1. ¿Tlake tijnekij nochi tojuantij?

¿KENIJKATSA tijyolmatiskiaj tlaj tijpantiskiaj se akajya katli tikixmatij uan tijtlepanitaj, uan ya amo kiilnamikiskia totoka o amo techixmatiskia? Uelis tlauel timoyolkokoskiaj pampa nochi tijnekij ma techilnamikikaj. Uan amo san tijnekij ma techilnamikikaj, tijnekij ma techpatiitakaj uan ma kipatiitakaj tlen tijchijtokej (Núm. 11:16; Job 31:6).

2, 3. ¿Tlake panoskia tlaj tijnekiskiaj tlauel ma techixmatikaj? (Xikita nopa achtoui tlaixkopinkayotl).

² Maske tijnekij ma techixmatikaj, moneki tijmokuitlauisej tlen tijyolmatij. Tojuantij titlajtlakolejkej, uan yeka ueliskia tijnekisej tlauel ma techixmatikaj uan ayokmo timoitaskiaj kej kinamiki. Satanás uan katli kinnauatia ueliskiaj kichiuasej ma tijnekikaj sekinok tlauel ma techpatiitakaj uan ma techixmatikaj. Kema kiampa pano, ayokmo tijueyichiuaj yon tijuejkapantlaliaj Jehová kej kinamiki (Apoc. [Rev.] 4:11).

³ Kema Jesús itstoya, katli tlayakanayayaj ipan religión kinekiyayaj ma kinuejkapantlalikaj. Yeka, Jesús kiniljuik  itokilijkauaj: “Ximomokuitlauikaj ika nopa tlamachtianij tlen itlanauatiljuaj Moisés tlen kinpaktia mokentisej ininyoyo uejueueyak. Kinpaktia kema tlakamej kintlajpalouaj ika kuali ipan tian[guis]. Uan inijuantij kinekij moseuisej ipan nopa sillas tlen más kipia tlatlepanitakayotl uan kinekij tlakuasej achtoui ipan se tlakualistli”. Uan teipa kiniljuik: “Inijuantij [...] achi más toTeko kintlatsakuiltis” (Luc. 20:46, 47). Uan kema Jesús kiitak kenijkatsa se siuatl katli ayokmo kipixtoya iueue temakak kentsi tomij, kiijtok tlauel kuali tlen kichijtoya pampa amo kinekiyaya sekinok ma kiuejkapantlalikaj (Luc. 21:1-4). Kiampa kinextik kenijkatsa kiita Jehová kema se akajya kineki ma kiuejkapantlalikaj. Ni tlamachtili techpaleuis ma tikitakaj nopa tlamantli kej toTeotsij kiita.

4. ¿San ajkia kinamiki tijnekisej ma techixmati, uan kenke tlauel ipati?

⁴ Uajka, ¿ajkia kinamiki tijnekisej ma techixmati? Amo kinamiki tijnekisej tlauel ma techixmatikaj kampa timomachtiaj, ipan toteki o kema tijchiuaj se tlenijki kema timoyolpakiltiaj. Apóstol Pablo kiijtok ajkia kinamiki techixmatis: “Ama ya inkiixmatij toTeko o más xitlauak tikijtosej, toTeko inmechixmati, uajka ¿para tlen inkinekij inkikajteuasej toTeko para sampa inkitekipanosej itlanauatiljuaj Moisés tlen ayok kipiaj chikaualistli?” (Gál. 4:9). ¡Nelia se ueyi tlateochiualistli! ToTeotsij, katli kinauatia nochi, uelis techixmatis. Jehová kineki kuali mouikas touaya. Kej kiijtok se katli momachtia Biblia, toTeotsij “kitlachilia tlen tijchiuaj uan kuali techita”. Kema Jehová techita kej tiiuampoyouaj, uajka tijkuamachiliaj kenke tiitstokej (Ecl. 12:13, 14).

5. ¿Tlake moneki tijchiuasej tlaj tijnekij Jehová ma techita kej tiiuampoyouaj?

⁵ Kej nopa kipanok Moisés. Kema kiiljuik Jehová ma kipaleui kimatis tlake kinekiyaya ma kichiua, ya kinankilik: “Uajka nijchiuas tlen tikijtojtok pampa nijmati tijchiuas tlen kuali, uan ta nimitsitas para tinoneluampo” (Éx. 33:12-17). Tojuantij nojkia tijseliaj miak tlateochiualistli kema Jehová kuali techixmati. Uajka, ¿tlake moneki tijchiuasej tlaj tijnekij Jehová ma techita kej tiiuampoyouaj? Moneki tikiknelisej uan tijmaktilisej tonemilis (xijpoua 1 Corintios 8:3).

