Biblia kinpaleuik kuali ma monejnemiltikaj

¿TLAKE kichijki se rastafari ma kitlauelkaua tlen momajtoya kichiua uan ayokmo ma kinchikoita katli chipaktikej? ¿Kenke se telpokatl katli tlauel mosisiniyaya uan tekitiyaya ininuaya katli kinamakaj drogas ayokmo kiampa kichijki? Ma tikitakaj tlen kiijtouaj.

“Ayokmo nitechikoitak” (HAFENI NGHAMA)

KIPIA: 34 XIUITL

EUA: ZAMBIA

SEKINOK TLAMANTLI: ELIYAYA RASTAFARI

TLEN NECHPANOK: Nonana mochololtik tlen Namibia uan tlapaleuik ipan nopa Organización del Pueblo de África del Suroeste (ika inglés kiiljuiaj SWAPO) pampa onkayaya tlauilankayotl. Inijuantij kinijixnamikiyayaj tlanauatianij tlen Sudáfrica, katli ipan nopa tonali tlanauatiyayaj ipan Namibia. Nonana asito kampa momanauiaj maseualmej ipan Zambia uan nopaya nitlakatki.

15 xiuitl niitstoya ipan miak kali kampa momanauiaj maseualmej tlen iaxka SWAPO. Inijuantij kinmachtiyayaj telpokamej ma kinijixnamikikaj tlanauatianij ipan Namibia, ma tlateuikaj, ma mokalakikaj ipan política uan ma kinkualankaitaj maseualmej katli chipaktikej.

Kema nijpixtoya 11 xiuitl, nijnekiyaya nijchiuas noconfirmación pampa nijnekiyaya nijnextis nijneltoka Cristo, yeka nikitato se tlayakanketl tlen se iglesia katli itstoya kampa timomanauiyayaj. Ipan nopa iglesia monechikouayayaj católicos, luteranos, anglicanos uan sekinok religiones. Maske ya nopa nijnekiyaya, ya amo kinejki kiampa ma nijchiua. Tlauel nimoyolkokok, yeka ayokmo nitlaneltokak ipan toTeotsij. Maske kiampa nechpanok, kema nijpixtoya 15 xiuitl, pejki nijneltoka uan nijchiua tlen kichiuaj rastafaris. Kiampa nijchijki pampa nechpaktiyaya nopa uikatl reggae, uan nojkia pampa ayokmo nijnekiyaya tlauel ma kintekitiltikaj katli euayayaj África. Nijmalinki notsonkal kej momajtokej kichiuaj rastafaris, pejki nijchichina marihuana, ayokmo nijkuajki nakatl uan nimosentlalik nikinmanauis katli yayauikej. Maske kiampa nijchijki, nojua niauilnemiyaya uan nijtlachiliyaya películas kampa nesiyaya momiktiaj. Uan nojua nijtekiuiyaya tlajtoli sokiyo.

BIBLIA NECHPALEUIK KUALI MA NIMONEJNEMILTI: Ipan 1995, kema nijpixtoya 20 xiuitl, nimoiljuik tlake nijnekiyaya nijchiuas ika nonemilis. Kipiayaya se keski tonali nijpouayaya nochi amatlajkuiloli tlen nijpantiyaya uan tlen rastafaris kichijchijtoyaj, uan maske se keski amatlajkuiloli kiualikayaya textos tlen Biblia, nikitak amo kuali kej moixtomayaya. Yeka noselti nimosentlalik nimomachtis Biblia.

Teipa, se nouampo katli nojkia eliyaya rastafari nechmakak se amatlajkuiloli tlen kichijchijtoyaj Jehová itlajtoltemakauaj. Nima pejki nimomachtia nopa amatlajkuiloli uan nijtemojtiauiyaya textos ipan Biblia. Teipa nikinixmatki Jehová itlajtoltemakauaj uan nojua nimomachtik Biblia ininuaya.

