1, 2. ¿Tlake tijnekij katli tijtekipanouaj Jehová? Xikijto se neskayotl.

¿TLAKE tijtlachiliaj kema tijkouaj se kuauitl itlajka? Tikitaj tlaj amo patiyo, tlaj namanok kitejkej, tlaj kuali uan tlaj ya iksitok. Ni tijchiuaj pampa tijmatij se kuali kuauitl itlajka moneki iksitos.

² Kema tijyekouaj tlen Jehová uan timoatsonpoliuiltiaj, nojkia tijnekij tielisej kej toikniuaj katli ya tlalnamiktokej. Ni amo kiijtosneki tijnekij tijpiasej miak xiuitl, kiijtosneki tijnekij tijnextisej kuajkuali tlamantli uan kuali timouampojchiuasej iuaya Jehová. Nopa Apóstol Pablo kiniljuik toikniuaj tlen Éfeso tlaj mosentikapaleuiskiaj uan nojua kiyekoskiaj tlen Jesús, nojkia eliskiaj tlalnamikinij kej Cristo (Efes. 4:13).

3. ¿Tlake sanse kichiuayayaj ne Éfeso uan ipan miak tlanechikoli tlen onka ipan ni tonali?

³ Kema Pablo kintlajkuiljuilik toikniuaj tlen Éfeso, itstoyaj miakej katli ya tlalnamiktoyaj uan tlen ya uejkajtoya kitekipanojtoyaj toTeotsij. Nojkia itstoyaj katli nojua monekiyaya  kuali mouampojchiuaskiaj iuaya toTeotsij. Nama nojkia kiampa pano ipan miak tlanechikoli. Miakej ya kipiaj miak xiuitl kitekipanojtokej toTeotsij uan sekij ayamo mochiuaj tlalnamikinij, kej tlauel miakej katli sejse xiuitl moatsonpoliuiltiaj. Inijuantij moneki kichiuasej kampeka nojkia elisej tlalnamikinij. ¿Uan ta tijnextia nojkia se tlen toikniuaj katli ya tlalnamiktokej? (Col. 2:6, 7.)

4, 5. 1) ¿Nochi sanse kichiuaj toikniuaj katli ya tlalnamiktokej? 2) ¿Tlake sanse tlamantli kichiuaj ni toikniuaj? (Xikita nopa achtoui tlaixkopinkayotl.)

⁴ Maske nopa kuauitl itlajka tlen ya iksitok amo nochi sanse ininuejuexka uan amo sanse nesij, ika se keski tlamantli tijmatij ya iksitok. Ika Cristo itokilijkauaj katli ya tlalnamiktokej nojkia kej nopa pano. Maske amo nochi sanse, amo kipiaj sanse ininxiui, amo euaj ipan sanse altepetl uan amo sanse tlamantli kinpaktia, ika se keski tlamantli kinextiaj nojkia ya tlalnamiktokej. ¿Ika tlake tlamantli kinextiaj nopa?

⁵ Katli ya tlalnamiktokej kichiuaj kampeka kichiuasej kej Jesús (1 Ped. 2:21). Ya kiijtok moneki ma tikiknelikaj Jehová ika nochi toyolo, tonemilis uan totlalnamikilis. Uan nojkia kiijtok moneki tikiniknelisej sekinok kej tojuantij timoikneliaj (Mat. 22:37-39). Katli ya tlalnamiktokej kichiuaj kampeka tlaneltokasej. Yeka, kej monejnemiltiaj kinextiaj tlauel kipatiitaj mouampojchiuasej iuaya Jehová uan teiknelisej.

6, 7. 1) ¿Tlake sekinok tlamantli nojkia kinextiaj katli tlalnamikij maske ya teikneliaj? 2) ¿Tlake moneki ma timotlajtlanikaj?

⁶ ¿Tlake nojkia kinextiaj katli ya tlalnamiktokej maske ya teikneliaj? (Gál. 5:22, 23.) Yolpakij, amo kualanij uan kipiaj ininyolo. Kema kipiaj kuesoli uan kinyolkokouaj nochipa motemachiaj ipan toTeotsij. Kema momachtiaj Biblia, kitemouaj tlen kinpaleuis kimatisej tlake kuali uan tlake amo kuali, uan ni kinpaleuia kitlapejpenisej kichiuasej tlen kuali. Amo moueyimatij uan kimatij tlauel kinpaleuis tlaj kikauasej ma kinyakana Jehová itlanauatiljuaj. * (Xijpoua nopa nota.) Tlajtolmoyauaj ika miak pakilistli uan kichiuaj kampeka mosentikapaleuisej ininuaya nochi toikniuaj.

⁷ Maske tijtekipanojtokej Jehová miak xiuitl o amo, nochi moneki timotlajtlanisej: “¿Kenijkatsa uelis kuali nijchiuas uan kiampa nijnextis nijchiua kej Jesús?”. Ma tikitakaj eyi tlamantli tlen techpaleuis nojkia timochiuasej titlalnamikinij kej Cristo.

