Katli ixtlamatij kiitstokej maseualmej katli tetlaskamatiliaj tlauel yolpakij, amo tlauel mokokouaj, kimatij kenijkatsa kiixnamikisej se tlaouijkayotl uan kinpiaj kuali ininuampoyouaj. Nopa ixtlamatketl Robert Emmons kiijtoua kema titetlaskamatiliaj techpaleuia amo ma tijnekikaj tlen sekinok kipiaj, amo ma timoyolkokojtokaj, amo ma tijnekikaj miak tlamantli uan amo san ma tikualantokaj. a

 ¿Kenijkatsa kinpaleuia konemej kema tetlaskamatiliaj? Ipan naui xiuitl kiitakej kenijkatsa eliyayaj 700 telpokamej katli tetlaskamatiliyayaj, uan kiitakej inijuantij amo tlauel tekajkayauayayaj kema kichiuayayaj se examen, amo tlauel kitekiuiyayaj drogas, amo tlauel moiuintiyayaj uan kuali monejnemiltiyayaj.

•   Amo titetlaskamatiliaj kema timoiljuiaj kinamiki techmakasej se tlamantli. Miakej konemej amo tetlaskamatiliaj kema kinmakaj se tlamantli pampa moiljuiaj kinamiki kinmakasej uan amo kiitaj kej se regalo.

   Ipan ni tonali, miakej kiampa moiljuiaj. Se tenaj katli itoka Katherine, kiijtoua: “Maseualmej kinekij ma timoiljuikaj kinamiki tijpiasej nochi tlamantli. Yeka, nochi tlen kisa ipan televisión kichiua ma tijnekikaj tijpiasej nopa tlamantli uan nojkia kiijtouaj tojuantij achtoui moneki tijpiasej”.

•   Kema konemej nojua pilsiltsitsij, uelis kiyekosej tetlaskamatilisej. Se tenaj katli itoka Kaye, kiijtoua: “Konemej nima kichiuaj se tlamantli, yeka tlauel kinpaleuis tlaj nima tikinmachtis ma kichiuakaj tlen kuali. Tlaj kiampa tijchiuas, elis kejuak tijtlakechis se xochitl pampa tijneki xitlauak ma moskalti”.

•   Xikinmachti tlake kiijtosej. Konemej katli nojua pilsiltsitsij uelis kinmachtisej ma kiijtokaj “tlaskamati” kema se akajya kinmaka se tlamantli o kinchiuilia tlen kuali. Uan kema moskaltijtiasej, nojua tlauel kipatiitstiasej kema se akajya kinmakas se tlamantli.

   Texto tlen mitspaleuis: “Nochipa ximotlaskamatikaj” (Colosenses 3:15).

   “Topilixui katli kipia eyi xiuitl nochipa kiijtoua ‘tlaskamati’ uan tlajtlani se tlamantli ika tlatlepanitakayotl pampa itatauaj kiampa kimachtijkej. Ika tlen kichiuaj itatauaj kimachtiaj ma tetlaskamatili” (Jeffrey).

•   Xikinmachti tlake kichiuasej. Kema mokone kiselis se regalo, uelis tijpaleuis ma kiijkuilo ipan se amatl kampa kiijtoua tetlaskamatilia. Nojkia uelis tikiljuis ma mitspaleui ipan se keski tlamantli tlen tijchiuas kalijtik. Ni kipaleuis ma kipatiita nopa tekitl tlen mochiua inmochaj.

   Texto tlen mitspaleuis: “Más pakilistli kiselia tlen temaka se tlenijki, uan axkeja tlen kiselia” (Hechos 20:35).

   “Tikinpiaj omej tokoneuaj katli ya telpokamej. Inijuantij tlauel techpaleuiaj pampa kiitaj tlake tlakualistli mochijchiuas, tlakualchiuaj uan tlapaleuiaj ika sekinok tlamantli tlen mochiua kalijtik. Uan nopa kinpaleuia ma kipatiitakaj tlen tijchiuaj uan ma kitlaskamatikaj” (Beverly).

•   Xikinmachti ma moiljuikaj kej kinamiki. Tlaj tijnekij se xochitl kuali ma moskalti, moneki tijtlalilisej kuali tlali, nojkia kiampa pano ika tojuantij, tlaj tijnekij titetlaskamatilisej, moneki amo timoueyimatisej. Katli amo moueyimati kuali kimati amo ueli kichiua iselti nochi tlamantli, nopa kipaleuia ma kintlaskamatili sekinok kema kipaleuiaj.

   Texto tlen mitspaleuis: “Ma axaka moueyimati, pero ximoiknonekikaj. Sejse inmojuantij xikinitakaj nochi sekinok keja más uejueyi kej ta. Amo san ximoiljuikaj tlen tlamantli tlen inmechpaleuis. Nojkia ximoiljuikaj tlen kinpaleuis sekinok” (Filipenses 2:3, 4).

   “Kemantika, kema titlakuaj tijchiuaj kejuak titetlaskamatiliaj. Teipa sejse tlen tojuantij kiijtoua kenke tetlaskamati. Ni techpaleuia ma timosentlalikaj ipan tlamantli tlen kuali uan ma titetlaskamatilikaj, uan amo timosentlaliaj san ipan tlamantli tlen amo kuali yon san ipan tlen tojuantij techpano” (Tamara).

 Uelis tijchiuas ni: Xikinmachti ika tlen tijchiua. Mokoneuaj amo ouij kimatisej tetlaskamatisej tlaj kikakisej ta nochipa tikintlaskamatilia inijuantij uan nojkia sekinok.