Tlauel ouij nijmatki ayokmo nitlachichinas uan nimoiuintis (2 Corintios 7:1). Nojkia nijpatlak kej nimoyoyontiyaya, nimoxinki, ayokmo nikitak películas kampa momiktiaj, kampa nesi pornografía uan ayokmo nijtekiuik tlajtoli sokiyo (Efesios 5:3, 4). Kema panok tonali ayokmo nitechikoitak, ayokmo kiampa nijchijki ika maseualmej katli chipaktikej (Hechos 10:34, 35). Tlauel nechpaleuik nijpatlas kej nimonejnemiltiyaya kema ayokmo nijkajki uikatl tlen kichiuayaya ma nitechikoita uan kema ayokmo nimouikak ininuaya maseualmej katli ueliskiaj kichiuasej sampa ma nijchiua tlen amo kuali.

Kema ayokmo nijchijki tlamantli tlen amo kuali, nijtemok kampa mosentiliaj Jehová itlajtoltemakauaj. Uajka, pejki nimomachtia Biblia uan nimoatsonpoliuiltik. Nochampoyouaj amo kinpaktik tlen nijchijki. Nonana nechiljuik ma nimokalaki ipan seyok religión uan amo ininuaya Jehová itlajtoltemakauaj. Se nonana iteixmatka eliyaya tekichijketl uan nochipa nechpinajtiyaya pampa nimochijki se tlen Jehová itlajtoltemakauaj.

Maske nochampoyouaj nechtetsopayayaj uan nechpinajtiyayaj, uelki nikijiyouia pampa nijchijki tlen Jesús tlamachtik. Nojkia, kema nikitak tlen Jehová itlajtoltemakauaj tlamachtiaj eli sanse ika tlen Biblia kiijtoua, nijkuamachilik nijpantijtoya religión tlen nelia melauak. Inijuantij nochipa kichiuaj tlen toTeotsij kiijtoua ipan iTlajtol, yeka tlajtolmoyauaj (Mateo 28:19, 20; Hechos 15:14). Uan nojkia nikitak amo mokalakiaj ipan política (Salmo 146:3, 4; Juan 15:17, 18).

¿KENIJKATSA NECHPALEUIJTOK? Nijchiuas tlen Biblia kiijtoua tlauel nechpaleuijtok. Nama ayokmo nijchichina marihuana, tlen kichiuayaya ma nijnempolo miak tomij sejse metstli. Nojkia, ayokmo nikita tlamantli tlen amo nelia eltok, ayokmo nimokokoua ipan notlakayo yon ipan notsonteko.

Kema nieliyaya niokichpil, nijnekiyaya niyolpakis, uan nama kena kiampa niitstok. Uan nojua tlauel niyolpaki pampa nama nijmati niitstok inechka toTeotsij (Santiago 4:8).

“Nama ayokmo nima nikualani” (MARTINO PEDRETTI)

KIPIA: 43 XIUITL

EUA: AUSTRALIA

SEKINOK TLAMANTLI: KINAMAKAYAYA DROGAS

TLEN NECHPANOK: Kema nieliyaya niokichpil, nochampoyouaj miakpa mochantitoj sejkanok, timochantijkej ipan pilaltepetsitsij, ipan se ueyi altepetl, uan se keski xiuitl tiitstoyaj ipan se ueyi kali katli eliyaya iaxka se religión. Tlauel niyolpaki kema nikilnamiki nopa tonali kema niitstoya ininuaya nomachikniuaj uan notíos. Timichtlajtlamayayaj, titlapeuayayaj, tijchijchiuayayaj bumeranes ika kuauitl uan sekinok tlamantli.

Notata eliyaya boxeador uan kema nojua nieliyaya niokichpil nechmachtik nitlateuis, yeka tlauel nimosisiniyaya. Kema nimotelpokachijki pejki nia bares uan tlauel nimoiuintiyaya. Na uan nouampoyouaj techpaktiyaya titlateuisej. Tijuikayayaj cuchillos uan bates de béisbol, kiampa ueliyayaj tikinteuiaj miakej, kemantika kipano 20 maseualmej.

Nijnamakayaya drogas uan tlen nikinichtekiliyaya katli tekitiyayaj kampa asiyayaj barcos. Na nojkia nikintekipanouayaya katli kinamakayayaj drogas, uan kema nikininamayaya katli kintlauikiliyayaj, nijuikayaya pistola o seyok tlamantli, uan kiampa nikinchiualtiyaya ma kiixtlauakaj tlen tlauikayayaj. Na nochipa nikijtouayaya: “Nitemiktis, o ma nechmiktikaj”. Kena, na nijnekiyaya nielis se temiktijketl.

