JOSUÉ moneki kichiuas se tekitl tlen tlauel ouij: moneki kinyakanas israeleuanij ma moaxkatikaj nopa tlali tlen toTeotsij kintenkauilik kinmakaskia. Moneki kiixnamikis uejueyi tlaouijkayotl. Uan Jehová kiiljuia kena uelis kichiuas iteki, yeka kiiljuia ma moyolchikaua uan amo ma majmaui. Nojkia kiiljuia ma kineltoka nopa Tlanauatili uan ma kipoua youali uan tonali, kiampa uelis kichiuas nochi tlen nopaya ijkuilijtok. Tlaj kichiuas nopa, kiiljuia kuali kisas nochi tlen kichiuas uan kipias tlalnamikilistli (Jos. 1:7, 8).

Ipan ni tonali tlauel ouij tiitstokej uan nojkia tikixnamikij miak tlaouijkayotl (2 Tim. 3:1). Tlen tijchiuasej nojkia kuali kisas tlaj tijchiuasej nochi tlen Jehová kiiljuik Josué. Tlaj nochipa tijpouasej Biblia, techpaleuis ma tijchiuakaj tlen nopaya techtlajtolmaka kema tikixnamikisej se tlaouijkayotl.

Miakej tlen tojuantij amo tijmatij kenijkatsa kinamiki timomachtisej uan sekij amo techpaktia yon se kentsi. Tijmatij tlauel ipati timomachtisej Biblia, yeka kualtiaskia tikitasej tlen kiijtoua nopa recuadro “ Xijchiua ni”. Nopaya tikitas tlake uelis tijchiuas uan kiampa ma mitspakti timomachtis.

Katli kiijkuilok se salmo kiijtok: “Xinechyakana ipan nopa ojtli tlen tinechnextilia [ika] motlanauatiljuaj, pampa san ya nopa nijneki nijchiuas” (Sal. 119:35). Ta nojkia uelis tlauel mitspaktis timomachtis toTeotsij iTlajtol. Tijpantis miak kuajkuali tlamachtili tlaj nojua timomachtijtias.

Maske ta amo tijyakanas se altepetl kej Josué kichijki, kena tikixnamiki miak tlaouijkayotl. Uajka, sanse kej Josué, ximomachti Biblia uan xijchiua ipan monemilis tlen tijyekoua. Kiampa, kuali kisas tlen tijchiuas uan tijpias tlalnamikilistli.