TLAMACHTILI TLEN IKA PEUA
¿Ajkia inijuantij Jehová itlajtoltemakauaj?
“Ya uejkajtok nikixmati Mike. Ya itstok ipan nopa religión tlen Jehová itlajtoltemakauaj, uan nopa nechtekipachouayaya. ¿Ajkia Jehová? ¿Kenke Jehová itlajtoltemakauaj amo iljuichiuaj? Nechtekipachouayaya pampa nimoiljuiyaya Mike itstoya ipan se secta.” (Becky, eua California, Estados Unidos)
“Kema Jehová itlajtoltemakauaj pejkej kinmachtiaj ika Biblia nokalnechkauaj, nimoiljuik: ‘¡Amo nijmati kenke kej nopa kitokaxtiaj nopa religión! ¿Tlake kiijtosneki?’” (Zenon, eua Ontario, Canadá)
“Nosiua uan na timoiljuiyayaj Jehová itlajtoltemakauaj ualauiyayaj pampa amo kuali tijyolmatiyayaj kema amo tiauiyayaj teopa. Uan timoiljuiyayaj tlaj amo tikasitoyaj tlen tijtemouayayaj ipan religiones tlen tlauel pankisayayaj, amo kema ueliskia tikasisej ipan nopa religión tlen Jehová itlajtoltemakauaj.” (Kent, eua Washington, Estados Unidos)
“Na, amo nijmatiyaya ajkia inijuantij eliyayaj yon tlake kineltokayayaj.” (Cecilie, eua Esbjerg, Dinamarca)
Uelis tikinitstok tlajtolmoyauaj kajkalpa, ojtipa, temakaj amatlajkuiloli uan tlamachtiaj ika Biblia uan amo tlainamaj. Uelis ni pilamochtsi inijuantij mitsmakakej. Uan uelis nojkia timoiljuia kej katli tikitakej achtoui uan timotlajtlania ajkia inijuantij Jehová itlajtoltemakauaj.
¿Kenijkatsa uelis tijmatis tlen Jehová itlajtoltemakauaj kichiuaj? ¿Kanke uelis mitsiljuisej tlen kineltokaj, kenijkatsa kiixtlauaj nopa kali kampa mosentiliaj uan nochi tlen kichiuaj, uan kenke mitspaxalouaj uan mitsnojnotsaj ojtipa?
Cecilie kiijtoua: “Nijpojki miak tlamantli ipan Internet tlen Jehová itlajtoltemakauaj uan nijtlakakilik miakej kiijtouayayaj tlen amo kuali. Nopa kichijki amo kuali ma nikinita”. Kema Cecilie monojnotski ininuaya kimatki kenijkatsa nelnelia eliyayaj.
Tlaj tijneki nojkia uelis tijchiuas nopa. Kualtiaskia tikintlajtlanis Jehová itlajtoltemakauaj tlen tijneki tijmatis. Inijuantij kichiuaj ni pilamochtsi uan uelis xitlauak mitsiljuisej nochi (Prov. 14:15). Nopa sekinok tlamachtili tlen tikitasej mitspaleuis tijmatis ajkia inijuantij, tlake kineltokaj uan tlake kichiuaj.
