Nopa tlakatl katli tlatominpiayaya uan Lázaro, tlen Jesús kiijtok ipan se tlapoualistli san kiixnextia se tlamantli (Lucas 16:19-31). Ni tlakamej kiixnextijkej ome pamitl tlen maseualmej: 1) nopa tlayakananij judíos katli tlauel moueyimatiyayaj uan 2) maseualmej katli amo moueyimatiyayaj uan kiselijkej tlen Jesús tlamachtiyaya.

Ipan ni tlamachtili tijnankilisej ni tlajtlanili:

•  ¿Tlake kiijtok Jesús tlen nopa tlakatl katli tlatominpiayaya uan Lázaro?

•  ¿Nelnelia panok?

•  ¿Kinextia ni tlapoualistli nelia kintlaijiyouiltiaj maseualmej ipan tlitl?

•  ¿Tlake kiijtosneki ni tlapoualistli?

 Ipan Lucas capítulo 16, Jesús kiijtok ni omej tlakamej mopatlak kej itstoyaj.

 ¿Tlake kiijtoua ni tlapoualistli? Kamanalti tlen se tlakatl katli tlatominpiayaya uan tlapijpiayaya. Uan ikalteno kikauayayaj se tlakatl teikneltsi katli motokaxtiyaya Lázaro uan kikuayaya tlen kimajkauayaya nopa tlakatl katli tlatominpiayaya. Kema Lázaro mijki, iluikaeuanij kiuikakej kampa itstoya Abraham. Teipa nopa tlakatl katli tlatominpiayaya nojkia mijki uan kitlalpachojkej. Nopa tlapoualistli kiijtoua maske ya miktoyaj, kejuak nojua itstoyaj ni omej tlakamej. Nopa tlitl kitlaijiyouiltiyaya nopa tlakatl katli tlatominpiayaya, yeka kiiljuik Abraham ma kititlani Lázaro ma kixoloni imakpil uan kiampa kiseseliskia inenepil. Abraham kiiljuik amo ueliskia kipaleuis pampa mopatlatoya kej itstoyaj uan eltoya kejuak se ueyi ostotl tlen axaka ueliskia kiixkotonas.

 Amo, san eli se neskayotl tlen Jesús kitekiuik pampa kinekiyaya techmachtis se tlamantli. Se keskij ixtlamatinij nojkia kiijtouaj amo nelia panok. Se neskayotl, ipan nopa Biblia tlen Lutero kikixtik ipan 1912, kiijtoua nopa tlapoualistli eli san se neskayotl, uan ipan Biblia de Jerusalén, tlen kitekiuiaj católicos, ipan se nota nojkia kiijtoua eli san se neskayotl, se tlapoualistli tlen amo monamiki ika sekinok tlamachtili pampa amo nelia panok.

 ¿Kinekiyaya tlamachtis Jesús nojua itstokej katli miktokej? ¿Kinejki kiijtos sekij maseualmej kintlaijiyouiltiaj ipan tlitl o Abraham uan Lázaro itstoyaj iluikak? Amo, ma tikitakaj kenke kiampa tikijtouaj.

 Se neskayotl:

•   Tlaj nopa tlakatl katli tlatominpiayaya nelia itstoskia kampa kintlaijiyouiltiaj ipan tlitl, ¿amo ixpoliuiskia nopa atl tlen Lázaro kipixtoya ipan imakpil?

•   Uan maske amo ixpoliuiskia nopa atl, ¿nelnelia kipaleuiskia nopa tlakatl katli tlatominpiayaya ayokmo ma tlaijiyoui ipan nopa tlitl?

•   ¿Kenijkatsa ueltoskia Abraham itstos iluikak tlaj Jesús kiijtok ayamo aka tlejkotoya iluikak? (Juan 3:13).

 Amo. Maske ni tlapoualistli amo nelia panok, sekij kiijtouaj kiixnextia katli kualmej yauij iluikak uan katli amo kualmej kintlaijiyouiltiaj ipan tlitl. a

 ¿Nelia tlen kiijtouaj? Amo.

 Biblia amo tlamachtia katli amo kualmej kintlaijiyouiltiaj ipan tlitl, nopaya kiijtoua tlake kinpano katli miktokej. Se neskayotl, ipan Biblia amo kiijtoua maseualmej katli kualmej itstokej ika pakilistli ipan iluikak uan katli amo kualmej kintlaijiyouiltiaj ipan tlitl. Nopaya kiijtoua: “Tlen yoltokej kimatij para se tonali mikisej. Pero tlen miktokej ayok tleno kimatij” (Eclesiastés 9:5).

 Ni tlapoualistli kinextia mopatlaskia kej itstoyaj nopa ome pamitl maseualmej.

 Nopa tlakatl katli tlatominpiayaya kinixnextik nopa tlayakananij judíos katli “tlauel kinejkej moricojchiuasej” (Lucas 16:14). Maske kikakiyayaj tlen Jesús tlamachtiyaya, amo kiseliyayaj. Uan inijuantij amo kinpatiitayayaj sekinok maseualmej (Juan 7:49).

 Lázaro kinixnextik nopa maseualmej katli kiselijkej tlen Jesús tlamachtik. Yeka, nopa tlayakananij judíos kinkualankaitayayaj nopa maseualmej.

 Mopatlak kej itstoyaj ni ome pamitl maseualmej.

•   Nopa tlayakananij judíos moiljuiyayaj toTeotsij kiseliyaya kej kiueyichiuayayaj, amo kimatiyayaj kejuak miktoyaj iixpa toTeotsij, pampa amo kiselijkej tlen Jesús tlamachtik. Yeka, toTeotsij ayokmo kinselik inijuantij yon kej kiueyichiuayayaj. Uan nopa tlamachtili tlen Jesús uan itokilijkauaj kimoyauayayaj tlauel kintlaijiyouiltiyaya (Mateo 23:29, 30; Hechos 5:29-33).

•   Maske nopa tlayakananij judíos amo kinmokuitlauiyayaj uan kintlauelkajtoyaj miakej maseualmej, nama nopa maseualmej ueliskiaj kinechkauisej toTeotsij. Miakej kiselijkej nopa tlamachtili tlen Jesús tlamachtiyaya uan nopa tlauel kinpaleuik, pampa kiampa toTeotsij ueliskia nochipa kuali kinitas (Juan 17:3).