Nimoskaltik ipan altepetl Alicante, España, tlen mokaua nechka ueyi atl Mediterráneo. Nochaj tijpixtoyaj miak kuesoli, yeka amo kema niitstoya. Nechka kampa niitstoya kichijchiuayayaj llantas uan José María katli tekitiyaya nopaya, mochijki nouampo. Tlauel kuali nechnojnotsayaya uan nochipa nechpaleuiyaya, amo kej nochampoyouaj. Maske nechpanoyaya ika veinte xiuitl, kema tlauel nimokuesouayaya ya eliyaya kej se noikni uan se nelnelia nouampo.

José María kimachtiyayaj Jehová itlajtoltemakauaj ika Biblia. Uan nesiyaya tlauel kipaktiyaya pampa miakpa nechiljuiyaya tlen kimachtiyayaj. Maske nijtlakakiliyaya ika tlatlepanitakayotl, amo nijnekiyaya nijmatis tlen nechiljuiyaya. Nieliyaya nitelpokatl uan nechpaktiyaya sekinok tlamantli. Teipa, nonemilis nimantsi mopatlak.

Amo nechpaktia nikijtos kema nechpanok tlen amo kuali pampa nimouiuichijki uan nijchijki tlen amo kinamikiyaya. San ipan se tonali mopatlak nonemilis. Ayokmo nijpixki chikaualistli uan san niuilantoya ipan se tlapechtli kampa tepajtiaj. Amo nijneltokayaya tlen nechpanok. Yeka nimoiljuiyaya ayokmo kinamikiyaya nojua niitstos.

José María yajki nechitato, uan nimantsi kiniljuik ma nechpaxalokaj Jehová itlajtoltemakauaj katli monechikouayayaj nechka. Pampa nochipa nechpaxalouayayaj asik ipan noyolo tlen nechiljuiyayaj. Kema nikiski kampa tepajtiaj pejkej nechmachtiaj ika Biblia. Nijyekok kenke maseualmej tlaijiyouiaj uan mikij, uan kenke toTeotsij kikaua ma pano tlen amo kuali. Nojkia nijpojki tlen toTeotsij kiijtojtok kichiuas teipa, kej kema ipan Tlaltipaktli itstosej san katli amo tlajtlakolejkej uan “ayok kiijtosej para mokokouaj” (Is. 33:24). Uajka pejki nijchixki ika miak pakilistli tlen panoskia teipa.

Kema nikiski kampa tepajtiaj nojua tlauel nimomachtik ika Biblia. Nojkia niajki kampa mosentiliaj Jehová itlajtoltemakauaj uan nitlajtolmoyajki ipan se silla de ruedas. Ipan noviembre 5, xiuitl 1988, kema nijpixtoya 20 xiuitl, nimoatsonpoliuiltik kampa toikniuaj kikualchijchijkej. Jehová nechpaleuijtoya kuali ma nikita nonemilis. ¿Kenijkatsa nijnextiliskia nijtlaskamatilia?

Nimosentlalijtoya nochipa nijtekipanos Jehová uan nijnekiyaya nijtekipanos miak (1 Tim. 4:15). Maske achtoui nijouijmatki pampa nochampoyouaj amo kinpaktik kema pejki nimomachtia Biblia, Jehová itlajtoltemakauaj nechpaleuijkej. Kichijkej se ueyi kampeka nochipa nechuikasej ipan tlanechikoli uan kampa titlajtolmoyauayayaj.

Teipa monejki ma nechpaleuikaj tonaya uan tlayoua. Kema ya uejkajtoya nijtemouayaya kanke nechmokuitlauiskiaj, nikasik se kali kampa itstokej katli mokokouaj ipan altepetl Valencia, tlen iuejkaka se 160 kilómetros uan mokaua ika norte tlen Alicante. Nama nojua nopaya niitstok.

Maske amo ueli nimeua, nimosentlalijtok nochipa nijtekipanos Jehová. Ika nopa tomij tlen nechmakaj tlanauatianij uan tlen sekinok nechmakaj, nijkojki se computadora tlen kitlalijkej notlapech inakastla uan nojkia nijkojki se teléfono. Mojmostla ika ijnalok se katli nechpaleuia kitlatia nocomputadora uan noteléfono. Kema nijneki nijchiuas se tlenijki ika nocomputadora san nikojolinia nokamak, uan ika se pilkuatsi tlen nijtlalia ipan nokamak nikijkuiloua nopa letras uan nopa números.

