1, 2. ¿Kenijkatsa techmachtik Jehová ma titeiknelikaj?

SE TETATA kinmachtia ikoneuaj ika tlen kichiua. Kema kinextia kiniknelia, kinmachtia nojkia ma teiknelikaj. Jehová kej nopa kichiua. San ya tlauel techiknelia. Biblia kiijtoua “yajaya achtoui techiknelik” (1 Juan 4:19). Kema Jehová kinextia techiknelia, techmachtia ma titeiknelikaj.

² ¿Kenke Biblia kiijtoua Jehová “achtoui techiknelik”? Pampa kititlanki iKone ma mikiki uan kiampa techmakixtik kema “noja tieliyayaj titlajtlakolchiuanij” (Rom. 5:8). Jehová kichijki nopa pampa kinekiyaya techmakixtis tlen tlajtlakoli uan mikilistli. Kiampa techmachtik ma tijchiuakaj kej ya, ma titeiknelikaj uan ma titemakakaj tlen tijpiaj (1 Juan 4:10). Uan pampa temaktilik iKone uelis timouampojchiuasej iuaya uan tijnextisej tikikneliaj.

3, 4. ¿Kenijkatsa tijnextiaj tikikneliaj Jehová?

³ Jehová nochipa kinextia techiknelia. Yeka, Jesús kiijtok nopa tlanauatili tlen tlauel ipati eliyaya ni: “Xikikneli toTeko Dios ika nochi moyolo uan ika nochi moalma [o monemilis], uan ika nochi motlalnamikilis uan ika nochi mochikaualis”  (Mar. 12:30). Jehová kineki ma tikiknelikaj ika nochi toyolo. Ya amo kipaktiskia tlaj tlauel tikikneliskiaj se akajya o se tlamantli uan ya amo. Uan amo san kineki ma tikiknelikaj ika nochi toyolo, nojkia kineki ma tikiknelikaj ika nochi totlalnamikilis uan ika nochi tochikaualis, nopa kiijtosneki ika nochi tlamantli tlen timoyoliljuiaj uan tijchiuaj (xijpoua Miqueas 6:8).

⁴ Uajka moneki tikiknelisej Jehová ika nochi tonemilis uan ika nochi tlen tijpiaj. Tlaj nelnelia tikiknelisej, tlauel tijpatiitasej ipan tonemilis. Ipan tlamachtili “¿Kenijkatsa kinextia Jehová techiknelia?” tikitakej naui tlamantli tlen kinextia techiknelia Jehová. Uan ipan ni tlamachtili tikitasej kenijkatsa uelis nojua tikiknelisej Jehová uan kenijkatsa uelis tijnextisej.

5. ¿Tlake tijnekij tijchiuasej kema timoyoliljuiaj ipan nochi tlamantli tlen Jehová techmaka?

⁵ Kema se akajya techmaka se tlenijki tijnextiliaj tijtlaskamatiliaj. Ni tijchiuaj kema tijtekiuiaj tlen techmakak. Nopa apóstol Santiago kiijtok Jehová techmaka miak kuajkuali tlamantli (Sant. 1:17). Jehová techmaka nochi tlen ika uelis tiitstosej uan tiyolpakisej, yeka tlauel tijtlaskamatiliaj. Tikitaj kenijkatsa tlauel techiknelia uan tojuantij tijnekij tijnextisej nojkia tikikneliaj. ¿Tijneki tijchiuas nopa?

6. ¿Tlake monekiyaya kichiuaskiaj israeleuanij uan kiampa Jehová nojua kinmakaskia kuajkuali tlamantli?

⁶ Jehová kinmakak israeleuanij miak kuajkuali tlamantli. Ipan miak xiuitl kinmakak tlen ika mopanoltijkej. Nojkia kinmakak miak tlanauatili uan kiampa kimatkej tlake kichiuaskiaj (Deut. 4:7, 8). Jehová kinnauatik monekiyaya kimakasej “tlen más kuali tlen itlajka tlen temaka” ipan inintlal (Éx. 23:19). Tlaj kinekiyayaj nojua ma kinmakato kuajkuali tlamantli, monekiyaya kineltokaskiaj uan kimakaskiaj tlen tlauel kuali. Kiampa kinextiskiaj kitlaskamatiliyayaj (xijpoua Deuteronomio 8:7-11).

