1, 2. ¿Ajkia eliyaya Sadoc? (1 Crónicas 12:22, 26-28).

 XIMOILJUI ipan ni tlamantli. Kipano 340 mil tlakamej mosentilijtokej pampa kinekij kitekitlalisej David kej tlanauatijketl. Nopa tlakamej itstokej nechka Hebrón, nopaya kakisti kenijkatsa uikaj, uetskaj uan kiueyichiuaj Jehová eyi tonali (1 Crón. 12:39). Nopaya itstok se telpokatl katli motokaxtia Sadoc. Maske miakej amo kiixmatij, Jehová kinejki ma tijmatikaj nopaya itstoya (xijpoua 1 Crónicas 12:22, 26-28). Pero ¿ajkia eliyaya Sadoc?

² Sadoc eliyaya sacerdote uan tekitiyaya iuaya sumo sacerdote Abiatar. Jehová kimakatoya miak tlalnamikilistli, kiampa kuali kikuamachiliyaya tlen Jehová mosentlalijtoya kichiuas (2 Sam. 15:27). Yeka, maseualmej kionitayayaj pampa kinekiyayaj ma kintlajtolmaka. Nojkia, amo majmauiyaya, uan ipan ni tlamachtili ya nopa tikitasej.

3. 1) ¿Kenke moneki amo timajmauisej? 2) ¿Tlake tikitasej ipan ni tlamachtili?

³ Ipan ni tonali, Satanás más kintlaijiyouiltia Jehová itekipanojkauaj (1 Ped. 5:8). Yeka, moneki amo timajmauisej pampa nojua tijchiaj nopa tonali kema Jehová kitsontlamiltis Satanás uan tlen amo kuali (Sal. 31:24). Ma tikitakaj eyi tlamantli tlen techpaleuis amo ma timajmauikaj kej Sadoc.

 XIJPALEUI ITLANAUATIJKAYO DIOS

4. ¿Kenke moneki amo timajmauisej tlaj tijnekij tijpaleuisej iTlanauatijkayo Dios? (Nojkia xikita tlaixkopinkayotl).

⁴ Katli tijtekipanouaj Jehová tijpaleuiaj iTlanauatijkayo ika nochi toyolo, pero kemantika moneki amo timajmauisej para uelis kiampa tijchiuasej (Mat. 6:33). Ipan ni tonali moneki amo timajmauisej tlaj tijnekij tijchiuasej tlen Jehová technauatia uan nojkia para uelis tijmoyauasej nopa kuali tlamachtili (1 Tes. 2:2). Nojkia moneki tijchiuasej kampeka amo timokalakisej ipan política pampa maseualmej tlauel moxelojtokej ika nopa tlamantli (Juan 18:36). Uan pampa amo mokalakiaj ipan política, miakej toikniuaj ouij kimatij amo kipiasej tlen ika mopanoltisej, kinmakilijtokej uan kintsaktokej.

5. ¿Kenke Sadoc monejki amo majmauis para kipaleuis David?

⁵ Sadoc amo yajki Hebrón san pampa kinekiyaya kiitas kenijkatsa kitekitlaliyayaj David kej tlanauatijketl. Ya mokualchijchijtoya para tlateuis (1 Crón. 12:38). Mosentlalijtoya yas iuaya David kampa yaskia tlateuiti uan kinmanauis israeleuanij tlen ininkualankaitakauaj. Maske uelis amo kimatiyaya kenijkatsa tlateuis, ya amo majmauiyaya.

6. ¿Kenijkatsa David kipaleuik Sadoc amo ma majmaui? (Salmo 138:3).

⁶ ¿Tlake kipaleuik Sadoc amo ma majmaui? Uelis tlauel kipaleuik tlen kichijkej se keskij tlakamej katli amo majmauiyayaj. Se tlen inijuantij elki David. Ya kuali kinyakanayaya isoldados uan kuali tlateuiyaya, yeka nochi israeleuanij kinejkej ma kinnauati (1 Crón. 11:1, 2). David motemachiyaya ipan Jehová uan kiiljuiyaya ma kipaleui kema ikualankaitakauaj kinekiyayaj kiteuisej (Sal. 28:7; xijpoua Salmo 138:3). Sadoc nojkia kipaleuik tlen kichijkej sekinok tlakamej katli amo majmauiyayaj, kej Joiada (o Jehoiadá), ikone Benaía (o Benaya) uan nopa 22 tlayakananij  katli kipaleuijkej David (1 Crón. 11:22-25; 12:26-28). Nochi inijuantij mosentlalijtoyaj kitekitlalisej David kej tlanauatijketl uan kipaleuisej.

