ToTeotsij tlauel kuali kichijchijtok totlakayo pampa iselti mokualtilia. Kema se akajya moteki, mouauatsoua o mochajkoua, “nimantsi peua tekiti se keski tlamantli tlen kichiua ma mochikaua kampa mokokok, maske uelis ueyi o amo” (Johns Hopkins Medicine). Totlakayo nimantsi kichiua amo tlauel ma eskisa kampa timokokojkej, kichiua estli chikauak ma pano ipan totlalo, kimotskiltia kampa timokokojkej uan kiyankuilia se keski tlamantli tlen totlakayo.

XIMOILJUI NI: Tlaj toTeotsij kichijki totlakayo iselti ma mochikaua, ¿kinamiki timoiljuisej ya amo uelis kichiuas kuali ma tijyolmatikaj? Katli kiijkuilok se salmo kimajtoya toTeotsij “kinyolchikaua tlen kipiaj yolkuesoli uan kinpajtia kampa mokokojtokej” (Salmo 147:3). Uan tlaj tlauel mitsyolkokojtok se tlamantli tlen mitspanok uejkajkia o tlen namantsi mitspano, ¿kenijkatsa uelis tijmatis toTeotsij kejuak kichikauas moyolo uan kiampa kuali tijyolmatis nama uan teipa?

ToTeotsij techtenkauilia: “Amo ximajmauikaj pampa na niitstok inmouaya. Amo ximokuesokaj pampa na niinmoTeko. Niinmechfuerzajmakas” (Isaías 41:10). Kema tijmatij Jehová techiknelia, kichiua ma tijpiakaj tlaseuilistli ipan toyolo uan nopa techpaleuia ma tikixnamikikaj kuesoli. Apóstol Pablo kiijtok nopa tlaseuilistli tlen toTeotsij techmaka kichiua ma tikilkauakaj tlen amo kuali tijyolmatij. Uan teipa kiijtok nochi ueliyaya kichiua pampa toTeotsij kimakayaya chikaualistli (Filipenses 4:4-7, 9, 13).

Biblia kichiua ma timotemachikaj Jehová nelia kinmakas maseualmej tlen kintenkauilijtok. Ipan Apocalipsis [Revelación] 21:4, 5 (moixkopintok ipan seyok iamayo) techiljuia tlake kichiuas toTeotsij uan kenke uelis timotemachisej ipan ya.

• “ToTeko kinuachilis nochi ininixayo”. Jehová kitlamiltis nochi tlamantli tlen kichiua ma titlaijiyouikaj uan ma timotekipachokaj, maske se keski kuesoli nesi kejuak amo uejueyi.

• “ToTeko tlen moseuia ipan nopa ueyi silla tlen yejyektsi”, katli eli nopa Tlanauatijketl tlen kichijchijtok nochi tlen onka, kitekiuis nopa chikaualistli uan tlanauatili tlen kipia, kiampa ayokmo titlaijiyouisej uan nochipa techpaleuis kema monekis.

• Jehová techiljuia tlen kitenkajtok eli “temachtli uan melauak”. San Jehová eli toTeotsij katli melauak, uan yeka temachtli ueli kiijtoua nelia kichiuas nochi tlen kitenkajtok.

“ToTeko kinuachilis nochi ininixayo. Uan ayok kema aki mikis, niyon mokuesos, niyon chokas, niyon mokokos pampa ya panotos nochi ni tlamantli tlen achtouia eltoya ipan nopa achtoui Tlaltipaktli. Uan toTeko tlen moseuia ipan nopa ueyi silla tlen yejyektsi kiijtok: ‘Xikita, na nijchijchiuas yankuik nochi tlen onka’. Uan yajaya nechiljuik: ‘Xikijkuilo ni pampa ni tlajtoli temachtli uan melauak’” (Apocalipsis 21:4, 5).

Tlen kichijchijtok uan Biblia techpaleuia ma tikixmatikaj toTeotsij. Nochi tlen onka techyololinia ma tijnekikaj timouampojchiuasej iuaya toTeotsij, uan Biblia xitlauak techiljuia: “Ximonechkauikaj kampa toTeko uan yajaya inmechnechkauis” (Santiago 4:8). Uan Hechos 17:27 nojkia kiijtoua: “Yajaya itstok nechka sejse tojuantij”.

Tlaj nojua tlauel kuali tikixmatis toTeotsij, mitspaleuis ximotemachi ya nelia kitekipachoua tlen mitspano (1 Pedro 5:7). ¿Kenijkatsa techpaleuia kema timotemachiaj ipan Jehová?

Ximoiljui ipan Toru, se tlakatl katli eua Japón. Maske inana kimachtiyaya tlen ireligión, teipa mokalakik ininuaya katli kinixmatiyayaj kej yakuza, katli tlauel kichiuayayaj tlen amo kuali. Toru kiijtoua: “Nimoiljuiyaya toTeotsij tlauel nechkualankaitayaya uan nechtlatsakuiltiyaya kema nikitayaya kenijkatsa sekinok kinmiktiyayaj, uan nojua tlauel kiampa nimoiljuiyaya kema mikiyaya se akajya katli nikikneliyaya”. Toru kiijtoua nopa kichijki tlauel  ma mosisini uan ma tetlaijiyouilti. Ya kiijtoua tlake kinekiyaya: “Nijnekiyaya nimikis kema nojua nitelpokatl uan nochi tlauel ma nechilnamikikaj pampa nijmiktik se akajya katli tlauel kiixmatiyayaj”.

Kema Toru uan isiua Hannah pejkej momachtiaj Biblia, ya kipatlak miak tlamantli ipan inemilis uan nojkia kej nesiyaya. Hannah kiijtoua: “San nimosentlachilia kema nikita kenijkatsa noueue mopatlatok”. Uan Toru kiijtoua: “Nijmati nelia itstok toTeotsij uan kitekipacho tlen kinpano sejse tlen tojuantij. Ya amo kineki yon se ma miki, uan kineki kintlapojpoljuis katli moyolkuepaj ika nochi ininyolo. Uelis tikiljuisej se tlenijki tlen amo aka tikiljuiskiaj uan tlen amo aka kikuamachiliskia. Jehová nechka kitlamiltis nochi kuesoli, tlaouijkayotl uan tlaijiyouilistli. Ipan ni tonali techpaleuia ika tlamantli tlen amo timoiljuiaj. Tlauel kitekipachoua tlen techpano uan techmokuitlauia kema timokuesouaj” (Salmo 136:23).

Kej kipanok Toru, kema tijmatij toTeotsij uelis kitlamiltis nochi tlamantli tlen techchoktia uan nechka kichiuas nopa, techpaleuia kuali ma tijyolmatikaj uan kuali ma tiitstokaj. Kena, maske tiitstok kampa tlauel tetlaijiyouiltiaj, tlauel mitspaleuis tijmatis toTeotsij tlauel mitsiknelia.