Tlaj toTeotsij amo kichiua ma titlaijiyouikaj, uajka ¿ajkia o tlake kichiua ma titlaijiyouiaj? ¿Kenke tlauel miakej maseualmej mayankamikij? ¿Kenke onka miak tlauilankayotl, kokolistli uan tlamantli tlen tetlasojsoljuilia? Biblia kiijtoua onka eyi tlamantli tlen kichiua ma titlaijiyouikaj:

1. Kema kinekij kipiasej miak tlamantli, kema san ipan inijuantij moiljuiaj uan kema tekualankaitaj. “Nikita para tlakamej tlauel kipiaj chikaualistli para mochiuilisej tlen axkuali se ika seyok” (Eclesiastés 8:9). Maseualmej tlaijiyouiaj pampa katli mosisiniaj uan katli moiljuiaj san ipan inijuantij kinchiuiliaj tlen amo kuali.

2. Pano tlen amo tijchiaj. Maseualmej nojkia tlaijiyouiaj pampa ipan “tlen ueli tlalochtli, tlen ueli tlamantli axkuali ueli kipantis aki ueli tlakatl kema axkichia” (Eclesiastés 9:11). Uajka, techpano tlen amo kuali pampa tiitstokej kampa amo kinamiki uan kema amo moneki nopaya tiitstosej, o uelis pampa timokuapolouaj o amo kuali tijchiuaj se tlenijki.

3. Katli kinauatia Tlaltipaktli. Biblia xitlauak kiijtoua ajkia kichiua tlauel ma titlaijiyouikaj: “Tlakamej kampa ueli ipan Tlaltipaktli mokauaj ipan ichikaualis Axkualtlakatl” (1 Juan 5:19). “Axkualtlakatl” eli nopa Diablo, se iluikaejketl katli achtoui amo mosisiniyaya, katli teipa ‘kikokolik nochi tlen melauakʼ (Juan 8:44). Sekinok iluikaeuanij kipaleuijkej Satanás pampa kinejkej kichiuasej san tlen inijuantij kinekiyayaj, kiampa mochijkej amo kuali ajakamej (Génesis 6:1-5). Kema tlaijixnamijkej, Satanás uan amo kuali ajakamej pejkej kichiuaj tlen amo kuali ipan Tlaltipaktli, uan ipan ni tonali nima nesi tlake kichiuaj. Satanás tlauel kualantok uan “kinkajkayaua nochi tlakamej tlen itstokej kampa ueli ipan Tlaltipaktli”, yeka Biblia kiijtoua “ipan Tlaltipaktli tlauel temajmati” (Apocalipsis [Revelación] 12:9, 12). Satanás tlauel mosisinia uan kipaktia kinitas tlaijiyouiaj maseualmej. Ya kichiua ma titlaijiyouikaj uan amo toTeotsij.

XIMOILJUI NI: Se akajya kintlaijiyouiltia maseualmej pampa tlauel amo kuali iyolo. ToTeotsij amo kichiuaskia nopa pampa Biblia kiijtoua “yajaya teiknelijkayotl” (1 Juan 4:8). Yeka, amo kinamiki timoiljuisej toTeotsij kichiua tlen amo kuali o tlen amo xitlauak (Job 34:10).

Uelis timotlajtlania ni: “¿Kema kitsontlamiltisej Satanás?”. Kej tikitstokej, toTeotsij kikualankaita tlen amo kuali uan tlauel kiyolkokoua kema titlaijiyouiaj. Yeka, Biblia techiljuia: “Xikiljuikaj toTeko nochi inmokuesol uan xijkauakaj imako, pampa yajaya inmechmokuitlauia” (1 Pedro 5:7). Ipan seyok tlamachtili tikitasej tlake tlamantli kinextia toTeotsij tlauel techiknelia uan kenijkatsa ika nopa chikaualistli tlen kipia uelis kitlamiltis tlaijiyouilistli uan tlen amo kuali. *