Nitlakatki ne Székesfehérvár, Hungría kampa pejkej itstoyaj kipano mil xiuitl. Nojua nikilnamiki tlen panok kema mochijki nopa ompa ueyi tlauilankayotl.

Noueyitatauaj nechiskaltijkej. Nikinilnamiki ika miak tlaiknelili. Noueyinana Elisabeth nechnextilik ma nitlaneltoka ipan toTeotsij. Kema nijpixtoya eyi xiuitl nechmachtik mojmostla ma nikijto iuaya se tlamaijtoli, ni nijkuamachilik kema nijpixtoya 30 xiuitl.

Nechmokuitlauijkej noueyitatauaj, pampa notatauaj tlauel tekitiyayaj pampa kinekiyayaj kikouasej se kali. San nochi sábados timonechikouayayaj kema titlakuayayaj sansejko. Nopa tlauel nechpaktia nikilnamikis.

Ipan 1958, notatauaj kikojkej se kali. Tlauel niyolpajki pampa niitstoskia ininuaya. Ni amo uejkajki, pampa chikuasej mestli teipa notata mijki ika cáncer.

Tlauel nechyolkokok, yeka nikiljuiyaya toTeotsij: “Nimitsiljuik xijmanaui notata. ¡Nijneki ma itsto nouaya! ¿Kenke amo tinechpaleuik?”. Nijnekiyaya nijmatis kanke itstoya notata. Yeka nimotlajtlaniyaya: “¿Yajki iluikak, o ayokmo itstok?”. Uan nikinkualankaitayaya katli kipixtoyaj inintatauaj.

Miak xiuitl niajki kampa kitlalpachojkej, nimotlankuaketsayaya uan nikijtouayaya: “ToTeotsij, xinechiljui kanke itstok notata”. Uan nojkia nijtlajtlaniyaya kenke techchijki.

 Kema nijpixtoya 13 xiuitl nimomachtik alemán pampa nimoiljuiyaya kiampa nijmatiskia tlen nijnekiyaya ipan amatlajkuiloli ika alemán. Ipan 1967 nimomachtito ne Jena, tlen mokauayaya ne Alemania oriental tlen ya polijki. Nijpojki nochi amochtli kampa kiijtoua kenke tiitstokej. Maske nechpaktik se keski tlamantli, amo nijmatki tlen nijnekiyaya, yeka nojua nikiljuiyaya toTeotsij ma nechnankili.

Ipan 1970 sampa niajki Hungría. Nopaya nikixmatki Rose, katli eliskia nosiua. Ne Hungría nochi eliyaya tlanauatianij ininaxka. Kema Rose uan na timosenkajkej tiajkej Austria. Tijnekiyayaj tiasej Sydney, Autralia kampa itstoya se notío.

Ne Austria nima nikasik tekitl. Se tonali, katli tekitiyaya nouaya nechiljuik Biblia uelis nechnankilis nochi uan nechmakak ome amochtli tlen kiixtoma Biblia. Nimantsi nijtlamipojki, uan pampa nojua nijnekiyaya nijmatis, nikintlajtlanik Jehová itlajtoltemakauaj sekinok amatlajkuiloli.

Kema nikaxitik se xiuitl iuaya Rose, techpaxalok se uan nechuikilik tlen nitlajtlantoya uan nechiljuik tlaj nijnekiskia nimomachtis Biblia. Pampa nijnekiyaya nijmatis miak tlamantli, sejse semana nechmachtiyayaj ompa, ¡uan tiuejkauayayaj naui horas!

Tlauel nechpaktiyaya tlen nechmachtiyayaj. Kema nechnextilijkej toTeotsij itoka Jehová ipan Biblia ika húngaro, amo nijneltokayaya. Niajtoya teopa 27 xiuitl uan amo kema nijkaktoya itoka. Nechpaktik pampa Biblia tlanankilia xitlauak uan kej kinamiki. Nijmatki mijkatsitsij amo tleno kimatij uan kejuak kuali kochtokej (Ecl. 9:5, 10; Juan 11:11-15). Nojkia nijmatki onkas se yankuik Tlaltipaktli kampa “ayok kema aki mikis” (Apoc. [Rev.] 21:3, 4). Nimotemachia nechka nikitas notata, pampa ‘toTeko kinyolitis tlen miktokej’ (Hech. 24:15).

Rose tlauel nechpaleuik. Ipan ome mestli tlankej techmachtiaj ika Biblia. Nochipa timonechikouayayaj uan tlauel techpaktiyaya pampa teikneliyayaj, kuali teseliyayaj uan mosentikapaleuiyayaj (Juan 13:34, 35).

Ipan 1976 techkajkej ma timochantikaj Australia. Kema tiasitoj, nimantsi tikintemojkej toikniuaj uan inijuantij kuali techselijkej. Ipan 1978 nojkia timochijkej Jehová itlajtoltemakauaj.

Nijmatki tlen nijnekiyaya nijmatis uan nikasik se tlauel kuali notata: Jehová (Sant. 4:8). Uan nama nimotemachia sampa nikitas notata ipan Xochimili (Juan 5:28, 29).

Ipan 1989 timokuepkej Hungría pampa tijnekiyayaj tikinmachtisej tochampoyouaj, touampoyouaj uan sekinok. Tikinmachtijtokej miakej, uan kipano 70 mochijtokej toikniuaj uan nojkia nonana.

Nikiljuijtoya toTeotsij 17 xiuitl ma nechnankili miak tlamantli. Nama ya kipia 39 xiuitl kema nijmatki. Yeka kema nimomaijtoua, nikiljuia: “ToTeotsij, tlauel nimitsiknelia, tlaskamati pampa tinechtlakakilik”.