Maske tlen ueli tekitl tijchiua, amo kema xikilkaua “tlen tekitij kuali kiselisej inintlaxtlauil” (Prov. 14:23). Tlaj titekitisej tijpiasej ika tlen timopanoltisej. Uan Biblia kiijtoua tlaj tijtekipanosej toTeotsij, ya temachtli techmakas tlen moneki (Mat. 6:31, 32). Uan tojuantij kinamiki tlauel titekitisej (2 Tes. 3:10).

Kema titekitij, techpaleuia tijchiuasej tlen kinamiki tijchiuasej. Josué, katli kipia 25 xiuitl, kiijtoua: “Tlaj ta timokouis tlen mitspoloua tlauel tiyolpakis, uan tlaj tiuelis tikixtlauas tlen tijtekiuia, kiijtosneki kena mitspaleuia moteki”.

Tlaj tlauel titekitisej kichiuas ma tijyolmatikaj tlauel topati. Maske ouij tlauel titekitisej uan uelis amo techpaktia toteki, tlaj titekitisej kej kinamiki uan tijchiuasej se ueyi kampeka tlauel titekitisej, tiyolpakisej (Prov. 26:14). Ni kichiuas tlauel kuali ma tijyolmatikaj. Aaron, katli tikitakej ipan achtoui tlamachtili, kiijtoua: “Maske kema tlami se tonali tlauel nikuatitok, o tlaj amo aka kiita tlaj kuali nitekitik, nijmati niuelki nijchijki noteki uan nopa tlauel nechpaktia”.

Biblia kipatiita kema tlakatl kichiua kuali iteki uan kema siuatl kichiua iteki ika ima (Prov. 22:29; 31:13). Sekij amo kinpaktia uan amo kuali kichiuaj ininteki, pampa amo nimantsi tiuelij tijchiuaj kuali se tekitl uan nochipa tijnekij tijchiuasej kuali se tlamantli.

Tlaj tikitasej toteki kej kinamiki o kuali tijchiuasej, tiyolpakisej ika tlen ueli tekitl. William, katli kipia 23 xiuitl, kiijtoua: “Tlaj tijchiuas se ueyi kampeka uan kuali kisas moteki, tlauel tiyolpakis. Uan tlaj amo titekitis kej kinamiki, amo kema tiyolpakis”.

Amo san ximoiljui keski tomij mitstlaxtlauiaj. Yeka ximotlajtlani: “¿Kenke tlauel ipati noteki? ¿Tlake panoskia tlaj amo aka o amo kuali kichiuaskiaj? ¿Kenijkatsa kinpaleuia sekinok?”

Tlauel moneki ma timoiljuikaj ajkia kinpaleuia toteki, pampa kiampa tiyolpakisej ika toteki. Yeka Jesucristo kiijtok: “Más pakilistli kiselia tlen temaka se tlenijki, uan axkeja tlen kiselia” (Hech. 20:35). Toteki kipaleuia katli tijtekipanouaj, tochampoyouaj o katli amo kipiaj tlen ika mopanoltisej.

Tochampoyouaj. ¿Kenijkatsa se tlakatl o isiua kinpaleuiaj ininchampoyouaj kema kinmakaj tlen moneki? Se. Kiitaj amo tleno ma kinpolo: tlen kikuasej, ininyoyo uan kampa itstosej. Kiampa kineltokaj kema kinnauatiaj ma kinmakakaj “i[nin]champoyouaj” tlen moneki (1 Tim. 5:8). Ome. Kinnextiliaj tlauel moneki kuali tekitisej. Shane kiijtoua: “Notata tekiti kej kinamiki. Amo tlachteki uan nochipa tlauel tekiti, ya miak xiuitl tekititok kej kuaxinketl. Nechmachtijtok kenke tlauel ipati nitekitis ika noma, uan nijchijchiuas tlen kinpaleuis sekinok”.

Katli amo kipiaj tlen ika mopanoltisej. Apóstol Pablo kiniljuik Cristo itokilijkauaj: “Moneki xitekitikaj”. ¿Kenke? Ya kiniljuik: “Para nojkia uelis inkinpaleuisej sekinok tlen kinpoloua tlen ika panosej” (Efes. 4:28). Tlaj titekitisej tikinmakasej tlen kinpoloua tochampoyouaj, uan uelis nojkia tikinpaleuisej katli amo tleno kipiaj (Prov. 3:27). Uan, tlaj tikinpaleuisej sekinok, tlauel tiyolpakisej.

Jesús kiniljuik itokilijkauaj: “Intla se soldado mitsnauatis xijuika itlamamal para se kilómetro, xijuikili ome kilómetros ipan iojui” (Mat. 5:41). Ni uelis tijchiuas tlaj amo titekitis san se kentsi, uan nojkia tijchiuas tlen  amo mitsiljuisej. Yeka kuali xijchiua moteki, ximoisiuilti uan kuali xijchiua tlen amo nesi.

Kiampa tlauel mitspaktis moteki, pampa tijchiuas pampa mitspaktia uan amo san pampa mitsnauatiaj. Yeka nojkia tijchiua tlen amo mitsnauatiaj (Filem. 14). Proverbios 12:24 kiijtoua: “Xitekiti chikauak uan tielis se tlayakanketl, pero intla timochiuas titlatsiui tielis itlatekipanojka seyok tlakatl”. Maske amo kema san tlapik titlatekipanosej yon techchiualtisej tlauel ma titekitikaj, tlaj san se kentsi titekitisej, tijyolmatisej nochipa san technauatijtokej tlen tijchiuasej. Tlaj nojkia tijchiuas tlen amo mitsnauatiaj, kuali tijyolmatis.

Maske kuali se tlauel tekitis, amo san ya nopa tlauel ipati. Biblia kiijtoua nochipa ma titekitikaj (Prov. 13:4). Ni amo kiijtosneki timosentlalijtosej san titekitisej. Ipan Traducción del Nuevo Mundo Eclesiastés 4:6 kiijtoua: “Tlauel kuali tlaj timosiajketsas se kentsi uan amo tlaj tlauel titekitis pampa san tlapik”. Ni kinextia se tlen tlauel tekiti uelis amo kema kiitstok tlake kipixtok pampa nochi tonali uan tetikayotl tlen kipia nochipa kitekiuia ipan iteki. Yeka Eclesiastés kiijtoua nopa eliskia san tlapik.

Biblia mitspaleuis tikitas nopa tekitl kej kinamiki. Maske kiijtoua ma titekitikaj, nojkia techilnamikilia ma ‘tijtlapejpenikaj tlen nelia kuali’ (Filip. 1:10). Kiampa uelis tiitstosej ininuaya tochampoyouaj uan touampoyouaj uan tikitasej tlauel moneki tijpouasej Biblia uan timoyoliljuisej kenijkatsa techpaleuia.

Tlauel kinpaktia ininteki katli kiitaj kej kinamiki. William, katli tikitakej ipan achtoui tlamachtili, kiijtoua: “Katli nijtekipanouayaya kuali kinextiyaya kej kinamiki se tikitasej toteki. Tlauel tekiti uan maseualmej tlauel kinpaktia kej kichiua iteki. Kema tlami se tonali, kiilkaua iteki uan mosentlalia san ipan ininchampoyouaj uan ipan ireligión. ¿Uan tijmati se tlamantli? Tlen nochi katli nikinixmati, yaya tlauel yolpaki”.