ToTeotsij temachtli kiita kenijkatsa tlaijiyouijtokej ipan Tlaltipaktli uan kichiuas ayokmo ma tlaijiyouikaj (Sal. 72:13, 14). Biblia kiijtoua toTeotsij kinpaleuis katli ‘tlaijiyouiaj’. ¿Kema kichiuas? “Kema [...] Jesucristo moualnextiki tlen iluikak iuaya iiluikaejkauaj [...] para kintlatsakuiltis nopa tlakamej tlen axkiixmatij [toTeotsij] uan tlen axkinejkej kichiuasej tlen itlajtol toTeko Jesucristo kiniljuik.” (2 Tes. 1:7, 8.) Ni panos ipan “nopa ueyi tlateuijkayotl ika toTeko tlen kipia nochi Chikaualistli”, tlen nojkia kiiljuiaj Armagedón (Apoc. [Rev.] 16:14, 16).

Kema mochiuas nopa ueyi tlauilankayotl, toTeotsij amo kinnauatis maseualmej ma kinteuikaj katli amo kualmej, kinauatis iKone Jesús uan sekinok iluikaeuanij ma kitlamiltikaj tlaijiyouilistli (Is. 11:4; Apoc. 19:11-16).

ToTeotsij amo kipatlatok kej kiita nopa tlauilankayotl. Ya kiijtoua ika nopa uelis kitlamiltis tlaijiyouilistli uan tlen amo kuali. Uan kej uejkajkia, ipan ni tonali nojkia san toTeotsij kinamiki kiijtos kema tlateuisej uan ajkia tlateuis. Ya mosentlalijtok kitlamiltis tlen amo kuali uan iKone Jesús kichiuas nopa. Ni kiijtosneki toTeotsij kikualankaita  nopa tlauilankayotl tlen mochiua ipan ni tonali, maske sekinok moiljuiaj kuali.

Ximoiljui omej iknimej moteuiaj kema itstokej ininselti, uan kema ayokmo moteuiaj kinojnotsaj inintata ipan teléfono. Se kiiljuia iikni pejki kiteuia, uan nopa seyok kiiljuia iikni kimakilik. Maske kinekij inintata ma kinneltoka, kema kintlakakilik kiniljuik ayokmo ma moteuikaj uan ma kichiakaj kema ya asiti. Maske kineltokakej, teipa sampa pejkej moteuiaj. Kema asito, inintata tlauel kualantoya, uan kintlakaualtik pampa amo kineltokakej.

Ipan ni tonali, maske katli moteuiaj ipan tlauilankayotl kiiljuiaj toTeotsij ma kinpaleui, ya amo kinpaleuia. Biblia kiijtoua: “Amo kema xikinkuepilikaj tlen inmechchiuilijtokej tlen axkuali [...;] amo kema ximomakuepakaj” (Rom. 12:17, 19). Uan toTeotsij kiniljuia maseualmej moneki kichiasej ma kisenkaua nochi, uan nopa kichiuas ipan Armagedón (Sal. 37:7). Ya amo kipaktia kema moteuiaj ipan tlauilankayotl pampa kinextiaj amo kitlepanitaj. Yeka, ipan Armagedón kitlamiltis nochi tlauilankayotl tlen onka ipan Tlaltipaktli (Sal. 46:9; Is. 34:2). Uajka, kema mochiuas Armagedón ayokmo aka tlateuis.

ToTeotsij iTlanauatijkayo tlauel techteochiuas uan ayokmo onkas tlauilankayotl. Jesús kiijtok ni kema momaijtok: “Xiuala, xitlanauatiki nikaj. Ma kichiuakaj mopakilis nochi ipan ni Tlaltipaktli keja mochijtok nepa iluikak” (Mat. 6:10). Kitlamiltis tlauilankayotl uan tlen amo kuali tlen kichiua ma moteuikaj (Sal. 37:9, 10, 14, 15). * Yeka, katli tijtokiliaj Cristo tlauel tijnekij tikitasej kema toTeotsij iTlanauatijkayo kichiuas nopa (2 Ped. 3:13).

¿Poliui miak tonali kema toTeotsij iTlanauatijkayo kitlamiltis tlaijiyouilistli uan tlen amo kuali? Ipan ni tonali mochiua tlen Biblia kiijtok panoskia, ni kinextia tiitstokej ipan “itlamia tonali” uan nechka tlamis tlen amo kuali (2 Tim. 3:1-5). * Kema ya panotos Armagedón, toTeotsij iTlanauatijkayo tlanauatis ipan Tlaltipaktli.

Ipan nopa tlauilankayotl mikisej san katli amo kineltokasej “itlajtol” Jesucristo (2 Tes. 1:8). Xikilnamiki toTeotsij amo kipaktia ma mikikaj maseualmej, yon katli amo kualmej (Ezeq. 33:11). Uan pampa toTeotsij “axkineki niyon se ma poliui” ipan nopa ueyi tlauilankayotl kema tlamis nochi tlen amo kuali, kineki ma momoyaua nopa kuali tlamachtili “ipan nochi tlaltinij ipan ni Tlaltipaktli para nochi tlakamej ma kimatikaj” (2 Ped. 3:8, 9; Mat. 24:14; 1 Tim. 2:3, 4). Yeka, pampa Jehová itlajtoltemakauaj tlajtolmoyauaj ipan nochi Tlaltipaktli, maseualmej uelis kiixmatisej toTeotsij, kineltokasej tlen Jesús tlamachtik uan itstosej kampa ayokmo onkas tlauilankayotl.