¿Kenijkatsa nechpaleuijtok nopa tepostli? Niueli nijtlachilia ipan Internet nopa jw.org uan AMATLAJKUILOLI IPAN INTERNET. Ni tlamantli tlauel nechpaleuijtok. Miakpa nijtlachilia Internet uan kiampa nimomachtia nopa amatlajkuiloli, kiampa nojua nijyekoua tlamachtili tlen toTeotsij uan nopa kuajkuali tlamantli tlen kinextia. Kema nijyolmati niitstok noselti o nimoyolkokoua, nochipa nikasi se tlamachtili ipan Internet tlen nechyolchikaua.

Ika nocomputadora nojkia ueli nikita tlen moixtoma ipan tlanechikoli kampa timosentiliaj. Nopa nechpaleuia nijtlakakilia tlen kiijtouaj nopaya, nitlanankilia, nimomaijtoua, nitlamachtia uan nojkia nitlapoua kema moixtoma nopa pilamochtsi Tlen Tematiltia. Nochi ni ueli nijchiua kampa niuilantok. Maske ayokmo ueli nia kampa timosentiliaj, nijyolmati nojkia niitstok ipan nopa tlanechikoli.

Noteléfono uan nocomputadora nechpaleuia nochipa nitlajtolmoyauas. Maske amo niueli nia kajkalpa kej kichiuaj miakej toikniuaj, kena nitlajtolmoyaua. Ika ni tepostli ueli nikinpouilia sekinok tlen nijneltoka. Pampa tlauel nechpaktia nitlajtolmoyauas ika teléfono, ueuejtlakamej o katli tlayakanaj ipan tlanechikoli nechiljuijtokej ma nikiniljui toikniuaj kenijkatsa tlajtolmoyauasej ika teléfono. Kema tijchiuaj nopa, nojkia tlajtolmoyauaj sekinok toikniuaj katli amo uelij nejnemij.

 Na amo nochipa san nijtekiuijtok nopa tepostli, pampa mojmostla nechpaxalouaj nouampoyouaj. Ualauij ininuaya ininchampoyouaj uan katli kinixmatij pampa kinekij kiyekosej tlen tlamachtia Biblia. Nochipa nechiljuiaj ma nikinyakana kema momachtiaj ika Biblia. Kemantika, toikniuaj ualauij nechitaj ininuaya ininchampoyouaj pampa kinekij ma nimomachti ininuaya. Tlauel nechpaktia kema konemej moseuiaj ipan notlapech uan nechiljuiaj kenke kiikneliaj Jehová.

Tlauel nijpatiita pampa nochipa nechpaxalouaj uan amo kema niitstok noselti. Ualauij nouampoyouaj tlen kampa ueli euaj. Ni tlauel kinpaktia katli tekitij ipan ni kali. Mojmostla nijtlaskamatilia Jehová pampa nikinpia noikniuaj tlen nechikneliaj.

Kema se akajya nechtlajtlania kenijkatsa niitstok, nijnankilia: “San kej ipa, nijchiua se kampeka”. Amo san na nijpia kuesoli. Uan maske amo tijpiaj sanse tlaouijkayotl, nochi kejuak “tiitstokej ipan se tlateuijkayotl para ma mokaua senkistok melauak totlaneltokilis” (1 Tim. 6:12). ¿Tlake nechpaleuijtok nikijiyouis? Mojmostla nimomaijtoua uan nijtlaskamatilia Jehová pampa nijpia ipan tlen nimotemachis. Nijchiua kampeka nimosentlalijtos nijtekipanos toTeotsij uan nimotemachijtos ipan tlen teipa kiijtoua kichiuas.

Nochipa nimoyoliljuia kenijkatsa elis nopa Xochimili tlen mochiuas ipan Tlaltipaktli uan kenijkatsa tlauel niyolpakis kema sampa nimotlalos uan niuitonis. Kemantika san nimauiltia iuaya nouampo José María katli tlaijiyouia pampa kipixtoya nopa kokolistli poliomielitis. Nijtlajtlania ajkia tlatlaniskia tlaj chikauak timotlaloskiaj. Uan ya nechnankilia: “Amo moneki tijmatisej ajkia tlatlaniskia. San moneki tijmajtosej kena uelis timotlalosej ipan Xochimili”.

Tlauel nijouijmati ni kokolistli tlen nijpia. Nijmati kema nitelpokatl nieliyaya nijchijki tlen amo kinamikiyaya, yeka nechpanok tlen tlauel amo kuali. Nijtlaskamatilia Jehová pampa amo kema nechtlauelkajki. Ya nechmakatok tlauel miak tlamantli... nikinpia miakej toikniuaj, nijneki nojua niitstos, niyolpaki kema nikinpaleuia sekinok uan nimotemachia ipan tlen teipa kichiuas. Tlaj monekiskia nikijtos san ika se keski tlajtoli nochi tlen nijyolmati, nikijtoskia Jehová nechmakatok tlauel miak tlamantli maske amo kinamiki nechmakas.