kichiua tlen kuali uan axkema tlajtlakolchiua” (Ecl. 7:20). Teipa, apóstol Pablo kiijtok “nochi tlakamej tlajtlakolchijtokej” uan “axaka senkistok kuali keja toTeko”, yeka tlaj “se tlakatl tlajtlakolchiua, kipantia miki[li]stli keja itlaxtlauil” (Rom. 3:23; 6:23).

⁴ Jehová nelia tlauel kiniknelia maseualmej, uan “yeka kititlanki iKone iyojtsi” ma kinmakixtiki. Kiampa kinextik nelia tlauel ueyi iyolo (Juan 3:16). Pablo kiijtok toTeotsij “ueyi iyolo touaya” uan kiijtok “pampa Jesús mijki topampa tojuantij, toTeko Dios kiueyitlalijtok uan kinextilijtok miak tlatlepanitakayotl” (Heb. 2:9). Uajka, “toTeko Dios techmaka se regalo kema tijneltokaj toueyiteko Jesucristo, uan nopa regalo eltok yolistli yankuik para nochipa” (Rom. 6:23).

5, 6. 1) ¿Tlake techpano pampa titlajtlakolejkej? 2) ¿Kenijkatsa techpaleuia kuali ma timonejnemiltikaj pampa “toTeko kipia ueyi iyolo”?

⁵ ¿Kenke titlajtlakolejkej uan kenke timikij? Biblia kiijtoua pampa Adán tlajtlakolchijki, “kichijki ma mikikaj nochi tlakamej”, yeka nochi tiikoneuaj tijpiaj tlajtlakoli uan timikij (Rom. 5:12, 14, 17). Maske titlajtlakolejkej, tojuantij uelis tijtlapejpenisej amo titlajtlakolchiuasej. ¿Tlake uelis techpaleuis? Moneki titlaneltokasej ipan Cristo imikilis. Kiampa tijnextisej tijpatiitaj pampa Jehová ueyi iyolo ika tojuantij, uan yeka tijnekij tijchiuasej tlen kuali. Biblia kiijtoua: “Pampa miak tlajtlakoli tijuikaj, noja más onpano toTeko kipixki ueyi iyolo touaya [...]. Uajka keja tlajtlakoli [...] techchiuilik ma timikikaj, ama ueyi iyolo toTeko touaya uan itlaiknelijkayo kipia tekiuejkayotl para techchiuilis tixitlauakej iixpa. Uan kipia tekiuejkayotl para techmakas yolistli tlen yankuik para nochipa ika toueyiteko Jesucristo” (Rom. 5:20, 21).

⁶ Maske titlajtlakolejkej, amo kinamiki titlajtlakolchiuasej. Yeka, kema tijchiuaj tlen amo kuali, nima tikiljuiaj Jehová ma techtlapojpoljui. Pablo kiijtok: “Tlajtlakoli ayok kipia tekiuejkayotl para inmechnauatis ipan inmoyolo keja se tekojtli, pampa ayok kipia tekiuejkayotl ika tojuantij itlanauatil Moisés. Ama tiitstokej imako itlaiknelijkayo toTeko tlen ueyi iyolo ika tojuantij” (Rom. 6:14). ¿Kenijkatsa techpaleuia kuali ma timonejnemiltikaj pampa “toTeko kipia ueyi iyolo”? Pablo kiijtok techpaleuia amo ma tijchiuakaj “nochi tlen [Jehová] axkipaktia uan nochi tlen tlakamej tlen ni Tlaltipaktli tlauel kinekij” kichiuasej, uan nojkia techpaleuis “ma timonauatikaj kuali ama ipan ni tonali [uan] ma tijchiuakaj nochi tlen xitlauak” (Tito 2:11, 12).

7, 8. ¿Tlake kiijtosneki Jehová technextilia ueyi iyolo kema techmaka “tlen moneki”? (Xikita nopa achtoui tlaixkopinkayotl).

⁷ Apóstol Pedro kiijtok: “ToTeko inmechmakatok sejse inmojuantij inmoyajatil tlen moneki para inkichiuasej sejse tlamantli inmoteki [...]. Uajka ika nopa yajatili tlen inkiselijtokej pampa ueyi iyolo toTeko, ximopaleuikaj se ika seyok para initstosej ininkualtekipanojkauaj” (1 Ped. 4:10). ¿Kenijkatsa Jehová kinextia ueyi iyolo kema techmaka “tlen moneki”? Maske tijpiasej tlen ueli kuesoli ipan tonemilis, ya nochipa techmakas tlen moneki uan kiampa uelis tikijiyouisej (1 Ped. 1:6).