7. ¿Kenijkatsa uelis tijtekiuisej “nochi tlamantli tlen tijpiaj” uan kiampa tijnextisej tikikneliaj Jehová?

⁷ Uelis tijnextisej tikikneliaj Jehová tlaj tijmakasej “nochi tlamantli tlen tijpiaj” (Prov. 3:9). Ni uelis tijchiuasej tlaj titemakasej tomij tlen ika tikinpaleuisej toikniuaj ipan totlanechikol uan katli itstokej ipan nochi Tlaltipaktli. Maske amo tijpiaj miak tlamantli, uelis tijtekiuisej tlen tijpiaj uan kiampa tijnextisej tlauel tikikneliaj Jehová (2 Cor. 8:12). Ma tikitakaj kenijkatsa nojkia uelis tijnextisej tikikneliaj.

8, 9. 1) ¿Ika tlake seyok tlamantli uelis tijnextisej tikikneliaj Jehová? 2) ¿Tlake kichijki Mike uan ichampoyouaj?

⁸ Nojkia uelis tijnextisej tikikneliaj Jehová tlaj timotemachisej ipan ya. ¿Kenke tikijtouaj nopa? Ma tikilnamikikaj Jesús kiijtok amo kinamiki tlauel techtekipachos ika tlake timopanoltisej, pampa Jehová kiijtoua techmakas nochi nopa tlamantli tlaj timosentlalisej san ya tijtekipanosej (Mat. 6:31-33). Tojuantij timotemachiaj nelia kichiuas tlen kiijtojtok, pampa kema tikikneliaj se akajya timotemachiaj ipan ya. Tlaj tlauel timotemachisej ipan Jehová, nojkia tijnextisej tlauel tikikneliaj (Sal. 143:8). Yeka, kualtiaskia ma timotlajtlanikaj: “¿Nijnextia nikiknelia Jehová kej nijtekiuia nochikaualis uan tonali tlen nijpia?  ¿Mojmostla nijnextia nimotemachia ya nechmakas tlen moneki?”.

⁹ Ma tikitakaj tlen kipanok Mike uan ichampoyouaj. Kema Mike eliyaya telpokatl kinekiyaya tlajtolmoyauati ipan seyok altepetl. Maske teipa mosiuajtik uan kinpixki omej ikoneuaj nojua kinekiyaya kichiuas nopa. Mike iuaya ichampoyouaj kipojkej miak amatlajkuiloli kampa kiijtoua toikniuaj tlajtolmoyauatoj ipan sekinok altepemej. Yeka moiljuijkej amo tlauel tlapijpiaskiaj, kinamakakej ininchaj uan mochantitoj ipan se kali tlen amo nelueyi. Mike ayokmo kintlanamakiltik miakej, yeka uelki kiyakanki iteki ipan Internet maske itstoya ipan seyok altepetl. Nama, tlatekipanouaj ika pakilistli ipan seyok altepetl. Kiijtoua kiitstokej kenijkatsa moaxitia tlen Jesús kiijtok ipan Mateo 6:33.

10. ¿Kenke moneki tijchiuasej kej David uan timoyoliljuisej ipan tlen Jehová techmachtia?

¹⁰ David nochipa moyoliljuiyaya ipan Jehová itlanauatiljuaj uan ipan tlen kichijtoya. Yeka kiijtok: “Iluikaktli tepouilia iueyitilis toTeko Dios”. Uan nojkia kiijtok “[itlanauatiljuaj] toTeko eltok senkistok kuali” uan temachtli, techyolchikaua uan techpaleuia ma tijpiakaj tlalnamikilistli. Kema David moyoliljuik ni, kinextik kiikneliyaya toTeotsij. Yeka kiijtok kinekiyaya moyoliljuiskia uan kichiuaskia san tlen Jehová kipaktia (Sal. 19:1, 7, 14). Kej David, tojuantij nojkia moneki timoyoliljuisej ipan tlen Jehová kichijtok uan ipan tlen techmachtia ipan Biblia.