7. 1) ¿Ajkia inijuantij techpaleuiaj amo ma timajmauikaj? 2) ¿Tlake mitsmachtia nopa video tlen toikni Nsilu?

⁷ Kema tikitaj tlen kichijtokej se keskij toikniuaj katli amo kinekij kitlauelkauasej Jehová yon iTlanauatijkayo, techpaleuia amo ma timajmauikaj. Kiampa kichijki Jesús. Ya amo kinejki mokalakis ipan política kema itstoya ipan Tlaltipaktli (Mat. 4:8-11; Juan 6:14, 15). Nochipa motemachik Jehová kipaleuiskia. Ipan ni tonali nojkia techpaleuia tlen kichiuaj se keskij telpokamej katli amo kinekij mochiuasej soldados yon mokalakiaj ipan política. Uelis tijtemos ipan jw.org tlen kinpanotok se keskij tlen inijuantij. a

XIKINPALEUI TOIKNIUAJ

8. ¿Kema monekis ueuejtlakamej amo majmauisej uan kiampa kinpaleuisej toikniuaj?

⁸ Jehová itekipanojkauaj tlauel kinpaktia mopaleuisej (2 Cor. 8:4). Pero kemantika moneki amo majmauisej. Se neskayotl, kema onka tlauilankayotl ueuejtlakamej kimatij moneki kinyolchikauasej toikniuaj, kinuikilisej amatlajkuiloli o se keski tlamantli tlen kinpoloua. Inijuantij kinikneliaj toikniuaj, yeka mosentlalijtokej kinpaleuisej ika tlen moneki, maske ueliskia kinpanos tlen amo kuali (Juan 15:12, 13). Kiampa kinextiaj amo majmauij kej Sadoc.

9. Kej kiijtoua 2 Samuel 15:27-29, ¿tlake kiiljuik David ma kichiua Sadoc? (Nojkia xikita tlaixkopinkayotl).

⁹ David ueltoskia kimiktisej, pampa ikone Absalón mosentlalijtoya kitekikixtilis (2 Sam. 15:12, 13). Yeka David monekiyaya kisteuas Jerusalén, uan kiniljuik itekipanojkauaj: “Ma tiisiuikaj ticholosej para timomanauisej, pampa intla axtle, niyon se  tlen tojuantij uelis cholos” (2 Sam. 15:14). Kema ya kistejtoyaj, David kiitak se akajya monekiyaya mokauas Jerusalén para kimatiltis tlake kinekiyaya kichiuas Absalón. Yeka kiniljuik Sadoc uan sekinok sacerdotes ma tlakuepilikaj (xijpoua 2 Samuel 15:27-29). Monekiyaya amo aka kimatis kenke itstoyaj nopaya, pampa tlaj kimatiskiaj, ueliskiaj kinmiktisej. Absalón san kinekiyaya kichiuas tlen ya kinekiyaya, tlauel mosisiniyayaj uan kitekikixtilik itata. Ximoiljui tlake kinpanotoskia Sadoc uan nopa sekinok sacerdotes tlaj Absalón kimajtoskia tlen inijuantij kichiuayayaj.

10. ¿Kenijkatsa Sadoc uan nopa sekinok sacerdotes kipaleuijkej David?

¹⁰ David kiniljuik Sadoc uan Husai katli nojkia eliyaya iuampo, tlen moiljuijtoya kichiuas (2 Sam. 15:32-37). Husai kichijki tlen David kiiljuik uan tlachijki kejuak kipaleuiyaya Absalón, yeka kiiljuik kenijkatsa ueliskia kiteuis David, kiampa David mochololtiskia. Teipa Husai kiniljuik Sadoc uan Abiatar tlen kichiuaskiaj (2 Sam. 17:8-16). Uajka Sadoc uan Abiatar kititlankej se akajya ma kiiljuiti David tlen Absalón kichiuaskia (2 Sam. 17:17). Jehová kintekiuik Sadoc uan nopa sekinok sacerdotes para amo ma kimiktikaj David (2 Sam. 17:21, 22).