⁸ Apóstol Juan nojkia kiijkuilok: “Nochi tojuantij tijselijtokej miak tlateochiuali tlen iricojyo Cristo pampa ueyi iyolo touaya. Uan mojmostla más techteochiua” (Juan 1:16). Jehová tlauel techteochiua pampa nochipa technextilia ueyi  iyolo ika miak tlamantli. Ma tikitakaj kenijkatsa techteochiua.

9. 1) ¿Kenijkatsa techpaleuia pampa Jehová ueyi iyolo? 2) ¿Kenijkatsa tijnextiaj tijtlaskamatiliaj?

⁹ Jehová techtlapojpoljuia totlajtlakoljuaj. Maske Jehová nochipa techtlapojpoljuia pampa tlauel ueyi iyolo, ya san techtlapojpoljuia kema nelia timoyolkuepaj uan tijchiuaj kampeka amo tijchiuasej tlen amo kuali (xijpoua 1 Juan 1:8, 9). Pablo kinixtomilik katli kintlapejpenijtoyaj yasej iluikak kenijkatsa Jehová tetlapojpoljuia, kiijtok: “ToTeko techmalakanijtok tlen ichikaualis Axkualtlakatl tlen tlanauatia kampa tsintlayouilotl uan techtlalijtok kampa tlanauatia iKone, Jesús, tlen yajaya tlauel kiiknelia. Uan Jesús techkojtok ika ieso para uelis techmalakanis tlen nopa tlen axkuali uan [toTeotsij] techtlapojpoljuijtok nochi totlajtlakoljuaj” (Col. 1:13, 14). Tlauel tijtlaskamatiliaj Jehová pampa nelia ueyi iyolo, yeka tlauel tijueyichiuaj. Uan pampa techtlapojpoljuia, nojkia uelis tijselisej sekinok tlateochiualistli.

10. ¿Tlake ueli tijchiuaj maske titlajtlakolejkej pampa Jehová nelia ueyi iyolo?

¹⁰ Uelis kuali timouikasej iuaya toTeotsij. Pampa titlajtlakolejkej, kema titlakatkej timochijkej tiikualankaitakauaj toTeotsij. Uan maske titlajtlakolejkej, Pablo kiijtok: “Kema tojuantij noja tieliyayaj tiikualankaitakauaj toTeko, Cristo iKone toTeko mijki topampa. Uan pampa mijki, toTeko moyoltlalik touaya uan techchijtok tiiuampoyouaj” (Rom. 5:10). Pampa Jesús motemaktilik, “toTeko moyoltlalik touaya”, nopa kiijtosneki nama uelis kuali timouikasej iuaya toTeotsij uan timouampojchiuasej iuaya. ¿Kenijkatsa ika ni tlamantli Jehová kinextia ueyi iyolo? Pablo kiixtonki ni kema kiniljuik katli kintlapejpenijtoyaj: “Ama, pampa toTeko Dios techchijtok tixitlauakej iixpa pampa tijneltokakej Jesucristo, timoyoltlalijtokej iuaya toTeko Dios ika nochi tlamantli tlen toueyiteko Jesucristo techchiuilijtok. Nojkia pampa tijneltokatokej Jesucristo, yajaya kichijtok ma tijmachilikaj para ama ueyi iyolo ika tojuantij. Uan ama tijpiaj tlatemachili ika toTeko” (Rom. 5:1, 2). ¡Tlauel tijtlaskamatiliaj Jehová pampa kuali timouikaj iuaya uan timouampojchijtokej iuaya!

11. ¿Kenijkatsa katli kintlapejpenijtokej yasej iluikak kinnextiliaj miakej maseualmej “nopa ojtli xitlauak”?