11. ¿Kenijkatsa ika tlen Jehová techmachtia uelis tijnextisej tikikneliaj?

¹¹ Nama Jehová techmachtia miak tlamantli tlen ya, tlen kichijtok, tlen mosentlalijtok kichiuas uan tlen Biblia. Maseualmej kiniljuiaj sekinok ma momachtikaj miak tlamantli ipan universidades, maske nopa kichiua ayokmo ma kiiknelikaj toTeotsij. Uan Jehová amo san kineki ma tijyekokaj miak tlamantli. Ya kineki kuali ma tijtlapejpenikaj tlen tijchiuasej, ma tijtekiuikaj tlen techmachtia uan kiampa kuali tiitstosej tojuantij uan nojkia sekinok (Prov. 4:5-7). Ni uelis tijchiuasej kema tikinpaleuisej maseualmej “ma kimatikaj tlen nelia melauak” uan kiampa uelis momanauisej (1 Tim. 2:4). Tlaj tikinmachtisej miakej tlen kichiuas toTeotsij iTlanauatijkayo, tijnextisej tikikneliaj Jehová uan maseualmej (xijpoua Salmo 66:16 uan 17).

12. ¿Kenijkatsa kiita se tosiuaikni tlen Jehová techmaka?

 ¹² Katli telpokamej nojkia uelis moyoliljuisej ipan nochi tlen Jehová kinmaka uan kinmachtia. Nopa tosiuaikni Shannon kiilnamiki tlake kiyolmatki ipan nopa ueyi tlanechikolistli tlen eyi tonali tlen motokaxtik “Devoción piadosa”. Ya kipixtoya 11 xiuitl uan iikni 10. Ipan se tlamachtili tlen kiixtonkej kiniljuijkej nochi telpokamej sansejko ma moseuikaj uan Shannon nojkia moseuik nopaya. Maske achtoui majmauiyaya, tlauel yolpajki kema nochi kinmakakej nopa amochtli Los jóvenes preguntan. Ya kiijtoua nopa kipaleuik ma kimati Jehová nelia itstok uan tlauel kiiknelia. Yeka, kitlaskamatilia pampa techmaka kuajkuali tlamantli.

13, 14. ¿Tlake moneki tijchiuasej kema Jehová techtlalnamiktis?

¹³ Biblia kiijtoua Jehová kintlalnamiktia katli kiniknelia “keja se tetat[a] kixitlaua ikone” (Prov. 3:12). ¿Tlake moneki tijchiuasej kema Jehová techtlalnamiktis? Maske uelis timotekipachosej uan timoyolkokosej, moneki nochipa tijkauasej ma techtlalnamikti Jehová. Kiampa tijchiuasej tlen kuali uan tiitstosej ika tlayolseuilistli (Heb. 12:11). Moneki nochipa tijkauasej ma techtlalnamiktikaj uan amo tikualanisej tlaj amo techpaktis tlen techiljuisej. Tlaj tijtlakakilisej Jehová uan tijpatlasej tlen moneki ipan tonemilis, tijnextisej tikikneliaj.

¹⁴ Kema itstoya Malaquías nopa judáeuanij amo kimakayayaj Jehová kuajkuali tlakajkaualistli, yeka kintlalnamiktik (xijpoua Malaquías 1:12 uan 13). Jehová miakpa kintlalnamiktik uan amo kitlakakilijkej, yeka kintlatsakuiltik (Mal. 2:1, 2). ¿Tlake techmachtia ni? Tlaj amo tijkauasej Jehová ma techtlalnamikti o timoiljuisej amo tlauel ipati, ayokmo mouampojchijtos touaya.

15. ¿Tlake sekinok tlamantli amo kinamiki tijchiuasej?

