Eli se kuali tlamantli tlen techpaleuia amo tlauel timokuesosej kema tijpiaj tlaouijkayotl o kema amo pano tlen timoiljuijtoyaj. Ni ueli tijnextiaj kema techpano tlen amo kuali. Sanse kej se okichpil miakpa uetsi kema peua nejnemi. Kema moskaltis nojkia mokuapolos, uan nopa kipaleuis ma kiyeko kenijkatsa kuali monejnemiltis.

Sekij konemej tlauel mokuesouaj kema amo kuali kisa tlen kichiuaj, kema kiixnamikij se tlaouijkayotl o kema se akajya kintlalnamiktia, uan sekinok konemej ayokmo kinekij kichiuasej tlen moiljuijtoyaj. Maske kiampa pano, moneki kikuamachilisej ni tlamantli:

• Amo kuali kisas nochi tlen kichiuasej (Santiago 3:2).

• Nochi tikixnamikij tlaouijkayotl ipan tonemilis (Eclesiastés 9:11).

• Nochi moneki ma techtlalnamiktikaj pampa kiampa tijyekosej sekinok tlamantli (Proverbios 9:9).

Tlaj mokone kiijiyouis tlen kipanos kimatis kenijkatsa kiixnamikis kuesoli tlen teipa kipias.

Kema mokuapolouaj

TLEN BIBLIA TETLAJTOLMAKA: “¿Axinkimatij para se kuali tlakatl yonke inkitlaijiyouiltisej chikome ueltas, nochipa sampa motlalanas?” (Proverbios 24:16).

Xijpaleui mokone ma kiita se keski tlamantli kej kinamiki. Ximoiljui, ¿tlake kichiuaskia tlaj amo kuali kisaskia ipan examen? ¿Moyolkokoskia uan kiijtoskia: “¡Nochi tlen nijchiua amo kuali kisa!”?

Tlaj tijneki tijpaleuis mokone ma kiijiyoui tlen kipano, xijpaleui ma moiljui tlake uelis kipatlas. Kiampa kimatis kenijkatsa kiixnamikis kuesoli uan amo san moteikneltiitas.

Amo xijsenkaua ikuesoljuaj. Xijpaleui iselti ma kisenkaua. Ueliskia titlajtlanis: “¿Tlake uelis tijchiuas uan kiampa tijkuamachilis tlen mitsmachtiaj?”.

Kema pano tlen amo kuali

TLEN BIBLIA TETLAJTOLMAKA: “Axinkimatij niyon kentsi tlachke inmopantis mostla” (Santiago 4:14).

Amo tijmatij tlake panos ipan tonemilis. Tomij uan tonemilis amo nochipa tijpixtosej. Kej Biblia kiijtoua: “Ax nochipa tlatlani yajaya tlen motlaloua chikauak.  Uan ipan tlateuijkayotl ax nochipa tlatlani yajaya tlen más kipia tetili. [...] Tlen ueli tlalochtli, tlen ueli tlamantli axkuali ueli kipantis aki ueli tlakatl kema axkichia” (Eclesiastés 9:11).

Tetajmej nochipa kinekij kinmokuitlauisej ininkoneuaj, yeka maske amo kenijki tlaj kiampa tijneki tijchiuas, amo uelis tijchiuas mokone amo ma kipia yon se kuesoli.

Maske uelis mokone ayamo kipia kuesoli kej katli kipolouaj ininteki o inintomij, uelis kipias sekinok kuesoli, kej kema ayokmo mouikas iuaya se akajya o kema mikis katli kiiknelia. *

Kema kiniljuiaj tlen moneki kipatlasej

TLEN BIBLIA TETLAJTOLMAKA: “Xijtlakakili nochi consejos [...] uan tijpias miak tlalnamikilistli tlen uejkauas nochi moyolis” (Proverbios 19:20).

Se akajya uelis kitlalnamiktis mokone pampa kineki kipaleuis ma kipatla amo kuali tlamantli tlen moiljuia o tlen kichiua uan amo pampa kineki kiyolkokos.

Tlaj nama tijpaleuis mokone kuali ma kintlakakili katli kitlajtolmakaj, inmechpaleuis kuali xiitstokaj. Se tetaj katli itoka John, kiijtoua: “Tlaj nochipa tijsenkauas kuesoli tlen kipias mokone, amo kema kimatis kenijkatsa kisenkauas iselti. Nochipa kipias kuesoli uan ta nochipa tijnekis tijsenkauas ikuesoljuaj. Nopa kichiuas amo kema kuali xiitstokaj”.

¿Kenijkatsa uelis tijpaleuis mokone kuali ma kintlakakili katli kitlalnamiktiaj? Kema se akajya kiiljuis mokone se tlamantli tlen moneki kipatlas uelis ipan escuela o sejkanok, amo xikijto amo kinamikiyaya kiampa ma kiiljuikaj. Uan xitlajtlani:

• “¿Kenke timoiljuia mitstlalnamiktijkej?”.

• “¿Kenijkatsa mitspaleuis tlen mitsiljuijkej?”.

• “¿Tlake tijchiuas kema sampa mitstlalnamiktisej?”.

Xikilnamiki, tlaj mokone kitlalnamiktisej amo san nama kipaleuis, nojkia kipaleuis teipa.