¹¹ Uelis tiitstosej tixitlauakej iixpa toTeotsij. Nopa tlajtolpanextijketl Daniel kiijtok ipan itlamia tonali, katli kintlapejpenijtokej yasej iluikak kinnextiliskiaj miakej maseualmej “nopa ojtli xitlauak” (xijpoua Daniel 12:3). ¿Kenijkatsa kichiuaj? Inijuantij tlajtolmoyauaj uan kinnextiliaj nopa “sekinok tlakamej” tlen Jehová tlanauatia (Juan 10:16). Kiampa kinpaleuiaj nopa miakej maseualmej ma itstokaj xitlauakej iixpa toTeotsij. Ika ni tlamantli, Jehová nojkia kinextia tlauel ueyi iyolo. Pablo kiijtok: “Ueyi iyolo toTeko ika tojuantij uan yajaya techchiua ma tiitstokaj tixitlauakej iixpa san tlapik, pampa Jesucristo ya tlaxtlajki totlauikilis ipampa totlajtlakoljuaj kema mijki” (Rom. 3:23, 24).

12. ¿Kenke kema Jehová techkaua ma timomaijtokaj kinextia ueyi iyolo?

¹² Uelis tijnechkauisej toTeotsij kema timomaijtosej. Jehová nelia tlauel ueyi iyolo, yeka techkaua ma timomaijtokaj. Pablo kiijtok “ma timonechkauikaj ika tlatemachili kampa moseuijtok toTeko [...] pampa ueyi iyolo ika tojuantij” (Heb. 4:16). Ika tlen Jesús kichijki, tojuantij uelis nochipa timomaijtosej ika Jehová. ¡Ni nelia se ueyi tlateochiualistli! Pablo kiijtok: “Pampa tijneltokaj [Cristo], ya tijpiaj tekiuejkayotl para tijnechkauisej uan tijkama[nalj]uisej toTeko uan tijmatij temachtli techselis ika pakilistli” (Efes. 3:12).

13. Pampa Jehová ueyi iyolo, ¿kenijkatsa techpaleuia “ipan tlen ueli tlalochtli”?

¹³ ToTeotsij techpaleuis kema monekis. Pablo kiijtok ueliskia timomaijtosej kema monekis, uan “ma axtimajmauikaj tijtlajtlanisej [toTeotsij] itlapaleuil, pampa temachtli techtlasojtlas uan techpaleuis ipan tlen ueli tlalochtli kema más moneki pampa ueyi iyolo ika tojuantij” (Heb. 4:16).  Kema tijpiasej se kuesoli, uelis tikiljuisej Jehová ma techpaleui. Maske amo kinamiki techpaleuis, ya nochipa techpaleuia. Kemantika techpaleuia ika toikniuaj katli itstokej ipan tlanechikoli. Pampa Jehová nochipa techtlakakilia uan techpaleuia, “ika miak pakilistli sejse tojuantij uelis kiijtos: ‘ToTeko nechpaleuia. Axnijmakasis tlen tlakamej uelisej nechchiuilisej’” (Heb. 13:6).

14. ¿Tlake seyok tlamantli kichiua Jehová pampa ueyi iyolo?

¹⁴ Uelis techyolchikauas. Nelia se ueyi tlateochiualistli pampa Jehová techyolchikaua kema tlauel timotekipachojtokej (Sal. 51:17). Kema toikniuaj katli itstoyaj Tesalónica tlauel kintlaijiyouiltiyayaj, Pablo kiniljuik: “ToTeko toTata techiknelia nochi tojuantij uan techyoltlalijtok para nochipa pampa ueyi iyolo ika tojuantij. Yajaya tlen techchiuilia ma tijchiakaj ika pakilistli nochi nopa kuali tlamantli tlen techmakas teipa. Uan ama toTeko toTata uan toTeko Jesucristo ma inmechyolchikauakaj uan ma inmechchiuakaj intemachmej” (2 Tes. 2:16, 17). Tlauel techyolchikaua tijmatisej Jehová techiknelia uan kitekipachoua tlen techpano.

15. ¿Tlake uelis timotemachisej tijselisej teipa pampa toTeotsij ueyi iyolo?

¹⁵ Uelis timotemachisej nochipa tiitstosej. Pampa titlajtlakolejkej, amo ueliskia timotemachisej tijselisej yon se tlamantli tlaj Jehová amo kipiaskia ueyi iyolo ika tojuantij (xijpoua Salmo 49:7, 8). Jehová kiijtojtok techmakas se tlamantli tlen tlauel kuali. Jesús kiijtok: “Ya ni ipakilis noTata. Kineki nochi tlakamej tlen kimachilisej para na niiKone uan nechneltokasej, ma kipiakaj yolistli yankuik para nochipa” (Juan 6:40). Uajka, pampa Jehová tlauel ueyi iyolo, uelis timotemachisej tiitstosej nochipa. Pablo kiijtok: “ToTeko technextilijtok para ueyi iyolo ika nochi tlakamej uan ueli kitlajtlakolkixtis tlen ueli tlakatl” (Tito 2:11).