11. ¿Kenijkatsa uelis tijchiuasej kej Sadoc kema monekis tikinpaleuisej toikniuaj?

¹¹ Tlaj techiljuisej ma tikinpaleuikaj toikniuaj kema kinpanos tlen amo kuali, ¿kenijkatsa uelis tijchiuasej kej Sadoc uan amo timajmauisej? 1) Ma tijchiuakaj tlen techiljuiaj. Kema pano tlen amo kuali, moneki amo timoxelosej uan tijchiuasej tlen techiljuia kali Betel (Heb. 13:17). Ueuejtlakamej, moneki kuali kiitasej tlen Jehová itlanechikol kiijtoua uan kiampa kimatisej tlake kichiuasej kema tetlasojsoljuilis se tlenijki (1 Cor. 14: 33, 40). 2) Amo ma timajmauikaj uan kuali  ma timoiljuikaj tlen tijchiuasej (Prov. 22:3). Kuali ma timoiljuikaj tlake tijchiuasej. Amo ma tijchiuakaj tlen ueliskia kichiuas ma techpano tlen amo kuali. 3) Ma timotemachikaj ipan Jehová. Ya kitekipachoua tlen techpano uan kineki kuali ma tiitstokaj. Jehová nojkia uelis techpaleuis ma tikinpaleuikaj toikniuaj.

12, 13. ¿Tlake techmachtia tlen kichijkej Víktor uan Vitali? (Nojkia xikita tlaixkopinkayotl).

¹² Ma tikitakaj tlen kichijkej Víktor uan Vitali, omej ueuejtlakamej katli kinuikilijkej tlakualistli uan atl toikniuaj tlen Ucrania. Víktor kiijtoua: “Kampa ueli tijtemojtiauiyayaj tlakualistli. Miakpa tijkakiyayaj kema tlatotopotsayayaj nechka kampa tiitstoyaj. Se toikni temakak tlakualistli tlen kiajojtoya o kiiyantijtoya, kiampa toikniuaj uelki kipiaj tlen kikuasej se keski tonali. Kema tijtlejkoltiyayaj se keski tlamantli ipan se carro, se bomba uetsiko se 20 metros nechka kampa tiitstoya, pero amo toponki. Ipan nopa tonali tlauel nijtlajtlanik Jehová ma nechpaleui amo nimajmauis uan kiampa nojua nikinpaleuiskia toikniuaj”.

¹³ Vitali kiijtoua: “Monejki amo timajmauisej. Kema achtoui nikinuikilik tlakualistli toikniuaj, niuejkajki 12 horas para niasiti, yeka tlauel nijtlajtlaniyaya Jehová ma nechpaleui”. Maske Vitali amo majmajki, kuali moiljuik tlake kichiuaskia. Ya nojua kiijtoua: “Miakpa nijtlajtlanik Jehová ma nechmaka tlalnamikilistli uan ma nechpaleui nikitas tlake ueliskia nijchiuas. Niajki san ipan carreteras kampa tekichiuanij tekauiliyayaj ma panokaj. Tlauel nechyolchikajki kema nikitak toikniuaj sansejko tekitiyayaj. Kiijkueniyayaj nochi tlen tlatsakuiliyaya ipan carretera, kisentiliyayaj uan kitlejkoltiyayaj ipan carro tlakualistli, yoyomitl uan sekinok tlamantli tlen toikniuaj kitekiuiyayaj, nojkia techtlamakayayaj uan techkauayayaj ma timokauakaj ininchaj”.

AMO XIJTLAUELKAUA JEHOVÁ

14. ¿Kenijkatsa tijyolmatij kema katli tlauel tikikneliaj kitlauelkaua Jehová?

¹⁴ Kema se touampox o se tlen tochampoyouaj kitlauelkaua Jehová, tlauel techyolkokoua (Sal. 78:40; Prov. 24:10). Uan tlaj tlauel tikikneliyayaj, más techyolkokoua. Tlaj kiampa mitspanotok, tlauel mitspaleuis tlen Sadoc kichijki.

15. ¿Kenke Sadoc monejki amo majmauis uan kiampa amo kitlauelkauas Jehová? (1 Reyes 1:5-8).