6, 7. ¿Tlake ueliskia kichiuas ayokmo kuali ma timouikakaj iuaya Jehová?

⁶ Nojkia moneki tijchijtosej kampeka nochipa kuali timouikasej iuaya Jehová. Kej Pablo kiniljuik toikniuaj katli itstoyaj Galacia, tojuantij nojkia amo kinamiki tijnekisej tlamantli tlen “axtleno ipati”, kej kema tijnekij sekinok tlauel ma techixmatikaj (Gál. 4:9). Maske toTeotsij kinitayaya kej iuampoyouaj, Pablo kiijtok sampa kinekiyayaj kipiasej tlamantli tlen amo tleno ipati. Kejuak kiniljuik: “Maske kuali inkiixmatij toTeotsij, ¿nojua inkinekij tlamantli tlen amo tleno ipati katli uejkajkia inkikajkej?”.

⁷ ¿Uelis nojkia kiampa techpanos? Kena. Kema tikixmatkej Jehová, tijkajkej nochi tlen Satanás techmakayaya, kej Pablo kichijki, uan kejuak amo tijnejkej sekinok ma techixmatikaj (xijpoua Filipenses 3:7, 8). Uelis amo tiajkej timomachtiaj ipan universidad, amo tijnejkej tijpiasej se kuali tekitl o tijtlanisej miak tomij. Uan maske tiueltoskiaj tijtlanisej miak tomij o miakej maseualmej ma techixmatikaj pampa tiueliyayaj kuali timauiltiaj, titlatsotsonaj o tiuikaj, tojuantij amo tijnejkej nopa (Heb. 11:24-27). Uan nama, ¿tikitaskiaj san tlapik tijkajkej  nochi nopa tlamantli? Tlauel amo kuali tlaj kiampa tijchiuaskiaj. Tlaj amo timomokuitlauiaj, ueliskia sampa tijnekisej tlamantli tlen “axtleno ipati”.

8. ¿Tlake techpaleuis nojua ma tijnekikaj Jehová kuali ma techixmati?

⁸ ¿Tlake techpaleuis nojua tlauel ma tijnekikaj toTeotsij kuali ma techixmati uan amo maseualmej? Tlauel moneki ma tikilnamikikaj ome tlamantli. Achtoui moneki tikilnamikisej Jehová nochipa kuali kinita itekipanojkauaj katli amo kitlauelkauaj (xijpoua Hebreos 6:10; 11:6). Ya tlauel kinpatiita sejse tlen itekipanojkauaj uan moiljuia amo kichiuaskia tlen xitlauak tlaj kiilkauaskia nochi tlen kichijtokej. Jehová nochipa “kinixmati inijuantij tlen nelia iaxkauaj” (2 Tim. 2:19). Uan kuali kiita “nopa ojtli tlen ipan nemij tlakamej tlen itstokej xitlauakej”, uan kimati kenijkatsa kinmakixtis kema kinpano tlaouijkayotl (Sal. 1:6; 2 Ped. 2:9).

9. Xikijto kenijkatsa Jehová kinextik kuali kinitayaya itekipanojkauaj.

⁹ Kemantika, Jehová kinextijtok ika uejueyi tlamantli kenijkatsa kuali kinita itekipanojkauaj (2 Crón. 20:20, 29). Ma tikilnamikikaj kenijkatsa Jehová kinmanauik israeleuanij ipan ueyi atl Rojo kema faraón kintepotstokak (Éx. 14:21-30; Sal. 106:9-11). Kichijki se ueyi tlamantli, yeka maske ya panotoya 40 xiuitl, maseualmej nojua kiilnamikiyayaj tlen panok (Jos. 2:9-11). Tojuantij tijmatij Gog tlen Magog nechka kinekis kintsontlamiltis toTeotsij itekipanojkauaj, yeka tlauel techyolchikaua tikilnamikisej kenijkatsa Jehová kinmakixtik itekipanojkauaj katli uejkajkia itstoyaj (Ezeq. 38:8-12). Kema panos nopa, tojuantij tlauel tiyolpakisej pampa tijnejkej Jehová ma techixmati uan amo maseualmej.

10. ¿Tlake nopa seyok tlamantli tlen nojkia moneki tikilnamikisej?