16. ¿Tlake kichijkej se keskij Cristo itokilijkauaj pampa kimatiyayaj toTeotsij ueyi iyolo?

¹⁶ Kej tikixtontokej, ueli tijseliaj miak tlateochiualistli pampa Jehová ueyi iyolo. Ni amo kiijtosneki uelis nochipa titlajtlakolchijtosej san pampa toTeotsij kinextia ueyi iyolo ika tojuantij. Kema itstoyaj  nopa achtoui Cristo itokilijkauaj, sekij kichiuayayaj “tlen ueli tlajtlakoli” san pampa moiljuiyayaj “ueyi iyolo toTeko” (Jud. 4). Moiljuiyayaj maske tlajtlakolchiuaskiaj, toTeotsij nochipa kintlapojpoljuiskia. Uan se keskij kinekiyayaj sekinok nojkia ma tlajtlakolchiuakaj kej inijuantij. Ipan ni tonali, tlaj se akajya nojkia kiampa moiljuiskia, tlauel kiixpanoskia “itonal toTeko tlen technextilia kejatsa toTeko kipia ueyi iyolo ika tojuantij” (Heb. 10:29).

17. ¿Tlake tetlajtolmakak Pedro?

¹⁷ Satanás kinkajkayajtok miakej toikniuaj, uan kichijtok ma moiljuikaj uelis tlajtlakolchiuasej pampa Jehová nima kintlapojpoljuis. Maske Jehová kena kintlapojpoljuia katli nelia moyolkuepaj, ya kineki ma kichiuakaj kampeka amo kichiuasej tlen amo kuali o amo kema ma tlajtlakolchiuakaj. Jehová kichijki Pedro ma kiijkuilo ni: “Moneki intlachixtosej para ni tlakamej tlen fiero tlen kinekij inmechkajkayauasej ika istlakatikayotl axuelis inmechuikasej ipan se ojtli tlen axkuali. Ya inmotlatskilijtokej ipan toTeko, uajka axaka ma inmechmajkaua. Pero ximomachtijtiakaj más tlen toueyiteko Jesucristo yajaya tlen toTemakixtijka. Uan más xijmachilijtiakaj kenijkatsa yajaya kipia ueyi iyolo touaya” (2 Ped. 3:17, 18).

18. ¿Tlake kinamiki tijchiuasej pampa Jehová technextilijtok ueyi iyolo?

¹⁸ Tlaj nelia tijtlaskamatiliaj Jehová pampa ueyi iyolo, uajka moneki tijueyichiuasej ika nochi tlamantli tlen tijpiaj uan tikinpaleuisej sekinok. ¿Kenijkatsa uelis tijchiuasej? Pablo kiijtok: “ToTeko techmakatok sejse tojuantij nopa yajatili o chikaualistli tlen moneki [...]. Sekij nopa chikaualistli para ma kinpaleuikaj sekinok, uajka moneki miak ma kinpaleuikaj. [...] Sekij nopa chikaualistli para ma tlamachtikaj iTlajtol, uajka moneki ma tlamachtikaj kuali. [...] Sekij nopa chikaualistli para ma kintlasojtlakaj sekinok, uajka ika pakilistli ma tetlasojtlakaj” (Rom. 12:6-8). Uajka, pampa Jehová technextilijtok ueyi iyolo, kinamiki tijchiuasej kampeka tlauel titlajtolmoyauasej, tikinmachtisej sekinok ika Biblia, tikinyolchikauasej toikniuaj uan tikintlapojpoljuisej katli techyolkokosej.

19. ¿Tlake tikixtomasej ipan nopa seyok tlamachtili?

¹⁹ Jehová tlauel techteochijtok pampa nelia tlauel ueyi iyolo. Yeka, kinamiki tijchiuasej kampeka tikiniljuisej “nochi tlakamej [toTeotsij] iTlajtol uan para nelia ueyi iyolo toueyiTeko ika nochi tojuantij” (Hech. 20:24). Ipan nopa seyok tlamachtili tikixtomasej kenijkatsa uelis tijchiuasej.