8. ¿Kenke tijmatij Jesús kuali kiixmatiyaya uan kikuamachiliyaya Biblia?

⁸ Jesús kuali kiixmatiyaya uan kikuamachiliyaya Biblia. Kema kipixtoya 12 xiuitl monojnotski ipan teokali ininuaya tlamachtianij ika tlen Biblia tlamachtia. Uan nochi katli kitlakakiliyayaj mokauayayaj san tlachixtokej (Luc. 2:46, 47). Teipa, kema kuali kitekiuik Biblia ikualankaitakauaj amo kimatkej tlake kinankiliskiaj (Mat. 22:41-46).

9. 1) ¿Kenijkatsa moneki timomachtisej tlaj tijnekij timochiuasej titlalnamikinij? 2) ¿Tlake moneki tijchiuasej kema timomachtisej Biblia?

⁹ Tlaj tijnekij timochiuasej titlalnamikinij  moneki tijchiuasej kej Jesús. Amo moneki tijmatisej san se keski tlamachtili tlen amo ouij, nojkia moneki timomachtisej tlen ouij ipan Biblia, pampa “tlakualistli tlen tetik eltok para tlakamej tlen ya moskaltijtokej” (Heb. 5:14). Moneki “tikixmatisej” tlen nelia tlamachtia Biblia (Efes. 4:13). Yeka, moneki timosentlalisej mojmostla tijpouasej Biblia uan sejse semana timomachtisej toselti uan ininuaya tochampoyouaj. Kema timomachtisej Biblia moneki tikitasej kenijkatsa kiita Jehová se tlamantli uan tlake kiyolmati, uan teipa uelis tijtekiuisej kema tijtlapejpenisej tlen tijchiuasej, kiampa tlauel kuali timouampojchiuasej iuaya Jehová.

10. ¿Kenijkatsa katli ya tlalnamiktokej kinextiaj kipatiitaj kema toTeotsij kintlajtolmaka?

¹⁰ Maske katli ya tlalnamiktokej kimatij tlen tlamachtia Biblia, nojkia kipatiitaj tlen toTeotsij tetlajtolmaka. Yeka kichiuaj kampeka kichiuasej tlen toTeotsij kineki, maske monekis kipatlasej kej itstokej, tlen kichiuaj uan tlen moyoliljuiaj. Kichiuaj kej Jesús uan kipatlaj kej monejnemiltiaj kema kichiuaj tlen xitlauak uan amo kitlauelkauaj toTeotsij (xijpoua Efesios 4:22-24). Kema tlakamej kiijkuilojkej Biblia, toTeotsij kinpaleuik ika itonal. Yeka, kema se toikni momachtia Biblia, toTeotsij itonal kipaleuia nojua kuali ma kiixmati Jehová, kuali ma mouampojchiua iuaya uan ma teikneli.

11. ¿Kenijkatsa monejnemiltiyayaj maseualmej kema Jesús itstoya ipan Tlaltipaktli?

¹¹ Maske Jesús amo eliyaya tlajtlakole kema itstoya ipan Tlaltipaktli, itatauaj, iikniuaj uan sekinok kena eliyayaj tlajtlakolejkej. Itokilijkauaj kemantika moueyimatiyayaj uan kitlasomatiyayaj tlen kipixtoyaj. Uan ipan youali kema kimiktiskiaj Jesús, mokualanijkej pampa kinekiyayaj kimatisej ajkia tlauel pankisayaya (Luc. 22:24). Maske kichijkej nopa, Jesús motemachiyaya eliskiaj tlalnamikinij uan kichiuaskiaj ma mosentikapaleuikaj ipan tlanechikoli. Yeka, ipan nopa youali kiiljuik Jehová ma kinpaleui itokilijkauaj nochipa itstosej sansejko, kej inijuantij itstoyaj sansejko. Kiiljuik: “Ma itstokaj san se keja tojuantij tiitstokej san se” (Juan 17:21, 22).

12, 13. 1) ¿Tlake kinamiki ma timosentlalikaj tijchiuasej? 2) ¿Kenijkatsa kiyekok se toikni kichiuas ma mosentikapaleuikaj toikniuaj?

¹² Katli ya tlalnamiktokej kichiuaj kampeka kinpaleuisej toikniuaj ma mosentikapaleuikaj (xijpoua Efesios 4:1-6, 15 uan 16). Nochi moneki tijnekisej timosentikapaleuisej ininuaya toikniuaj. Yeka moneki amo timoueyimatisej. ¿Tlake tijchiuasej tlaj se toikni mokuapolos o techixpanos? ¿Ayokmo tijnojnotsasej? ¿O tijchiuasej kampeka tijsenkauasej nopa kuesoli? Tlaj tijchiuasej kampeka tijsenkauasej uan amo tijueyilisej, tijnextisej ya titlalnamiktokej.