BIBLIA NECHPALEUIK KUALI MA NIMONEJNEMILTI: Kema nieliyaya nipilsiltsi nijkaktoya tlen Jehová itlajtoltemakauaj. Yeka, kema nijpiayaya se 20 xiuitl, nijtlajtlanik nonana tlaj kinixmatiyaya. San panotoya ome tonali kema se Jehová itlajtoltemajka katli itoka Dixon asiko nochaj. Timokamanaljuijkej se kentsi, uan teipa nechtlanejki ma nia ipan tlanechikoli. Kena niajki, uan nama kipano 20 xiuitl nojua nimonechikoua. Tlauel nechpaktiyaya pampa kema nitlatsintokayaya se tlamantli nechnankiliyayaj ika Biblia.

Nechmachtijkej toTeotsij Jehová tlauel kinpatiita nochi maseualmej, maske sekij amo kitlepanitaj (2 Pedro 3:9). Nojkia nijyekok ya eli se Tetaj katli tlauel teiknelia uan nochipa nechmokuitlauiskia maske sekij amo kiampa kichiuaskiaj. ¡Tlauel nechyolchikajki nijmatis tlaj nimoyolkuepaskia ya nechtlapojpoljuiskia nochi notlajtlakoljuaj! Efesios 4:22-24 tlauel nechpaktik, nopaya kiijtoua ma tijtlauelkauakaj tonemilis “tlen achtoui” uan ma tijnextikaj tonemilis “tlen yankuik” kej kipaktia toTeotsij.

Nijmatki ouij nijkauas tlen achtouia nijchiuayaya. Maske se keski tonali amo nijtekiuiyaya drogas, ipan sábados uan domingos nimosentiliyaya ininuaya nouampoyouaj uan sampa nijchiuayaya tlen amo kuali. Nikitak amo ueliskia nijpatlas nonemilis tlaj nojua nimouampojchiuaskia ininuaya. Yeka, nimoiljuik ayokmo nimouikaskia ininuaya uan niaskia nimochantiti ipan seyok altepetl. Se keskij yajkej nouaya, uan kema tiauiyayaj ipan ojtli kinekiyayaj sampa ma nijchichina marihuana. Nikiniljuik ayokmo kiampa nijchiuaskia, yeka nimoiyokatlalik uan noselti niasito ipan nopa altepetl kampa nimochantiskia. Teipa nijmatki inijuantij tlachtektoyaj ipan se banco ika se escopeta.

¿KENIJKATSA NECHPALEUIJTOK? Kema ayokmo nimouikak ininuaya nouampoyouaj, ayokmo ouij nijmatki nijpatlas nonemilis. Uan ipan xiuitl 1989, nimoatsonpoliuiltik. Teipa, nosiuaikni uan notatauaj nojkia moatsonpoliuiltijkej.

Nijpia 17 xiuitl nimoamasenkajki uan nikinpia eyij nokoneuaj. Nojkia uelis nikijtos maske sekinok nechtlaijiljuiaj nama ayokmo nima nikualani. Nikiniknelia nochi maseualmej maske euaj ipan sekinok altepemej o kamanaltij seyok tlajtoli (Apocalipsis 7:9). Nochipa nikilnamiki tlen Jesús kiijtok pampa ya nopa nechpanotok: “Tlaj mojmostla inkichijtiasej tlen niinmechiljuia, uajka nelia initstosej innomomachtijkauaj. Uan inkimatisej tlen melauak, uan nopa tlen melauak inmechtojtomas” (Juan 8:31, 32).

[Tlajtoli katli pankisa]

Tlauel nechpaleuik nijpatlas kej nimonejnemiltiyaya kema ayokmo nijkajki uikatl tlen kichiuayaya ma nitechikoita

[Tlajtoli katli pankisa]

Na uan nouampoyouaj techpaktiyaya titlateuisej. Tijuikayayaj cuchillos uan bates de béisbol, kiampa ueliyayaj tikinteuiaj miakej, kemantika kipano 20 maseualmej