¹⁵ Kema David ya ueuejtixtoya uan nechka mikiskia, ikone Adonías kinejki kitekikixtilis, maske Jehová kitlapejpenijtoya Salomón ma tlanauati (1 Crón. 22:9, 10). Sadoc amo kitlauelkajki Jehová, maske Abiatar katli eliyaya iuampox, kipaleuik Adonías (xijpoua 1 Reyes 1:5-8). Tlen kichijki Abiatar kinextik kitlauelkajtoya David uan nojkia Jehová. Uelis Sadoc tlauel moyolkokok pampa tekititoya iuaya kej sacerdote kipano 40 xiuitl (2 Sam. 8:17). Sansejko kimokuitlauijtoyaj “ikaxa Toteko Dios” (2 Sam. 15:29). Tlauel kipaleuijtoyaj David uan sansejko kuali kitekipanojtoyaj Jehová (2 Sam. 19:11-14).

16. ¿Tlake kipaleuik Sadoc amo ma kitlauelkaua Jehová?

¹⁶ Maske Abiatar kitlauelkajki Jehová, Sadoc amo kiampa kichijki. Yeka, David motemachiyaya ya amo kema kitlauelkauaskia. Kema David kimatki tlen kichiuaskia Adonías, nima kiniljuik Sadoc, Natán uan Benaya ma kitekitlalikaj Salomón kej tlanauatijketl (1 Rey. 1:32-34). Sadoc tlauel kiyolchikajki kema kiitak Natán uan sekinok Jehová itekipanojkauaj amo kitlauelkajkej uan kipaleuijkej David (1 Rey. 1:38, 39).  Kema pejki tlanauatia Salomón, kitekimakak Sadoc kej sacerdote “keja ipatlaka Abiatar” (1 Rey. 2:35).

17. ¿Kenijkatsa uelis tijchiuasej kej Sadoc tlaj se katli tikikneliaj kitlauelkaua Jehová?

¹⁷ ¿Tlake techmachtia tlen kichijki Sadoc? Tlaj se katli tlauel tikiknelia kitlauelkaua Jehová, ximosentlali amo tijtlauelkauas Jehová (Jos. 24:15). Ya mitspaleuis kuali xijtekipanojto uan amo xijtlauelkaua. Ximomaijto uan nochipa xiitsto ininuaya toikniuaj katli amo kitlauelkauaj Jehová. Tlaj kiampa tijchiua, Jehová tlauel mitsteochiuas (2 Sam. 22:26).

18. ¿Tlake techmachtia tlen kinpanok Marco uan Sidse?

¹⁸ Ma tikitakaj tlen kinpanok toikniuaj Marco uan isiua, Sidse. Omej ininichpokauaj kitlauelkajkej Jehová kema moskaltijkej. Marco kiijtoua: “Kema tlakatij tokoneuaj, tlauel tikinikneliaj. Tijnekis amo tleno ma kinpano. Yeka kema kitlauelkauaj Jehová, tlauel mitsyolkokos”. Nojkia kiijtoua: “Jehová amo kema techtlauelkajtok. Kema tlauel nimotekipachoua, nosiua nechyolchikaua, uan kema ya amo kuali kiyolmati, nama na nijyolchikaua”. Sidse kiijtoua: “Tikijiyouijtokej miak tlamantli pampa Jehová techpaleuijtok. Tlauel nimoyolkokouayaya, nimoiljuiyaya eliyaya notlajtlakol pampa noichpokauaj kitlauelkajkej Jehová. Yeka nijpouilik Jehová tlen nijyolmatiyaya. Teipa, kema tiajkej tlanechikoli, nechnechkauik se tosiuaikni katli miak xiuitl amo nikitstoya, kitlalik imax nopani uan nechiljuik: ‘Xikilnamiki Sidse, amo elki motlajtlakol’. Jehová nechpaleuijtok ma nijtekipano ika pakilistli”.

19. ¿Tlake timosentlalijtokej tijchiuasej?

¹⁹ Jehová kineki itekipanojkauaj amo ma timajmauikaj, sanse kej kichijki Sadoc (2 Tim. 1:7). Maske kiampa kineki ma tijchiuakaj, ya amo kineki ma timotemachikaj san ipan tojuantij. Yeka kema tikixnamikis se kuesoli, xikiljui Jehová ma mitspaleui. Uelis timotemachis ya mitspaleuis amo ximajmaui sanse kej Sadoc (1 Ped. 5:10).