¹³ Ximoiljui tlen kipanok toikni Uwe. Ya tlauel kikualankamakayaya kema toikniuaj mokuapolouayayaj. Se tonali, moiljuik momachtis ika Biblia uan ika amochtli Perspicacia tlen kipanok David. Ya momachtik ni pampa David nojkia kipixki kuesoli ininuaya sekinok. Se tonali, Saúl kinejki kimiktis. Seyok tonali, se keskij israeleuanij kinejkej kimiktisej ika tetl. Uan seyok tonali, isiua kipinaualtik (1 Sam. 19:9-11; 30:1-6; 2 Sam. 6:14-22). Maske David kipanok ni, nojua kiiknelijtoya Jehová, motemachijtoya ipan ya uan tlauel kitekipachouayaya tlen sekinok kinpanoyaya. Kema Uwe momachtik nopa, kiitak monekiyaya kichiuas kej David uan ayokmo kualanis kema mokuapoloskiaj toikniuaj. Nojkia kiitak monekiyaya tetlapojpoljuis uan kichiuas ma mosentikapaleuikaj toikniuaj. Nelia tlauel moneki ma tijchiuakaj kej ya.

14. ¿Ajkia ininuaya mouampojchiuayaya Jesús?

¹⁴ Jesús kuali kinnojnotsayaya nochi, yeka kuali kiyolmatiyayaj kema itstoyaj iuaya tlakamej, siuamej, konemej o katli ya uejueyij. Maske kichiuayaya nopa, amo mouampojchiuayaya ininuaya nochi. Se tonali kiniljuik apóstoles: “Innouampoyouaj tlaj inkichiuaj tlen niinmechnauatia” (Juan 15:14). Jesús mouampojchijki san ininuaya katli kiikneliyayaj uan amo kitlauelkauayayaj ya uan Jehová. Yeka, tlauel moneki timouampojchiuasej san ininuaya katli nelnelia kiikneliaj Jehová. ¿Kenke?

15. ¿Kenke kualtiaskia telpokamej ma mouampojchiuakaj ininuaya katli ya tlalnamiktokej?

¹⁵ Se kuauitl itlajka kuali iksi kema kitotonia Tonati. Kema toikniuaj teikneliaj eliskia kej kema nopa Tonati tetotonia, pampa techpaleuia ma tielikaj kej katli ya tlalnamiktokej. Tlaj titelpokatl, ¿ya tijmati tlake tijchiuas ipan monemilis?  Tlaj tijneki kuali tijtlapejpenis tlen tijchiuas, ximouampojchiua ininuaya katli ya uejkajtok kitekipanojtokej Jehová uan kichiuaj ma mosentikapaleuikaj toikniuaj. Inijuantij kinpanotok miak kuesoli uan uelis mitspaleuisej tijchiuas tlen kuali. Tlaj tiitstos ininuaya, mitspaleuisej kuali xijtlapejpeni tlen tijchiuas uan timochiuas kej katli ya tlalnamiktokej (xijpoua Hebreos 5:14).

16. ¿Kenijkatsa katli kipixtokej miak xiuitl kipaleuijkej se tosiuaikni kema eliyaya ichpokatl?

¹⁶ Tosiuaikni Helga kiilnamiki kema nechka kisaskia kampa momachtiyaya, nochi katli momachtiyayaj iuaya kiijtouayayaj tlake kichiuaskiaj teipa. Miakej kiijtouayayaj momachtitij universidad. Uan Helga moiljuik kintlajtlanis toikniuaj katli ya tlalnamiktokej ma kitlajtolmakakaj. Sekij ya kipixtoyaj miak xiuitl. Ya kiijtoua tlauel kipaleuijkej uan kitlajtolmakakej ma kitekipano miak toTeotsij, yeka tlatekipanok kej precursora makuili xiuitl. Maske ya panok miak xiuitl, Helga kiijtoua tlauel kuali tlen kichijki kema eliyaya ichpokatl pampa kitekipanok Jehová.

17, 18. ¿Tlake moneki tijchiuasej tlaj tijnekij nojua kuali tijtekipanosej Jehová?

¹⁷ Tlaj tijchiuasej kej Jesús tielisej kej katli ya tlalnamiktokej, kuali timouampojchiuasej iuaya Jehová uan tlauel tijnekisej tijtekipanosej. Kiampa nojua kuali tijtekipanosej. Jesús kiniljuik itokilijkauaj: “Xijkauakaj ma kauani inmotlauil ininixtla tlakamej uan kiitasej tlen kuali inkichiuaj uan kiueyichiuasej inmoTata tlen itstok ipan iluikak” (Mat. 5:16).

¹⁸ Katli ya tlalnamiktokej uelis tlauel kinpaleuisej toikniuaj pampa inijuantij kuali kitekiuiaj inintlalnamikilis. ¿Kenijkatsa techpaleuia totlalnamikilis kuali tijtlapejpenisej tlen tijchiuasej? ¿Kenijkatsa tijnextiaj tijtlepanitaj sekinok inintlalnamikilis? Ni tikixtomasej ipan nopa seyok tlamachtili.