¹⁰ Nama ma tikilnamikikaj nopa seyok tlamantli tlen nojkia techpaleuis: Jehová uelis kinextis techixmati ika tlamantli tlen amo kema timoiljuijtokej. Ya amo kinteochiuas katli kichiuaj tlen kuali san pampa kinekij sekinok ma kinitakaj. ¿Kenijkatsa tijmatij nopa? Pampa Jesús kiijtok maseualmej katli kinpaktia ma kinpatiitakaj, san ya nopa kiselisej kej inintlaxtlauil (xijpoua Mateo 6:1-5). Uan nojkia kiijtok iTata “ichtakatsi” kinita nochi katli amo kinpatiitaj maske kichiuaj miak tlamantli tlen kinpaleuia sekinok. ToTeotsij kiita nochi tlen kichiuaj uan yeka kinteochiua, uan kemantika ika tlamantli tlen amo moiljuijtoyaj. Ma tikitakaj se keski neskayotl.

11. ¿Kenijkatsa Jehová kinextik kuali kiixmatiyaya María?

¹¹ Kema Jehová kichiuaskia iKone ma tlakatiki ipan Tlaltipaktli, kitlapejpenik María, se ichpokatl katli amo moueyimatiyaya uan katli amo monamiktijtoya. Ya itstoya ipan Nazaret, se pilaltepetsi tlen amo tlauel ipati eliyaya uan mokauayaya uejka tlen altepetl Jerusalén, kampa eltoya nopa yejyektsi teokali (xijpoua Lucas 1:26-33). ¿Kenke Jehová kitlapejpenik nopa ichpokatl? Nopa iluikaejketl Gabriel kiiljuik toTeotsij kuali kiitayaya. Uan María kinextik kuali tlaneltokayaya kema kamanaltik iuaya Elisabet (Luc. 1:46-55). Jehová kiitstoya kenijkatsa María kuali kitekipanouayaya, yeka tlauel kiteochijki.

12, 13. ¿Kenijkatsa Jehová kinextik kuali kiixmatiyaya Jesús kema tlakatki uan kema kiuikakej ipan teokali?

 ¹² Kema Jesús tlakatki, Jehová amo kinmatiltik uejueyij tekichiuanij o tlanauatianij tlen Jerusalén uan Belén. Ya kintitlanki iluikaeuanij ma kiniljuitij tlapialmokuitlauianij katli itstoyaj nechka Belén (Luc. 2:8-14). Nopa tlapialmokuitlauianij kipaxalotoj nopa okichpil (Luc. 2:15-17). Uelis María uan José kinpaktik kema nopa maseualmej kiitatoj Jesús uan kiuejkapantlalijkej. Ma tikitakaj kenijkatsa Jehová uan Satanás amo sanse kichiuaj. Kema Satanás kintitlanki se keskij astrólogos ma kiitatij Jesús, nochi maseualmej katli itstoyaj ipan Jerusalén kimatkej tlen panotoya uan miakej tlauel kualankej (Mat. 2:3). Pampa nochi kimatkej Jesús tlakajtoya, tlauel miakej konemej kinmiktijkej (Mat. 2:16).

¹³ Kema panok 40 tonali, María monekiyaya kimakas Jehová se tlakajkaualistli ipan teokali tlen eltoya ipan Jerusalén, tlen mokauayaya se 9 kilómetros iuejkaka tlen Belén (Luc. 2:22-24). Kema yauiyayaj, uelis María moiljuiyaya tlaj nopa sacerdote kiueyichiuaskia o kiuejkapantlaliskia ikone pampa teipa kichiuaskia se kuali tekitl. Maske uelis amo panok kej María moiljuijtoya, Jesús kena kiuejkapantlalijkej. Ika “se kuali tlakatl [katli] itoka eliyaya Simeón tlen kinneltokak nochi itlanauatiljuaj toTeko” uan ika nopa siuatlajtolpanextijketl Ana, katli kipixtoya 84 xiuitl, Jehová kinmatiltik Jesús eliskia Cristo, nopa Mesías tlen kichixtoyaj (Luc. 2:25-38).

14. ¿Kenijkatsa Jehová kiteochijki María?

¹⁴ ¿Uan tlake panok ika María? ¿Nojkia kiuejkapantlalik Jehová pampa kuali kimokuitlauik uan kiiskaltik iKone? Kena. Kichijki ma moijkuilo ipan Biblia nochi tlen María kiijtok. Kema Jesús tlajtolmoyajki ipan nopa eyi xiuitl uan tlajko, María amo yajki iuaya, uelis pampa ayokmo kipixtoya iueue. Yeka amo kipixki se keski tlateochiualistli tlen sekinok maseualmej kipixkej. Maske amo yajki iuaya Jesús, kena itstoya kema kimiktijkej (Juan 19:26). Uan se keski tonali achtoui, kema Jehová ayamo kinmakayaya itonal ipan Pentecostés, xiuitl 33, María nojkia itstoya ininuaya Jesús itokilijkauaj ipan Jerusalén (Hech. 1:13, 14). Uelis nojkia kitlapejpenijkej yas iluikak. Tlaj nelia kiampa panok, uajka nochipa itstos iuaya Jesús ipan iluikak. ¡Nelia se ueyi tlateochiualistli kiselik pampa kuali kitekipanok toTeotsij!