¹⁵ Miakej moueyimatij uan amo kinekij kinmakasej sekinok tlen kipiaj. Miakej amo kinpaktia ma kintlalnamiktikaj yon ma kiniljuikaj tlake moneki kichiuasej. Uan kema kikauaj ma kintlajtolmakakaj, kichiuaj ika kualantli tlen kiniljuiaj. Biblia kiijtoua amo kinamiki ma tijchiuakaj nopa. Moneki tijyekosej tlen Jehová  kineki ma tijchiuakaj uan tijneltokasej (Rom. 12:2). Yeka, ika itlanechikol techtlajtolmaka kema moneki. Techiljuia kenijkatsa kinamiki timouikasej ininuaya tlakamej o siuamej, kenijkatsa tikintlapejpenisej touampoyouaj uan kenijkatsa tijtlapejpenisej ika tlen timoyolpakiltisej. Kema tijkauaj Jehová ma techtlalnamikti uan tijpatlaj tlen moneki ipan tonemilis, tijnextiaj tijtlaskamatiliaj tlen techtlajtolmaka uan tikikneliaj (Juan 14:31; Rom. 6:17).

16, 17. 1) ¿Kenke kema tijtlapejpenisej tijchiuasej se tlamantli moneki tijmatisej kenijkatsa kiita Jehová? 2) ¿Tlake kichijkej israeleuanij pampa amo motemachijkej ipan Jehová?

¹⁶ Konemej kintemouaj inintatauaj kema kinekij ma kinpaleuikaj uan ma kinmanauikaj. Uan katli ya uejueyij kemantika kiniljuiaj inintatauaj ma kinpaleuikaj, pampa maske ininseltitsitsij uelis kitlapejpenisej tlake kichiuasej, kimatij uelis kinpaleuis tlen kiniljuisej. Maske Jehová techkaua toseltitsitsij ma tijtlapejpenikaj tlake tijchiuasej, nochipa tikiljuiaj ma techpaleui pampa timotemachiaj ipan ya uan tikikneliaj. Yeka, kema tijnekij tijchiuasej se tlenijki tijchiuaj kampeka tijmatisej kenijkatsa kiita Jehová. Kema tikiljuiaj ma techpaleui, ika itonal techpaleuia ma tijchiuakaj tlen kinamiki (Filip. 2:13).

¹⁷ Kema itstoya Samuel uan nopa filisteaeuanij ya kintlaniyayaj israeleuanij kema moteuiyayaj, nopa israeleuanij amo motemachijkej ipan Jehová uan amo kitlajtlanijkej tlake kichiuaskiaj. Kiuikakej nopa kaxa tlen kipixtoya tlajtolsenkaualistli kampa tlateuiyayaj, pampa kiampa moiljuiyayaj Jehová kinpaleuiskia ma tlatlanikaj. Amo kitemolijkej kimatisej kenijkatsa kiitayaya Jehová, kichijkej san tlen inijuantij moiljuiyayaj kuali. Yeka, mijkej 30,000 israeleuanij. Uan nopa filisteaeuanij moaxkatijkej nopa kaxa tlen kipixtoya tlajtolsenkaualistli (1 Sam. 4:2-4, 10, 11; xijpoua Proverbios 14:12).

18. ¿Tlake kinamiki tijchiuasej kej kiijtoua Salmo 42:5 uan 6 uan Proverbios 3:5 uan 6?

¹⁸ Se tlakatl katli tlauel kiikneliyaya Jehová kiijtok kema kipixtoya uejueyi kuesoli, motemachiyaya toTeotsij kipaleuiskia uan kimanauiskia (Sal. 42:5, 6). ¿Nojkia kiampa tijyolmati? Maske uelis ya timotemachia ipan Jehová, moneki nochi tijyekosej kuali timotemachisej ipan ya. Biblia kiijtoua: “Ximotemachi ipan toTeko ika nochi moyolo. Amo xijtokili san tlen motlalnamikilis mitsiljuia. Ximoiljui tlachke ipakilis toTeko ipan nochi tlamantli tlen tijchiuaskia, uan yajaya mitsyakanas ipan se ojtli tlen xitlauak” (Prov. 3:5, 6).

19. ¿Kenijkatsa uelis tijnextis tikiknelia Jehová?

¹⁹ Timomachtijkej kenijkatsa Jehová yaya achtoui techiknelik. Kiampa techmachtik ma tikiknelikaj. Yeka, moneki nochipa timoyoliljuisej ipan tlen techmakatok uan kenijkatsa tlauel techiknelia. Ma tijnextikaj tikikneliaj ika nochi toyolo, totlalnamikilis uan tochikaualis (Mar. 12:30).