15. Kema Jesús itstoya ipan Tlaltipaktli, ¿kenijkatsa Jehová kinextik kuali kiitayaya?

¹⁵ Jesús amo kinekiyaya katli tlayakanayayaj ipan religión o tekichiuanij ma kiuejkapantlalikaj. Ya kinekiyaya Jehová kuali ma kiita. Jesús tlauel kuali kiyolmatki kema toTeotsij expa kikamanaljuik tlen iluikak. Ipan ueyatl Jordán, kema moatsonpoliuiltik, Jehová kiijtok: “Ya ni noKone, katli nikiknelia uan kuali nikita” (Mat. 3:17, TNM). Ipan nopa tonali, san Jesús uan Juan kikajkej nopa tlajtoli. Uan uelis se xiuitl achtoui kema kimiktiskiaj, eyij apóstoles nojkia kikajkej kema toTeotsij kiijtok: “Ya ni noKone tlen nikiknelia. Nijpia miak pakilistli ika tlen kichiua. Xijtlakakilikaj tlen yajaya kiijtoua” (Mat. 17:5). Uan kema nechka mikiskia, Jehová sampa kinojnotski tlen iluikak (Juan 12:28).

16, 17. ¿Tlake tlateochiualistli kimakakej Jesús maske amo moiljuijtoya tlaj kimakaskiaj nopa?

¹⁶ Maske Jesús kimajtoya nelia tepinajti  eliskia kema kimiktiskiaj, pampa kiijtoskiaj kiixpanotoya toTeotsij, kema momaijtok, kiijtok ma mochiua Jehová ipakilis uan amo tlen ya kinekiyaya (Mat. 26:39, 42). “Kiijiyouik nopa kuauitl kampa kitlaijiyouiltijkej, uan amo pinajki ika nochi tlen kichiuilijkej”. Ya kinekiyaya Jehová kuali ma kiita uan amo maseualmej (Heb. 12:2, TNM). ¿Kenijkatsa Jehová kinextik kuali kiitayaya iKone?

¹⁷ Kema itstoya ipan Tlaltipaktli, Jesús kiijtok sampa kinekiyaya kipias tlen kipixtoya kema itstoya ipan iluikak (Juan 17:5). Uan yon se tlamantli kinextia ya kinekiyaya kiselis sekinok tlamantli. Maske amo kinekiyaya nopa, ¿tlake kichijki Jehová? Jesús amo kema moiljuik kenijkatsa Jehová kiuejkapantlaliskia. Kiyolkuik “uan kichijki más ueyi que nochi sekinok”. Uan kimakak seyok tlamantli tlen amo aka kimakatoya: kichijki Jesús ayokmo kema ma miki (Filip. 2:9; 1 Tim. 6:16). * ¡Jehová nelia kimakak se ueyi tlateochiualistli pampa amo kema kitlauelkajki!

18. ¿Tlake moneki tikilnamikisej tlaj amo tijnekij maseualmej tlauel ma techixmatikaj o ma techuejkapantlalikaj?

¹⁸ ¿Tlake techpaleuis amo ma tijnekikaj maseualmej ma techixmatikaj o ma techuejkapantlalikaj? Moneki tikilnamikisej Jehová nochipa kinextia kuali kinixmati itekipanojkauaj uan nojkia kinteochiua ika tlamantli tlen amo kema moiljuijtoyaj. ¡Amo tijmatij ika tlake tlamantli techteochiuas teipa! Maske amo tijmatij, moneki tikijiyouisej nochi kuesoli tlen tikixnamikisej uan tikilnamiktosej nochi maseualmej katli tlauel kinixmatij uan kinuejkapantlaliaj nechka kintsontlamiltisej (1 Juan 2:17). ToTata Jehová, katli tlauel techiknelia, nochipa kichiua tlen xitlauak uan amo kema kiilkauas nochi tlen tijchiuaj pampa tikikneliaj (Heb. 6:10). Kena, Jehová kinextis kuali techixmati uan techuejkapantlalis, uan uelis kichiuas ika tlamantli tlen amo tijchiaj o amo timoiljuiaj.